ȌỒ بستان الفراشات ❀ تعلم الخياطة ① الباترونات ỐŐ

[mimi_belle]

راني حملت كتاب Le_modélisme_de_mode_vol 1 t.pdf لنصحتي به الاخت و راني نقرى فيه فهمت بزاف حوايج ما كنتش فاهمتهم و عرفت النقائص تاوعي فالعادة انا راسي خفيف بصح مع هاد الباترون تودرت شوية ههه الف شكر و الف عرفان بالجميل جعلك الله من اهل الجنه و اياك اميييييييين

[وفاء الياسمين]

كنت راح نعاود نشرحلك النقطة الي قلتي عليها

وفرحت كي لقيتك قلتيلي فهمت

على كل حال نعاود نشرحلك ومش شرط المشكل فيك ممكن أنا منعرفش نفهم و معرفتش نوصل الفكرة مليح


شوفي باش نرسمو خط اليد و خط الكارور

أولا تحسبي ارتفاع الظهر من ارقبة إلى الحزام
ثم تقسمي القيمة الي لقيتيها على إثنان و تزيديلها واحد

يعني مثلا لو لو لقيتي 44
44/ 2 = 22 +1= 23
يعني خط اليد راح تلقايه بهذ الطريقة

وباش ترسم اليد لازم تسحقي نقطة أخرى وهي خط الكارور

انت كنت لقيتي عمق ارقبة الخلفي و هذا وين حسبنا حط اليد يعني عندك كل القيم الي تحتاجيها

واش تديري

ارتفاع الظهر تنقصيلو عمق الرقبة و القيمة الي لقيناها تاع خط اليد

مثلا

44 - 2,38 - 23 = 18,62

لكن باش نرسمو خط الكارور نقسم هذ القيمة على ثلاثة ونزيدلها واحد

18,62/3 + 1 = 7,2

وترسمي خط الكارور ابتداءا من خط اليد يعني من خط اليد تحسبي 7,2


نتمنى افهمتيني

[mimi_belle]

شكرا حبيبتي لكن مشكلتي لم تكن في الخطوط لي ذكرتيها فهمت كل شي من الخطرة الاولى انا مشكلتي كانت في القيمة تاع لا كارورامام و خلف بصح درك نحاول نصلحه ونرسلك

[وفاء الياسمين]

شوفي انت احكمي المتر الي تقيسي بيه و حطي بدايتو عند الإبط و حتى مايقابله عند الابط الآخر
بصح ماشي تدخلي كامل المتر يعني من فوق منين يبدا الإبط و شوفي شحال يجيك
ثم اقسميه على اثنان

عاودي شوفي الرسومات الي حطيتها في الصفحة الأولى تلقاي كيفاش يقيسوها


بالتوفيق و أي سؤال ماتتردديش اسألي

[mimi_belle]

راني خدمت باترون اليد و اخييييييييييييييرا شوفيه و قوليلي يلا نطبقه على الكتان و بغيت نسقسيك بالنسبة لزيادة تاع الخياطة ند ير حوالي 1،5 او 2سم مع ثني القماش milieu dos et mileu devant و بالنسبة للكم اظن انه لا يتم ثني القماش و شكرا

[وفاء الياسمين]

أهلا ميمي يبان مليح نقولك حاجة برك قبل ما تديريه على القماش

أحكمي كاش حاجة من حوايجك عندها يديها يجوك قد قد و قيسي عرض اليد و شوفي عرض الباترون اذا قراب لبعضاهم باش ما يجيكش صغير

وراك تشوفي هذاك المستقيم الي راكي راسماتو لعرض اليد الي فوقه دائرة اليد شوفيه اذا اكثر من قيس محيط اليد في الأعلى
يعني قيسي عرض يدك من الاعلى و قارنيه لازم يكون قدو أو أكثر منه


و نعم واش قلتي صحيح بالنسبة للسؤال الثاني

ربي يوفقك حنونة

[mimi_belle]

الف شكر و تقدير على مجهوداتك القيمة راني نحاول و نردلك

[nadia1975]

مأجورة ان شــــــــــــا ء الله وهي صدقة جارية

[وفاء الياسمين]

بارك الله فيكم

[mimi_belle]

ما خرجليش كامل........ راسي ما بغاش يدخل ،كل مرة نحاول و غي كيف كيف غادي نشوف كاش خياطة بالاك نلقى الوقت و نتعلم عندها؛ التعلم عن بعد جاني صعيب نظريا فهمت كل شي لكن تطبيقيا ما عرفتش نطبق على كل حال الف الف شكر على افتتاحك للدورة وشكرا على مجهوداتك لي عمري ما راح ننساها و جعلها الله في ميزان حسناتك ان شاء الله لكن غادي نكون دائما معاكم في المنتدى ما نجمش نصبر عليكم ههه راني حاسة بلي درت صحبة جديدة و هاد الصحبة عن جد طيبة و راح نكون دايما متتبعة لمجلتك الرائعة و نتمنالها صدى كبير ان شاء الله التمست فيكم الصدق و الله حبيبتي وفاء فيك و في الكثير ومن العضوات بارك الله فيهن. دمتي في رعايت الله و حفظه
سلام

[وفاء الياسمين]

أهلا أختي تمنيت لو قدرت نعاونك أكثر من هكذا لكن اي شيء تحتاجيه قوليلي سأظل في الخدمة بإذن الله

[mimi_belle]

لا عليك حبيبتي كل شي بالمكتوب