بنات العز يروحو للدز

*سندوسة* · 2017-05-10, 12:03

يقولوا ناس زمان
بنات العز روحو للدز وبنات الدز يروحو للعز

تقولوا مكتوب ربي سبحانه وهدا الكلام مكانش منه
لكن فالمجتمع وفالحياة الزوجية خاصة تخلينا نطرحوا عدة تساؤلاات

علاه بنات الفاميليا يتمرمدو مع رجال؟ قصدي ازواجهم

علاه راجل كي يعيش تجربة زواج فاشلة ينتقم من زوجته الجديدة بالرغم انها نعمة زوجة بإعتراف منه ومن اهله؟

علاه الزوج مايعرفش قيمة زوجته حتى بعد مايخسرها كي لا نقول يفقدها؟

علاه الزوج يضغط على الزوجة وخصوصا انها بنت فاميليا والكل يشهد بأخلاقها وحتى هو؟

علاه يوصل الرجل يعيش فتحديات وصراعات بمجرد انه عنده لكلمة ومالازمش طيح يعني تسقط واحيانا حتى على حساب سعادته؟

موضوع للنقاش

النجمة القطبية · 2017-05-10, 21:18

اولا يا اختي سندوسة الفتاة لا يجب ان تتسرع في الزواج وتعطي نفسها فرصة للاستفسار عن الرجل ومعرفته قبل الزواج
انا مثلا ضد الخطوبة القصيرة او السريعة لكن المرات الواحد يخاف ينصح الناس يقولوا محبلناش الخير لان البعض يشوف ظاهر الزوج فقط ويعتبر الزواج طوق نجاة لكن الحقيقة ليست كدلك
المراة المفروض تكون غير متسرعة وتفكر مرارا وتكرارا اكثر من الرجل نفسه ومتتزوجش بشخص هي غير مقتنعة بيه
ثانيا بالنسبة للرجل المطلق صاحب التجربة السابقة المجازفة تكون اكبر لاسباب لن اعددها الان لان شخصية وسيكلوجية الرجل تختلف عن المراة عموما
وكل رجل مطلق راح يقولك مرتي السابقة ماشي مليحة ولن نعمم
وفي النهاية تبقى قضية المكتوب والقضاء والقدر
واديد ربي اللي يرزق مرة يرزق مرات
بالمناسبة انا ضد المثل اعلاه لان التوفيق من الله سبحانه وتعالى
كاين مثل اخر سمعته من العجائز يقولك زهر الشابة في الحمى وزهر المزعوقة في السما او شئ كهدا
بالتوفيق اختى سندوسة افتقدنا مواضيعك في المنتدى وان شاء الله ربي يكثر افراحك ويحلي ايامك وتجي تقوليلنا المثل مكانش منوا

ام هدول · 2017-05-10, 21:24

اهلين سندوسة من لي قريت ردك في الكوزينة وانت في بالي ...وبقيت نفكر فيك ....حبيتي الزواج مصير ...يعني تربطي حياتك بشخص ...ووتنوي تتتتبدل حياتك كامل وتبني حياة اخرى مع شخص اخترتيه ...وتحملي معاه الحلوة والمرة ..والزواج ليس فقط فستان ابيض وحنة وهدايا ..و......هو كدللك مسؤولية ...وضغط ..وتحدي كبير ....للاستمررا ....وليس كل ما يتمناه المرء يدركه .....والحياة الزوجية تعلمك حوايج بزااف .....خليك قوية ...وايمانك كبير ..وطلبي ربي يكتبلك الخير ...نتمنالك التوفيق ....من كل قلبي

*سندوسة* · 2017-05-11, 10:20

اقتباس:

المشاركة الأصلية كتبت بواسطة النجمة القطبية

اولا يا اختي سندوسة الفتاة لا يجب ان تتسرع في الزواج وتعطي نفسها فرصة للاستفسار عن الرجل ومعرفته قبل الزواج
انا مثلا ضد الخطوبة القصيرة او السريعة لكن المرات الواحد يخاف ينصح الناس يقولوا محبلناش الخير لان البعض يشوف ظاهر الزوج فقط ويعتبر الزواج طوق نجاة لكن الحقيقة ليست كدلك
المراة المفروض تكون غير متسرعة وتفكر مرارا وتكرارا اكثر من الرجل نفسه ومتتزوجش بشخص هي غير مقتنعة بيه
ثانيا بالنسبة للرجل المطلق صاحب التجربة السابقة المجازفة تكون اكبر لاسباب لن اعددها الان لان شخصية وسيكلوجية الرجل تختلف عن المراة عموما
وكل رجل مطلق راح يقولك مرتي السابقة ماشي مليحة ولن نعمم
وفي النهاية تبقى قضية المكتوب والقضاء والقدر
واديد ربي اللي يرزق مرة يرزق مرات
بالمناسبة انا ضد المثل اعلاه لان التوفيق من الله سبحانه وتعالى
كاين مثل اخر سمعته من العجائز يقولك زهر الشابة في الحمى وزهر المزعوقة في السما او شئ كهدا
بالتوفيق اختى سندوسة افتقدنا مواضيعك في المنتدى وان شاء الله ربي يكثر افراحك ويحلي ايامك وتجي تقوليلنا المثل مكانش منوا

حنا قلنا هدا مجتمع معيق وماعندناش ثقة في كلام ناس اصلا هاد الانسان لي يعرفوه الكل يشهله بالخير لكن فالبيت انسان اخر
الحمد لله كنا مقتنعين بالرغم من صغر المدة يعني لواحد كي يقولك نخاف ربي هنا لازم العشرة باش تتأكدي منه
والله العظيم مهري كان مصف والخاتم والهدايا هو جابهم انا ماطلبت منه والو وحتى موكب العرس قلتله حابة عرسي يكون مميز واني نركب معاه بفستان الفرح في سيارته البسيطة بالرغم من اني من عائلة مستواها المادي جيد والحمد لله لكن عمري ماحسسته بهاد الامر
كاين لي يقدر واش دير معاه لمرا وكاين لي لا
انا شفت نسا يطلبو مهر غالي ودهي واعراس فافخم صالات وراجل قابل وانا سهلت عليه كلش وفالاخير هادي هي النتيجة

شكرا اختي بارك الله فيك وفرحني ردك

*سندوسة* · 2017-05-11, 10:34

اقتباس:

المشاركة الأصلية كتبت بواسطة ام هدول

اهلين سندوسة من لي قريت ردك في الكوزينة وانت في بالي ...وبقيت نفكر فيك ....حبيتي الزواج مصير ...يعني تربطي حياتك بشخص ...ووتنوي تتتتبدل حياتك كامل وتبني حياة اخرى مع شخص اخترتيه ...وتحملي معاه الحلوة والمرة ..والزواج ليس فقط فستان ابيض وحنة وهدايا ..و......هو كدللك مسؤولية ...وضغط ..وتحدي كبير ....للاستمررا ....وليس كل ما يتمناه المرء يدركه .....والحياة الزوجية تعلمك حوايج بزااف .....خليك قوية ...وايمانك كبير ..وطلبي ربي يكتبلك الخير ...نتمنالك التوفيق ....من كل قلبي

اهلا اختي الغالية ان شاء الله الاحوال بخير
قلتي نتحمل معاه لحلوة والمرة كاين امور لي حدود كي يقولك ونتي عروسة زوجتي ادا كانش نهار جبتلك عروسة جديدة اتقبليها على خاطر عيوني
يمنع عليك الحفافة والحمام ومكياج ويفرض عليك لباس الواسع جدا والالوان الغامقة ويتحكم فكل صغيرة وكبيرة فالبيت ماليش حق التصرف وهو مايغضش البصر
وهو متأكد من اخلاقي الحمد لله وحتى عايلته هنا يصبح ضغط وهدا ضغط يولد الانفجار
واخر مشكلة لي وصل بينا الحال هاكا اني مانتصلش بيه لما يكون فالخارج وانا بعيدة على اهلي قريب 1000 كلم مانروح لناس مايدخلو عليا ناس وبلا امور الاخرى التي لا داعي لدكرهاا
وكيما قلتي زواج ماهوش هدايا وووو انا نقولك حاجة اني في ظرف شهر تعلمت طبخات نتاعهم وهدايا ولا مرة جابلي هدية يقول كاين غير زوج اعياد هاكدا وقلنا ماعليش ومرانيش انسانة متطلبة عمري ماديت من عنده مصروف

شكرا لك حبيبتي الغالية وبارك الله فيك

kacimo.samy · 2017-05-11, 12:19

اختي حتى حنا الرجال نطيحو ففي نسا يهبلونناا

نتي خيري راجل قد كلمتو يخاف ربي بافعال غير اقوال
افعال صح و ذكورة راهم بزاف

هذا ما يستهالكش و ربي شافلك خير اتفقنا
وكاين لي خير عليه
ليت القلوب على اشكالها تقع

*سندوسة* · 2017-05-11, 13:13

اقتباس:

المشاركة الأصلية كتبت بواسطة kacimo.samy

اختي حتى حنا الرجال نطيحو ففي نسا يهبلونناا

نتي خيري راجل قد كلمتو يخاف ربي بافعال غير اقوال
افعال صح و ذكورة راهم بزاف

هذا ما يستهالكش و ربي شافلك خير اتفقنا
وكاين لي خير عليه
ليت القلوب على اشكالها تقع

في هاد الدنيا مكانش قاع احتياطات وحسابات مع القدر والمكتوب
المهم ربي يجيب لخير
شكرا لك وبارك الله فيك وربي يرزقك بزوجة صالحة لي تهناو مع بعض وتفرحو

النجمة القطبية · 2017-05-11, 13:27

اقتباس:

المشاركة الأصلية كتبت بواسطة *سندوسة*

حنا قلنا هدا مجتمع معيق وماعندناش ثقة في كلام ناس اصلا هاد الانسان لي يعرفوه الكل يشهله بالخير لكن فالبيت انسان اخر
الحمد لله كنا مقتنعين بالرغم من صغر المدة يعني لواحد كي يقولك نخاف ربي هنا لازم العشرة باش تتأكدي منه
والله العظيم مهري كان مصف والخاتم والهدايا هو جابهم انا ماطلبت منه والو وحتى موكب العرس قلتله حابة عرسي يكون مميز واني نركب معاه بفستان الفرح في سيارته البسيطة بالرغم من اني من عائلة مستواها المادي جيد والحمد لله لكن عمري ماحسسته بهاد الامر
كاين لي يقدر واش دير معاه لمرا وكاين لي لا
انا شفت نسا يطلبو مهر غالي ودهي واعراس فافخم صالات وراجل قابل وانا سهلت عليه كلش وفالاخير هادي هي النتيجة

شكرا اختي بارك الله فيك وفرحني ردك

انا يا اختي سندوسة نعرفك في المنتدى الله يبارك عليك وماشي محتاجة تبرري الف واحد يتمناك اخلاق وادب
علابيها قتلك واحدة كيما انتي لازم تدي وقتها لانوا ماشي الناس كيما انتي كامل
وتاني قضية المهر مصحف انا ضدها مراناش في وقت الصحابة للاسف التنازل يكون بعد الزواج بعد ما تعرفي الرجل وليس قبله
تحتاج المراة لتعرف معادن الناس القضية ماشي قضية غنى وفقر انما اختبار لصبر الرجل وقدرته على تحمل المسؤولية ورغبته في الزواج
بالاك البعض يختلف معي في هدا الامر
وراح نقولك امر الرجل يحب يتعب متصدقيش كلام رجال المنتدى بالعكس الرجل الحقيقي ميحبش الساهل طبعا مرانيش مع اللي تشرط لكن ايضا ماشي مع اللي تتنازل
عموما حبيبتي كل هدا لا يهم انتى الان وكلي امرك لله واصبري اعطيه فرصة حبيبة حتى يحس بقيمتك
وربي يفرحك

ام كمال · 2017-05-11, 14:54

السلام عليكم
ختى كل ما قلته صح
لكن تجربتي من هدى الحياة لى يتنازل من يوم الاولى النتيجة تكون ظاهرة يعنى تبقي تتنازل الى يوم غير محدود
لى تتنازل على حقها وتسامح وتضحى وتصبر والله والله والله غير تبقي حياتها كلها كما هاك خاصة مع الزوج الغير المبالي خطرش يتعود غلى هدا الامر انا منيش نقول كامل الازواج لكن نقول الاغلبية ربي يهديهم
والوقت لى تحبي تفهمى ما تقدريش يكون فات القطار ما يفهمك حتى واحد وما يحس بمعناتك غير الله سبحانه
اما على العبد ينصحك اصبري وانت صبرتي ما فيه الكفاية وما يحس بالجمر غير لي كواتو

اقتباس:

المشاركة الأصلية كتبت بواسطة *سندوسة*

يقولوا ناس زمان
بنات العز روحو للدز وبنات الدز يروحو للعز

هدى ماقولة كاين منها

تقولوا مكتوب ربي سبحانه وهدا الكلام مكانش منه
لكن فالمجتمع وفالحياة الزوجية خاصة تخلينا نطرحوا عدة تساؤلاات

علاه بنات الفاميليا يتمرمدو مع رجال؟ قصدي ازواجهم

تعرفى علاه اختى خطرش من نهار الاولى الطاعة الزائد قايمة باهله كما يحب خاطره حتى تحس انها خادمة هيا تتحمل خطرش والدها رباوها على الحشمة والطاعة وخدمة لعباد لى يستهلو ولى ما يستهلوش وفيها امور بززززززززززززززززززززززاف

علاه راجل كي يعيش تجربة زواج فاشلة ينتقم من زوجته الجديدة بالرغم انها نعمة زوجة بإعتراف منه ومن اهله؟

تعرفي علاش شخصته ضعيفة خطرش لو كان جا كل واحد ينتقم على حساب تحربته الفاشلة راه كارثة
ماشى كاع االاصابع كيفكيف وحديث قياس

علاه الزوج مايعرفش قيمة زوجته حتى بعد مايخسرها كي لا نقول يفقدها؟

هدى هيا اختى اي انسان ما يعطيش قيمة لانسان حتى يفقده لكن بعد فوات الاوان

علاه الزوج يضغط على الزوجة وخصوصا انها بنت فاميليا والكل يشهد بأخلاقها وحتى هو؟

يخاف تعرفي علاش كما قالتى ديجا راه خارج من زواج فاشل يقول فى هدى نبين شخص ويضغط ويضغط والزوجة الثانية تخلص فاطورة تاع الاولى بصح هنا راه يدمر فى روحه ما عاشة وتهني مع الاولى وراه يدمر فى الثانية دايما هم الخاصر ربي يهديه

علاه يوصل الرجل يعيش فتحديات وصراعات بمجرد انه عنده لكلمة ومالازمش طيح يعني تسقط واحيانا حتى على حساب سعادته؟

قتلك هدا النوع من الرجال يدمرو فى حياتهم الزوجية بلا ما يشعرون ونساو انا الزوجة بكلمة واحدة ترض وتسمع وطيع بلا عنف
موضوع للنقاش

first first · 2017-05-11, 15:13

والله يااختي سندوسة مكاتيب
والدنيا واش صاير فيها؟؟؟كاين كلش
بنات العزيروحو للدر
وبنات العز يروحو للعز
وبنات الدز يزيدو يروحو للدز
وبنات الدز يروحو للعز

ماتفتحيش باب للشيطان لانها اقدار

ربما لنا جزء او دور بسيط(او كبير ) في رسم هته الاقدار ولكن للتخفيف عن النفس حتى اخطاؤنا اقدار
المهم في الحكاية مادرتيش حرام او منكر .....................وشدة وتزول لعل الايام القادمة تجبر بخاطرك

وكيما يقولو هذه الدنيا يوم لك ويوم عليك غير الجنة لي مكانش فيها الميزيرية والتعب

تفرج باذن الله.

محمد جديدي التبسي · 2017-05-11, 15:16

كل ما يحدث للانسان من خير وشر هو من قضاء الله وقدره يعني مكتوب
لكن لا ينبغي ان نعلق أخطائنا وفشلنا على المكتوب
بل لابد من محاسبة النفس اولا والحرص على عدم تكرار الأخطاء داتها كل مرة
في الحياة الزوجية الأمر أخطر لأن حياتنا ترتبط بطرف آخر
ما يهم في هذه الحياة هو ان تكون النية صافية وكل طرف يسعى للعطاء أكثر من الأخذ والا فان المعاناة ستكون مضاعفة ولن يعيش المرء متعة الحلال كما ينبغي
أما الفروق المادية بين الزوجين فليست مشكلة ان كان كل طرف يؤدي دوره و راضي ومقتنع ويفهم معنى الزواج.
بالعودة لموضوعك مجتمعنا تعود على ان التضحية تكون من المرأة أكثر لذلك دائما تُنصح بالصبر لانها المتضررة الأكبر من الانفصال مما جعل الرجل يستغل هذه النظرة المغلوطة للمجتمع ويظلم ويقصر في حق زوجته للاسف!
قضية مساعدتك لزوجك وتيسير مهرك هذا الامر تفعلينه بنية صادقة لله اولا وليس من اجل الرجل فقط
صحيح هناك من ينكر هذا الجميل ويعتبر من تساعده ميته ع الزواج ووو
لكن هذا لا ينفي ان هناك رجال يقدرون ذلك ويعلمون علم اليقين ان المرأة التي تغالي في مهرها غير صالحة للزواج وفارغة من الداخل تهتم للمظاهر فقط وغدا لو افتقر زوجها او احتاج ستخلعه مباشرة... وما اكثرهن في مجتمعنا تبيع نفسها بعرض من الدنيا.
ربي يصلح الاحوال.

سَامِيَة · 2017-05-11, 19:31

ياك يقولو الزواج كيما الدلاعة كل واحد وزهرو فيها...هي كاين هاك وكاين هاك وهاذ الدنيا فيها السعداء وفيها البؤساء واذا كان كل واحد منا يتمنى ان يعيش سعيد وحياتو كاملة من كل جهة من سيعيش إذا في الحالة الأخرى...ربي رحيم بعبادو ونشاله كلما يحرم واحد من حاجة يعوضو بحاجة أخرى

kacimo.samy · 2017-05-11, 21:11

اقتباس:

المشاركة الأصلية كتبت بواسطة فتاة عادية

ياك يقولو الزواج كيما الدلاعة كل واحد وزهرو فيها...هي كاين هاك وكاين هاك وهاذ الدنيا فيها السعداء وفيها البؤساء واذا كان كل واحد منا يتمنى ان يعيش سعيد وحياتو كاملة من كل جهة من سيعيش إذا في الحالة الأخرى...ربي رحيم بعبادو ونشاله كلما يحرم واحد من حاجة يعوضو بحاجة أخرى

اول مرة نسمعها هههه

قرويجة · 2017-05-11, 21:37

السلام عليكم ورحمة الله وبركاته اختي أنا أوافقك الرأي في هذا المثل الشعبي و ازيدكي علما هذه عدالة إلاهية فبنت العز تذهب للدز كما يقول المثل لتجرب الشقاء و بنت الدز تذهب للعز لكي تترتاح و تللك الأيام نداولها بين الناس

ع.عيسى · 2017-05-11, 22:29

لان بنات العز يشرطوا العز و يحوسوا على المادة ، يجيهم بن الفاميليا يقولولوا روح العب بعيد.