قوارب السلق والجبن

[إلهام07]

البسملة1

قوارب السلق بالجبن


حبيباتي هذي الوصفة خفيفة ولذيذة ومناسبة جدا لشهر رمضان كمرافق للشوربة او الحساء على سبيل التنويع .
بصراحة حطيت الوصفة من قبل في الفاااايس بوك وماتصورتش تلقى هذا الشعبية والإعجاب لذا حبيت نشارككم بيها لأنو دائما نحب نشارككم الوصفات اللذيذة والمضمونة .

1- نبدى بتحضير العجينة : نضع في صحن عميق كاس واحد فرينة ( الفرينة غربلوها قبل الاستعمال دائما) + علبة ياوورت طبيعي ( خرجو العلبة من الثلاجة مسبقا باش الياوورت يدفى ) + بنفس العلبة نتاع الياوورت نكيل بيها 1 علبة حليب دافيئ واللي ماعندهاش تضيف ماء دافيء لكن يفضل حليب + 1 م ك سكر + قرصة خميرة كيميائية + 1 ملعقة كبيرة خميرة الخبز فقط لاغير ونحرك بالمضرب اليدوي لنحصل على عجينة سائلة مثل الصورة….. نغطي الصحن ونخليه في مكان دافيء حتى تشوفو العجينة تخمرت وتضاعف حجمها مليح لازم تخليوها تخمر مليح حتان يتعمر الصحن لهذا قلتلكم استعملو صحن عميق هذي هي الخمرة نتاع العجينة وسر النجاح لازم العجينة تخمر مليح

2- في هذا الوقت نروح نحضر الحشو :في مقلاة وعلى نار متوسطة نحط 2 ملاعق كبار معمرين مليح زبدة ونضيف السلق المقطع أخضر ( مانفوروش كي نقليه يجي ألذ ) ونبقى نحرك فيه كل شوية رايح يطلق الماء نتاعو ويذبل وينقص في الحجم نضيفلو شوية ملح وثوم ونبقى نقلي حتى ينشف

في نفس الوقت وفي مقلاة أخرى نقلي البصلة المقطعة في 2 مغارف زيت ونذبلوها مليح بدون ملح..كي تذبل مليح وتلقاوها بدات تتحمر نضيف اللحم المفروم والثوم ونحرك حتان يتحول لون اللحم المفروم من الأحمر إلى البني نضيف الملح والتوابل ( فلفل اسود وكمون وفلفل احمر وثوم بودرة نكثر شوية توابل لانها توابل للحم ولخليط السلق معا ) نقلي شوية ونطفي .

لما ينشف السلق من الماء نضيفلو خليط اللحم والبصل ونخلط ونذوق الملح إذا ناقص نزيد شوية ومانكثرش الملح لأنو رايحين نزيدو من بعد الجبن.

3- الآن نرجع للعجينة نلقاها خمرت نضيف الكاس نتاع الفرينة الثاني والملح والاعشاب العطرية مرحية ونلم العجينة بالملعقة ثم نكمل بيدي نعجنها مليح في الصحن لأنها تلصق في اليدين .

الآن نضيف ملعقتي زيت الزيتون كل مرة نضيف بالوحدة نعجن ونضيف الثانية ونعجن ونخليها في الصحن تريح شوية ( 10د ) باش كي نجي نشكلها ماتعبنيش .

4- الآن نرجع للعجينة نلقاها تنفخت ..…نرش سطح العمل بشوية فرينة نحط العجينة وباستعمال قطاعة العجين نقسمها إلى 10 كريات متساوية.

5- نأتي الآن لتشكيل القوارب : نرش فرينة لأنو العجينة تلصق و نأخذ قطعة عجين ونطرحها على شكل بيضوي ونحط الجبن على الحواف ونلف عليه العجين ونغلق مليح ونزيد نصف لفة باش مايخرجش الجبن ونغلق الحافتين مليح باش تاخذ شكل القارب ونحطها في صينية مدهونة بالزبدة والاحسن نستعمل صينية البيتزا للطهي.

6- نوزع كمية من الحشو في وسط كل قارب ونزيد نوزع قطع جبن صغار ( أنا استعملت كامومبار + جبن طري للطلي ).

7- نسخن الفرن على 180° وندخل القوارب للفرن في الرف الوسطاني حتى تتحمر من تحت ( تحتاج فقط حوالي 10د )

8- كي تتحمر من تحت نزل الصينية للرف السفلي ونشعل من فوق باش تتحمر ايضا ماطولش ونخرجها مباشرة نحيها من الصينية .

9- نحطها في صحن التقديم ونزينها بالجبن المبشور ونرش القليل من البقدونس لإعطاءها لونا جميلا.


أترككم مع الصور ..... صدقوني مش رايحين تندمو كي جربوها : :




















* ملاحظة : ممكن طبعا تدهنو الحواف بالبيض وترشوه جلجلان لكن انا حبيت نحافظ على ريحة زيت الزيتون والاعشاب في الوصفة
* زيت الزيتون ضروري جدا جدا هنا في الوصفة وريحتو غير مزعجة تماما .
* فكرة الثوم بودرة في العجينة شفتها عند ام سهام وعجبتني سرقتهالها هههههههههههههههه
* الخليط ممكن ضيفولو ايضا شوية كرام فراش لكن عموما كيما راهو يبان ماهوش ناشف .



تحياتي .............. لهومة اللهلوبة

["أم بلقيس"]

لى الشرف نكون من اول القرعجين
يعطيك الصحة
كي العادة متالقة و مميزة
كور و ديكور
انشاء الله نجربهم و نردلك بالخبر
صحى فطورك

[أم فاطيمة]

امممممممممممممممم لهلوبة يعطيك الصحة يا ام المعجنات هههه

[*رفيقة الدرب*]

يا سلام تبان هايلة
شهيتيني يعطيك ألف صحة و صح فطورك
ما تحرميناش من السرقة تاعك

[saja hamed]

اممممممممممممممممممم وامممممممم يعطيك الصحة وهذي ماهيش حاجة جديدة عليك لانك فنانة بمعني الكلمة

[روضة 88]

تسلم ايدك يا الهام

[fadila34]

ربي سحفظك ويخليك ويخليك دائما متالقة كل حاجة من يديك ررررررررررررروعة طبقت عجينت بريزى تاع الزيت وبطاطا شورما وشحال من حاجة وخرجو 44444444444 والله غير توحشناك ما دزدياش طولي علينا لاشتا ادخلي واخرجي ممممممموح عليك

[وردة سطيف]

هايلة هايلة هاية
غدوة ان شاء الله نجربها ونحطلك تطبيقي
يعطيك الصحة

[فرح العمر]

دائما متميزة سواء في الوصفات او في طريقة الطرح ربي يبارك فيك

[ارزاق]

يعطيك الصحة الهام الوصفة راح تعجب اولادي لانهم يموتو علي السلق والعجينة تبان رووووعة نقدر ندير بيها خبز الهمبرغر ؟

[ام سهام 02]

ماشاء الله عليك الهام وصفاتك راقية وبريزونتابل تحمر الوجه ربي يفرحك و يعطيك على حساب نيتك الطيبة حبيبتي

[أم ماجد]

الله الله عليك يا لهلوبة
ربي يفرحك ويبعد عليك عيون الحساد

[أم أيوب 11]

الله يعطيك الصحة العجينة راهي تبان خفيفة دمت متألقة

[إلهام07]

مشكورات حبيباتي على المرور أكيد مانغيبش راني ديما نطل عليكم نقرعج هههههههههههههه

المشاركة الأصلية كتبت بواسطة ارزاق

يعطيك الصحة الهام الوصفة راح تعجب اولادي لانهم يموتو علي السلق والعجينة تبان رووووعة نقدر ندير بيها خبز الهمبرغر ؟

أختي ارزاق هذي العجينة تصلح كلش بيتزا معجنات بانواعها وندير بيها ثاني الافخاذ الكاذبة جي هايلة
فقط الهامبرغر كيما على بالك صغري الكريات قد ماقدرتي وكي تحطيهم في الصينية ماتخليهمش شكل كرة هبطيهم كلي تقرصي فيهم من بعد كي يخمرو يبومبيو مايجيوش معجنين وزيد خمريهم مليح قبل مادخليهم للفرن

[ام هاديل وياسين]

يعطيك الصحة اختي هايييلة