هل اتطلق

[مشكلتي]

السلام عليكم ورحمة الله وبركاته

قصدتكم بعد الله اخواتي واخواني في الله انا مشكلتي مع زوجي متزوجة منه منذ ست سنوات ولي معه ثلاث اطفال زوجي منذ زواجنا وهو يفضل امه واخواته عني يجيب كل رغباتهم حتى اذا حرضوه عني لا يفكر ابدا يأتي ويضربني ويسبني بأبشع الشتائم فقط لترضى عنه امه المشكلة انه يرى كل شيئ بعينه ثم يصدق ماتقوله هي لا مايراه ومؤخرا اكتشفت خيانته لي عبر الهاتف تعبت نفسيا هو طوال النهار خارج البيت ليرضي رغباته وانا المسؤولة عن كل امور البيت اصبحت جدا عصبية مع اطفالي مشاكلي مع اهله ومشاكلي معه ....فكرت في الطلاق لكن اهلي يرفضون الطلاق بحجة كلام الناس وامي قالت لي بالحرف الواحد اذا تطلقتي لا تأتيني بأطفاله لأن زوجي سب امي وشتمها في الكثير من المرات .....اعيش جحيم ضرب وسب وشتم لي ولأهلي كل هذا ليرضي اهله ....تعبت والمشكلة اني اصبحت أفرغ كل مكبوتاتي على اطفالي المساكين دون ان اشعر وضميري يقتلني لأجلهم لا أب حنون يحتويهم ولا ام تحن عليهم
ارجوا منكم الدعاء والنصيحة رجاء واجركم على الله

[زبدة ذايبة]

ما حك جلدك مثل ظفرك.

عوض ما تتحولي لأداة هدم لأطفالك وأسرتك

حاولي تحلي مشكلتك بطريقة مختلفة.

خاولي من جيهة أهل زوجك.

و على مايبدو راهم (حاقرينك) على هذا راه يصرى فيك هكذا.

حاولي تقوي روحك أكثر*

وترفعي من قيمة نفسك

هذا اللي يجي يسبك ويسب أهلك ويضربك*

يعني ماعندك حتى قيمة عندو*

ولو كان تطلبي الطلاق فهذا يعني قدمتيلو يد المساعدة.

وتكوني هنيتيه من بزاف أمور.

لهذا أبدا ما تخليلوش الطريق يسرح ويمرح.

حاولي توقفي على رجليك.

وبطلي من دور الضحية لأنه هو سبب البلاء والمشاكل.

واكثري من الدعاء*

فما خاب من لجأ إلى الله.

[أم رقية نسرين]

أسأل الله العظيم ان يفرج كربك و يهدي زوجك
حاولي يا ختي متعامليش ابنائك بقسوة صدقيني راح يأثر فيهم بزاف بزاف وراح تحطميهم و نتي تكوني الخاسر دائما علابالي صعيبة عليك بصح جاهدي نفسك كي تكوني غضبانة روحي اتوضاي و اكثري الإستغفار
بالنسبة لزوجك معلاباليش واش نقولك بصح ممكن ينفع معاه الحوار في لحظة صفاء
واكثري الدعاء الدعاء وربي يفرج عليك

[ايمان4]

وضعك صعب نوعا ما و لسنا مخولين لتحريضك على الطلاق لاننا لسنا نحن من سنتحمل تبعاته يعني لست من ساصرف عليك و لا على اولادك ... سؤال هل عندك مؤهل علمي للعمل ؟ ليسانس ماستر ؟ هل لديك حرفة ؟ اذا لم تكن لك لا هاته و لا تلك ابدئي بتعلم حرفة الخياطة من النت او الطبخ اي شيء يخطر على البال المهم تعلمي من النت راه فيه لعجب علابالي صعيبة الوضع لي فيه و تزيدي لكن لا تياسي ...لانو حسبما قلتي كاين خيانة على الاقل تعرفي تصنعي حاجة ....بامكانك العمل و البيع عبر النت وسائد صغيرة فراش انيق او كروشيه ... هكذا منين تلهي روحك الضغط ينقص بزاااااف لانو مش النهار كامل و انت تخممي لانو هو راه يبدل الجو في العمل مع الاصدقاء مع الحبيبات لي يخون معاهم عليها ما يشيخ ما يضحك معاك انت تضلي بين اربع جدراان مع عائلته لي رانا عارفين العائلات الجزائرية مع الكنات الا من رحم ربك و زيد تعب الاطفال ا=نورمالون يجي هو يفوج عليك يهدر و يضحك معاك و يحكيلك على العالم برا كيفاش راه داير ... انت جربي واشتا نقلك تعيشي لاولادك الهاي فيهم قريهم علميهم و هو اقعدي عنده كي الحجرة ف الصباط ما يتهناش منكم بالساهل لكن احذري من الانجاب مرة اخرى في مثل هاته الروف لا تظلمي صغارا جدد ربي يحفظلك وليداتك و ينجحهملك هوما سلاحك مستقبلا ...
الله غالب مجنكعنت مزال بزاف متخلف في الصوالح هادو معدناش le savoir vivre نبغيو نحقرو الراجل باش بالقليل يعيش مع زوجته لا هو يغبنها و يقلك مشي مليحة لا يا رجل كونك زوج حنون و عطوف اخرجو مرة في 15 يوم لي جبل ا سيدي بلا مشوي غير بيض مغلي مع خبز و اضحك و العب مع زوجتك و اولادك رحلة كما هادي متنتساش و تقوي العلاقة ... للبحر غير من نهاركم كي يجي يلعب مع الاطفال و يراقب دراستهم يحسو بلي ابوهم قريب منهم و منها يتعرف على عقلية ابناءه عن كثب كي يحكيوله كيفاش يخمموا و يصححلهم لي يبانله انو غلطوا فيه ... يدي الذكور معاه الى المسجد يصليو المغرب و العشاء لانو هاذ الصلوات مشي في وقت الدراسة ... في العطل يدي ابناءه لحلقات تحفيظ القران و الله كاين امام وقت كنت صغيرة كنت نقرى الجامع في العطلة طان كل يوم يجيب ابناءه يحفظو بسيف عليهم و اليوم عنده ستة اولاد كلهم حفظة قران كلهم جامعيين كلهم بمناصب مرموقة و كانو غير الاوائل في الدراسة لكن كان يحبهم و مراقبهم وقته كان لابناءه ما جابهمش و ارماهم على الام لا تقاسمها معها و اليوم اولاده يحبوه يصرفوا عليه مالقري ميخصهش .... و يدعوله بالخير وو ناس جد محترمين ... الدنيا و الهنا غير ساهل غير لي ميبغيش

[أنا ستازيا]

وعليكم السلام ورحمة الله تعالى وبركاته

زواج دام ست سنوات و ثلاثة أطفال...يضربني ويسبني بأبشع الشتائم... خيانته عبر الهاتف ... سب امي وشتمها في كثير من المرات .........

كل هاذ الاحداث المتسلسة بسبب قلة الاحترام بيناتكم في زوج كي انتي كي هو .... من المفروض يكون بينك وبين أهلو لقدَر ما توصليهم ماتخليهم يوصلوك مايولّي هو منبعد يوصلك و يوصل ماماك وداركم الكل .... خاطر كي يروح لقدر يروح معاه كلشي ...

لوكان تفكري شوي بعقلك تلقاي بلي لوكان تستمري بهاذ الوضع راح تبقاي في كل الحالات والفرضيات انتي هي الخاسر الوحيد في هاذ المعركة التافهة...

هو مستحيل راح يتخلى على عايلتو وبالأخص أمو لي رباتو وتعبت عليه ولى يوقف ضدها في خاطر باه يراضيك انتي .... صدقيني مستحيل يدير هاذ الشي حتى وكنتي انتي لي صح وهاذي حاجة لازم تتقبليها رغما عنك...

قضية الضرب من كلامك حسيت بلي انتي من النوع لي كي يغلطو فيه الناس تشعلي فيه بالعياط و ربما ماتفيقيش مع روحك هداك الوقت وتولي تعيطي وتهدري اي حاجة جات في بالك وماشي بعيد انك حتى انتي تسبي وتشتمي (خاطر كيما قلتي كي تتقلقي تروحي تفشي غلك في وليداتك الصغار مساكن يعني كي تقلقي تولي في حالة لاوعي) ... .اذا كنتي من هاذ النوع صدقيني راح تدي طريحة الصباح وطريحة نص نهار و طريحة لعشية وقليل عليك ....

حاجة خلاف الدار لي يكون فيها ديما الحس ولعياط ولقباض و كل يوم المشاكل بين لعجوز والكنة هاو صرا هكا هاي قالتلي هكا هاي دارتلي هكا ..... الراجل كي راهو يروّحلكم للدار كل يوم راكم تشعلو ... يعني حكاية يخونك و يحكي فالتلفون ماجاتش من الفراغ .....

ولي قالتلهم اسكتو نتاع يسب ماماك و يشتمها ؟؟؟؟ تقول عليكم راكم عايشين في ستاد (مع كل احتراماتي)... هاو ليك واش يصرا كي يطيح لقدَر مع النسيب ...

مافهمتش علاه تزوجتو ؟؟؟ باه تكوّنو عايلة و تجيبو ولاد تربوهم على الصلاح ؟؟؟ ولى باه تلعبو ماتش دزاير كونطر مصر في أم درمان ؟؟؟....

وماتخميش على لولاد صدقيني انتي راح تروحي منا و هو يتزوج منا و يجيب لي تهزو بيه بولادو بأمو بخواتاتو .....

ثبتي روحك وديري عقلك في راسك و حاولي تصلحي مايمكن اصلاحه ... مانيش راح نقولك واش ديري خاطر كلشي راهو واضح قدامك و كلشي بين يديك انتي ... انتي لي تصلحي دارك وانتي لي تخربيها ....

سلام

[عماد الفقير]

السلام عليكم
ربي يفرج كربك اختي في الله
نصيحة فقط ، تمّسكي ببيتك و بزوجك و لا تنسي الدعاء في كل حين .
الله المستعان .

ايضا يا بارك الله فيك ، لا تنساقي وراء الكلام العاطفي للأخوات .

[zahra1999]

رب يفرج عليك اختي عاجلا غير اجل

[سيليا142]

الله يفرج عليك

[kacimo.samy]

السلام عليكم
ربي يفرج عليك اختي

[ام كنوز]

سلام الله عليك يااختي انا سيده كي كنت صغيرة شفت نفس المشكل بعينيا بابا وأمي كانوا نفس القصه إلى قلتيها ماما اختارت الطلاق بابا عاود الزواج بصح مش من عشيقتو ولكن من فتاه اختارتها له جدتي واش تقلك مش بابا خلاص إلي كان يتعامل مع ماما بشر وعدوانيه عاد إنسان لطيف حنون يخرج يدلع اخذتنا أمي معها ومتصدقيش الحياة إلى عشناها بأس في باس وأمي ندمت على الطلاق قالت ياريت حملت متطلقتش عادي حساباتك أختي الطلاق عمرو ولاكان حل بالعكس ولادك محتاجين باباهم مكاسب كيما الاب في الدار حتى ويالوكان شيطان الأب واحد ميعوضو