حماقتي هلكتني

[مشكلتي]

السلام عليكم
جمعه طيبة
انا شابة 20 سنة اعاني من مشكلة في شخصيتي
مانعرفش ندافع على نفسي
غبية حمقاء ساذجة سميوها كيما حبيتوا
دائما نظهر بمظهر الضعيف امام الناس
بالرغم من اني الحمدلله متفوقة في دراستي مليحة ما نعايبش الناس
ولكن دائما نتحط في موقف الاهانة والضعف
كيما يقول لمثل "وين تحط روحك تلقى روحك"
متأكدة انو السبب مني و إلا ماكانوش الناس كامل يعاملوني معامله وحدة
فيا عيب ولكني ماعرفتوش
جيت بهلولة هكا حمقاء
مانعرفش نتصرف
مانعرفش نجيب حقي
بالرغم من اني قوية من داخلي لكني نبان ضعيفه من الخارج
لاني ما نعرفش ندافع على روحي ما نعرفش نفرض احترامي لروحي
ربما لاني انا مشني محترمة نفسي
عياتني المشكلة هاذي
من كنت صغيره وانا هكا
لا املك من يوجهني ويرشدني ما نحبش نحكي لعبد حكاية كيف هاذي مانحبش نبين ضعفي
حتى خواتاتي ما يوجهونيش العكس يضحكوا عليا
دائما ما اجدني وحيدة مانحبش ندور مع الناس
لاني ماعنديش الحذاقة مانعرفش نهدر
الكلمة الاخيره نجيبها الاولى
نعرف بنات حاذقات ولسانهم مزير
مانيش نقوللكم حابه نولي سليطة لسان ولا نعاير ولا نسب لا
فقط كيفاش نتخذ الموقف الحازم لي يخلي كل واحد يدير حدودو معايا
جيت من النوع الطيب جدا حد السذاجة
اعلم ان هذا خطأ
و اريد تغيير وضعي مانيش راضيه بتاتا على نفسي هكذا
حتى الجاذبيه ما نجذبش الشخص لي معايا العكس ننفرو جيت طايحة خشينه خاطيتني الظرافة
الكل يشوف عقلي صغير ويعاملني بسُفه و نوع من التحقير وهذا يوجعني نحب نوقفو عند حدو ماعرفتش الطريقة المناسبة
جربت موقف العصبيه والقلقة ولكن لقيتو هذا بالذات يزيد من استفزاز الشخص لي قدامي ليا
جربت زعمه نرد ردود ولكني مانعرفش نرد رد قوي خاطيني الشي هاذا راني تبهليل برك
دائما نطيح في مواقف محرجة مانعرفش نخرج منها
شعور الغباء مسيطر عليا
وبالمقابل انا منيش من النوع لي يرضى لنفسو هذي الاشياء
محترمة نفسي داخليا لكن خارجيا كاين وحد الديفو ما فهمتوش نظهر دائما ضعيفه
والله متمنية جدا نتخلص من هذا الشعور يوما و نكون شاطرة كيما الناس كامل
خاطيتني الشطارة في والو .. شعور الفشل مستوطنني
دائما ما امنح الناس طاقة كبيرة ايجابية وقوة بالكلام لانو افكاري تميل الى القوة
ولكني " لاتكن صلبا فتكسر" ربما حتى هذا سبب
مافهمتش العيب بالضبط اين
حتى كي نكون انا على حق والشخص على خطأ ما نعرفش نثبت روحي ويتغلب عليا هو..
ما يتقبلونيش الناس ما يبلعونيش بسهولة
بالرغم من كل هذا لكني ما نتخدعش بسهولة نميز الاشخاص و مانيش من النوع لي يصدق كل شي بسهولة ومانيش إمعة الهوا لي يجي يديني لا .. وواثقه من نفسي عادي و متقبلتني لك مش متقبله نفسي من هذي الناحية فقط
اني قلتلكم داخليا فاطنة وفاهمة ولكن خارجيا العكس تماما هذا هو الحمق بعينه
تركيبتي معقدة جدا
انيروني الله ينوركم

[مراد سابقا10]

هو عند واحد من الإحتمالين :

1- اما انت خوافة وهي اساس المشكلة وهذي لازم تتخلصي منها تدريجيا واذا مكانش روحي لإخصائي نفساني يعاونك تتخلصي من هذه المشكلة

2 الإحتمال الثاني وهو عندك توحد ضعيف والمعالج النفساني من سيشخص حالتك بدقة اي هو المشكل بالضبط ؟؟؟؟؟ لأن المشاكل النفسية تتداخل مع بعضها البعض .

[softech]

الله يبارك باينة على موضوعك انك فعلا فاهمة و فطنة و هذا أمر مليح بزاف و مشكلتك تدل على انك ذات تربية حسنة
لا بد ان تعرفي يا بنيتي اننا نحن و رغم تجاربنا احيانا نعاني من هذه المشكلة
و السبب في رايي هو الثقافة الدخيلة التي تشبع بها المجتمع خاصة الشباب منهم
فصار اثبات الذات هو في تقمص الشخصيات و حتى تصرفات لممثلين او مغنين غربيين او شرقيين
في حالتك يجب ان تخلقي جوا يناسبك
او بالاحرى البحث عن صديقة او صديقتين بمثل عقليتك في هذه الحال ستجدين من يتجاوب معك او يفهمك
لأن الثقافة الحديثة و الغزو الذي غمرنا صنع نوع من البنات المسترجلات قليلات الحياء سواء في لباسهن او كلامهن او اخلاقهن
و هؤلاء لا يجب ان تجدي طريقة كيف تثبتي نفسك بينهن لأنك ستضيعين معهن
و لكن افضل لك اعتزالهن و لن تخلو الدنيا من امثالك...بالتوفيق بنيتي.

[سُـــمَـــيَّـــه]

ختي نتي مشي حمقاء أو غبية نتي متربية و أخلاقك عالية كفاية باش تخليك ماتنجميش تهدري
اللي لسانهم سليييط و يردو بالعجب اعرفي بلي راهم خبيييرات في المشاجرات و اخلاقهم فاسدة
ساعفيني ابتعدي عن كل واحد يحب يجبد البلا و ادا حقروك وكلي ربي عليهم و صايي

[زايدي أمحمد]

الله يوفقك

[samirsman]

ليس بك اي مشكلة او شيء
ابتعدي عن كل فكرة تقول لك بانك ضعيفة
ابقي كما انت
هذه تسمى تربية وليست ضعف
ومن يريد اذيتك فابتعدي عنهم ولا تردي عليهم افضل من محاولة الرد عليهم او مجاراتهم
الله يحفظك و يبارك فيك و يثبتك

[المُعادلة الصّعبة]

عليكم السلام

انا لا اتفق مع اللي ردوا فوقي
موضوعك لا علاقة له بالتربية او الحياء او الاخلاق او ما شابه
بـ غضّ النظر عن التربية ولكن الدفاع عن النفس وفرض الاحترام شيئ مُهمّ
في رايي مايقدرش واحد يعيش بلا ما يقدّر نفسو لانو رح الناس كامل يشوفوه بنفس النظرة وما يقدروهش كيما قلتي انتي exactly
من خلال ما نعرفو
لازم دوما يكون موقفك حازم لما يتعلق الامر بـ سخرية منك او من شيئ يخصك

الوقت لي تحسي في عبد يهاجم فيك و يضحك ما تضحكيش معاه لانك هنا صح تولي تحت مُسمى حمقاء وو ... لي قلتيه كامل لأنو ما كانش عبد يرضى لنفسو مواقف كيف هذي
اذا تعدى واحد واخترق الحدود وقفيه عندها وما تسامحيهش حتى يعتذر منك ويدير حسابو منا والجاي
و هي لازم تثبتي نفسك من اول لقاء مع الاشخاص حسب علم النفس
يبداوا يكونوا عليك نظرة ولربما انتي النظرة لي كونوها عليك انك شخص طيبة و ساكتة وخاطيك ويبداوا يستغلوا بالعقل حتى يلقاوك فريسة .. علم النفس لي يتكلم مانيش انا
لذلك منا والجاي من اول لقاء ما تخليش حتى واحد يضحك عليك ودائما حطي نفسك في الموقف تاع الواثقه يلي عاجبتها روحها وراضيه على روحها بكل عيوبها اكيد الجميع رح يشوفك هكا
واحذري تتحومقي بالكلام السلبي عن نفسك بدافع المزاح
-مانعرفش ندير اك الحاجه - خاطيني - انا حابسه- لانو انتي قلتي عن نفسك هكا وش تستناي الناس يقولوا عليك؟ لربما انتي في نيتك تتمسخري بروحك فـ اكيد البقيه رح يتمسخروا بيك -عذرا-
حبيت نقولك ما تسمحيش بهذيك الدساره لي تفوت الحدود
وقت الجد جد وقت المزح مزح
حاجه عجباتك عجباتك حاجه ما عجباتكش ما تقبلتيهاش اهدري على روحك عبري عن ذاتك بكل أريحية الكلمات لي جاوا على فمك قوليهم ما يهمكش
رضى نفسك أولى من رضى اي شخص آخر
ربما تنقصك الثقه في نفسك او شيئ من هذا القبيل احترت صراحة ما قدرتش نشخص حالتك فعلا صعيبه
لاني بصراحة من كلامك ما لمستش فيك هذاك الضعف الضعف اللي ضعف
من كلامك حسيتك واعية وعارفه وش تديري ولكن كأنو الحظ ما واقفش معاك ماحسيتكش كيما قلتي بهلولة ووو..
وفعلا انطبق على كلامك لانك قلتي انا طبيعية ولكني نظهر بمظهر الضعف .. انا شخصيًا ما لمستش فيك جانب الضعف من خلال اسلوبك كلامك والله اعلم
اللي عندي قلتهولك اختي ربي يقويك ويوفقك لما يحبه ويرضاه سلامي

[هـــدوء]

شوفي عزيزتي . طالما عندك هاذي الفطنة أكيد عندك القدرة تقراي شخصية كل من حولك.

مثلا كي تتنمر عليك وحدة تقدري تعرفي هل هي فعلا "جادورة" كيما نقولوا بالعامية و لا فقط تلعبها بش زعما تبان ....المهم اذا كانت "جادورة" نصيحة مني جامي تناقشيها و لا تحاولي تكسري راسك معاها خاطر تهبط معاك المستوى لأسفل السافلين و تولي تهدر هدرات خارج نطاق التغطية وحدة بأخلاقك ماتقدرش تتحملهم ودخلك في معمعة تع شبهة وتخليك تباني كيفها سوقية و فتاة شارع بمجرد مايشفوكم ناس مع بعض .

أما إذا كان الاحتمال الثاني و ما أكثرهن ردي و ماتخافيش خاطر هاذوا ما يصكوا ما يفكوا هكا مساكن كلاب ضالة تنبح و فقط .بمجرد ما تردي عليهم مرة و لازوج خلاص ما يزيدوش يدوروا بيك خاصة إذاكان الرد مفحم .

و مثلا نفترضوا وقعتي في موقف هكا ؟ علاه تخافي زعما وش أقصى حد ممكن يوصل ليه النقاش؟ الضرب مثلا؟ راح تلقاي روحك تضربي تلقائيا دفاعا عن نفسك.

حبيبتي كي تكون عندك كلمة حق جامي تخافي تقوليها إلا إذا كان خصمك نافذ السلطة و كلامك يخليه يحطك هدف في راسو.

و المثل يقول "إذا القاضي خصيمك طبق حصيرك"

[خالد عنابي]

اعتقد انكي تمارسين سلوكا هداما للذات

وهو شكل من اشكال المازوخية مردها التقدير المنخفض للذات او الشعور بالذنب والمحاولة لتخفيفه عبر وضع نفسك في تلك المواقف

ولي يقولك متربية ومتخلقة فهذا ليس له علاقة بمشكلتك

مع الاسف العملية تتم لاشعوريا ومخك على دراية تامة بما يفعله والحل انك تعسي روحك مليح او تروحي تشوفي طبيب نفسي

[أبو سالم]

أسألي الخالق الكريم ، فهو من خلق لك هذه النفس
التزمي حدوده وطاعته وسترين كم تصبحين قوية ومباركة
عن تجربة أتحدث

[زبدة ذايبة]

تحتاجي لبعض الأنانية وحب الذات

القليل منها يساعدك على تجاوز كل هذا.

انت قاعدة تضحي بنفسك لأجل الآخرين.

تخافي وش يقولو عليك

وتخافي تسقط قيمتك في عينيهم

ماتحبيش يتقلقو.

ماتحبيش ترفعي صوتك عليهم.

اهتمامك بالعالم الخارجي وترضيته على حساب نفسك هو الذي ولد هذه المشكلة.

لو كنت حارسة أمينة على نفسك.

ولو كنت منتبهة لمايضرك ومايؤذيك.

لكنت انتفضت على أقل شعور بالإسائة.

لكنك. تنجرين مع كل شخص يجرك.

شخصية سهلة وبسيطة وخفيفة.

لا رأي لك ولا إحساس.

وكل السبب في عدم حبك لنفسك

وعدم احترامك لها.

لذا ياعزيزتي

ديىي جهدك تكوني شوية أنانية وشوية محبة لذاتك

حافظي عليها وحطيها في مكان عالي.

وماتحطيش روحك بين الأرجل والأقدام اللي يجي يركلك بقدمه.

ارفعي من مكانتك.

وبيني مستواك

وبرقي عينيك.

النظرة المكسورة تدل على أشياء كثيرة.

ماتفتحيش الشهية تاع الناس باش يستخدموك كأداة يبينو بيها قوتهم.

لأن الناس دائما مايبحثون عن ضعيف لنحره أمام الأقوياء.

حتى يؤكدو لأنفسهم وللآخرين أنهم ذوو سلطان وهيبة وقوة.

ماعليك سوى أن تدفعي نفسك إلى الأمام وتنتبهي لما فيه احترام نفسك.

واحرصي على ماينفعك.

رب يوفقك ويسهل دروبك.

[kikimo73]

Bon courage

[عبدالحق الجزائري]

[quote=أبو سالم;3997360475]

أسألي الخالق الكريم ، فهو من خلق لك هذه النفس
التزمي حدوده وطاعته وسترين كم تصبحين قوية ومباركة
عن تجربة أتحدث

[/qu
جواب منطقي وانا من رايك

[mohamed nadim]

هدا الجورنان لي كتبتيه
ور اكي دايرة روحك ما تعرفيش تهدري

[الحياة بسمة]

بوركي رأي شافي وكافي