نوكل نشرب نرقد(مانعرف والو

[مشكلتي]

السلام عليكم

منتديات الجلفة عالم افتراضي .. وانا متخفي بعضوية مجهولة.. لذا ساتكلم براحتي وبكل حرية... فقط كملاحظات :

1) من فضلكم انا احتاج لكل راي في ال20 رد .. لذلك اتمنى ان يكون كل رد على الموضوع في مكانه..

2) اتمنى ان ترد عليا العضوة ( زبدة ذايبة) و الاخ ( elwawy ) ..وحتى باقي الاعضاء اكيد...

لنبدأ :
انا شاب عمري 20 سنة.. مشكلتي هي انني مانعرف ندير والو.... ومانحبش ندير والو...

مشكلتي انو ماعنديش حتى مهارة ( مهارة ) او كفاءة... مانعرف ندير والو في حياتي... نوكل نشرب ونرقد...

مكانش حتى خدمة نقدر نخدمها.. عايش عالة فقط... ماعندير حتى معرفة علمية ولا عملية ولا حتى علاقات اجتماعية تقدر تخلبني نخدم...
مانقدر نخدم والو ومانعرف نديرو والو في حياتي....

انا ذرك في السنة 3 الجامعية نحفظ في البوليكوب ونطلع في العام برك.. القراية ماعجبتينش ومكانش حتى قراية تعجبني ...

نجحت الباكالوريا و مالقيت ماندير... حتى كي دخلت للجامعة ونطلع في الاعوام بالحفظ من اجل الامان ( او مزال صغير.. ولدي مزال يقرا .. ماشو وقت خدمة ) وانا في الحقيقة راني نهرب من الواقع برك...

ذرك راني عايش نوكل نشرب نكونكتي ويصرف عليا بابا و ماما هوما اللي يصرفوا عليا وانا كون يخطوني هوما نموت بالشر والمجاعة والفقر... لانني مانعرف ندير والو في حياتي .. مانعرفش نخدم.. ماعنديش معرفة ماعنديش مهارة... نحب نرقد ول نموت.. مانحبش الخدمة .. مانحبش حتى نكسر راسي بش نتعلم مهارة ولا حرفة... يداي ماهوش تاع حرفة... منعزل عن الناس....

في حياتي لم امارس الرياضة... جسم هزيل اقل من جسم النساء... كانني لست شاب.. جسم هزيل جدا...

حياتي تمشي وانا ماعلاباليش وين راني رايح ... ظلام.. مستقبل مجهول... راني نصبر في روحب ونقتل في الوقت في الجامعة بصح لوقتاه...

الدنيا حسيتها صعيبة عليا... كون غير متولدتش من اصلو... كرهت روحي ... لا وصلت كرهت نظام الحياة... نكره النساء.. نكره الرجال.. نكره الاطفال...

كل الشباب في عمري يتعلموا فب مهارات وحوايج جديدة ( روح وقوة الشباب ) بصح انا عجزت في كل شيء.مثلا حتى البنات يتعلموا في سياقة السيارة وانا مانيش حاب نتعلم ... هكا حاب مانعيشش..

نكره كل شيء .. مانحب حتى واحد يسقسيني حتى سؤال... سعات تغيضني روحي قاعد نضيع في سنوات شبابي بلا حتى استفادة... اصبح عجوزا في جسد شاب..


وعلاش لازم نخدمو؟؟؟ نكره الزواج والخطوبة... نكره كل شيء... نكره الحياة..
مانيش حاب نزيد نعيش غير نعمر في وقتي بش ما ننتحرش

انا نفكر كي يموت والديا ( مصدر دخلي الوحيد) نجيب كرتونة واصبح متسول في الشارع واطلب المال من الناس بكل ذل و مهانة ( الله غالب مكانش حل ) مانعرف ندير والو...

كون جيت أنثى نعمل على الزواج ( ذرك نتزوج برجل غني ونرتاح من مشاكلي بكل سهولة )

بصح انا راجل لازم انا هو اللي نخدم... علاه...

مافهمتش ؟ مانعرف والو مانفهم والو.... حسبي الله ونعم ااوكيل في كل الاباء والامهات... علاه تجيبوا وتنجبوا في الاطفال.... يتعذبوا ويتمرمدوا..

كرهت ...

[نينو]

السلام عليكم
استمتع بحياتك يا اخي . لما كل هذا التذمر . باذن الله تكمل قرايتك وتلقى خدمة كي الناس
وايضا مشكلتك ليست ماتعرف تدي والو. مشكلتك هي انك انت لم تجرب العمل . اعمل في العطل اي عمل . ولا تقل ان جسمي هزيل . انا كنت هزيلا جدا ايام الجامعة ولكن كنت اعمل مونيفري بناء.
وفي الاخير نقلك استمتع بحياتك حت لو لم تعمل. مش غير انت متخدمش . سلام

[nadir_telecom]

يا أخي ماكان حتى شخص في هاذ المنتدى ريح يفيدك من غيرك تبانالي إبدى غير من روحك و شوف النتيجة درك نتا راك لقيت أصل المشكلة و مشكلتك الإكتئاب اللي بدورو خالك تكره طعم الحياة أخي أوالا لازم تعرف بلي ربي سبحانو ماخلقناش للعبث غير هاك و صايي خلقنا باش نعبدوه و الحوايج لخرى زايد ناقص معناتها حاول صحح علاقتك مع المولى عز وجل في الأول لإبدى صلي الصلاوات في وقتها أقرى شوية قرأن و شوف + نتا الحمد دركا راك 20 سنة و السنة 3 جامعى ماعناها راك على الأقل محقق إنجاز بزاف ناس راه تحلم بالباك و لا غير تدخل للجامعة و نتا الخمد الله راك العام في العام الحمدلله نتا راك تكرره التخصص تعلم حبو و إدا ما راهوش عاجبك كمل ليسانس السنة و حبس و شوفلك كاش معهد و تكوين و إبدأ من جديد راه مازال مافاتش الوقت بالنسبة للجسم إبدأ من جديد و إبدأ مارس الرياضة ماشي شرط رياضة صعيبة الجري مثلا كل صباح إجري شوية مع الوقت رايح نحس بالتغير مازلك صفير و دير شوية حتان توالف وزيد بالنسبة للزواج و الأمورات غير ماتخممش من دركا ركز على المشوار الدراسي و العملي و بعداك ساهل +إدا تحب كمل لا ليسان و روح فوت الخدمة الوطنية تشوف حاجة جديدة و دير صحاب جدد و تتعلم تخلص شوية بويسك تفوتها ظابط يعطوك شوية قيمة و تدي ثيقة في روحك نورمال + نتا تقول ماعرف ندير حتى مهارة يا أخي المهارة أصلها تكتسب و تنمى ماش يزيد بيها الطفل إبدأ تعلم في كاش مهارة و شوف الحاجة القريبة لي تريحلها نتا راك تقول فنيان و غير إجتماعر شوف كشما تخدم أونلين و إنشالله رابي يوفقك تعلم نورمال شوف الحاجة لي تقدر بالاك تحبها و تخدم بيها و تعلمها راها ماهيش رايحة تديلك وقت نورمال 1 عام عامين 3 تتعلمها تتعلمهاا وماتقنطش من رحمة ربي أخي حاول ماتستسلمش و صايي وتبانلي أخي أعرض مشكلتك على كاش طبيب نفسي راه رايح يعاونك كثير أخي و تلاحظ بلي حياتك رايحة تتحسن يا أخي الإكتئاب راه مرض صعيب للأسف لأنه مايبانش و الشعور نتاعو قاصح أنا في الماضي كنت كيما نتا بصح اقل حدة شوية منك و الحمدلله مع الوقت ريحت و الحمد راني ملتزم بالعمل وكلش و لحمدلله على هاذيك راني حاس بيك غير إبدأ من جديد و صايي من الأخير ربي يشافينا و يشافيك و جميع الأمة الإسلامية و السلام عليكم و رحمة الله و إدا كشما عندك أسئلة أخي غير راسلني في الخاص أخي رحبا بيك السلام

[tassnim5]

في هذه الفترة الكثير من الناس تعاني من الاكتئاب و خاصة الشباب. لكن لازم تخرج نفسك من هذا و أنت في اولى خطوات النجاح لانك عرفت مشكلتك و كتبت هذا الموضوع و تنتظر الحلول و هذا أهم شيئ.
ثانيا يبدو أنك شخص واع و بالتالي يمكنك اخراج نفسك بسهولة من هذا المشكل. بالنسبة للدراسة فانت و الحمد لله في السنة الثالثة و الكثير لم يستطع تحقيق هذا الانجاز. لا تقل انك لا تحب تخصصك فلو كنت حقا تكرهه و تكره الدراسة لبقيت لعدة سنوات في السنة الاولى و لربما لم تتمكن من الوصول الى الثالثة. أنت تملك الارادة و يمكنك الحصول على الماستر و من تم الدكتوراه.
اجعل لنفسك هدفا و اسعى الى الوصول اليه حدد ما تريد أن تكون و هذا لن يكون بين ليلة و ضحاها و لكن اجلس مع نفسك و فكر في مستقبلك بهدوء. يالنسية للمال و الرزق فلا تقلق أبدا فهو مقسوم من عند الله و ليس لك الا السعي، والداك حاليا من واجبهما ان ينفقا عليك لانك تدرس.
و قبل كل شيئ ارجع الى القران و حاول ان تقوم بحفظ بعض الاجزاء ثم اكثر من الاذكار و الصلاة على النبي ففيها راحة للنفس. ثم تابع فيديوهات بعض الشيوخ التي تتحدث عن الرزق و العمل. حين تحس ببعض التحسن حاول ان تجعل لنفسك بعض الاصدقاء الصالحين و اعمل معهم على التطوع في بعض الانشطة كزيارة المرضى و الاطفال المحرومين و المسنين فالعمل التطوعي يجعلك تشعر باهمبة حياتك و بحاجة الناس اليك.
استغل فترة الحجر اجعل لنفسك جدولا من الاعمال التي ستجعلك تنسى هذا المشكل نهائيا : رياضة، تطوع ، قران، علم ، تعلم حرفة ، عمل........................
ارجو اخيرا ان تنزع من قاموس كلماتك : لا اريد و أكره.

[Amir ami]

انا كي قريت العنوان في بالي شخص غير متعلم. لكن لما رايت موضوعك تعجبت من مستواك الجامعي يعني على الاقل راح تتخرج وتكون عندك شهادة. شوف ياصديقي صحيح العيش بدون هدف مشكل كبير. لكن تقدر تضع هدف حتى ولو كان صغير. مثال رياضة الكاراتي لا تحتاج الى جسم ضخم بالعكس تحتاج جسم عادي او صغير. والشيء الثاني انت تحب تكونكتي اذن تقدر تشوف فيديوات تاع التنمية البشرية. جرب ماعندك ماتخسر. وبالتوفيق.

[نجاة^^]

السلام عليكم
الحمد لله مزال كاين الضو كيما نقولو ،20 سنة وزيد تقرا في الجامعة مزلت راك في اول خطوات حياتك تقدر تبدا من ثرك ،أنفض الغبار على روحك وأستمتع بحياتك اللي نتا رايح ترسمها ،مشي لازم حرفة ولا متخدمش ،روح بيع لاشتا في سوبيرات ولا قهوة ولا مكتبة ،ولا حتى خدمة في الأنترنيت علاه لا ،،المهم أتحرك قبل ما تقضي على عمرك وماتحكمها لا دنيا لا آخرة لأنو لقدر الله وكملت بهذا الحالة مصيرك راهو في خطر ،شوف ننصحك أولا تعدل الجانب الديني تتسقم حياتك،أحكم صلواتك ،وأدع الله وأتوكل عليه ،
أبدا الرياضة ولو جري يعني ماشي لازم ليصال ولا متريضش ،،
نتمنى بعد ما تتريع¨ل حياتك تجي تكتبلنا كيف بدأت وأين وصلت ،،،وفقك الله وسدد خطاك

[visa uk]

مابك ولاشيء انت برك من نوع لي تهرب في العين وانت من نوع متشلئم للغاية ايضا نعرفو عباد امثالك يضل يهرب في العين ويهبط مورال وهو عقلو في عقلو كمل ووووو ادا بقيت هاك انا منحبش هباد كفكك بالصفة وكلام والوجه ات متشائم للغاية معقد موسوس قراف وووو حسب طريقة كلامك رغم انك جامغي وووووووو ولك شهادات لكنك من نوع لي مكتئب وتفشل لي معاك كلامك كلو وسواسي انا هدا نوع من ناس نهرب منهم تماما نفيق شوية نهرب لانو يعطك طاقة سلبية للغاية او شيطانية روح سقك روحك وماتتكلمش بابلوسزاس بالوساويس والشطوك ووووووشكوك
كابك مابك حتي شيء تحب اهيش هاكتهبط المورال للناس وووووووانت راك فاريها روح عاود راجع نفسك شخصة هادي في عاصمة وحد مايتكلم او يريح معاه

[natssomi]

السلام عليكم أخي وبعد،أ، فهمك لمشكلتك هو نصف الحل ،أنت الآن واعي بلي راك في مشكل تعتبرو نت عويص و هذي أول خطوة فالمسار الصحيح
الآن للنتقل للب المشكلة ،أنت ما عندكش مشكل كبير برك راك نشات في لبئة اتكالية وين تبقى تعتمد على باباك وماماك ،إذن الحل يكمن في تغيير هذا النمط تاع العيش بالاتيان بالنقيض ،قبدل ماتبقى تستنى والديك نوض وحوس على خدمة حتى ولو كان المدخول موش عالي ، ولكن نت لازم تعتبرها الحل الأول باه تخرج من العزلة تاعك
،انا ثاني راني كيفك ،رجعت نتقلق من روحي كعاد معنديش مدخول ثابت ولكن بالشوي نبدى نراجع روحي ونشوف وش هم اهتمامتي وموهبي، والحمد لله اكتشفت في موهبتي لأدبية رجهت نكتب قصص ونشارك بيهم فالمسابقات والحمد لله ربحت في بزاف مسابقات وحليت قناة يوتوب
بالعودة ليك مارس الرياضة ، دير صحابك لانهم هم لي يحفزوك باه تكمل وتواصل ، اكتشف مواهبك، اقرى كتب تنمبة بشرية ، بعد فالقترة هذي هلى مواقع التواصل وابقى ريح مع راسك وخمم مليج وين راك حاب تووصل
وتذكر" ولا تهنوا ولا تحزنوا وأنتم الأعلون إن كنتم مؤمنين"

[Anabela]

اولا السلام عليك اخي الكريم ، انت انسان واع بمشكلتك وهذي نقطة ايجابية جدا وراك هنا تطلب في حل وهذي نقطة اخرى. مليحة ، وناكدلك بلي مركش وحدك فدنيا هذي لي تخمم هذا التخمام خاصة في عمرك ، راح تتقدم فلعمر ان شاء الله وتشوف موراك اما تتحسر على عدم التحرك و التقدم في حياتك اما تقول الحمد لله مريت بوقت صعب وتخطيتو بمشيءة الله و بنيتي في اصلاح الحياة،
المشكلة في ظاهرها تبدو كبيرة لكنها فلحقيقة صغيبة اذا نتا بغيت تتبدل للاحسن
ومتقوليش نحوس ننتحر ونكمل الحياة حنا مخلقناش الله باه ننتحرو عندك فرصة واحدة فقط فالحياة لن تتكرر دير المجهود تعك تنال دخول الجنة والعتق من النار علا خاطر حنا اصلا وجودنا على الارض امتحااان فقط ، بصح ناس يختلفو فورقة الامتحان لي يمدهالنا الله اما تنسحب من الامتحان بفكرة الانتحار ولا تبديد الوقت حتا يكمل الامتحان هذا ضعف ولاينبغي للانسان ان يكون هكذا صح كين اوقات الانسان يحبط وينضر بصح ديمن يكون عندك الامل في الله باه تشوف نور جديد

مدابيا كلامي يوصلك وتستفاد منو لانني فوقتك مصبتش لي ينصحني ولا يخليني نحبس مانكره حياتي ونبدا نخمم لمستقبل افضل مالا اسمع مني هذو النصائح
لحاجة الاولى بلاك نهدرلك نص هدرة بدين لانو بغينا ولا كرهنا حنا هنا باه نعبدو المولى عز وجل اي فعل ولا كلمة منا داخلة فهذا النطاق
حاجة اولى حسن علاقتك بالله داخلة فيها الصلاة ، والذكر كل وقت ولا خصص وقت معين سبحان الله الحمد لله الله اكبر ولا اله الا الله ولاحول ولا قوة الا بالله
"اللهم اني اعوذ بك من الهم والحزن واعوذ بك من الجبن والبخل واعوذ بك من العجز والكسل واعوذ بك من غلبة الذين وقهر الرجال"
هذا دعاء مهم جدا ينحي عليك الهم والكسل خاصة ونهدر عن تجربة
الحاجة الثانية شوف فحياتك الاشياء لي انعم الله عليك بها كما والديك ربي يحفظهملك الصحة ، الراحة ، نعمة الاسلام، ...نعم بزاف لاتعد ولاتحصى ولاتستحقر اي نعمة مهما كانت صغيرة ، واحمد الله عليها كل يوم
اكثر من الاستغفار مش شرط تكون داير ذنوب
بر والديك ومتخسرش معاهم لهدرة وقدر تعبهم معاك لان بر الوالدين يفتح بيه الله بزاف بيبان
ضرك بدا تخمم فالقراية لي راك تقرا فيها اسكو فيها امل تصيب بها خدمة ولالا
اذا لا جرب تعاود باك وتقرا وش باغي ولا دير دبلوم بلحاجة لي تحس تقدر تخدم بيها متقولش راح لحال مزاالت صغير بزاف باه تبدا بداية جديدة صدقني
جرب تبني صداقات مع ولاد عندهم طموحات راح يحفزوك بلامتحس بعد على الناس الكسلاء
الرياضة وثم الرياضة احسن حاجة تطلع بيها المورال يلوكن مشي ل20 دقيقة يوميا
اي حاجة تعول ديرها ولا كش عادة جديدة كما سبور بدا بلعقل متزدمش ضربة وحدة
تفكر بلي الحياة مهبش ساهلة كما قلت نتا كون جيت طفلة تتزوج برجل مرفه وتنتهي مشاكلك الحياة ابدا مش هكك الطفلة لي تزوجت هذي مكن حتا ضامن بلي راح تعيش في هناء لمجرد توفرلها الجانب المادي
وكل واحد ووش عطاه الله كامتحان لازم يتجاوزو باعانة الله وبجهد منو شخصي وعرف بلي كل انسان باه ابلاه الله مهما بانلك مخثو والو الا معندو حاجة مخفية يتمنى يحصل عليها
اتعلم عادة قراءة الكتب راح تستفاد بزاف
وجرب تخالط الناس وتهدر وتقسر وتتفاعل راه تتعلم بزاف حوايج واذا كنت انطواءي حاول بلعقل حتا تكون محيط ترتاح معاه
اعرف بلي الحياة لي راك عايشها مهما كانت تعيسة في نظرك راهي حلم الملايين حول العالم اعرف تقتنص الفرص لي مدهملك الله عزوجل
بزاف ناس قريتلها هنا تعاليق راهي تنتقد فيك افكارك سلبية وشيطانية بلعكس دير روحك مقريتهاش هذي لهدرة انت انسان سوي واعي جدا ومخصك والو هذ التخمام حتا انا مريت بيه ووصولك لهذك التخمام اما يكون نقطة تحول كبير فحياتك اما تكمل فهذ طريق لي ناكدلك بلي مرح توصل لوالو لانك تعيش فمنطقة الراحة متحوسش تكسر راسك وهذا خطا الانسان خلقو ربي للتحرك و البحث كون خليفة الله في هذي الارض،وانا رني اكيدة بلي تختار الموقف الايجابي مدامك حوست تغير
جامي لادير فبالك بلي راح الحال حتى لو تكون مولا 25 او اكثر. تقدر تبدا من جدبد وتخدم عى روحك وشخصيتك
واذا راك تسمع لنقد من حولك على كسلك ولا شكلك ولا اي حاجة قيس موراك الناس هذوك مرحش يكملو معك مسيرة حياتك كل واحد لاهي فحياتو شاطرين برك فتطراش لهدرة
مواقع التواصل اذا تشوف بلي راهي ةتزيد فالاحباط وخسارة الوقت انا ننصحك تبتعد ضربة وحدة ،انا عن تجربة نحكيلك فنصيحة هذي سورتو كثر فيهم الذر ووتضياع الوقت فصوالح تافهين بدل الواحد يخمم فلفايدة
ان شاء الله يفيدوك هذ النقاط كشما نتفكر نزيد نردلك

[Elwawy]

يشرفني أنك قصدتني لطلب المساعدة, و مشكلتك سهلة إن شاء الله, أنت ربما "بيرفيكسيونيست" لا أعرف بالعربية ربما يقال "منشد الكمال" و هو من الناس من لا يرضى أبدا بمردودية أقل من 100% و الغريب أنه يقع في فخ المماطلة و عدم القيام بأي شيء لأنه يُسقط نظريا نتيجة ما سيقوم به وتظهر له أنها غير مرضية كما أنه يخاف من النجاح أيضا, شخصيا مررت بمراحل مماثلة أين لا أستطيع تحريك أي شيء و أبقى حبيس الإسقاطات النظرية و أعلم أن المشكل هنا (الكل أو لا شيء)

-------------------------------------------------------------
الحل على شكل خربشات غير مرتبة قد تفيدك بطريقة أو بأخرى:

- إذن ماكانش منها ما تعرف دير والو, يمكنك القيام بأي شيء فقط المردودية هي التي تحرجك, تخاف أن تنظر إلى نتيجة رذيئة, و تريد أن تضمن الشيء من أول ممارسة؟ لا يمكن, إذن تذكر التعلم يأتي على مراحل, مرحلة تتعلم فيها النظري, و مرحلة تمارس فيه النظري إلى أن ترقى الممارسة للدرجة التقان الذي ترجوه. "صافوار و صافوار فار", تبدأ ب 1% 10% 20% إلى 100%.

- رحلة الألف ميل تبدأ بخطوة, لتكي تقوم بأي شيء لابدأن تبدأ, و لا يهم المدة اللازمة لإنجاز ذلك الشيء, إبدأ من الأسهل للأصعب و و قم بتجزيء أي مهمة تريد القيام بها إلى المتسوى الذى يمكنك التعامل معه.

- لكي تعرف هل حبة تمر مسوسة أم لا يجب أن تفتحها, إذن لكي تعرف إذا النتيجة من القيام بشيء ما يجب أن تجرب ثم تستنتج واقعيا و ليس نظريا في ذهنك, توكل على ربي و جرب.

- لا تحتقر أبدا نفسك أنت طالب في الوقت الحالي, ما دامك تاكل تشرب و ترقد كأول خطوة حاول أن تقوم بهذه الأشياء بطريقة صحيحة و منظمة, سيتغير تفكيرك و يذهب التفكير السلبي.

تذكر أن المتعة تأتي عند القيام بالأشياء و أثناء ممارستها و ليس بعد القيام بها و الحصول على النتيجة, بعد النتيجة هناك هدف أخر و أشياء أخرى تقوم بها و هكذا دواليك , دراسة لأعوام > تخرُّج > فرحة المتخرج ليوم واحد بعدها أنت بطال في مهمة جديدة تبحث عن عمل. البنادم دوما في مهمة المرور من حالة "أ" إلى حالة "ب" عندما تصل للحالة "ب" فكأنك في حالة "أ" أخرى بمعنى أنه لا يوجد نهاية أو راحة.

و بما أنك قصدتني دعني أقول لك:

أني دخلت الجامعة في سن 20 أو 21 بعد إعادة الكالوريا 4 مرات, و أعدت العام الأول في الجامة "زكارا" أصدقائي كانو يدرسون في الجامعة أنذاك.

لم أمارس الرياضة من 16 إلى 26 عدا السباحة, لم أمارس الرياضة بشكل منتظم إلا في الخمس أعوام الأخيرة - هناك شيخ هندي بدأ الرياضة و الركض في عمر 100 سنة وعمره الأن 112 أظن أو أكثر-

أملك رخصة سياقة حصلت عليها في أواخر عشريناتي و لم أسق السيارة إلى يومنا هذا

لا تقارن نفسك أبدا مع أي إنسان أخر عدا نفسك (يقال الحشيش يبدو دوما مخضر في الجهة الأخرى), بل عاند و إجعل الأخرين مصدر إلهام و تحفيز, أنظر فقط لديفيد جوجنز مسكين من طفل يعاني من التنمر و طفولة بائسة إلى أقوى رجل في العالم, نعم أقوى رجل في العالم مداير كي المطرق.

إذن خلاصة القول في كل شيء قم بما تستطيع القيام به ثم مر لمستوى أعلى منه حتى لو كان الفرق طفيف وو هكذا إلى أن تتضح لك الرؤية و الوجهة و تبدو لك أشياء جديدة و أمور تعجبك, مثلا الرياضة يمكنك شراء حبل و القفز؟ سهل؟ إبدأ بهذا, عيش يومك و أترك عليك هذا التفكير, لا أحد يدري كم سيعمر, إذن هي بون نوفال و رحمة أننا نموت, تخيل لو كان متوسط عمر الإنسان هو 1000 سنة لإنتحر كامل سكان الأرض.

خربشات فقط على السريع أنا متاح على الخاص

[قدور بن عاشور]

و الله يا أخي جاني الضحك و أنا نقرا موضوعك،
لأنني وجدتك تصفني أنا،
لأنني أحس أني ما نعرف والو و لا أصلح لشيء،

رغم أنني تخرجت من الجامعة منذ مدة، و عندي شهادات أخرى،
و عملت في مجالات عدة، و كسبت خبرات و مهارات، و لا أحد يشكك في كفاءتي المهنية،

إلا أنني لما أجلس مع نفسي، أجدني لاشيء و لم أتعلم شيئا، و لا أصلح لشيء
ماعدا عملي الذي أصبح روتينا مملا مثل دراستك،
أنت تجيب المعدل و أنا نجيب نهاية الأسبوع هههههه

لكن الحقيقة طبعا مغايرة، فما أوصلك للجامعة إلا تفوقك و اجتهادك، و نجاحك في دراستك شطارة.
و هذا الذي أنت فيه في الحقيقة يدل على أنك لست بمغرور،
و متعطش للتعلم و كسب المهارات و هذا شيء ممتاز،
نقد الذات شيء مهم لإصلاح النفس، واصل في ذلك و لكن بإيجابية،
لا تنس دائما الجانب المضيء من الأمر و ضعه دوما بين عينيك.
الإنطلاقة دائما تكون بالنظرة الإيجابية لكل مايدور حولك.

[visa uk]

بطل من التوسويس وتهراب العين لانك اوفون اوفوننننننننننن لاباس بيك وعقلك في عقلكككككككك مليح كاين نوع كما نتا متشائم للغاية موسوس يضل يهبط مورال او يهرب عين وعو فونننن تاعو قانع بروحو وووووبطل وساويس وشكوك اوك مابك والو راك هايل وعقلك يخمم فور من عند ربي سبحانو

[Al220]

ضحكت على خاطر انا تاني كنت كيفك خونا بصح من خدمت عرفت بلي الشي لكنت نقراه عنده فائدة و لقيته مجرد مرحلة

[زهرة لوتوس]

مثلما ان الجسد يمرض النفس تمرض ايضا...عمرك الان 20 سنة مازال لم يفت الاوان بامكانك ان تتدارك الامر

ربما بحكم تربيتك انت تخاف من المجتمع و كل ما هو جديد...ربما انت في الجامعة لان الامر اتى بصفة تلقائية يعني الوالدين يدخلوك الى المدرسة في سن 6 سنوات و يكفي ان تدرس لتنتقل الى السنة التي بعدها حتى تجد نفسك في الجامعة و يبدوا لك انك تتوجه نحو المجهول بعدها

عليك ان تعالج نفسك و تطلب المساعدة اظنك من النوع الدي لا يتحدث ابدا عما في داخله
و تبدوا دكيا لان نقذ الذات من علامات الفطنة

كما انه يجب ان تعرف ان طريقة تفكيرك ستتغير كن واثقا من هاذا...ما تكرهه الان قد تفعله بعد سنوات

ولكي يكون تدخلي مفيدا....بما انك لاتحب الاتصال بالمجتمع و لديك وقت فراغ زائد خاصة في زمن الكورونا...قم بالعمل على الانترنت هناك من يكسب جيدا و من البيت و بسهولة يكفي ان لا تمل و تصبر

اما الجسم الهزيل فعليك ممارسة الرياضة سيتقوى جسمك و ينتعش عقلك الامر مجرب

الفراغ يقتلك لو انشغلت لذهب كل هذا الالم

[❣سڪڕ❣]

خويا والله غير اك محبط ومكتاب هادا ماكان يعني حالة نفسية عابرة
++ مكاش لي زاد متعلم روح شوف حياتك تفاءل اقرى في برامج تطوير الذات اون لاين
حاول تتعلم وستستطيع لنو مكاش مستحيل
ثق في نفسك فحسب ....