بمناسبة شهر رمضان.... دورة طبخ للمبتدئات

[زينب 83]

بارك الله فيكم غالياتي مزال وصفات طاجين لكباب ، بونارين ، الجبن ، الجلبانة ، كل واحدة تحطلنا طريقتها و اسراراها

[أم ياسين الزهراء]

اسفة متاخرة بزاف بصح اكيد راح نلحق وبارك الله فيك اختي زينب

اولا حبيت نحطلكم طريقتي في طاجين الحلو واللي هي مختلفة تماما على الكل ونضن وانا متاكدة بلي واحد مايدير كيفها لاني سالت شحال من واحدة ويقولولي مانديروهش هكى المهم هدي طريقتنا في دارنا والفضل طبعا لماما الله يشافيها يارب


اولا في قدرة نحط اطراف لحم غنمي لازم ونفضلهم بلا عضم ولا شحم ونرمي عليهم حوالي زوج كيسان سكر في الحقيقة نخدم بعيني بصح حبيت نوصل الفكرة وندير عليهم نص مغرف صغيرة تاع قرفة وشوي زبدة ونقص النار ونخلي الكل يتكرامليزا وطبعا مع التحريك ونعس لايتحرق السكر ونبقى نحرك كيشغل راح ندير كراميل حتى يدوب السكر الكل ويحمار وفي هداك الوقت نرمي عليه حوالي زوج مغارف ماء الزهر طبعا راح يكشكش فهمتو كيشغل نخدم في العسيلة وكيدخل البة تاع الماء الزهر ثمى نزيد الماء مانكثروش حسب واش عندنا من العين والزبيب وكينرمي الماء نرمي عود قرفة وحبات من النجمة ومن جهة اخرى نكونو غسلنا العين او البرقوق هو الزبيب وحطيناهم يتشمخو في ماء مخلط مع ماء الزهر ونخلوهم يتنفخو وكينمرقو الطاجين نرمو كلش في القدرة يعني مانصفوش العين والزبيب بالعكس نخلو النكهة وكلش يطيب مع بعضاه ونغطو القدرة ونخلوها طيب علة نار متوسطة ومين داك نطلو وفي الخير كتوصلي للمرق اللي تحبيه كاين اللي يحبو عاقد وكاين اللي عادي نص نص نطفي النار ونرمي فاني ومغرف عسل حر او عادي حسب الموجود ومغرف ماء الزهر او الورد ونغطي يايمى واش نقلكم الريحة والبنة وكلش واللي تحب المشماش انا نغليه وحدو وكيقريب يطيب الطاجين نرميه في المرق باش يرفد النكهات وحتى شباح الصفرى قبل مانطفي بدقيقة نحطها في الطاجين نموت على ريحة اقرفة وهكى نتاكد راح تدخل البنة في كلش

وادا شفتي مرقتك مايهة بزاف تقدري تزيدجي السكر عادي ماتخافيش

هدي طريقتنا وناكدلكم امممممممممممممم واللحم يطيب هايل وانا مالفة نخدم كمية كبيرة ونحط في بوايط ونجبد كل مانستحق وعمري لانسخنو ويجي روعة

[أم ياسين الزهراء]

المرة الماجية نحطلكم طريقتي في الكفتة او المثوم وشطيطحة لحم

[x ام رحاب x]

زينب راني حابة انحط طريقة طيابي بصح راني نجمل في الصور باه اتكون كل طبخة ومعاها صورتها

[أم ضياء عبد الرحيم]

صباحكم فل و ياسمين
زينب ما شاء الله عليك راكي مزهية القسم بأفكارك المتميزة ربي يفرحك و يهنيك
منين فتحتي الموضوع و انا من المتتبعات و إستفدت الكثير من حراير المنتدى
أول فكرة هزيتها فكرة أم رحاب للفارميسال باش ما تتعجنش كي نزيدوها للشربة جربتها و النتيجة رائعة حتى كون تصبح الشربة و تعاود تتسخن الفارميسال تبقى كيما هي شكرا حبيبتنا أم رحاب و إن شاء الله نزيد نهز أفكار كثيرة من عند الأخوات
أخواتي كون تفيدونا بأسرار الطهي بصفة عامة كيفاه يجي بنين أخوات بزاف يكون عندهم كل خير و يتبعوا الوصفات بحذافيرها و مع هذا تجيهم المالكة صامتة و أخوات من القليل يخرجوا أطباق رائعة
و على سيرت المالكة الصامتة كانت أمي تحكيلنا واحد النكتة عل الماكلة الي تتمرق بكمية كبيرة من الماء تجي صامتة
واحد الراجل تزوج بإمرأة ما تعرفش اطيب دخل الكوزينة للقاها اطيب و القدرة تالمو معمرة بالصوص فاضت و تسيح قال لمرتو باستهزاء

إيه كل مراقة مرزاقة (يعني المرأة الي تمرق بزاف يجي الرزق على يديها) بالطبع هو يتمسخر بها هي مسكينة فرحت قاتلوا أملا ما شفتيش واش رميت ع الطاقة (النافذة)
ثاني الخبز و الكسرة بزاف بنات عندهم مشكل في طريقة العجن و المقادير
كيفاه تتعلم الأخت القيس بالعين كيفاه طريقة العجن الصحيحة
كون كل أخت تعطينا طريقتها في التحضير بالتفصيل
و الأشياء التي تبالنك بديهية كاين أخوات ما يعرفوهاش
راكم تقولوا كي عاد انتبهتي لهذه الأمور ابداي انتي و فيدينا
نقولكم إذا حضر الماء يسقط التيمم و كي كاين الشافات أنا نقد على كرسي الطالب و نتعلم

[*أم سجى*]

المشاركة الأصلية كتبت بواسطة جيادا

صباحكم فل و ياسمين
زينب ما شاء الله عليك راكي مزهية القسم بأفكارك المتميزة ربي يفرحك و يهنيك
منين فتحتي الموضوع و انا من المتتبعات و إستفدت الكثير من حراير المنتدى
أول فكرة هزيتها فكرة أم رحاب للفارميسال باش ما تتعجنش كي نزيدوها للشربة جربتها و النتيجة رائعة حتى كون تصبح الشربة و تعاود تتسخن الفارميسال تبقى كيما هي شكرا حبيبتنا أم رحاب و إن شاء الله نزيد نهز أفكار كثيرة من عند الأخوات
أخواتي كون تفيدونا بأسرار الطهي بصفة عامة كيفاه يجي بنين أخوات بزاف يكون عندهم كل خير و يتبعوا الوصفات بحذافيرها و مع هذا تجيهم المالكة صامتة و أخوات من القليل يخرجوا أطباق رائعة
و على سيرت المالكة الصامتة كانت أمي تحكيلنا واحد النكتة عل الماكلة الي تتمرق بكمية كبيرة من الماء تجي صامتة
واحد الراجل تزوج بإمرأة ما تعرفش اطيب دخل الكوزينة للقاها اطيب و القدرة تالمو معمرة بالصوص فاضت و تسيح قال لمرتو باستهزاء

إيه كل مراقة مرزاقة :d(يعني المرأة الي تمرق بزاف يجي الرزق على يديها) بالطبع هو يتمسخر بها هي مسكينة فرحت قاتلوا أملا ما شفتيش واش رميت ع الطاقة (النافذة)
ثاني الخبز و الكسرة بزاف بنات عندهم مشكل في طريقة العجن و المقادير
كيفاه تتعلم الأخت القيس بالعين كيفاه طريقة العجن الصحيحة
كون كل أخت تعطينا طريقتها في التحضير بالتفصيل
و الأشياء التي تبالنك بديهية كاين أخوات ما يعرفوهاش
راكم تقولوا كي عاد انتبهتي لهذه الأمور ابداي انتي و فيدينا :d
نقولكم إذا حضر الماء يسقط التيمم :d و كي كاين الشافات أنا نقد على كرسي الطالب و نتعلم

شكرا اختي باااارك الله فيك بالفعل بما أنه موضوع خصيصا للمبتدءات نحتاج فيه لنصائح وتوضيحات اكثر عكس مراني نشوف هنا راهم غير المحترفات يحطو فأطباقهم ....نتمنى لي عندها أسرار للطبخ ونصائح تحطهم هنا تفيد بيهم خصوصا وأن الموضوع للمبتدءات شكرا

[أم ضياء عبد الرحيم]

نسيت نطلب حاجة كون تحطولنا أفكار لاطباق إقتصادية و ركزوا مليح على اقتصادية :d

[سر سعادتي..]

بارك الله فيكن....والله موضوع مميز مثل صاحبته....استفدت منكن كثيراااااااااااااااااااااااااااااااا ربي يعطيكم ما تتمناو

[أم ياسين الزهراء]

واله جيادا ضحكتيني ههههههههه وباش نفيدك من خبرتي المتواضعة في الطبخ كانت ماما دايما توصيني وتعيط عليا وتقلي الخضرة عبارة ماء بمعنى مانكثروش فيها الماء والمقصود مانكثروش الماء في الطبخ هو اللي يسمط الماكلى وادا حدث وكثرنا الماء كاين الحل نقفلو القدرة نص قفال يعني نحطو المغلاق نص ونقو النار راح تخثار الماكلى وباش الماكلى تجي بنينة هو التقلية نقلو القدرة مليح مليح ونمرقو بماء سخون وكل مانتفكر نفيدكم والحمد لله ماكلتي بنية حوحو يشكر رحو هههههههههههههه واصدقكم القول استفدت بزاف من منتدى الجلفة

لي عودة

[زينب 83]

هههههههه جيادا فكرتيني بروحي كي كنت نتعلم ما نجي نخثر الماكلة حتى نهبل ، ... حقا اذا كنت انت يا جيادا ماشي شاف شكون الشاف 😊😊😊
ام ياسين اكيد ماكلتك عسل يا عسل
الاخت امال 95 هذا الموضوع ليس لوضع الاطباق هو لجمع وصفات و اسرار طيابات تكون معروفة باه تكون بداية للمبتدئات و انا في اول الموضوع قلت الموضوع مفتوح للجميع و كل واحدة تسأل واش تحب ، و على فكرة ماشي المبتدئات برك يتعلموا انا عن نفسي تعلمت بزاااف حوايج منهم طريقة ام ياسين في شربة فريك امممظظظ و فكرة ام رحاب تاع الدويدة و الحريرة لي عمري درتها ووووووو

هيا اذا عندك اسئلة اتفضلي حبيبتي

[زينب 83]

اتذكرت بعض الاسرار

للمرق الابيض شوي موتارد في التقلية يعطيها بنة هايلة
لصلصات الطماطم كيما تاع البيتزا نزيد ملعة قحوة سكر او عسل ينحيلها الحموضة و يعطيها طعم تحفة

اي عجينة في خميرة فورية لازم تكون طرية و تلصق في اليد باه كي طيب جي هشوشة و الفرن لازم يكون سخون مليح


الكسرة العادية مالازمش تكون جارية لا نعجنوها باليابس باه جي مقرمشة و و واقفة

للبقوليات و للحم العاصي نزيدو 2 او 3 نواة تمر للمرق راح يطيبو تمتم بصح ماتنساوش تنحوهم في الاخير ههههههه

السلاطة نقصوها بيدينا خير من السكين باه ماتكحالش و تذبل

الدبشة و المعدنوس نحفظوهم في قرعة بلاستيكية و نغلقو عليهم راح يبقاو مدة طويلة معانا

كي نطيبو في لاكوكوت الماء لي نزيدوه يكون فوق الربع شوي مانكثروش بزاف


مرق تاع الفطير او المسمن نزيدلو ملعقة صغير سكر


باه مانكثروش الطماطم المصبرة في المرق نحطو فلفل حلو مرحي يعطينا اللون الجميل بلا حموضة

كاشما نتفكر نزيد

[أم ضياء عبد الرحيم]

صباحكم فل
أختي أمل خليك معنا إن شاء الله تستفادي و أي سؤال الأخوات ما يبخلوش
أم ياسين و زينب حبيباتي شفتوا كيفاه بديتو تخرجوا في الأسرار :d
زينب انا قلت كي عاد دورة للمبتدئات كون بديتي بالاساسيات يعني من سنة أولى طبخ هكذا البنات الكل يستفاد
و انا عندي سؤال بخصوص قلب اللوز وين نسكن ما كنش دشيشة قلب اللوز واش نستعمل في مكانها الدقيق الخشين أو المتوسط
انا كنت نستعمل الخشين لكن يجيني معجن و يبقى ابيض من الداخل مع أنه نطيبوا مليح و المرة الأخيرة جاتني فكرة حمصت الدقيق شوية في المقلاة كيما نديروا الرفيس محمصتوش بزاف غير شوية برك قيس ما خذى لون و جا أحسن واش رأيكم و واش من نوع نستعمل

[زينب 83]

المشاركة الأصلية كتبت بواسطة جيادا

صباحكم فل
أختي أمل خليك معنا إن شاء الله تستفادي و أي سؤال الأخوات ما يبخلوش
أم ياسين و زينب حبيباتي شفتوا كيفاه بديتو تخرجوا في الأسرار :d
زينب انا قلت كي عاد دورة للمبتدئات كون بديتي بالاساسيات يعني من سنة أولى طبخ هكذا البنات الكل يستفاد
و انا عندي سؤال بخصوص قلب اللوز وين نسكن ما كنش دشيشة قلب اللوز واش نستعمل في مكانها الدقيق الخشين أو المتوسط
انا كنت نستعمل الخشين لكن يجيني معجن و يبقى ابيض من الداخل مع أنه نطيبوا مليح و المرة الأخيرة جاتني فكرة حمصت الدقيق شوية في المقلاة كيما نديروا الرفيس محمصتوش بزاف غير شوية برك قيس ما خذى لون و جا أحسن واش رأيكم و واش من نوع نستعمل

انا الفكرة جاتني فجاة يعني ماخممتلهاش المهم رانا استفدنا ما شاء الله
لقلب اللوز استعملي نص غليظ راهو يجي بين المتوسط و الغليظ و سمعت مرة واحدة قالت نديرو بالكسكس و الله اعلم

[جنة الفردوسْ]

هاذي طريقتي في طاجين الجبن
نقليو 250غ لحم مع نص حبة بصلة و2 ثوم فلفل اسو دو كسبر والملح ونزديلو معدنوس
الان في صحن نخلط 2 ملاعق كريمة طازجة 2 ملاعق خبز مرحي مع فنجان حليب وحبة فرماج شاف والا اي فرماج تحبي ورشة فلفل كحل و ضيفيهم للحم المقلي وامباعد حطيهم في صحن وامباعد خلطي 3 بيضات ضيفلهم ملح ومعدنوس وصبيهم فوق الخليط تاعنا ورابي شوي فرماج روج فوقهم والى الفرن

[جنة الفردوسْ]

اختي زينب الف شكر على الاسرار والنصائح وكلش والله اني نستفاد منك اخر......ربي يجعلها في ميزان حسناتك ويعوضك كل خير
انا كوني مبتدئة بفضل المنتدى اني نتعلم في بزاف حوايج والحمدلله