صباح الخير جميعا
بما أنكم ما خيرتوش الوصفة فأنا اخترت البيتزا يالله كل وحدة تحط طريقتها و نصائحها و اسرارها
بالنسبة ليا احنا في الدار يحبوا البيتزا رقيييييقة و تقرمش و هاكم الوصفة ديالي
ندفي كاس لبن و نص كاس ماء على نار قليلة و كي ما يكونش عندي اللبن نعوضهم بحليب
نحط فيهم ملعقة سكر و ملعقة كبيرة خميرة الخبز و نخلطهم
نحكم زوج كيسان فرينة نحط شوية ملح و نحكهم مليح بشوية زيت تقريبا فنجان صغير
ثم نلم بالخليط تع الخميرة و اذا شفتها محتاجة ماء او فرينة نزيد شوية المهم نتحصل على عجينة طرية تلصق شوية
انا مانعجنهاش بزاف و لكن نخليها تريح بزاف
و غالبا نخدمها الصباح نخليها نصف ساعة بره ثم نحطها في كيس في الثلاجة و العشية نطيبها
بالنسبة لصلصة الطماطم نرحي الطماطم حب بعد ما نقشرها طبعا قدر الامكان و نطيبها مع شوية ملح و قليييل من السكر و ثوم و نعناع ناشف و ملعقة طماطم مصيرة و شوية زيت السر ديالها هو اني نغطيها و كل شوي نحركها و نخليها تطول بزاف في الطياب حتى تتسبك و تطيب ملييييح و تطلق بنتها و كل ما طولت تجي احسن اقل شيء ساعة و اذا شفتها نشفت خلاص نزيد شويييية ماء و نزيد نخليها تطيب
نوليو للعجينة نطرحها رقيقة خلاااااص و نحطها في السنيوة و بش ما تتنفخش نثقبها بالشوكة مليح مليح
كي يكون عندي الوقت ندخلها هكذاك دون الصلصة في فرن سخون نطفي من التحت و نشعل فقط من الفوق و نخلي الوجه تاعها ينشف مليح
نخرجها و ندهنها بشوية موتارد و نحط الصلصة اللي يستحسن ما تكونش جارية بزاف لاني كيما قلت لكم الدار يحبوها رقيقة و تقرمش
و نزينها حسب الرغبة و ندخلها الفرن سخون تطيب مليح و كي تخرج ندهنها بزيت الزيتون
و كي نكون مزروبة ندهنها مباشرة بالموتارد يعطيها ذوق و ما يخليش العجينة تجي مشمخة لانو يمنع امتصاص العجينة للسوائل
هذي كانت طريقتي المعتمدة لحد يوم امس و لكن قررت نغيرها لاني البارح جربت طريقة جديدة هبل عليها زوجي مع انو ماشي من عشاق البيتزا و كذلك اختي و اولادي يموتوا عالبيتزا و هاذ الطريقة عجبتهم بزااااف
واش عملت بالضبط
عملت الخبز العربي بطريقة سهلة جدا
دفيت نصف كاس ماء حطيت فيه ملعقة صغيرة سكر و ملعقة خميرة الخبز و خلطتهم مليح
زدت عليهم علبتين ياغورت طبيعي بدرجة حرارة الغرفة و ثلاث ملاعق كبيرة زيت خلطتهم مليح
و لميت بالفرينة و في الخير زدت ملح عجنت شوية فقط يعني حتى صارت عجينة طرية و ملساء و حطيتها في كيس و خليتها ترتاح لمدة ساعة بالتمام
قسمتها كريات و غطيتهم شوية برك حتى وجدت مليح أموري
حطيت الفرن يسخن و حطيت في الأسفل سنيوة ثقيلة مقلوبة
حليت بالرولو بمساعدة الفرينة الكريات حليتهم رقاق بصح ماشي بزاااف رقاق
حطيتهم في مناديل مرشوشة في الفرينة هاذي فوق هاذي حتى كملت الكمية و قلبت المجموعة باش الاولى تجيني من الفوق
خليتهم ريحوا شوية يعني غير نظفت المطبخ سريعا و جهزت حالي
و طيبت بالوحدة نفتح الفرن نحطها و نغلق الفرن و نخليها حتى تنتفخ و نقلبها و نعاود نغلق الفرن و كي تطيب نحطها داخل قطعة قماش نظيفة داخل كيس بلاستيكي بش ما ينشفوش و ما ييبسوش حتى كملت الكمية
بعد ما بردوا عملت بيهم خبيزات بيتزا كل واحد وحدة و النتيجة اكثر من رائعة و حلفت ما نبدلهاش و الأهم ان قررت نعمل كمية كبيرة و نحطها في المجمد و كي نحب بيتزا مباشرة نزينها للفرن و تطيب بسرعة لانو كلش طايب العجينة طايبة و كذلك الصلصة
كانت هذه طريق و افكاري المتواضعة نتمنى تعجبكم و تفيدكم
و طبعا بانتظار طرقكم و وصفاتكم و اسراركم
انا راني خارجة و العشية باذن الله نجي نشوف وش حطيتو
( تقرير عن مشاركة سيئة )، و الموجودة أسفل كل مشاركة .
2015-08-03, 08:40
العرض العادي
