موضوع جذيذ - الصفحة 8

هبة الكوثر · 2012-04-28, 20:15

اقتباس:

المشاركة الأصلية كتبت بواسطة hakim3148

مساء الخيراختي ام مارية اسفة على الرد المتاخر والسبب راه في النتلانت لرااهي عيانة هذه الايام وحتى الميكرو راه معمر فيروس بسيف باش يمشي المهم بالنسبة لاولادي عندي 5بسلامتهم ولد و4بنات هما ما يتشرطوش اما ولدي مايحبش المعجنات وميحبش الشوربة وزوجي يبغي lلي بلا في الفرن اما عن المصروف مانعرفش نتصرف نهار نشري حوالي 100ال150الف بلاما ندير عشا مليح وكل يوم حاصلة دبري عليا مصروف شهر باكلاتوا ما يتجاوزش 2مليون حيث شهرية زوجي ماتتعداش 3مليون حبيت نقتصد بلاما نحرمهم هيا وريلي شطارتك

احكمي مليون اقسميها على 5 اسابيع تطيحك كل اسبوع 2000 الف واحكمي 500 الف روحي اشري قيص 100 الف لحم كونجيلي و 100 الف حوت و 100 الف لحم مرحي و100 الف اشري شوية خضروات واقصميهم في ساشيات ديري موني تاعك بحيث انك في الاسبوع يكون عندك يوم تطيبي فيهم معجنات ويوم تطيبي فيهم الحساء ويوم تطيبي فيه البقوليات منهار تديري فيه حوت ونهار تاع لاغراتان ونهار سبيسيال ماكلة بنينة شطاطح مثلا وكي تديري هادوك الماكلات لي ماتعجبهمش زيدي ديري غراتانتاع البطاطا بالحليب والفرماج ولا غراتان تاع البدنجان ولا شلايظ وحطي 200 الف تاع الخبز تاع كل يوم لمدة شهر صدقيني تلقاي روحك موفرة ملين في جيهة ماتمستش وهادوك الاظرفة رايحة تلقي فيهم دراهم ماتمستش وديري شهر خبي فيهم دراهم الماء والتريسيتي
هده مجرد راي ان شاء الله نكون عاونتك اختي والاسبوع الخامس على اساس انها ممكن تطول لاباي ولا كاش مايصرا بعيد الشر للطوارئ

hakim3148 · 2012-04-29, 11:43

صباح الخير خياتي وحباباتي نسيت ما قتلكش يا اختي ام مارية انه زوجي شارط عليا كل خميس جاجة محمر يعني عشا مليح وزيد ياخذ كل اسبوع 100الف مصروفو تاع دخان وقهاوي وزيد عندي بنتي نور البارح كان عندها عام يعني عيد ميلادها نشريلها علبة ليكوش كبيرة130الف والحليب والمشكلة الكبيرة ه الايام مرضنا والسبب الماء ملوث بدينا نشرو افري كل يوم فاردوا وهدا ما زادة الطين بلة
زيدي فيديني بافكار اخرى حسب التوضيحات الجديدة والسؤال لك كذلك يا ام دودة

نيفرتيتي. · 2012-04-29, 12:21

اقتباس:

المشاركة الأصلية كتبت بواسطة hakim3148

صباح الخير خياتي وحباباتي نسيت ما قتلكش يا اختي ام مارية انه زوجي شارط عليا كل خميس جاجة محمر يعني عشا مليح وزيد ياخذ كل اسبوع 100الف مصروفو تاع دخان وقهاوي وزيد عندي بنتي نور البارح كان عندها عام يعني عيد ميلادها نشريلها علبة ليكوش كبيرة130الف والحليب والمشكلة الكبيرة ه الايام مرضنا والسبب الماء ملوث بدينا نشرو افري كل يوم فاردوا وهدا ما زادة الطين بلة
زيدي فيديني بافكار اخرى حسب التوضيحات الجديدة والسؤال لك كذلك يا ام دودة

عيد ميلاد سعيد لبنتك نور
الحليب والكوش مافيهم حتى توفير وبالاخص عام كازال ماتفهمش والالي عنده طريقة انه تنحي الكوش من درك قادر ينفعك لانه بنت عمي العام اللي فات لقيتها منحية الكوش لولدها وهو عنده عام

ام مرية · 2012-04-30, 16:32

اقتباس:

المشاركة الأصلية كتبت بواسطة hakim3148

صباح الخير خياتي وحباباتي نسيت ما قتلكش يا اختي ام مارية انه زوجي شارط عليا كل خميس جاجة محمر يعني عشا مليح وزيد ياخذ كل اسبوع 100الف مصروفو تاع دخان وقهاوي وزيد عندي بنتي نور البارح كان عندها عام يعني عيد ميلادها نشريلها علبة ليكوش كبيرة130الف والحليب والمشكلة الكبيرة ه الايام مرضنا والسبب الماء ملوث بدينا نشرو افري كل يوم فاردوا وهدا ما زادة الطين بلة
زيدي فيديني بافكار اخرى حسب التوضيحات الجديدة والسؤال لك كذلك يا ام دودة

يا اختي راكم عايشين بذخ في الوقت الي رانا فيه لازم تديرو لزمان عقوبة
انا كنت راح نمدلك جدولي انا ولكن بدلت رايي كي شفت ضروفك
اختي احكمي الشهرية كل راس شهر واعملي اضرفة وحطي كل مبلغ في ضرف اي مبلغ نتاع الكهرباء في ضرف مغلق حتى ومازال وقتها ما تصرفيهش
مبلغ خلاص الماء وهكذا كل الالتزامات المالية تعمليلها ضرف وتحطي فيه المبلغ المستحق والي يبقى اقسميه
1 مبلغ للطوارئ حطيه بجية ما تصرفيهش تحت اي ضرف الى للضرورة
والباقي اعملي ليستة بلوازم القضيان نتاع الشهر ما تبخلي على ولادك ما تبذري اقضي قيس
راجلك جاجة محمرة كل اسبوع بزاف اعملوها كل اسبوعين وانا نفضل انك تعمليها كل شهر عشاء مرتب من مجميعو وفي الايام الاخرى هاديك الجاجة اعمليها على قداش من يوم
بنياتك راهم يكبرو لازمك تدخريلهم شوية اعمليلهم شحيحة يطمو فيها
وليدك فشيه صح ولكن مالزامش يتجاوز الذكر صعيب الى دللتيه لازم تزيريه
الماء ما تشري ما والو غليه مليح وخليه ينزل بعد ذلك عمريه في القراعي وخلي الشوائب الي نزلت منو ارميها
ليكوش والحليب ما نقدروش نقتصدو فيهم ولكن الحليب نتاع لويا يوالم بنتك راهي كبيرة
وليكوش زيديلها شوية حتى ل أوت ونحيهملها خلاص عام بزاف لازم تتعلم تخرج للفيسي حشاكم
الدخان لازم يبطلو راجلك اولا حرام ثانيا راه يعري
قوليلي على قضيانك واش تقضي كامل بالاك نلقاولك حل

ام انيس2 · 2012-05-03, 10:29

اقتباس:

المشاركة الأصلية كتبت بواسطة هبة الكوثر

احكمي مليون اقسميها على 5 اسابيع تطيحك كل اسبوع 2000 الف واحكمي 500 الف روحي اشري قيص 100 الف لحم كونجيلي و 100 الف حوت و 100 الف لحم مرحي و100 الف اشري شوية خضروات واقصميهم في ساشيات ديري موني تاعك بحيث انك في الاسبوع يكون عندك يوم تطيبي فيهم معجنات ويوم تطيبي فيهم الحساء ويوم تطيبي فيه البقوليات منهار تديري فيه حوت ونهار تاع لاغراتان ونهار سبيسيال ماكلة بنينة شطاطح مثلا وكي تديري هادوك الماكلات لي ماتعجبهمش زيدي ديري غراتانتاع البطاطا بالحليب والفرماج ولا غراتان تاع البدنجان ولا شلايظ وحطي 200 الف تاع الخبز تاع كل يوم لمدة شهر صدقيني تلقاي روحك موفرة ملين في جيهة ماتمستش وهادوك الاظرفة رايحة تلقي فيهم دراهم ماتمستش وديري شهر خبي فيهم دراهم الماء والتريسيتي
هده مجرد راي ان شاء الله نكون عاونتك اختي والاسبوع الخامس على اساس انها ممكن تطول لاباي ولا كاش مايصرا بعيد الشر للطوارئ

بارك الله فيك اختي الكريمة ربي يعطيك على قد نيتك
عجبني الرد تاعك وراني رايحة نجرب طريقتك لاني والله حاصلة في المصروف هههههه

sondse1 · 2012-04-29, 21:37

مساء الخيرات حبيباتي
واش احوالكم ان شاء الله بالف خير
واش راكي حبيبتي ام مرمورة وواش راهي مرمورة
حبيبتي ام امجد والله راني مع التوجاد للعرس و جامي لا ننساكم بالعكس كلكم في بالي و قلبي

كما وعدتكم هاقد عدت للموضوع
راح نمدلكم بعض الاقتراحات اتمنى يفيدوكم
اولا بالنسبة للتوجاد لسيدنا رمضان
تقريبا كيما حبيبتي ام مرمورة
1/ الفريك نقيوه و نغسلوه و نملحوه و نطرحوه في الشمس ييبس و من بعد نرحيوه
2/ الفلفل او ما يسميه البعض الحميص
نخدموه و نرحيوه مع الثوم و نطيبوه مع الطماطم و نخبيوه في دي ساشي في الكونجيلاتور
3/ المخللات مثل الفلفل و الخيار و الزيتون
4/ المعجون " سفرجل / تفاح / المشماش "
5/ الثوم نفصوه و نص نرحيوه و نص نخليوه حب و نجمدوهم
6/ العصير سواء عصير القارص ولا عصائر اخرى نخدموهم و نديروهم في قرع الماء و نجمدوهم
7/ الجلبانة نخدموها " نفصوها و نحطوها في قرع الماء و نجمدوها في الكونجيلاتور و كي نجبدوها تجي و اكنها غير كيف خدمتيها ""مجربة و ناجحة 100ب100 "
8/ الجاج نخدموه و نملحوه و نكونجليوه
9/ اللحم نقطعوه و نقسموه تاع المرقة وحدو و تاع الطاجين الحلو وحدو و تاع الغراتن ولا وصفات اخرى وحدو والى الكونجيلاتور
10/ التوابل ليها حصة ايضا و لكن كي نقربو على رمضان باه تبقا صالحة

و لي عودة باذن الله تعالى
مع تحيات اختكم مريومة

ام مرية · 2012-04-30, 18:35

مرحبا بيك اختي مريم سلسبيل عندك الحق التوامل مهمة جدا راح نقلكم على طريقتي في تحضيرها
انا نشريها حب من كل نوع
الكبابة والعرق الاصفر وسكانجبير فلفل اسود واخر ابيض زريعة القصبر وزيد حبة حلاوة والكمون والكروية وزريعة البسباس والعكري نقيهم مليح ونحمهم غير وية يعني قيس ما يسخنو ويبداو يطلقو الريحة ومن بعط نهرسهم في المهراز ونرحيهم في الرحاية يما عندها وحدة سبيسيال بالتوابل شغل نتاع بكري ما نصيبوهاش درك من بعد نغربلهم في السماد يعني سيار رقيق ونعمرهم في بايط سيتو
ونعمل من كل نوع باطة صغيرة يعني وحدة كمون وحدة كروية ...........الخ
ونشري القرفة عود نطحن النص والباقي نخليه عود نحب بزاف نعملو في الشربة نرمي نص عود يمد البنة هايلة وكذلك في القهوة نموت عليه
الرند لازم ماكاش الي ما يحبو ش ههههههه
ناخذو الثوم نفصوه ونملحوه ونحطوه يجف في قطعة قماش قطنية قبالة الشميسة حتي يجف نرحوه بودرة ونحطوه في بايط

نفس العملية للبصل
واي استفار راني في الخدمة

مريم سلسبيل · 2012-04-30, 18:47

يعطيك الصحة ام مرية

zahra ayoub · 2012-04-30, 19:15

السلام عليكم انا عضوة جديدة و حابة نكون كيما اختكم عجبتوني بزاف كيفاش تتشاورو في الصغيرة والكبيرة الحقيقة حتى انا عدت مدمنة على منتدى الجلفة علاجالكم

انا عندي اقتراح حول الاقتصاد في المصاريف مثلا كيما موالفة انا ندير كل شهر يشري زوجي الرافيطايما نحاول نخبي حوايج للشهر اللي يكون فيه فاتورة الكهرباء
و هكذا ندير مع رمضان
الحوايج اللي نخبيهم مثلا مواد التنظيف و الخل و الزيت و بعض المعجنات و الطماطم و الهريسة و......... كل مراة تعرف على حساب وش تقضي

المهم لحوايج اللي ما يفسدوش و هكدا في شهر رمضان مانشريش هاد لحوايج و نفضل باش نشري اللحم والدجاج والخضر و الفواكه

نصيحة اخرى
انا ما نحبش التبذير بزاف يعني كل شي بمقدار و الحمد لله الشهرية تكفينا و نفضلو باش نخبيو للزمان

نتمنى نكون فدتكم شوية و تقبلوني اخت ليكم

احبكم في الله

Oum_ahmed · 2012-04-30, 19:56

شكراااااااا علي الطرح المتميز

نيفرتيتي. · 2012-04-30, 20:12

التوابل في رمضان عندنا تكون هكا
راس الحانوت
كسبر كروية فلفل اسود فلفل ابيض كمون زريعة البسباس ورد وممكن نكون نسيت حوايج كي نتفكر نعاود نقلكم
فلفل عكري حار حلو كركم زعفران قرفة اعواد للمرقة حلوة مانحبهاش مرحية باه ماتكحلش المرقو حلوة تجي صفرة كمون مرحي زريعة البسباس تكون حب نحب نديرها للكسرة كمون اسود او السنوج كيما يقولو في بعض المناطق ثان للكسرة ثان نوجد كسبر حشيش نقطعو ونشيحو في الظل نخليه للزة ساعات مايكونش كاين هذا خير من ماكانش خلاص ثان فلفل اسود
التوابل تاع راس الحانوت وحدها هديك نقوها ونيبسوها في الشمس وبعد نرحيوها اما باقي التوابل في تكون كل وحدة وحدها
اما بالنسبة للفريك نشروه ونقوه ونرحوه ونصفوه الدقاقة تع الفرك نستعملوها كي قريب طيب الشربة باه نخثرو بيها الشربة ونستعملوها ايضا في ليبول تاع الكفتة احنا نديرو فرك ولا دقاقة مع الكفتة كاين اللي يدير الروز احنا لا
وكي نزيد نتفكر حاجة نقلكم

sondse1 · 2012-05-01, 09:34

اسعد الله صباحكم حبيباتي

بالنسبة للتوابل نتاع رمضان حنا نوجدو كما يلي

الفلفل الاحمر الحار و الحلو
الفلفل الاسود
الطماطم المصبرة
الفاح للمرقة الحمرا و للمرقة البيضا
الكزبرة المرحية
الكروية
الرند
الفلف الابيض
نجمة اليانسون
القرفة مرحية و العود
حبة الحلاوة
السينوج
الزعيترة
الثوم بودرة
الكمون
الكركم
الزعفران الشعرة
الزعفران بودرة
القرنفل
جوزة الطيب
الزنجبيل " سكنجبير"
الجلجلانية

مام نوجدو البودرة نتاع الفريك تنضاف للمرقة في النهاية تعطي بنة و تثقل المرقة

sondse1 · 2012-05-01, 09:42

بالنسبة لتجهيز البنات
انا نقوللكم على اختي ما كنا موجدينلها حتى حاجة
غير الذهب و شوي قماش جايبهم بابا في فرنسا و الحج و تونس و مناطق اخرى
يعني ماهيش جاهزة و كي تخطبت عدنا نجريو و زيد لقينا كلشي يحرق و المدة صغيرة بين الخطبة و العرس 7 اشهر برك

و انا بعدها عدت نوجد للبكري و ذرك كي تخطبت الحمد لله لقيت روحي جاهزة و ما بقاوليش غير الحوايج الخفاف
يعني لازم توجدو مليح للبنات نتاعكم للبكري باه كي يجيها مكتوبها تلقايها واجدة
مثلا تشريو الذهب و القماش و كاين حوايج ما يديموداوش كيما الملابس الداخلية و لي روب دو شومبر و ديزابيي
و تاني الحوايج الرقاق كيما الخيمارات و الاكسسوارات
تاني تقدرو تشريولهم السيشوار و الحداد و لي كوفر و تاني لي صاك
و تاني لي كوفرلو و الزور و التروسوات كاين دي مودال شابين و ما يديموداوش
تاني القماش نتاع التصديرة كامل لعرايس تلقاو التصديرة نتاعهم من القماش القديم
و كما الشرب مثلا ما يديموداش خلاص
اتمنى اني افدتكم ولو بالقليل
و لي عودة ان شاء الله

NOUR 1 · 2012-05-01, 10:14

شكرا ياسندس انت من اي منطقة في المسيلة عجبني الترسوللي حاطتيه في احد المواضيع ياريت تخبرني عنه حبيت نحكو على الاسواق الرخيسة المشهورة في كل منطقة هكذا لل حابيشري يكون عارف وين يروح

sondse1 · 2012-05-01, 10:50

اقتباس:

المشاركة الأصلية كتبت بواسطة nour 1

شكرا ياسندس انت من اي منطقة في المسيلة عجبني الترسوللي حاطتيه في احد المواضيع ياريت تخبرني عنه حبيت نحكو على الاسواق الرخيسة المشهورة في كل منطقة هكذا لل حابيشري يكون عارف وين يروح

العفو حبيبتي
انا من لمسيلة سنتر فيل
التروسو اللي حطيتو خادماتو انا ما شريتوش
و راني حطيت كيفية عملو في دورة التطريز بالورود

بالنسبة للاسواق

هنا في لمسيلة كاين 2 مشهورين بزاف و متجاورين
الاول لاسيتي حي وعواع المداني
و هو مجموعة من الحوانت قدام بعضاهم كاين الخاصين بالعرايس كيما زنقة العرايس
و فيهم نلقاو كامل الحوايج اللي تحتاجهم العروس من كفروليات و زور و كوات و تروسوات الى الفساتين نتاع الزفاف و نتاع الفيونساي و تاع التصديرة
و كاين الخياطين معضمهم في بني الزرقة
و تاني حوانت الخاصين بليكاش ريدو و الصالون ماروكان من اهمهم
محل اميرة فادي لصاحبيه فيصل و وليد
و تاني محل برج العرب
و كاين تاني محل قلعة بني حماد

اما بالنسبة للشيفون فمحلاتو ببني الزرقة القديمة

بالنسبة لمحلات التطريز نجد محل سندس و محل محمد و محلات اخرى
و لا ننسا محلات الالبسة و الاحذية و ايضا محلات الاواني و التحف و ايضا محلات مواد التنضيف و محلات مواد التجميل " لي كوسميتيك " متوزعين على كامل لاسيتي " حي وعواع المدني

اما المنطقة الثانية و هي بجوار لاسيتي و التي تسمى ب " بن الطبي "
و هو مجموعة محال مع بعضها في مجمع من طابقين بالاضافة للطابق الارضي
و فيه كل ما يخص الالبسة / الافرشة / الاحذية / الاواني

كما لا ننسى البازارات المتواجدة في حي 500 مسكن
و هي عبارة عن مجموعة محلات مع بعضها لبيع الالبسة و الاحذية و الافرشة

و كاين تاني محلات متوزعة في كامل المسيلة
يعني متفرقة مش في بلاصة وحدة

اتمنى نكون افدتكم