بمناسبة شهر رمضان.... دورة طبخ للمبتدئات

[زينب 83]

المشاركة الأصلية كتبت بواسطة نسمة صبح

سلام حبيباتي

المثوم جهتنا منديروهش لكن نحاول نتعلمو..كاين زوج اللي يجي احمر بالعكري و الكمون و الفلفل الاكحل ولا ابيض داراتو مرة وحدة عنابية و عجبني بزاااف جات لا صوص ماغون و بنيينة اللي عندها لا غوسات هك تقولي.

و حبيت نسقسيكم كي طيبو لا بات تاع لكيش اطيبوها من تحت مبعد تحطو الحشو و لا من فوق و تحت خاطر دايما تبقالي ناقصة طياب ف النص..

اهلين حبيبتي
انا نطيبها مليح برك حافظي على اللون ماتحمريهاش باه المرة الثانية ماتيكش يابسة و طايبة بزاف
المكونات تاع الكيش عادة يكون طايبين يعني المرة الثانية ندخلوها للفرن ياه يطيب البيض او البيشامال او يذوب الجبن هذا ماكان

[ام يحيى عبد الصمد]

اختي نسمة الصباح المثوم يجي صوص بيضاء نعطيك طريقته حبة بصل مع طرف لحم مغرف فلفل اكحل ومغرف مسكير جبين وحد جنبو دجاج ملعقتين كبار سمن ورند وكمشة حمص كي يطيب لحم نديرو لي بوليت نتاع لحم تكوني درتيلهم سنة ثوم فلفل اسود وملح وتحمصي في المقل شنبنيون حب كامل مع ملعقة زبد متستعمليش شنبنون المقطع مهوش بنين وديريه في لصوص مع معدنوس صدقيني يجي رائع

[نسمة صبح]

شكرا حبيبتي زينب على الاجابة والاهتمام و شكرا لفتحك الموضوع..في ميزان حسناتك ..نحن بالمتابعة

[آسيا 25]

السلام عليكم
أختي زينوبة تكرمي راح نحطلك طريقتي في طاجين الشواء:
نحط قطعة لحم مليحة و فخد دجاج يتحمرو شوية في ملعقتين زيت باش يطلقو بنة الشواء ثم نضيف بصلة كبيرة مرابية و سنينات ثوم و ملح و فلفل أبيض و زنجبيل و حمص مرنخ (أما إذا كان طايب نخليه للأخير) و نلوحو و نخلي كلش يتقلى مليح ثم نمرق بماء ساخن و نخليها تغلي و في هذه الأثناء نوجد كرات الكفتة بمزج اللحم المفروم مع ملح فلفل أبيض ثوم شوية زنجبيل معدنوس مقطع رقييييق, بيض و شابلير ناعمة مع إضافة ملعقة نشاء ونعجن الكفتة بكف يدي مليح و تشكليها دوائر أو أصابع كيما تحبي أنا نفضل أصابع و نحشيها بقطعة جبن في المنتصف ثم نحمر أصابع الكفتة في شوية زيت فقط و لما يخثار المرق نلوحهم 5 دقائق لا أكثر و كاين ناس ما يلوحوهمش فالمرقة خلاص فقط يسقيوهم في الأخير لكن أنا نحب الكفتة تكون طرية ثم نعمل العقدة اللي هي بياض بيض + معدنوس مقطع + عصرة ليمون و قليل من المرق نخلطهم و نظيفهم للقدر و نخلط و نطفي عليها .
هنا حبيت نضيف ملاحظة لازم الدجاج ينزع من القدر فور طهيه ما نخليهش حتى يطيب اللحم و من بعد يتفتتلي أنا نحتاجو مجمول, لأنو بعد طهي اللحم نحمرو هو و الدجاج في الفرن أمافي الأعراس عندنا في قسنطينة يبعتوه للكواش يحمرهولهم.
طريقة التقديم: في صحن عريض أو بلاط كيما نقولولو نحط فخد الدجاج في منتصف الصحن مع قطعة اللحم و نحط ساير داير الكفتة ثم نسقي بالمرق و نزين بالحمص و المعدنوس المقطع و أبراج الليمون و طبعا مع العصرنة اللي وصلنالها الناس رجعو كاين اللي يضيف الشمبينيون و اللي يضيف حلقات زيتون و يبقى كل واحد و إمكانياتو.
أتمنى أني أفدتكن حبيباتي سلام.

[ام اياد 2013]

طريقتي في شطيطة لحم
طراف لحم غنمي وبقري
بصل مبشور وسنينات ثوم مهروسين
فلفل اسود ملح شوية قصبر بودر شوية كمون حمص طايب نصف طياب ورقات رند
نحط الطراف نتاع اللحم نتاعي ونحط عليهم البصل وشوية زيت ونقليهم على نار قليلة
كي نشوفهم تقللو شوية نحطلهم الثوم والبهارات مع الملح والحمص ووشوية ماء ونغطيهم ونخليها تطيب على نار قليل منزدلهاش كامل الفرنو ومرة على مرة نطل عليها ونشوف الماء لنقصلها ونزيدها غير بالفنجان كي طيب نزيدلها فنجان ماء ونزيدلها على الفورنو تاخد خليات نتاع التعقاد ونطفيلها

[آسيا 25]

سلام
حبيت نحط صورة طاجين الزيتون كنت عملتو البارح و الوصفة حطيتهالكم من قبل فقط هنا أضفت لمسة عصرية و هي رحيت شوية زيتون مع شوية صدر دجاج و ملح و فلفل أبيض و ثوم ثم أضفت معدنوس مقطع و بياض بيض و شوية شابلير و عمرت مول السيليكون بالخليط و طيبتهم في الفرن حتى حمارو ثم نزعتهم و أضفتهم للمرق في الأخير غلاو شوية فقط و طفيت نتمنى يعجبكم كنت ناوية نزيد نصور الشريبة لكن للأسف طاحت البطارية تاع الهاتف و رحت حطيتو يتشارجا مي ماعليش مازالو اليامات تقبل الله صيامكم حبيباتي.

[*أم سجى*]

المشاركة الأصلية كتبت بواسطة آسيا 25

سلام
حبيت نحط صورة طاجين الزيتون كنت عملتو البارح و الوصفة حطيتهالكم من قبل فقط هنا أضفت لمسة عصرية و هي رحيت شوية زيتون مع شوية صدر دجاج و ملح و فلفل أبيض و ثوم ثم أضفت معدنوس مقطع و بياض بيض و شوية شابلير و عمرت مول السيليكون بالخليط و طيبتهم في الفرن حتى حمارو ثم نزعتهم و أضفتهم للمرق في الأخير غلاو شوية فقط و طفيت نتمنى يعجبكم كنت ناوية نزيد نصور الشريبة لكن للأسف طاحت البطارية تاع الهاتف و رحت حطيتو يتشارجا مي ماعليش مازالو اليامات تقبل الله صيامكم حبيباتي.

الله يبارك عليك يعطيك الصحة عجبني الطبق لي حطيتيه عندي هدوك لي مول باذن الله نجربو ....ولي عودة لك نقرعج عالمقادير والطريقة اذا مفيش مشكل

[هبة ام عبدو]

مكعبات صدر الدجاج 2 مغارف ماغرين .مغرف ريت نقلوهم رشة ملح فلفل اسود على نار هادية مع 2 حبات نجمة الارض حبة بصل مرشوق فيها حبات قرنفل وعود قرفة رشة زعفران كي يتقلو مليح نحيو البصلة ونمرق كي يغلي ما نزيدلو كاس سكر ونخليه يطيب ننقع العينة ومشمش وزبيب وكيوي في ماء ساخن 20 د ومن بعد نزيدهم يطيبو ومعاهم ونزيد كاس سكر ونخليه يطيب سر نجاح الحلو متغطيش عليه كي يطيب كلشي يلزم مايكون خفيف مايكون ثقيل بزاف نطفي عليه ونضيفلو كاس صغير ماء الزهر
شهية طيبة
بقية الصور محبوش يطلعو معلباليش وعلاه

[الماسة النادرة]

لبنات نتمنى نعاونكم اذا حبيتو

[*أم سجى*]

خياتي قولولي واش هي التوابل المناسبة للشربة؟واش هي التوابل المناسبة للكباب؟واش هي التوابل المناسبة لطاجين الزيتون؟

[حياتي كلها امل]

بنسبة لتوابل التى نحطهم في شربة فريك فلفل اسود قرفة زنجبيل راس الحانوت والعكري .
الكباب فلفل اسود شويه قرفة وكركم

[حياتي كلها امل]

طريقتي في طبخ طجين الجلبانة نضع البصل والتوم والملح والفلفل والزنجبيل وراس الحانوت والزيت ونخليها تتقلى ثم نضيف طماطم مرحيه وشويا طماطم مصبرة ونمرق بشوية ماء ثم نضيف الجلبانة ونتركها طيب بعدما طيب نكسر عليها البيض بلا مانخلط ودير شوية معدنوس من الفوق وبصحتكم

[ام هدول]

شباح الصفرة
كنت متوخرة شوية بصح حبيت نشارك بهاد الوصفة على اوصولها ورايحن تنجحو فيها ان شاء الله
اولا نحضر العجينة ودللك بوضع 3كيلات لوز مرحي رطب +كيلة سكر رطب ونخلط مليح +صفار البيض بالشوية حتى تتللم ماتكون طرية بزاف ماتكون يابسة ونتركها ترتاح بجيه ونحضر المرق بوضع البصل في طنجرة +اللحم قطع صغيرة +القليل من الزبدة +شوية ملح وشوية زعفران +شوية فلفل اكحل +قرفة عود +الطيب ونقلي كلش مليح ونضيف الما حتى يتغطى اللحم ونتركوه يطيب
لما يطيب اللحم نضيف كمية قليلة من السكر باش ما ييبسش اللحم او يسود نتركوه مدة ونحضر شباح الصفرة ناخد كمية من العجينة ونشكل بيدينا ادا اردتي مثلثات او نجمات ونستطيع ان نشكل بالطابع ثم نضع الحبة في بياض البيض لي كنا خلطناه شوية ونرمي في الزيت ساخن ونقطرهم ونخليهم يبردو ونرجعو الى المرق ننزع منه اللحم ونصفيه ونتركوه يرتاح حوالي ربع ساعة ومن بعد نردو الى الطنجرة بالشوية يكون الشوائب تاعو قعدت في القاع والمرق يكون صافي
نحطو على النار ونضيفو السكر ودلك 3كيلات مرق بكيلة سكر ونتركوه على النار حتى يعقد
نحكم حبات شباح الصفرة ونمسحهم بالورق المطبخ او طرشونة با ش نحي الزوائد ويكون شكل الحبة جميل لما يعقد المرق نرمي الحبات داخل المرق ونطفي مع اضافة مغرفة ماء ورد ونغطي ونخليهم يتشربو المرق وكدلك نضيف قطع اللحم ....وشهية طيبة



هاد الطبيق ديالي في اول رمضان اضفت مع شباح الصفرة العين يعني البرقوق والزبيب واللوز صراحة جا روعة
ملاحضة فقط حمرة شوية حبات شباح الصفرة .وهي نورمالمون تجي صفرة ماعليش ...... االبنة هايلة

[ام حمزة22]

السلام عليكم
اسفة اختي زينب على التاخير النت راهي تقيلة وما ساعدتنيش باش نتواصل معاكم
المهم ان شاء الله نفيد المبتدئاء بالمعلومات لي عندي
اولا حبيت نقوللكم انا ما نستعملش بزاف التوابل
التوابل الموجودة عندي هي الفلفل اكحل والقرفة هادو يدخلو لكل اطباقي والكمون نستعملو للمتوم او لشطاطح والكروية لشرمولات مثلا زرودية مشرملة او قرعة مشرملة ....الخ
وعندي فلفل دريس نستعملو للمرق الحمراء الحارة ممممممممممم
وعندنا حنا فالعاصمة راس الحانوت خاص وما فيهش بزاف التوابل القرفة و فلفل اكحل وجوزت طيب وكبابة و قرنفل نستعمل هاد راس الحنوت لشطيطحة جاج او لحم وكدالك لطمينة يجي رووووعة جربوه لبنات وردولي لخبر

نتكلم على الشوربة الاصلية العاصمية
في قدر نضع اللحم مع البصل وحبة قرعة مقطعة رقيقة وزيت وقرفة وفلفل اكحل وفلفل عكري وحميصة وحشيش شوربة نقلي الكل حتى يدبال ثم نضيف شوية ماء ونخليه يطيب على نار قليلة نحط على القدر مسكاس فيه طماطم حب بعد ما تدبال نرحيها ونضيفها للمرق ومرة على مرة كي نشوف المرقة شربت نضيف شوية ماء ونبقا نضيف فالماء حتى نشوف ان اللحم دخلو طياب ما ننساش نحضر الفريك نقيه ونغسلو ونحطو بجيه باش نضيفو بعد ما نمرق والا درناها بالفارميسال نضيفو في اخر لحضة نرجعو لشربة الفريك بعض ما ضفنا لفريك وبعد ما غلا نضيف الطماطم المصبرة وما ننساش نحرك مرة على مرة باش ما يلسقناش لفريك
بعد ما يطيب الفريك ونشوف وندوق الا لازملنا نضيفو الماء او نضيف القليل من القرفة وفلفل اكح او ملح الا جات شربتنا بنينة ماكلاه نضيفلها هدا التوابل نضيفلها شطبة نعناع وشوية حسيش شوربة ونطفي عليها

اما طاجين المثوم
ناخد طنحرة نحط فيها اللحم انا نفضل لحم غلمي لي يوالم بزاف مع هاد الطاجين وساعات ندير خليط لحم غلمي وبقري نضيف للحم حميصة و درسة متكونة من ثوم بكمية معتبرة وكمون وملح ندرس هاد المكونات ونحط النصف في الطنجرة على اللحم والنصف التاني نضيفو على اللحم المرحي نضيف في الطنجرة نضيف بصلة مقطعة رقيقة وزيت ما نكثرش بزاف لان اللحم راح يتلق ليدام نخلي الكل يتقلة ثم نضيف الماء ما نكثرش حتى يتغط اللحم نخلي اللحم يطيب بعد ما يطيب نمرق وبعد ما يغلي نضيف الكويرات نتاع اللحم المرحي لي ضفنالو الدرسة ونلمو بالبيض حبة بعد حبة حتى يتلم ونفدر نكون كويرات لي نضيفهم فالمرق وما نخليهمس بزاف يغلو فالمرق حتى ما ينحلوش لان الاحم المرحي غلية وحدة ولا 2 ويطيب تم تم

اما شطيطحة جاج او لحم

ناخد قطع اللحم نحطهم في طنجرة نضيفلهم الدرسة لي متكونة من فلفل دريس وثوم وملح نشمخ فلفل دريس ونقيه من الزريعة ثم نضيفلو الثوم وندرسو حتى يولي مثل البوري نضيفو على اللحم من بعد نضيف الحميصة و الزيت وفلفل عكري وادا حبينا نضيفلو الحرور دو 5 توابل نخلي الكل يتقلة من بعد نضيف الماء حتى يطيب اللحم الا حبيتو ضيفو ربع ملعة طماطم مصبرة وتقدرو تستغناو عليها

لي عودة بادن الله الا سمحتلي النت

صح فطوركم

سلاااام

[*أم سجى*]

المشاركة الأصلية كتبت بواسطة ام حمزة22

السلام عليكم
اسفة اختي زينب على التاخير النت راهي تقيلة وما ساعدتنيش باش نتواصل معاكم
المهم ان شاء الله نفيد المبتدئاء بالمعلومات لي عندي
اولا حبيت نقوللكم انا ما نستعملش بزاف التوابل
التوابل الموجودة عندي هي الفلفل اكحل والقرفة هادو يدخلو لكل اطباقي والكمون نستعملو للمتوم او لشطاطح والكروية لشرمولات مثلا زرودية مشرملة او قرعة مشرملة ....الخ
وعندي فلفل دريس نستعملو للمرق الحمراء الحارة ممممممممممم
وعندنا حنا فالعاصمة راس الحانوت خاص وما فيهش بزاف التوابل القرفة و فلفل اكحل وجوزت طيب وكبابة و قرنفل نستعمل هاد راس الحنوت لشطيطحة جاج او لحم وكدالك لطمينة يجي رووووعة جربوه لبنات وردولي لخبر

نتكلم على الشوربة الاصلية العاصمية
في قدر نضع اللحم مع البصل وحبة قرعة مقطعة رقيقة وزيت وقرفة وفلفل اكحل وفلفل عكري وحميصة وحشيش شوربة نقلي الكل حتى يدبال ثم نضيف شوية ماء ونخليه يطيب على نار قليلة نحط على القدر مسكاس فيه طماطم حب بعد ما تدبال نرحيها ونضيفها للمرق ومرة على مرة كي نشوف المرقة شربت نضيف شوية ماء ونبقا نضيف فالماء حتى نشوف ان اللحم دخلو طياب ما ننساش نحضر الفريك نقيه ونغسلو ونحطو بجيه باش نضيفو بعد ما نمرق والا درناها بالفارميسال نضيفو في اخر لحضة نرجعو لشربة الفريك بعض ما ضفنا لفريك وبعد ما غلا نضيف الطماطم المصبرة وما ننساش نحرك مرة على مرة باش ما يلسقناش لفريك
بعد ما يطيب الفريك ونشوف وندوق الا لازملنا نضيفو الماء او نضيف القليل من القرفة وفلفل اكح او ملح الا جات شربتنا بنينة ماكلاه نضيفلها هدا التوابل نضيفلها شطبة نعناع وشوية حسيش شوربة ونطفي عليها

اما طاجين المثوم
ناخد طنحرة نحط فيها اللحم انا نفضل لحم غلمي لي يوالم بزاف مع هاد الطاجين وساعات ندير خليط لحم غلمي وبقري نضيف للحم حميصة و درسة متكونة من ثوم بكمية معتبرة وكمون وملح ندرس هاد المكونات ونحط النصف في الطنجرة على اللحم والنصف التاني نضيفو على اللحم المرحي نضيف في الطنجرة نضيف بصلة مقطعة رقيقة وزيت ما نكثرش بزاف لان اللحم راح يتلق ليدام نخلي الكل يتقلة ثم نضيف الماء ما نكثرش حتى يتغط اللحم نخلي اللحم يطيب بعد ما يطيب نمرق وبعد ما يغلي نضيف الكويرات نتاع اللحم المرحي لي ضفنالو الدرسة ونلمو بالبيض حبة بعد حبة حتى يتلم ونفدر نكون كويرات لي نضيفهم فالمرق وما نخليهمس بزاف يغلو فالمرق حتى ما ينحلوش لان الاحم المرحي غلية وحدة ولا 2 ويطيب تم تم

اما شطيطحة جاج او لحم

ناخد قطع اللحم نحطهم في طنجرة نضيفلهم الدرسة لي متكونة من فلفل دريس وثوم وملح نشمخ فلفل دريس ونقيه من الزريعة ثم نضيفلو الثوم وندرسو حتى يولي مثل البوري نضيفو على اللحم من بعد نضيف الحميصة و الزيت وفلفل عكري وادا حبينا نضيفلو الحرور دو 5 توابل نخلي الكل يتقلة من بعد نضيف الماء حتى يطيب اللحم الا حبيتو ضيفو ربع ملعة طماطم مصبرة وتقدرو تستغناو عليها

لي عودة بادن الله الا سمحتلي النت

صح فطوركم

سلاااام

شكرا اختي بارك الله فيك