بمناسبة شهر رمضان.... دورة طبخ للمبتدئات

[omjoujou]

طريقتي تاع طاجين لحلو
في طنجرة نحط طرف لحم نص حبة بصلة بعدما نكون رشقتها بحبات تاع الطيب عود قرفة على راس مغرفة صغيرة فلفل اسود على راس مغرفة صغيرة ملح مغرفة كبيرة سمن ولا زبدة مغرفة كبيرة سكر نص كاس ماء ونقليهم على نار هادية وامبعد نمرق بشوي ماء انا ندير عيني ميزاني كي نشوف اللحم بدا يدخلو الطياب نضيف السكر ونخليه المرقة تغلي شوي وامبعد نضيف الفواكه الجافة الزبيب والعينة والمشماش بعدما كنت نفختهم في ما سخون معطر بماء زهر
كي نشوف هذوك الفواكه الجافة لي ضفتهم طابو نضيف شوي ماء زهر ونطفي على الطنجرة

[جازيا ام البنات]

حبيت نشارك معاكم بطاجين الحلو
الطريقة الاولى نحتاج طراف لحم غنمي نحطهم في طنجرة +سمن حوالي ملعقة +بصلة مقطعة +قرصة ملح +زعفران(من الاحسن تع الشعرة)ونقلي من بعد نضيف عود قرفة ونجمة الارض وورقتين رند نمرق حتى يتغطى اللحم ونخليه يطيب
من بعد كي يطيب اللحم نحط في الطنجرة شوية زبيب وحبيبات صفرجل وحبيبات برقوق(العينة) وحبيبات مشماش محط كمية من السكر حسب الذوق من3 الى 4 ملاعق وممكن نعوض بالعسل نزيد لفاني ونخليها على نار هادئة حتى نشوف الفواكه الجافة طابت ماتاخدش وقت طويل نحط ملعقة ماء الزهر ونطفي النار باش تبقى بنة ماء الزهر وعند التقديم نحط اللحم في الوسط وندور الطبسي بالصفرجل ونزين بالبرقوق والمشمش ماننساش الزبيب ونبعثر شوية لوز محمص من الفوق

الطريقة الثانية هي لحم حلو ومالح
نحتاجو لقطع لحم غنمي بصلة مقطعة ملعقة سمن او زبدة والملح نعمل عادي ماشي قرصة باش يجي بنين الزعفران قرفة عود والرند نمرق ونخليه يطيب
من جهة اخرى نبخر البرقوق والمشماش كي يتبخرو مليح نحطهم في طبسي ونذرذر عليهم القرفة مطحونة وشوية كبابة وشوية سكروشوية لفاني نغطيهم ونخليهم يتشربو
نحضر العقدة لي نعمر بيها المشماش شوية لوز مطحون+سكر ونلمو بالماء زهر نشكل كويرات صغار
من جهة اخرى نحمص شوية جلجلان لما يطيب اللحم ناخد طبسي من الاحسن يكون مسطح نعمل اللحم في الوسط وشوية مرق ونعمل شرائح الاناناس داير ساير وفي كل اناناسه نحط حبة برقوقة من بعد مانرمدها في هاداك الجلجلان المحمص وحبة مشماش بعد ما نعمرها بهديك العقدة ونزيد نبعثر شوية لوز محمص ممكن نضيف التين المجفف (ماشي هداك لي يجي في الفرينة لالا كاين تين مخصص للطواجن يتباع في علب) وشهية طيبة للامانة الصورة ماشي نتاعي فقط باش تشوفو طريقة التزيين

[DôRsàfe]

الســلآآم عليكم
مشكوورة أختي زينب موضوع رآآئع
أنــآ مانعرفش نطيب ههههههه
و ديسيديت اليوم ندير أنــآ حــآبة تعطيوني كــآش plat حاابة ديروو بالروز مي يكون مليح وســآهل و نقدر عليه
ماتبخلونيشش
بوركتمم

[زينب 83]

المشاركة الأصلية كتبت بواسطة dôrsàfe ♥

الســلآآم عليكم
مشكوورة أختي زينب موضوع رآآئع
أنــآ مانعرفش نطيب ههههههه
و ديسيديت اليوم ندير أنــآ حــآبة تعطيوني كــآش plat حاابة ديروو بالروز مي يكون مليح وســآهل و نقدر عليه
ماتبخلونيشش
بوركتمم

اهلين حبوبتي

شوفي حنونة اذا حبيبتي نعطيك طريقة ساااهلة للارز و يجي بنين

ترابي بصل ثوم و تحطي معاهم بهارات مثلا فلفل اسود كسبر و كركم و ملعقة طماطم مصبرة ملح و اذا تحبو الحار شوي هريسة و ملعقة زيت و قطع لحم و شوي زيتون اخضر مقطع يكون مغلي و ممكن شوي فطر مقطع انا نحب الدجاج ندير الدجاج خير من اللحم احسن باه نحمرو من بعد تخلي كلش يتقلى على نار ذليلة حتى اللحم يشرب البنة
مباعد تمرقي مي ماتكثريش ىبزااااف الماء باه جيك بنينة
كي يطيب المرق حطيها في بلا تاع فرن و فرغي عليها الارز مي ماعمريش يعني يبقى تحت المرق . من الافضل الارز البسمتي لي جي حبتو طويلة يجي هايل و دخليهم للفرن يكون سخون قبل راح يطيب الارز بعد ربع ساعة او 20 دقيقة خلي شوي مرق زيادة كون ينشفلك و مايطيبش زيديلو شوي حتى تلقايه طاب يجي روووعة مع الاخير ممكن تزيدي عليه شوي زبدة و تحمريه شوي
اذا درتيه بالدجاج
بعد ما يطيب ديري تتبيلة فيها شوي زيت . ثوم مرابي . فلفل اسود . موتارد شوي عصير ليمون و ملح
ادهني بيهم الدجاج تاعك و دخليه يحمار من الجيهتين

[زينب 83]

بارك الله فيكم حبوبات
زيدونا وصفات المثوم رجاءا
و كل واحدة تعطينا طريقتها في طاجين الجبن و طاجين الشواء القسنطيني و طاجين الجلبانة
جزاكم الله خيرا

[أم فاطيمة]

السلام عليكم و رحمة الله
طاجين لحلو
ناخذ طنجرة نضع فيها قطع لحم و سمن و نقلي مليح حتى يتحمر اللحم نضف الماء قيس ما يتغى
نضيف عود قرفة و نجمت لرض و شوية زعفران و قرصة ملح و نخليه يطيب مليح
ناخد الفواكه الجافة نفورها باش ما تتحرحرش و يبقة شكلها مليح
كي يطيب اللحم و يبقى مرق قليلة نضيف الفواكه و سكر حسب الرغبة و نصف كاس صغير ماء
الزهر و نخليها تعقد و كي نطفي نضيف وحدة لفاني تعطيها رائحة زكية
طاجين لمثوم
ناخذ طنجرة نضع فيها قطعة لحم صغيرة نقليها مع بصل مفروم و سمن و زيت
ونمرق نضيف طماطم مرابية زعفران و فلفل اسود و ملح كمية من الثوم ما نقلوهش باش ما ينحرقش
و حمص مشمخ من قبل و نغلق و نخليها طيب
نحضر لحم مفروم نضيف له ملح و فلفل اسود و كمية من الثوم و معدنوس
و مغلاف فرينة و لا نشا باش يجي طري و من ما يطيب الحمص و قطعة اللحم
نرمي الكرات و نخليها طيب و في نفس الوقت الفرينة و لا نشا
لي ضفناها تخثرلينا المرق و تبقة كمية المرق حسب رغبة كل وحدة

[أم زكرياء34]

رمضان كريم ومبارك وكل عام وجميع الامة الإسلامية بخير

بارك الله فيك اختاه وجزاك خيرا

[326159487]

مشكوووووووووووور

[la fleurr]

طاجين الحلو ندير مغرف كبيرة دهان مع عود قرفة يذوبو نزيد نص كاس سكر او حسب الرغبة نزيد كمية من ماء مشي بزاف كي يعقد السيرو و يذوب كامل سكر ندير مغرف كبيرة قرفة و زبيب و برقوق و ماء الزهر ووحد لفاني و نخليهم يطيبو

[نسمة صبح]

السلام عليكم حبيباتي

مشكورة زينب على الموضوع..نطلب من كل وحدة تحط وصفتها تحاول تمدنا لي زاستيس..هكا كل وحدة تبدل في طريقتها على حساب لي زاستيس و توصل لاحسن طريقة

نشارك معاكم بطاجين لحلو..

قطع لحم و حبة صغيرة بصل مغرف سكر عود قرفة و شوي قرفة غبرة رشة ملح نخليهم يتقلاو مع التحريك باه ميتحرقش السكر فقط يتكرمل و مبعد نمرق و كي يطيب اللحم نحطو العين لي نكونو شمخناها ف الما لما تغلي شوي نزيد الزبيب المشمخ و السكر عينك ميزانك..تقريبا ميزان العينة مع ميزان السكر

مثل كيلو عين كيلو ناقص شوي سمر و رطل زبيب..

و اذا شفنا نوعية العين مش مليحة نحط معاها نصف كمية السكر باه متذوبش..

حنا منحطوش ماء الزهر لكن رايحة نجرب و مرة رميت شوي تفاح مع الزبيب جا هايل..

[أم الحبايب 26]

البسملة1



طريقتي مثوم نحط لحم فطنجرا ونزيد معاها ثوم معا شويا كمون ملح وفلفل لكحل ونزيد فلفل لعكر ولاحسن تكون هريسا نتع فلفل لحمر مخدوما فلبيت قليه ونمارقو نخليه يطيب ونروح للحم مفروم نحطلو شويا من درسا نتع ثوم ولكمون وشويا هريسا مخدوما فدار جي بنينا وشويا دهان وحبى بيض وتشا ونكورها دبلات ونديره طيب معا لحم يكون طاب نص طياب

صحا فطوركم وشكر للاخت زينب ربي يجزيها على هذا الموضوع لحطتو

[DôRsàfe]

المشاركة الأصلية كتبت بواسطة زينب 83

اهلين حبوبتي

شوفي حنونة اذا حبيبتي نعطيك طريقة ساااهلة للارز و يجي بنين

ترابي بصل ثوم و تحطي معاهم بهارات مثلا فلفل اسود كسبر و كركم و ملعقة طماطم مصبرة ملح و اذا تحبو الحار شوي هريسة و ملعقة زيت و قطع لحم و شوي زيتون اخضر مقطع يكون مغلي و ممكن شوي فطر مقطع انا نحب الدجاج ندير الدجاج خير من اللحم احسن باه نحمرو من بعد تخلي كلش يتقلى على نار ذليلة حتى اللحم يشرب البنة
مباعد تمرقي مي ماتكثريش ىبزااااف الماء باه جيك بنينة
كي يطيب المرق حطيها في بلا تاع فرن و فرغي عليها الارز مي ماعمريش يعني يبقى تحت المرق . من الافضل الارز البسمتي لي جي حبتو طويلة يجي هايل و دخليهم للفرن يكون سخون قبل راح يطيب الارز بعد ربع ساعة او 20 دقيقة خلي شوي مرق زيادة كون ينشفلك و مايطيبش زيديلو شوي حتى تلقايه طاب يجي روووعة مع الاخير ممكن تزيدي عليه شوي زبدة و تحمريه شوي
اذا درتيه بالدجاج
بعد ما يطيب ديري تتبيلة فيها شوي زيت . ثوم مرابي . فلفل اسود . موتارد شوي عصير ليمون و ملح
ادهني بيهم الدجاج تاعك و دخليه يحمار من الجيهتين

~ بــآرك اله فيك أختي زينب بربي أن شاء الله غدوة جربو وادا صلحتلي نصورو ونوريهولك
مشكوورةة ♥

[raouane19]

allah ybark

[حياتي كلها امل]

شكرا لك اختي زينب على الموضوع الراءع .
طريقتي في المثوم طراف صغار لحم +ثوم+زيت+ملح+فلفل اسود+كمون+فلفل عكري ونمرق بشوية ماء ونخليها تتقلى ثم نضيف الحمص ونمرق ونخليها طيب .
نروح للبولات لحم مرحي+ثوم+نفس التوابل التي عملتيها في المرق وحبة بيض والفكرة التى نعملها هي عندما نكور اللحم نرمدها في الفرينة ثم نضعها في المرق باه تعقدهالي ثم في الاخير كي يطيب رش معدنوس وبصحتكم

[نسمة صبح]

سلام حبيباتي

المثوم جهتنا منديروهش لكن نحاول نتعلمو..كاين زوج اللي يجي احمر بالعكري و الكمون و الفلفل الاكحل ولا ابيض داراتو مرة وحدة عنابية و عجبني بزاااف جات لا صوص ماغون و بنيينة اللي عندها لا غوسات هك تقولي.

و حبيت نسقسيكم كي طيبو لا بات تاع لكيش اطيبوها من تحت مبعد تحطو الحشو و لا من فوق و تحت خاطر دايما تبقالي ناقصة طياب ف النص..