شجع شجع مصر....دى مصر حبيبتى

[اختكم فى الله]

السلام عليكم ورحمة الله وبركاته



ازيكوا يا جماعه يارب الكل بخير وصحه تمام....كله طالع من العيد كل سنه وانت طيبين جايه متاخر واكلين لحمه يعنى متغذيين كويس



طبعا العنوان مش مكانه هنا خالص صح



بصوا انا حتكلم على حريتى من اول ما سجلت فى المنتدى ده وحتى هذه اللحظه وحتكلم على وجهتين نظر من الجانبين
على فكره انا فى اسلوبى سخريه او تريقه مش على الناس انما على الواقع مش اكتر


اول ما سجلت فى المنتدى بجد فرحت جدا لانى بحب اتعرف على مجتمعات تانيه لانى كل اللى اعرفه هى مصر اقصد انا كجيل(الشباب حاليا) معندهوش اغلبيته ثقافه عن تاريخه ووطنه ومشاكله ولا حتى بيفكر فى مستقبله محدش يقولى اتكلمى عن نفسك انا بتكلم عن صوره عامه عن حال شباب عربى مسلم كأغلبيه الا من رحم ربى والا يعنى الخيبه اللى احنا فيها دى ايه مش جايه من بره احنا اللى السبب فيها ذل وهوان وضعف وتاخر اخلاقيا قبل ما نكون متاخرين فى الصناعه والزراعه وكل شىء (اتمنى حد يذكرلى شىء واحد العرب او المسلمين متقدمين فيه عن كل دول العالم )

المهم خلينا فى موضوعنا اصل الكلام فى وضعنا بيثير الحسره والاستغراب



يعنى انا مش بايدى اسافر واتعرف على كل بلد واتعرف على حياه الناس فيه ولا اخلاقهم ولا عاداتهم واعتقد ده حال اغلبنا وبما اننا الحمد لله ربنا كرمنا بشىء اسمه النت وحاجه اسمها المنتديات قدرنا نعرف ونتكلم مع بعض باختلاف الدين والبلد والتفكير والسن



ربما كانت فرصه للتقريب بين البعض وممكن فرصه تانيه لزياده الخلافات والفرقه وده للاسف جانب سىء للنت او احنا اللى خلناه وحش وضرنا اكتر من ما نفعنا



حصل طبعا بعد ما سجلت معاكوا احداث مصر الجزائر (اوعوا حد يقولى اقدام بقى)


اساسا مكنتش فى دماغى حاجه من اللى بيتقال اهو ماتش وخلاص وحيعدى بطلت اشجع كوره بس مازالت زمالكاوية حد هنا اهلاوى



لغايه ما يوم سمعت عن اتوبيس المنتخب الجزائرى انضرب بالطوب واتعور لاعبيين ودول يقول محصلش والجانب التانى يقولك حصل وده بقولك دى خطه مرسومه عشان ميلعوبش والفيفا تحسبلهم الماتش والتانيين يقولولك لا دول طلعوا فردة جسمه وحركوها ادام الناس فى الشارع فضربوهم بالطوب المهم كله ايه خلاص اتشحن ميه ميه ولازم نخفى العار وناخد الثأر



بعد كده جاه يوم لذيذ يوم الماتش بتاع القاهره ولا كان فى دماغى غير البلد ظهر فيها اعلام فيه ايه قالوا متش مصر مع الجزائر بصراحه مش فاضيه ومش مهتمه وبعدين اللهم اجعله خير صحيت لقيت جارتى وعيالها و الناس بتصرخ دخل اول جون والناس اتهبلت بعدها خلاص المباراه حتخلص وكله حط فى دماغه انهم حيخسروا ومبروك للجزائر يحصل ال ايه جون تانى يالهوى يارب ما كان جه وارتحنا وعلى اللى حصل البلد خلاص اتهبلت تقولش حررنا فلسطين يا ناس وكله يصرخ ويهتف ويجروا وبدات نكسه 67 ويا قلبى لا تحزن رايحين السودان البلد الشقيق


محش يرد غير لما يقرا الموضوع كله لسه حنزله على اكتر من مره اهدوا اتقلوا كده