اطباقي الرئيسية في رمضان

[حياة نور الدين]

السلام عليكم

صح رمضانكم

جبتلكم اليوم بعض اطباقي الرئيسية لي درتها في رمضان افكار بسيطة واقتصادية وجميلة التقديم وبنينة تفضلوا

الطبق الاول: سيقار الفلفل الحلو محشي بالدجاج



نشوي الفلفل في الفرن او على الشواية نحطوا في كيس يعرق ومنبعد نقيه ونخليه على جهة

نحضر صدر دجاج نحطوا في لاشواغ مع بصل وثوم وملح وفلفل اسود وزنجبيل وحبة بيض و3 مغارف شابلوغ ونرحيه





نحل حبة الفلفل وتولي على شكل مستطيل نشكل اصبع من الحشو ونحطوا ونلف الفلفل على الدحاج ونكمل كامل الكمية
ممكن حبة فلفل ديرلك زوج سيقار ادا كانت كبيرة وملحمة





تحضير صلصة الطماطم
في مقلة ندير زيت وملح وفلفل اسود واحمر وهرؤيسة وثوم وكمون ونرابي حبة طماطا وملعقة طماطم مصبرة ونقلي بعد ما تتقلى نضيف كاس ماء ونخليها حتى تغلي نحط السيقار تاعنا ونخلبه يكمل طياب حتى تخثر الصوص ونطفي ونقدمه مع بطاطا مقلية ونرابي عليه فرماج









ممكن ندير الوصفة في الفرن

الطبق الثاني : غراتان لازانيا البدنجان

قطع البدنجان رقيق نملحوا ونرمدوا في الفرينة ثم البيض باش ميشربش الزيت



نحضر صلصة الطماطم كما حضرناها في الوصفة الاولى



نرحي الدجاج مثل الوصفة الاولى ونضيف عليه بيض مغلي ومرابي



ناخد مول يدخل للفرن ندير صلصة الطماطم ثم طبقة بدنجان ثم صلصة الطماطم وخليط الدجاج ونعاود نحط بدنجان وصوص طماطم والحشو تاعنا ثم في الاخير شرائح البدنحان والصوص ونرابي الفرماج وندخلها الفرن تتحمر







دوقها رووووعة وخفيفة

غراتان بوزلوف

راس بوزلوف مشوط ومغسول ومقطع ومغلي بالماء والملح والفلفل الاسود والرند
بعد ما يطيب نحولوا العظم ونقطعوه



نحضروا صلصة الطماطم كالعادة نفرغوا قفي البيراكس او اي بلا يدخل للفور
نحط فوقها قطع البوزلوف



نقلي البطاطا دوائر نحطها فوق البوزلوف ونرابي عليها الفرماج وندخلها الفرن








الطبق الرابع: طاجين الخوخ



نقيت البطاطا رقيقة كانت عندي وحطيتها في ماء وملح وغليتها كي طابت ارحيتها او تمرسيها بفرشيطة
زدتلها شوية ملح وفلفل اسود ومعدنوس نقطع رقيق وجبن وصفار بيضة وخلطت وحطيتها في الثلاجة تريح

كان عندي طرف من صدر الدجاج طايب رخيتوا مع بصل وملح وفلفل اسود وزنجبيل (اختياري انا نخبه مع الدجاج) ومعدنوس



في هداك الوقت وجدت المرق تاعي اللي هو ملعقة زبدة طرف دجاج ملح فلفل اسود وقرفة بصلة صغيرة مرابية وسنة ثوم وحمص خليتهم تقلاو وزدت ملعقة صغيرة فرينة ومرقت
بعد ما يطيب الدجاج وتخثر المرق نطفي النار

نخرج البطاطا من الثلاجة ناخد كمية نحطها على كمف اليد وندير شوية من الحشو ونشكلها كرة نمررها بالترتيب ععلى الفربنة والبيض والشابلوغ ونقليها





في طبق التقديم نحط الكرات تاعي ونسقي بالمرق في الوسط او في الحواشي باش الحبات ميتشربوش المرق بزاااااف



بصحتكن

يتبع