طريقة عمل عجينة التزيين - الصفحة 5

aboayoub · 2013-10-30, 22:53

غدا ان شاء الله راح نحطلكم حلويات النواد كوكو
تصبحون بالف خير

aboayoub · 2013-10-30, 23:07

اقتباس:

المشاركة الأصلية كتبت بواسطة bichaz810

بارك الله فيك على كرمك هذا وماتنسايش تحطي سر الكاوكاو الي يولي طعمو لوز

سر الكاوكاو هو فيه 2 طرق الطريق 1 ولي انا نستعملها لانو اسهل وانا معنديش الوقت بزاف كي نشري الكاوكاو نشريه بلا قشور و نطحنو مباشرة ونضيفلو 2او3 ملاعق عشاء فنيليا تع الميزان و قطرات بنة لوز الحلو
والطريقة 2 فوري الكاوكاو في كسكاس وحطي في القدرة الي يفور عليها عصير القارص مع الماء وحطي حبة قارص مقطعة ثم حطيه في سنيوة مفرشا بكاغط تع الطاولات تع الاعراس وكل يوم بدلي الكاغط حت ينشف

om rahma · 2013-10-31, 00:27

merciiiiiiii

ام ريم · 2013-10-31, 04:32

يعطيك العافية

Babinaall · 2013-10-31, 06:12

بارك الله فيك أختي لكن واش من عبار ستعملتي للسكر و النشاء؟ جزاك الله خيرا

mayaaa71 · 2013-10-31, 13:18

مرحبا أختي بيك معانا .

الحقيقة هذا المنتدى رائع البنات فيه ماشاء الله .

وهاكي زدت أنت الله يبارك تكمل سعادتنا بيك .......أهلا وسهلا بيك مرة أخرى .
أنت تعلمين أختي أننا دائما بحاجة للتعلم ...هناك من تعمل وليس لديها الوقت للتعلم في المدارس الخاصة .. وهناك من ليس لديها المال لتتعلم .. وهناك من تسكن في المناطق البعيدة لا يمكنها ولا يسمح لها بالتنقل إلى المدن أين توجد المدارس الخاصة للحلويات
وأنت الله يبارك صاحبة الصنعة فتحت لينا باب الخير
الله يزيدك من نعيمو ويفتح أبواب الخير في وجهك ويهون عليك كل صعب آمين .

فقط لا تحرمينا من أسرار الحلويات والجديد في هذا المجال .

aboayoub · 2013-10-31, 14:03

اقتباس:

المشاركة الأصلية كتبت بواسطة babinaall

بارك الله فيك أختي لكن واش من عبار ستعملتي للسكر و النشاء؟ جزاك الله خيرا

مساء الخير حبيباتي اسفة على التاخير في الرد الكهرباء كانت مقطوعة من الصباح
ستعملت مشيربة صغيرة راح نحطلكم عبار اخر تاني ناجح اخذتو من عند وحدة من كتاب للتورتات انجليزي
المقادير
3كيسان سكر قلاسي انا نستعمل المرجان
كاس نشاء
2ملاعق ماء ورد
ملون ابيض (انا نستعمل تع الميزان)
نصف كاس كليكوز ونفس الشيء اذاجات جارية زيدي السكر ونشاء وادلكي شوية
انا نسيت في الاولى محطيتش ملون ابيض

aboayoub · 2013-10-31, 14:11

اقتباس:

المشاركة الأصلية كتبت بواسطة mayaaa71

مرحبا أختي بيك معانا .

الحقيقة هذا المنتدى رائع البنات فيه ماشاء الله .

وهاكي زدت أنت الله يبارك تكمل سعادتنا بيك .......أهلا وسهلا بيك مرة أخرى .
أنت تعلمين أختي أننا دائما بحاجة للتعلم ...هناك من تعمل وليس لديها الوقت للتعلم في المدارس الخاصة .. وهناك من ليس لديها المال لتتعلم .. وهناك من تسكن في المناطق البعيدة لا يمكنها ولا يسمح لها بالتنقل إلى المدن أين توجد المدارس الخاصة للحلويات
وأنت الله يبارك صاحبة الصنعة فتحت لينا باب الخير
الله يزيدك من نعيمو ويفتح أبواب الخير في وجهك ويهون عليك كل صعب آمين .

فقط لا تحرمينا من أسرار الحلويات والجديد في هذا المجال .

تسلمي حنونة امييييين ربي يتقبل دعواكي ان شاء الله عندك الحق كل وحدة وظروفها ان شاء الله راح نمدلكم كل واش نعرف وكل ما نكتشف حاجة جديدة مش راح نبخل عليكم

aboayoub · 2013-10-31, 14:32

اقتباس:

المشاركة الأصلية كتبت بواسطة عائشة62

شكرا لك . ربي يوفقك

إذا ممكن حلويات جديدة الي تأخذهم العروس معاها

وأي وصفات حلويات بنواتكوكو مع قلاصاج شكولا

مانيش مزروبة في أي وقت يساعدك

حنونة ماتقوليش راني نسيتك درك شوية نحطلك حلويات النواتكوكوا
فيما يخص حلويات العروسة راح نحط صور في الايام القادمة ان شاء الله

aboayoub · 2013-10-31, 14:56

les boule de néje
كريات الثلج
2 عبارات نواتكوكوا اطحنيه
نصف عبر سكر عادي
ملعقة عشاء فنيليا
نعجنوها ببياض البيض ضربيه شوية
ديريها كويرات ورشي السنيوة بالفرينة وطيبيها
( ممكن تحطيهم في لمول تع السيليكون قلوبة راح يكون الشكل احسن انا منيش مجربتهم في هاذو لمول لكن الفكرة جاتني ذرك )
كي يطيبو خليهم يبردو مليح
والقلاساج كيما حبيتي انا هاذو نديرلهم طلية وانتي اذاحبيتي تغطسيهم في شيكولا او في معجون ثم رمديهم في سكرفاج الشيكولا نصف ابيض ونصف بلون اخر او رمديهم في قوفريط او بستاش لك الاختيار .
راح نحطلك غوسات اخرين لكن في المساء انا راني مشغولة شوية...

عائشة62 · 2013-10-31, 15:34

بارك الله فيك تفكرتيني ..

الله يكون في العون رغم أشغالك تفكرتيني ....يكثر خيرك أختي

في المساء أرجو منك إجابتي على أسئلتي

الطلية نتاع العرايش و المخبز وكيفاش يصنعو هذيك الخطوط الرقيقة فوق الحلوى هي قلاصاج ولا فوندون وكيفاش تكون متقونة بهذاك الشكل .

والطلية نتاع شكولا للقاطو الجاف أي نوع من الشكولا تستعملي ممكن طريقتك .

الحلويات التي تعسل مثل البقلاوة الدزيريات تتعسل فور خروجها من الفرن و العسل يكون دافىء ولا سخون مليح

والبقلاوة شحال مدة طيابها في الفرن .

وبارك الله فيك وربي يخليك لينا.

aboayoub · 2013-10-31, 16:06

اقتباس:

المشاركة الأصلية كتبت بواسطة عائشة62

بارك الله فيك تفكرتيني ..

الله يكون في العون رغم أشغالك تفكرتيني ....يكثر خيرك أختي

في المساء أرجو منك إجابتي على أسئلتي

الطلية نتاع العرايش و المخبز وكيفاش يصنعو هذيك الخطوط الرقيقة فوق الحلوى هي قلاصاج ولا فوندون وكيفاش تكون متقونة بهذاك الشكل .

والطلية نتاع شكولا للقاطو الجاف أي نوع من الشكولا تستعملي ممكن طريقتك .

الحلويات التي تعسل مثل البقلاوة الدزيريات تتعسل فور خروجها من الفرن و العسل يكون دافىء ولا سخون مليح

وبارك الله فيك وربي يخليك لينا.

راح نجاوبك ذرك حنونة جبت قهوتي وراني نشرب هيها قلت نضرب دارة عندكم مادام نكمل قهرتي ونروح لشغلي
1_كاين انواع كثيرة من الطلية راح نحطهم العشية ان شاء الله وهذيك الخطوط الرقيقة الرقيقة تع الطلية هي بنفس الطلية زيديلها ملون ابيض واللون الي حبيتيه
وتكون متقونة ب..اشري لبوش تع النيلو راهم رخاس قولي للبائع الحلويات بوش تع الطلية اثقبيه ثقبة رقيقة بالكيردون(عود الاسنان او الاسياخ يجيو طوال تع اللوح يشويو بيهم )اتعلمي قبل في سنيوة او طبسي ديري خيوط او غانجووات ونقيطات كي تحكمي يدك احدمي فالقاطو
2_انا نستعمل شيكولا بوجادير نحطها في كسرونة في حمام مائي ونزيدلةا شوية حليب وكي تشوفيها ذابت نحيها على النار لخاطر تزيد تنشف وتنحرق
3_البقلاوة تتعسل فور خروجها ويكون العسل بارد وكي تشرب وتشوفيها خصها زيديها
اما الدزيرات فيهم سر ثقبيهم من الاسفل بالكيردون او الاسياخ 2او3 ثقبات وكي تشربيهم اذا كانو سخان لازم العسل يكون بارد واذا بردولك قبل ماتكملي التعسال سخني العسل
اذا كان العسل سخون=القاطو بارد
اذا كان العسل بارد= القاطو سخون
البقلاوة كل وحدة كيفاش تحبها طايبة هي تاخذ حوالي ياعة هي تبان كي اطيب راهي تطلعلها الطباب للجوانب

عائشة62 · 2013-10-31, 16:15

بصحتك القهوة ماتخافيش عاونينا وأنت شغلك يكمل بلا ما تحسي

كلش خفيف ظريف كل واحدة تدعيلك دعوة متينة

الله يجازيك كل خير على هذا القلب الطيب .

إذا ممكن حلويات جافة يكون فيها الحشو نوادكوكو

الله يحفظك لأهلك وناسك .

aboayoub · 2013-10-31, 16:43

اقتباس:

المشاركة الأصلية كتبت بواسطة عائشة62

بصحتك القهوة ماتخافيش عاونينا وأنت شغلك يكمل بلا ما تحسي

كلش خفيف ظريف كل واحدة تدعيلك دعوة متينة

الله يجازيك كل خير على هذا القلب الطيب .

إذا ممكن حلويات جافة يكون فيها الحشو نوادكوكو

الله يحفظك لأهلك وناسك .

الله يسلمك حنونة ارواحي تشربي راهي بخبز المطلوع
راح ناطيلك عبر شباب بزاف ومايطيبش
عبر نواتكوكوا مطحون+عبر مشماش المجفف اطحنيه +عبر ناقص سكر قلاسي +زبدة غ ولمي ب كرام فراش وشكلي كيما حبيتي ممكن تحطي حشو نوتيلا او سوغيز كونفي

عائشة62 · 2013-10-31, 18:42

ربي يحفظك ...مع هذا العرضة و كلامك حلو كلي شربت وأكلت .

أنا خرجت من المنتدى بلا نشوف الرد .

حطيت قهوتي مع المطلوع .

الآن راني نضحك القلوب مع بعضها .