الميلفاي بالتفصيل خطوة بخطوة من مطبخي mille feuille

[oum ibrahim]

بسم الله الرحمن الرحيم
السلام عليكم و رحمة الله تعالى و بركاته
اليوم حبيت نقدملكم وصفة الميلفاي او الالف ورقة بالتفصيل خطوة خطوة و ان شاء الله تنجحو في تحضيره هو فيه خطوات نتبعوها و النتيجة اكثر من رائعة
مقادير العجينة المورقة pate feuilleté
انا استعملت وصفة العجينة المورقة السحرية و درت نصف المقادير
500 غ فرينة استعملت سيم للتوريق تقدرو تستعملو فرينة عادية
4ملاعق زيت
2ملاعق خل
قرصة ملح
250غ مرغرين خاصة بالتوريق
مقادير كريمة الحلواني crème patissière
500ملل حليب اي نص لتر
100غ سكر
60غ نشاء ما يعادل 2ملاعق مملوءة جيدا
2حبات بيض
فانيليا سائلة او بودرة
ملعقة كبيرة مرغرين
التغطية او القلاصاج
انا نستعمل الفوندون الجاهز ثمنو معقول 80 دج و ممكن نحضر القلاصاج بالحليب و ملون ابيض و نضيف السكر الناعم مغربل حتى نحصل على قوام ثقيل
طريقة تحضير العجينة
نخلط مكونات العجينة ماعدا المرغرين و نلمها بماء عادي بدون عجنها ونحصل على عجينة متماسكة ماتكونش يابسة و لا طرية نخليها ترتاح شوية باه تساعدنا في العمل
نحل العجينة مربع و نبشر فوقها المرغرين و نلفها على شكل رولي
نحلها على شكل مستطيل و نطبقها على 3
ثم نعاود نحلها مستطيل و نطبقها على 3 و خلاص تكون جاهزة للاستعمال
ملاحظة .العجينة المورقة بعد ما نكمملها التوريق تعطينا ضعف وزن الفرينة الي درنا اي حنا درنا 500 غ فرينة تعطينا كيلو عجينة مورقة
الخطوات موضحة بالصور




نقسمها على 3
نحل الجزء الاول بسمك 2ملم نفرش بلاتو بورق الطهي و نحط فيه العجينة ونثقبها مليييييح بالفرشيطة و نحط فوقها قطعة اخرى ورق الطهي و فوقها بلاتو يكون ثقيل نوعاما لمنع انتفاخ العجينة لازم تتورق بلاما تنتفخ واذا استلزم نحطو بلاتو نتاع زجاج كما عملت انا
ندخلها للفرن مسخن مسبقا على 200 د حتى نشوفها تحمرت واذا شفتوها من فوق مازالت بيضاء اقلبوها و خليوها تتحمر من الجهة الاخرى
نعاود نفس العملية مع الجزاين الباقيين
ملاحظة .استعمال ورق الطهي لمنع التصاق العجينة من فوق و تحت و لتسهيل العمل ممكن نعوضوه بالالمنيوم


تحضير الكريمة
نسخن الحليب في كسرونة فوق النار
من جهة اخرى نخلط البيض و السكر و النشاء ونفرغ عليه الحليب مع التحريك ثم نرجع الخليط في الكسرونة فوق النار ونبقى نحرك حتى تعقد الكريمة و تتماسك ننزعها من النار و نضيفلها قطرات فانيليا و ملعقة اكل مرغرين و نحرك و نفرغها في اناء اخر و نغطيها ببلاستيك ملامس للسطح لمنع تكون قشرة و ندخلها الثلاجة تبرد ملييييييح
بعد ما نخرجها من الثلاجة تكون متماسكة كثير نضربها بالباتور حتى تولي ناعمة
ملاحظة.
ممكن ايضا تستعملو كريم موسلين بدل الكريم باتيسيير وهي نفس الكريمة باتيسيير بعد ما تبرد نضربها بالباتور ونضيفلها مرغرين و نضرب حتى نحصل على كريمة خفيفة و لونها فاتح

تركيب طبقات الميلفاي
بعد ما تطيب طبقات العجينة و تبرد نطلي الطبقة الاولى بنصف كمية الكريمة ثم نحط الطبقة 2 و نطليها بالنصف المتبقي من الكريمة ونحط فوقها الطبقة 3 ومن فوق نحط بلاتو وفوقو حاجة ثقيلة و نخليه مدة باه الطبقات تتماسك فيما بينها
تحضير التغطية
نسخن الفوندون شوية فوق حمام مائي واذا لقيناه متماسك بزاف نزيدلو الماء بالقطرة حتى نوصل للقوام المناسب لازم ما يكونش سائل و مايكونش متماسك بزاف باه نمشيوه بسهولة فوق الميلفاي
نذوب شوية شكولا و نزيدلها قطرات ماء و سكر ناعم حتى يكون قوامها كما الفوندون و نديرها في كيس و نثقبو لازم نجهزها قبل ما نفرغ الفوندون لانو ممكن يتماسك و مايعطيناش نتيجة مليحة في التزيين واذا كنت خدمت القلاصاج بالسكر خذي كمية قليلة وزيديلو شوية كاكاو حتى تتحصلي على لون شكولا
نفرغ الفوندون فوق الميلفاي و بسرعة نمشيه بالسباتولا و نعمل خطوط بالشكولا و نزين براس سكين او كيردون نروح ونجي حتى نحصل على شكل رخامي او ماغبغي للاسف هذي الخطوة ماصورتهاش لانو كما قلتلكم لازم تكوني سريعة قبل ما ينشف الفوندون
ندخل الميلفاي للثلاجة و نخليه على الاقل ليلة كاملة مع فرض رقابة على المطبخ باه يعطيك نتيجة مليحة و يساعدك في التقطيع



في الغد قطعيه بالحجم الي حبيتي كبير او صغير هذه المقادير تعطيك من 12 الى 14 حبة كبيرة نوعاما او 18 حبة صغيرة



واستمتعي بحلى ميلفاي صنع منزلي و مضمون و فرحي افراد عائلتك





هذا كنت عملتو بالكريم موسلين






و ممكن حتى تاخذيه ضيافة في علبة و يظنو انو مشري اممممممممممممم

حاولت يكون شرحي مفصل و مبسط قدر الامكان نتمنى نكون وفقت في الشرح و الي عندها اي استفسار تتفضل
واذا عجبكم و جربتوه و نجحتو فيه ادعيولي دعوة خير و لعائلتي و لكن بالمثل
و السلام عليكم