مشاركتي في مسابقة كيكتي الاجمل

[oum radja]

يشرفني اليوم أن أضع بين يديكم مشاركتي البسيطة لمسابقة
كيكتي الاجمل
وقبل ما ندخل في الصح حبيت نقدم هاذ الباقة تاع الورود لكل من زار موضوعي دون ان انسى المشرفة الغالية ام رامي




كيكتي بعنوان
كيكة الورود الراقية بكريمة الجبن


نتمنى الشكل النهائي للكيكة يكون نال اعجابكم
نروحو للتفاصيل


مقاديركيكة الجبن

3حبات بيض
4حبات فرماج اي نوع
كاس سكر
1/2كاس زيت
1/2 كاس ماء
2خميرة كيميائية
فاني
2 كيسان فرينة
خلطت المقادير بالترتيب الا الخميرة خليتها هي الاخيرة مع الفرينة و تحصلت على عجينة خفيفة كيما في الصورة

في هاذ الوقت شعلت الفرن يسخن وجهزت المول
انا قسمت الكيكة نصفين خليت الاول ابيض و الثاني درت له ملعقة كاكاو راها في الصورة بالصح ماذكرتهاش في المقادير
بصراحة كنت حابة نتحصل على شكل جاني فكرة في راسي بالصح هاذ العجينة بالذات ما ساعدتنيش لانها تجي خفيفة على هاذا
درت الكيكة بالشكل الرخامي
ولوكان عرفت كنت نديرها بيضاء
ماعليش هاذي وحدة من الصعوبات لي واجهتني بالصح مع هاذا جاتت بنيييييييييييينة ولي ذاقوها قالولي راكي دايرا فيها قاطو بيمو مرحي
ها هو شكل الكيكة قبل ما طيب

وهاهي كي طابت ريحتها تشهي


خليتها تبرد و رحت نحضر في الكريمة
كريمة الجبن
علبة جبن كريمي انا درت كيري
كاس سكر ناعم
100 غ زبدة طرية
كاس شاي حليب مركز محلى يعني نيسلي
وبودرة شونتيي
ملون ابيض
ملون احمر


درت الفرماج مع الزبدة وخلطتهم مليح بالباتور
زدت كاس سكر ناعم انا مادرتش كل الكمية لي راها في الصورة و خلطت مليح من بعد زدت كاس شاي تاع نيسلي بلا ما نحبس الخلط هنا ما قدرتش نصور
رايحين نتحصلو على كريمة من الذ ما يكون و باش تكون الكريمة تاعي متماسكة زدت ليها 3مغارف بودرة الشونتيي
و في الاخير ملعقة صغيرة ليمون باش يكسر هاذيك الحلاوة تاع النيسلي

اممممممممممممممممممممممممممممممممممممممممممم
قسمت الكريمة و لونت جزء منها باللون الابيض
والثاني باللون الاحمر

وخليت الكريمة في الثلاجة تبرد
سقيت الكيكة بعصير

هاذ الكيكة خفيفة وزدت سقيتها ما تحتاجش اني نحشيها بالكريمة
عمرت الكيمة الحمراء في لابوش و بديت نشكل في الورود
ومن بعد زدت ورود بيضاء و كيما راكم تشوفو هاذا شكلها النهائي



و هنا كي قطعتها

و في الاخير بغيت نحط تقييمي للكيكة تاعي قبلكم هههههه
الذوق راااااااااااااااااااااااااائع و ما رانيش نشكر في روحي هههههههه على خاطر الفرماج عطاني ذوق مختلف عن الكيكات لي موالفة نديرهم او حتى نذوقهم في اماكن اخرى
الشكل اولا و بصراحة ندمت لي ما درتش الكيكة بيضاء انا كنت متخيلة شكل و ما خرجليش
حاجة اخرى لوكان درتها في مول اصغر من هاذا باش تجي مرتفعة بالصح خفت لا ما طيبش مليح من الوسط و تجي معجنة
بالصح ماعليش رانا نتعلمو من اخطاءنا
و الصور جات مظلمة شوية كان الجو مغيم الله غالب
تقبلو مني فائق الاحترام و نتمنى ما يكونش موضوعي ثقيل عليكم