الدرس الاول في دورة الرسم على القماش - الصفحة 4

fifiarch · 2012-09-16, 14:47

مساء الورد على احلى عضوات
ان شاء الله راكم بخير
اليوم نحطو الرحال في اول درس من دورتنا الجديدة
دورة تعلم الرسم على القماش
نتمنى لكن كل الافادة وانو الدورة تكون خفيفة على قلوبكن وتتعلمو معنا هاذ الفن
على بركة الله نبدا اول درس

الدرس الاول في دورة تعلم الرسم على القماش

والدرس ارتاينا انو يكون خفيف حتى بالشوي نتعلمو هاذ الفن ونبداو من الاسهل الى الاصعب
الدرس من تقديم اختنا
kiya
ربي يحفظها وييسرلها امرها وترجع معنا قريبا
اعطتنا من وقتها وافادتنا معها جازاه الله خيرا على تعبها معنا

هنا العمل الذي سننجزه باذن الله

اولا نبدا مع الادوات
وهي الادوات لي كنا ذكرناها في الدرس الافتتاحي

الان نقص قطعة قماش كل اخت بالشكل لي تحبو
انا اخترت نعمل منديل فقصيت قطعة القماش بشكل مربع

عندنا هاذ الرسم لحاشية القماش على شكل شرشفة ننقلوه على قطعة القماش نتاعنا
انا رسمتو من قبل على قطعة بلاستيك وكل مانحتاج عمل منديل ننقلو مباشرة على القماش بواسطة الكالك

وهكذا حتى نكملو نقل الشرشفة على كامل قطعة القماش

نجيبو المديوم

ونتبعو الرسم لي فوق القماش بيه

بعدين نجيبو البانسو الخشين مع اللون لي نحبو نستعملوه انا هنا اخترت الاخضر

نقومو بنفس العملية لي درناها مع المديوم

بعد مانكملو المنديل كامل نخلوه ينشف ونقصو الجوانب

الان نجيبو الرسمة لي حابين نعملوها في المنديل نتاعنا
انا هنا اخترت رسمة بسيطة لاننا مبتدئات في الفن ولازم نبداو بالسهل

نثبتوها في المكان لي حابينو ونحطو بين القماش والرسمة الكالك

ونتبعو بالسيالة حتي نتحصلو على الرسم فوق القماش

الان باه نرسمو الاغصان نجيبو البانسو الرقيقة والللون الاخضر
ونتبعو فوق الغصان

في الاوراق نحاولو نسحبو الللون بسرعة وخفة للداخل يكون مسحوب شوية

هنا العمل بعد ما كملنا الاغصان والاوراق نتاعنا

بعد مانكملو نمسحو البانسو بقطعة قماش صغيرة باه ننظفوه لانو راح نستعملو لون اخر وننتقلو لمرحلة اخرى في التلوين

نبداو النوع الاول نتاع الورود اختارو اللون لي تبغوه انا مثلا اخترت اللون الزهري

ونتبعو نفس طريقة الاوراق

ناخذو اللون الاصفرونديروه في الدائرة الصغيرة

نجيبو اللونين الازرق والابيض

بالبانسو الرقيق نديرو الزهرة تاعنا من الخارج بالزرق والبانسو الخشين نديرو الداخل بالابيض ونحاولو نمزجوهم شوية

ونلونو قلب الزهرة بالاصفر

ونكمل بقية الاهار بنفس الطريقة حتى نتحصل على العمل نتاعنا

ملاحظات هامة

*حاولي تخدمي بتاني من اجل نظافة العمل نتاعك لانو تطاير قطرات الالوان على قطعة القماش يخسرهالك

*باه تستعملي الالوان جيبي الغلاق وصبي فيه القليل من اللون المراد واخلطيه بالقليل من الفرني لاعطاء اللمعة وللمعان اكثر ممكن تضيفي البعض من اللماع

*ممكن الاخوات يختارو اي رشمة اخرى للتلوين
فقط يراعو انها تكون رسمة بسيطة مثل المعطاة في الدرس وعندها نفس انواع الازهار لانو مازالت دروس اخرى ان شاء الله نتعلم منها انواع اخرى

*خلى العمل نتاعك حوالي اربعة وعشرين ساعة باه ينشف وكي ينشف اقلبيه على ظهرو وعدي عليه المكواة من اجل ثبات اكثر للالوان

هنا رابط مفيد نتمنى تستفادو منو

https://www.djelfa.info/vb/showthread.php?t=1103846

هنا ننهي الدرس الاول
نتمنى تكون الخطوات مفهومة
بالتوفيق للجميع
التطبيقات توضع واخر اجل لوضعها يكون يوم السبت المقبل ان شاء الله