نداء لكل طلبة الجامعة أسرعوا - الصفحة 4

nouha19 · 2012-07-17, 10:24

شكرا لك يا السطايفية و الله انت رائعة
ممكن حتى انا تبعثيلي في الخاص تعيشي؟
المزيد من النصائح يا الخاوة

سطايفية بكل فخر · 2012-07-17, 11:22

اقتباس:

المشاركة الأصلية كتبت بواسطة فيصل 1993

تعيشي ختي سطايفية بكل فخر ربي يحفظك و ربي يوفقك إن شاء الله من نجاح إلى نجاح

امين يارب لكم ايضا ونشاء الله انتم توليو مستقبل لبلاد لي راح مستواها منذ الثمانينيات

سطايفية بكل فخر · 2012-07-17, 11:24

اقتباس:

المشاركة الأصلية كتبت بواسطة nouha19

شكرا لك يا السطايفية و الله انت رائعة
ممكن حتى انا تبعثيلي في الخاص تعيشي؟
المزيد من النصائح يا الخاوة

كامل حابين النصائح فالخاص
باش تستفيدو كامل رايحة نحطهم هنا وخلاص لانو الجميع يحوس عليهم اوكي ساضعهم بعد قليل
ولي كاش متسقسيني مكانش مشكل يابنات

kamela · 2012-07-17, 11:36

يعطيكم الصحة
^^

manel dima · 2012-07-17, 11:54

اقتباس:

المشاركة الأصلية كتبت بواسطة سطايفية بكل فخر

ختي انا راني اكسباريونس فالبنات ولحد الان مزلت مفعهمتهمش كيفاش يخمو راني طفلة وحايرة فيهم لهذا راني نبه فيكم
+
كاينين نصائح من بعد نكتبهم فقط للبنات
ونصائح اخرى عامة
مام خاوتنا الذكور رايحة ننصحهم بحكم وشا شفت فالجامعة

علابالك أختي أنا اخترت طب الأسنان في جامعة قسنطينة ومن وراها صيدلة وطب في جامعة سطيف ، معناها إذا ماقبلونيش في طب الأسنان أكيد رايحين يقبلوني في الصيدلة أو الطب ، يعني نجي عندكم لسطيف ، وبالاك نتعارفوا أنا وأنت وتعاونيني في هاذو لحوايج لأنو عندك خبرة ، خاصة مع لبنات هههههه

manel dima · 2012-07-17, 11:59

اقتباس:

المشاركة الأصلية كتبت بواسطة سطايفية بكل فخر

واجبنا
+
انا قطعت عهد على روحي نعاون اي واحد محتاج مساعدة لاني مريت مرحلة كيفكم

يعطيك الصحة أختي والله يكثر من أمثالك
أنت واش تقراي بالضبط ؟

سطايفية بكل فخر · 2012-07-17, 12:06

بصريات وميكانيك الضبط

سطايفية بكل فخر · 2012-07-17, 12:09

اقتباس:

المشاركة الأصلية كتبت بواسطة manel dima

علابالك أختي أنا اخترت طب الأسنان في جامعة قسنطينة ومن وراها صيدلة وطب في جامعة سطيف ، معناها إذا ماقبلونيش في طب الأسنان أكيد رايحين يقبلوني في الصيدلة أو الطب ، يعني نجي عندكم لسطيف ، وبالاك نتعارفوا أنا وأنت وتعاونيني في هاذو لحوايج لأنو عندك خبرة ، خاصة مع لبنات هههههه

وشا من ولاية انت
+
مرحبا بيك

سطايفية بكل فخر · 2012-07-17, 12:21

نبدا على بركة الله
كامل راكم خاوتي ومنتمنالكم غير الخير علابالي راكم جدد فالجامعة وحابين متفشلوش في تجاربكم
ولهذا انا رايحة نحطلكم اي نصيحة مدوهالي واي تجربة صراتلي ليا او لاصدقائي باش ميصرالكمش واش صرالنا

1/نصائح خاصة للبنات

*تذكري دائما انك فتاة واخلاقك سر جمالك وشرفك كنزك فحافضي عليه وصوني نفسك من شهوات الجامعة فالسنة الاولى اصعب سنة لانك تنتقلين من عالم التقيد الى عالم الحرية والحرية هنا نسبية فان تكوني حرة ليست معناها ان تفعلا شيئا خارج الدين والعادات والتقاليد.

*فالجامعة ستكونين مستهدفة من طرف الشباب خاصة من يكبرينك سنا لانهم يعلمون انك جديدة فالجامعة ولا تعرفين العقليات المختلفة لهذا احذري منهم لانهم يلهون فقط وقت الصح اكيد امهاتهم من يخترن العروس لهم

*حذاري من الصحبة لان الصحبة السيئة تلهيك عن ما جئت من اجله وهي الدراسة وحذاري من مصاحبة البنات غير المتخلقات لانهن سيؤذينك خاصة صمعتك"قلي شكون صاحبك نقلك ةشكون نت"هذا ديما حطوه في بالكم

*باباك ويماك والاهل تاعك بعثوك باش تقراي ماش باش تضيععي وقت ولازم اي خطوة تخطيها يكونو راضين عليك با ش يرضى عليك ربي

*سرك اختي احتفضي به لنفسك وعمرك لتقوليه لصحبتك لانو البنات ميحكموش فمهم وقليل لي تعرف وا ش هو السر وابسط واتفهم مشكل بيناتكم تسمع بيك الجزائر كاملة وديرلك ليبروبلام

*حاولي اختي ديما تكوني صدقات بدون ان تعمقيها لانو قادرة تعمقيها ومن بعد تكتشفي بلي هذيك الصديقة او الصديق سيئين وتندمي"خالطي ومتصاحبيش"

*اختي عمر ولا تاكلي من يد طفلة متعرفيهاش معلابلكش واش كاين فيها ولا تكون مهيش نظيفة وعمرك متحسيها بلي انت متكليش من يدها
احكمي عليها الماكلة ولكنتي شاكة فيها خليها تبعد عليك وارميها .كولي فقط من عند لي متاكدة منهم

*رقم الهاتف تاعك ماشي كامل الناس تعرفو لانو صراو مشكال بزاف على جالو ولحقو الطفلة انهم يبطلوها ماليها من لقراية
يكفي تمدي النيمرو تاعك لوحدة كونفيوس تقرا معاك باش تمدلك الاخبار تاع الجامعة ولي معاك فالشومبرا با ش تبقاو على تواصل اما الباقي واش ديري بيهم وزيد كاينة النت باش تتواصلو الايميل يكفي .

*كي تصرالك حاجة فالجامعة ديما احكيها لامك ومتخبيش عليها لانو ممكن هذيك الحاجة لي صراتلك تسببلك مشكل مرة اخرى على الاقل يكونو اهلك علابالهم بيها ويقفو معاك وقت الشدة.

*لبنات الاقامة ردو بالكم من الامن ثما راهم يبانولكم طرونكيل مي هوما نار تحت تبن راهم قمة الرذالة الا من رحم ربي .مكالاه دخسوهم عليكم من السلام عليكم فوتو طلب لكارت مديهالو مطلبش فوتي بلا ما تحكي معاهم"الفم المغلوق متدخلو ذبانة"

*لبنات الاقامة والديكم دارو فيكم ثقة مكالاه تخالطو ثما وتوليو تروحو بلبسة تخرجو بلبسة ولا تلحقو ثما تهبطو لريسطو بلا حجاب والمكايج والحوايج هاذو تعاملي كيما كنت في دارك حطي روحك باباك وخاوتك راهم معاك ثما .

*لبنات الاقامة جيرانك فالسكن الاحترام بيناتكم ومكالاه دخصوهم عليكم لانو يوليو يسكنو عندكم وتصرا المشكال وقت الامتحانات "وان كيدهن لعظيم"اذا حطاتك وحدة في راسها والله ماكي سالكة منها لهذا تجنبوا المشكال بين بعضاكم والبنات مهمش ساهلات

*كثرت على بنات الاقامة ههه مزالت حاجة فقط وقتك مضيعيش فالاقامة فالقيل والقال والتقطاع والتمنشير ديري حاجة تنفعك لان عندك الوقت مارسي هواياتك احفضي القران راجعي دروسك تعلمي حاجة تفيدك فحياتك مثلا نعرف بنات فالاقامة تعلمو خدمة الدار والكروشي وهن ناجحات فالدراسة لانهم عرفو كيفاش ينظمو وقتهم

*للبنات غير المقيمات علابالي بلي تعبكم الجامعة والنهار كامل يروح فترونسبور لكن ميمنعكمش تسفادو من وقتكم فالجامعة
وفالنهاية بالتوفيق ليكم يالبنات حطو ربي ما بين عينيكم بشا يرضى عليكم ويستركم من كل شر

2/نصائح خاصة بالذكور

ممكن انا منيش ذكر مي معليش رانا شفنا وعلى الاقل نوصلكم وجهة نظري لانكم اخوتي

*راكم رجالة مشاء الله لخر فيكم 18 سنة يعني اهلكم معتامدين عليكم مكالاه طيحو بيهم

*يجيكم وحد الوقت تحبو تفياقو على الاساتذة واسمحولو على كلمة فياقة مي هذي هي الكلمة الصائبة لانو الرجلة تتناقض مع لفياقة والراجل تاع الصح لي يحكم نفسو من الغضب "كاظم الغيظ"
اذا قالك الاستاذ نوض نوض وعلاه دير المشاكل قالك اخرج اخرج بدون نقاش ولما يهدا اهدر معاه بالعقلية "لقبيح ديما يغلبو الصامط"متوصلوش رواحكم تحت شعار الرجلة انكم تلحقو الاستاذ وانتم هوما الخاصرين لانو الاستاذ في بلاصتو وحاجة مرايحة تزعزعو ويخسر عليك 0 والصابوطاج فوق راسك والاا كثر كونسي ديسيبلين ونت برا لمدة 2 لهذا اكسب الاستاذ ومتفقدوش

*اول حاجة جي في بال الطفل انو يثبت رجولتو خاصة انو نتقل من مرحلة المراهقة لمرحلة الرشد والجزائريين يثبتوها بالدخان والقاروات
لهذا اخوتي حذاري من التدخين خاصة لما تمر بيكم ازمات ونحكي سيرتو على صحاب القامة عمركم ولا ديرو التدخين حل لانو يضركم فقط ولي راهم يتكيفومن قبل نشاء اله يبطلوه

*لاصحاب الاقامة نتم ايضا الصحبة راهي واعرة وغدارة والزلقة راهي بلقة بلاكم من صحاب السوء
وبلاكم تاكلو حاجة مكمش متاكدين منها ونحذركم الكثرة من المخدرات
وحتى لبنات متكلوش من يديهم لانهم قادرين يكونو عقرولكم وفهمكم كفاية
هههههههه علابالي راكم تضحكو لانو طفلة تقلكم هكا مي راهي صرات فالجامعة تاعنا وربي يحفظكم من السحارات والمشعوذات وراكم خاوتي ونخاف عليكم

*لبنات تاع الاقامة عندهم باش يتلهاو اكثر من الطفل لانهم يطبخو هههه ماش يكيفكم دوروها تحواس وتنساو لقراية
حذاري من هذي النقطة عمركم لتخليو لاخر لحظةوتحطو تقراو عندكم الوقت حطو فليل ريفيزيو مع بعضاكم وقت السهرة منها قصرة وشياخة منها قراية

*وقتكم متضيعوهش شاركو فالاندية تاع الاقامة وديرو سبور والله حاجة مليحة وتسمحلك تتنقلو بين الجامعات وتكونو صداقات وتعرفات جديدة

*اكثر من يصرف الدراهم هوما الذكور حاولو تخليو الحطات واللبسة لماليهم الزين راه للبنات معليش اعدلو رواحكم مي متبذروش دراهمكم والديكم شاقيين عليهم باشيمدوهملكم حاولو ترحموهم شوية
وبالكم تلبسو الالوان تاع الانانيش ههههههه والله لبنات يضحكو عليكم ويديروكم مهزلة كونو رجالة من مظهركم ثاني

*اخي الطالب انت ايضا عند بنات خواتاتك لما تتعامل مع فتاة فالجامعة حط ديما بلي كيما ديرلها يديرو للاخت تاعك"كما تدين تدان"وربي يحفظلكم امهاتكم وخواتاتكم وكل اناث عايلتكم
حافظ عليها ومتاذيهاش وصن نفسك منها وفي نفس الوقت متخليهاش تاذيك لانو وصلنا لوقت يالطيف لبنات اصعب من الذراري
ربي يباركلك ويبارك في اهلك

*نصيحة اخيرة متتهاونوش فصلاتكم وعباداتكم ودراستكم لانو هكا تضمنو مستقبلكم وتاسولو

بالتوفيق ليكم وربي يحفظكم ويستركم

سطايفية بكل فخر · 2012-07-17, 12:24

هذو نصائح لكلا الجنسين الان رايحة نحطلكم نصائح عامة تاع لقراية

ليندا ب · 2012-07-17, 12:38

بارك الله فيك أختي و الله غير نصائح في القمة يعطيك الصحة و ربي ينجحك في قرايتك
جعل الله مجهوداتك حسنات يوم القيامة

مَجْنُوْنَةٌ أَنَاْ · 2012-07-17, 13:01

أختي السطايفية ،،

الكل يريد تفاصيل أكثر ،، اقتراحي أن تفتحي موضوعا خاصا بالبنات فقط ،، ( boys keep out)

هنا أو في قسم شقائق الرجال ،،

فنحن نريد جميع التفاصيل خاصة لنا (اصحاب الاقامة)

فأنا سادرس باذن الله في جامعة قسنطينة

و بارك الله فيك أختي

سطايفية بكل فخر · 2012-07-17, 13:06

3/نصائح عامة للطلبة الجامعيين الجدد

اصعب سنة اخواني هي السنة الاولى لانو يتغير عليكم النظام ملي كنتو فالثانويات المراقبين والاساتذة يتحكمو فيكم توليو احرار نسبيا لكن لازم تتحكمو فرواحكم

*نبداو بنظام التدريس .كاين ثلاث حصص فالجامعة
-les cours او المحاضرات مفيهمش الغياب لكن هذا ميمنعش انكم تحضرو لانو 75بالمئة الامتحانات منهم
-td الحصص تاع التمارين ثلاث غيابات بدون مبرر يقصيوك من الموديل شاركو فيهم با ش يطلعولكم لي نوت ويعاونوكم فالامتحانات
-tp الحصص التطبيقية هاذو فقط للشعب العلمية والتقنية تقراوهم فالمخابر الغياب بدون تبرير ينقصولك نقطة
+
يمدولكم ديرو كونتروندي ولازم تمدوه بشا ميقصيوكمش ومتكرفصوهش برك اعدلوه باش تجيبو نوت مليحة

*عمركم لاتقولو هذي مادة اساسية وهذي ثانوية ومتححقروش المواد العود لي تحقرو يعميك وانا شخصيا المواد الثانوية هي لي نقضتني فاول فصل ليا لاني ندبتلها في مادة اساسية

*الاساتذة ثم الاساتذة ثم الاساتذة بالكم وتقلو الاحترام معاهم"قم للمعلم وفه التبجيلا كاد المعلم ان يكون رسولا وزيد من علمني حرفا صرت له عبدا"
الخاسرين هوما نتم واذا صابوطاك راحت عليك
معليش تطلب حقك لكن باحترام واشفيها اذا احترمت استاذك كيما باباك والله وحدو يولي يحبك ويعاونك
انا شخصيا استاذي تاع الفيزياء مرضت فالمتحان ومخدمتش بلا منقولو زادلي فتيدي با ش يطلعلي الموديل لان علابالو بلي انا نحتارمو ونقرا

*متخدموش برك على 10 صحيح نظام ل مد يلزمنا بذلك لكن لازم نطورو قدوراتنا ونحسنو مستوانا وميخلعوكمش صحاب الماستر كيما قالهالكم الاخ لانهم والله نصهم فارغين وحنا احسن منهم وساعات معلومات حنا نهرفوها وهوما لا
وزيد الماستر واش هو مهوش من مقامكم؟؟؟ والله والو اتكل على ربي وقرا والماستر يجي وحدو ليك

*حطو في بالكم لي يقرا يلقا ومكانش منها تاع انت مريح والنتائج يجيو يجريو ليكم

*كيما قال الاخ from13 متتشوكاوش من النقاط عادي جيب 1 و2 نورمال فالجامعة واحد ميضحك على خوه ولا يخبي لانو لافيشاج بيبليك تلقا 0 كيما تلقا 19 نت وشطارتك وقرايتك
نقلكم على روحي نهار افيشالي الاستاذ 4 فلانفورمتيك شبعت ضحك على روحي كثر خيرو مدهالي مكنتش نفهم عندو
رحت شكرتو كي مدهالي قريب قتلني ههههههه ربي يذكرو بالخير قالي مديتهالك لان الانجليزية تاع البرنامج صحيحة
هههه لكن لحد الان لكما نتلاقاه نلقي عليه التحيةو نحكي معاه لانو مهوش عدوي ولكنو في يوم من الايام قراني

والعام هذا تفيشاتلي 19 كذبت روحي حطيت روحي نام انا من الناس لي ميهموهاش النقاط المهم عندي المعلومة ونرضى بلقليل مي والله احساس واحد اخر كي تجيب 19 فالجامعة تحس روحك حاجة خاصة لما يشكروك الساتذة ويشجعوك
مام ليزامي نتاوعك يفرحولك والله تحب دايما تجيبها
ومهيش بعيدة عليكم كاينة حتى 20 ماشي كي قالولكم صابوطاج توليو متقراوش كاينين استذة ناس ملاح يعرفو حق ربي

*متحشموش تسقسيو الاستاذ على حاجة حتى لو تكون تافهة خوفا انهم يضحكو عليك قادرة طيحلك فالامتحان وتبلوكي فيها ساعتها وين رايحين ينفعوك لي ضحكو عليك وتاكد بلي لي يضحك عليه فارغ في مخو ودايها شيعة برك

*بلاكم يخلعوكم صحاب الفرنسية بالفرونسي تاعهم كامل ولاد 9 وفرونسي الجزايرريين بالشاقور ورايحين تكتاسبوها من لقراية وتوليو متعرفوش تحوسو بالعربية
انا كنت 0 على الشمال وملي قريت فالجامعة وليت نفهمها والحمد لله ران ي قاعدة نتحسن
وزيد متفهمش حاجة قالها الاستاذ قال ياشيخ تعيش عاودلي وشا قلت وشا معنها
اكتبها في اخر الكراس هكا متزيدش تروحلك طول حياتك واحسن شيئ فالشعب العلمية انو الكلمات العلمية يتعاودو نفسهمم في كل ليموديل يعني مفهومهم ميتغيرش

*حاولو طورو رواحكم فاللغات خاصة اصحاب الاقامات عندكم الوقت ديرو ufc وزيدو ديبلوم لشاهدتكم وديرو دورة فالاعلام الالي تاع 6 شهر مليحة للمستقبل والله الوقت عندكم بزاف

*اقراو في قروبات تسهل عليكم بزاف لقراية وتكون صدقات بيناتكم مليحة ليكم وكيما يقول معريفة الرجل كنوز والرجل ماشي هو الذكر هو لي تلقاوه وقت الشدة وشخصيا نعرف بنات احسن بمئة رجل

بالتوفيق ليكم واي حاجة نزيد نتفكرها نقولهالكم
+
ظرك نعطيكم نصائح على المراجعة

سطايفية بكل فخر · 2012-07-17, 13:09

اقتباس:

المشاركة الأصلية كتبت بواسطة linda b

ايه اختي سطايفية لوكان تقدري بليييييييز
أنا معنديش فيس بوك ممكن تبعثيلي الايميل نتاعك

والله راني غير فالجلفة يابنات وزيد اي حاجة تسحقوها قولولي راني نحاول نتواجد في اكبر قدر من المواضيع

سطايفية بكل فخر · 2012-07-17, 13:11

اقتباس:

المشاركة الأصلية كتبت بواسطة *black poisen*

أختي السطايفية ،،

الكل يريد تفاصيل أكثر ،، اقتراحي أن تفتحي موضوعا خاصا بالبنات فقط ،، ( boys keep out)

هنا أو في قسم شقائق الرجال ،،

فنحن نريد جميع التفاصيل خاصة لنا (اصحاب الاقامة)

فأنا سادرس باذن الله في جامعة قسنطينة

و بارك الله فيك أختي

كيفش تفاصيل اكثر
+
ههههه الذكور ايضا عندهم حق عليا لانهم جزء من الجامعات
=+
افتحي انت المضووع واعدك اني سوف ازورة واشارككم برايي المتواضع ونجاوبكم على كل تساؤلاتكم