حريرة رمضان - الصفحة 4

النرجووسة · 2014-05-25, 23:52

اقتباس:

المشاركة الأصلية كتبت بواسطة jojo dj

الف شكراختي حريرة تهبل وشرحتلنا بالتفصيل الله يجازيك خير حبيت نسقسيك كاين لي يديرو الحلبة فالحريرىى ياختي اذا تعرفي الوصفة قوليهالي

اختي جوتومو الحلبة فالحريرة روووووعة ماما كانت ديرهالنا غير حبيبات

رحيق الورد · 2014-05-25, 23:55

شكرا على الوصفة

(( هبة الرحمن )) · 2014-05-26, 15:57

فكرة هايلة

اختك راهي معاك من الغرب ......نفس الحريرة...

وننصح البنات بتطبيقها حريرة الغرب لذيذة ونويصكم بالتوابل تع المغرب ....تلقاوهم في مغنية ( تلمسان ) توابل روووووووووووووووووووووعة وهوما اللي يزيدو في نكهة الطياب ...أنا مستحيل رمضان نطيب فيه بلا توابل المغرب... الجيران يشمو الحريرة بامتار من نطيبها

النرجووسة · 2014-05-28, 15:22

وحتى انا ختكم من الغرب اكزات من مغنية ههههه يا يما حريرتناااااااااااااا

~ام ~م~خ~أ~ · 2014-05-28, 21:36

السلام عليكم
شكرا على الموضوع جا في وقته...
طريقتي في عمل الحريرة :لحم+بصل+ثوم+حبات جزر+حبة بطاطا+حبة كورجات+حبة لفت+شوية كرافس ونكتر من القصبر+زيت+حبة طماطم+طماطم مصبرة+زعفران+ملح نضيف الماء ونغلق الكوكوط لما يطيب نحي اللحم ونرحي الخضر ونرجعها للنار ونضيف التشيشة وقبل ما نطفي النار بربع ساعة ندق سننات ثوم مع شوية قصبر و ملعقة ص فلفل أسود وم ص كمون و نصف ملعقة كبيرة راس الحانوت(خاص بالحريرة حنا نقولولهم حشاوش الحريرة)ونضيفهم و بعد ربع ساعة نطفي النار جربوها راها تجي هايلة....

fatimazahra09 · 2014-05-28, 21:42

نموت على الحريرة ... وعلى الحراير ليعرفو يطيبوها .... ياتيك الصحة

sirina2 · 2014-05-29, 10:20

صباح الخير أنا الحريرة ما نديرلهاش الخضرة باش ما تتبدللهاش البنة
ندير البصلة والثوم وطماكم الحب واللحم والقصبر وملحوفلفل أسود وراس الحانوت والزيت ةنقلي مليح ونزيد شوية ماء والطماطم المصبرة ونرمي التشيشة أنا ندير مرمز ونقلي من بعد نزيد الماء والحمص ونخليها طيب من الآخر نزيد قصبر وراس الحانوت جربيها ومش رايح تندمي تجي خفيفة وبنينة

fatimazahra09 · 2014-05-30, 09:39

اقتباس:

المشاركة الأصلية كتبت بواسطة lyzzabel

مممممم كنت نقول ام طيري الجنة دخلت و ما زال ما قالتليش على طريقتها فالحريرة هههههه
الله يعطيك الصحة حبيبتي راها تبان بنييييييين يعطيك الصحة ،،انا طريقتي تختلف شوية
ندير اللحم و بصلة مقطعة و فصوص ثوم يتقلو في شوية زيت و من بعد حبة طماطم مقطعة و ندير ربطة قصبر و ربطة كرافس ،ملح حرور كروية ،زعفران،راس الحانوت ،عود قرفة ، شويييية كبابة مطحونة و مراااات ندير شوية كركب و نقلي على نار هادية مع التقليب و نمرق شوية و نضيف ملعقة ك طماطم مصبرة و زوج حبات زرودية مانكثرش فيها الخضرة ، نخليها تغلي شوية و نزيد نمرق و نغلق و نخليها تطيب
مين يطيب اللحم نصفيها فالكسكاس مرات نطحن الخضار و مرات لا ،، نرد المرقة فوق النار و نزيد كمية الماء و الطماطم المصبرة لي ناقصين و نزيد زوج ملاعق ص كروية و نذوق الملح ،،نزيد ربطة قصبر و مين تغلي نرمي فيها التشيشة و نخليها تطيب ربع ساعة و نوجد الفرينة مخلطة مع الماء مليييييح و نضيفهم للحريرة و نخليها تغلي ربع ساعة وحدخرا ،،مين نطفي نعصر عليها نص ليمونة صغيرة و نديرلها شوية قصبر مقطع رقييييييق و نقدمها مع اللحم نكون قطعته قطع صغيرة فالغرافي،،،، مممممم ههه

و فالأخير نقولك اللللف شكر حبيبتي على الموضوع الشيق

و بارك الله فيك

السلام عليكم اختي ... انا نموت على الحريرات ... وعجبتني طريقة الاخت ام طيري الجنة ... و أنا نقرا في الردود لقيت وصفتك ... والله شحال متوحشة حريرة معسكر ... وعييت نعاود كيفها ما عرفتش ... قوليلي برك من واش متكون راس الحانوت نتاع معسكر من فضلك
وحتى حنا عندنا طريقتنا في الحريرة و الي هي ... نديرو الخضر واللحم والقصبر وعرف كرافس و 1 م ك طماطم وشوية حمص و نقلو و نمرقو وكي يطيب اللحم انحيوه و نطحو الخضر وانا مانطحنش و نديرو التيشة ولا المرمز و نخلوه يطيب .. وفي الاخير نزيدو سنة ثوم مقطعة رقيق و 1 م ص كروية نخلوه يغلي غلية ولا زوج ونطفي .. وشوية قسبر مقطع ... وهذا ماكان