الجزء 106 من واش طيبتي اليوم, معا لنتعلم فنون الطبخ

[أم ماجد]

https://www.djelfa.info/vb/showthread.php?t=1728992
لبنات لهلوبة هنا عودة قوية ربي يحفظها

[cuisineshowdalatifa]

أم وسيم مرانيش بعيدة عليك ساعة ونصف و أنا عندك نجيبلك المعجون و اللي حبيتيه

[دائمة الحمد]

امممممممممممم لطيفة اول مرة نشوف معجون السفرجل ابيض روعة

[om wassim]

ربي يحفظك لطيفة و يعطيك ماتتمناي كلي جيتي و جبتي يعطيك الصحة

[lahna moka]

أمال حبيبتي انا السردين نجيبو و نحطو مباشرة في ماء بارد خاصة كي تكون السخانة و نبدا ننحيلو فالراس و الأمعاء واحد واحد حتى نكملهم و بعدها نغسلهم مرتين ولا ثلاثة دون ما نعجنهم و نكرفسهم هههههه غير باش تتنحى الطبقة العلوية تاع الحراشف
في الأخير نحطو في كسكاس و نرش عليه شوية ملح و كمون و 2 فصوص ثوم مرحي و نغطيه و نخليه فالثلاجة لوقت الاستعمال
_اذا حبيت نقليه نزيدلو شوية كمون و شوية قصبر مقطر و ثوم مرحي و نخلط الكل و نلصق كل 3 كالاصابع و نرمدهم فالفرينة أو السميد و نقليها عادي و نرش عليها عصير ليمون مممممممم
_ اذا حبيت نديرها دولمة او مثوم كيما اليوم: ناخذ السردين هاذاك بعدما نظفتو و قطرتو و تبلتو و ننحيلو الشوك معليش يتفتت لاخاترش أصلا رايحة تعجنيه شوية . بعد ما تنحيلو الشوك ديريه في اناء مع كمون و فلفل أسود و قصبر مقطع و ثوم مرحي و كمشة روز و شوية ملح و صفار بيض او بياض و اعجني الكل بلا ما تحوليه لبيوري طبعا هههههه غير باش تختلط المكونات ديريهم كريات رمديهم فالفرينة. وجدي المرقة تاعك البيضاء و ديري الكويرات فيها و خليها تطيب
ملاحظة: السردين كي يكون جديد تلقاي شوية صعوبة باش تنحي الشوك لاخاترش اللحم يكون لاصق بيها و أصلا يكون واقف و شاد روحو كيما نقولو بصح السردين القديم يعني اللي يكون معرض للحرارة فالشارع كي تجي تنحيلو الشوك يتفتت
نتمنى أفدتك اختي و لو بالقليل و اي سؤال على عيني و راسي

[ام محمد 05]

حبيبتي لهنة ربي يجازك كل خير وشكرا على التوضيح لكن ممعنى تلصقي 3 كالاصابع هههههههههه والله مفهمتش ودوختك معايا

[lyzzabel]

صباح الأنوار حبيباتي الغاليات و نهاركم طيب
فطورنا اليوم برانية و سلاطة بإذن الله
مازال ما راجعتش ،، من بعد انشالله نولي ،، باااااااي


اللهم ما اصبح بي من نعمة او بأحد من خلقك فمنك وحدك لا شريك لك فلك الحمد و لك الشكر

[ام نور الهدى 2014]

السﻻم عليكم
ابنات ممكن وصفة تلمبرجة تاع ام رامي راني مقدرتش ندخل للمدونة تاعها؟؟

[ام محمد 05]

هاكي اختي مي المدونة مقدرتش ندخلها https://www.djelfa.info/vb/showthread...post1056011314

[أم ريمة*]

لهنة ريمة ماتدخلش للمنتدى خلاص ناشى كيما انا مدمنة ههه المهم هاهو البروك تارت عيد ميلاد حفيدى ولد ريمة لى درتهالووكاب كايك انتاع حنان روعة ربى يهنيها ويسعدها امين

[om kamilia]

تفضلو هذا عشايا كروكات الشوفلور



وطاجين اللفت



وسلق بالدرسة وحر المرقد تع لينا



صح عشاكم

[ام محمد 05]

مشاء الله روعة

[ام محمد 05]

لهنة راني زدتلك سؤال

[lahna moka]

أم ريمة التارت مممممم و ألف مبروك لحبوبي اياد لعقوبة ل 100 سنة يا رب
أم كاميليا مممممم على عشاك بصح اللفت ما نحبوش عطيني غير السلق ممممممم
حنان انا خرجولي فالبابا 10 حبات بالضبط ربما المول تاعك كبير على تاعي
أم نور الهدى تفضلي وصفة المبرجة تاع أم رامي

اخبطي 250غ مرغرين لابال مليح بيدك حتى تصير كالمرهم

زيدي نصف علبة المرغرين زيت

ثم كاس حليب بارد من الثلاجة

خلطي مليح مليح بيدك او بالباتور

ثم اضيفي 4 كيلات بعلبة المرغرين دشيشة خشنة + كيلة فرينة + ملح ونص كيس خميرة كيميائية

الان اعجني بكفوفك مليح واضغطي على العجينة واذا احتجت شوية حليب زيدي عينك ميزانك بصح ما تكثريش بزاااف انا زدت اقل من ربع كاس

اقسمي العجينة على اثنين

والغرس اشري نتاع البطانة مش المعجون اخدميه وحدك نقيه مليح وفوريه زيديلوشوية ماء زهر وزيت وجلجلانية ونص كيس خميرة القاطو واعجنيه مليح

على جنب نحط شوية دشيشة في صحن ونسكب عليها شوية زيت ونخلطها باه نحرش بيها المبرجة كيما تعرفوا

نبدا العمل نحتاج لقطعة بلاستيك خشينة نفرشها على الطاولة وفي الجهة اليمنى منها نقرص القرصة الاولى وراهي تتشقق على الحواشي اعدليها بيدك

ثم نضع فوقها نصف كمية الدشيشة المزيتة ونحرشها مليح

الان نقلب الجهة اليسرى للبلاستسيك على القرصة ثم نقلب القرصة بحذر

ندهن البلاستيك بالزيت ونقرص الغرس
نقلبه على القرصة الاولى

وبنفس الطريقة نقرص القرصة الثانية ونقلبها ونضع فوقها الدشيشة المزيتة ونحرشها

ثم نحللها حتى نتحصل على السمك المطلوب 1 سم

نقسمها ونطيبها على طاجين حديد

خليها تبرد ثم امسحي الحبات بمناديل ورقية باه تتخلصي من حبيبات الدشيشة المحروووقة وقدميها


إضغط هنا لرؤية الصورة بحجمها الطبيعي.


إضغط هنا لرؤية الصورة بحجمها الطبيعي.

[أم ريمة*]

ههذاالكاب كايك انتاع حنان ما حبوش الصور يتحملو