كل شيء تحتاجه للتحضير لباك 2012 هنا

[amel soltani]

rabi ynaja7na kamal normalement nta 3ilmi lala

[روح المعرفة]

oui je suis scientifique wantia okhti elkarima wana cho3ba

[amel soltani]

moi aussi 3ilmiya

[amel soltani]

7abitak ta3tini isme al kotob li ra7 ta9ra biha w al mawa9i3 pcq manich 7aba nkhalat bzffff haka nas7ouni 7aba nasi7tak.att

[روح المعرفة]

المشاركة الأصلية كتبت بواسطة amel soltani

7abitak ta3tini isme al kotob li ra7 ta9ra biha w al mawa9i3 pcq manich 7aba nkhalat bzffff haka nas7ouni 7aba nasi7tak.att

ماكان حتى مشكل أختي شوفي أنا قررت مادا سأراجع و ماهم المراجع سوف أخبرك بكل شيء إن شاء الله
1/في رمضان متعبيش روحك خلاص برك اقراي شوي اللغات باش تحسني روحك فيهم و زيد ميطلبوش خدمة كبيرة اعتبريهم كمتعة و اقراي القرءان و استعيني بالله و ادعيه في كل صلاتك ليوفقك إن شاء الله
المراجع
1/علوم طبيعية ميسر أحمد أمين خليفة بجزئيه و هدا ما قاله لي جميع الطلبة المتحصلين على شهادة البكالوريا بامتياز اصلا المراجع لي راح نقولهوملك الكل نصحوني بيهم المتفوقون بامتياز و جيد جدا كدلك موقع الأستاذ بوزار إنه ممتاز
نقولك اقراي الموضوع ادا او يفيدك إن شاء الله بالنسبة للمواقع
https://www.djelfa.info/vb/showthread.php?t=670804
لاكان حابة تدي الباك بامتياز لازملك تحفظي تاريخ و جغرافيا جميع الدروس و جميع الخرائطاستعيني بالملخصات و كاين كتاب قالولي عليه اسمو (الوجيز في الاجتماعيات) مليح ياسر و (الطبري في التاريخ) و ملخصات محمودي عادل و اني دوك عندي ملخصات و دروس هايلين في حاسوبي حتان نهزهم للنترنت و هدا يتطلب وقت المهم عندي حوايج ياسر إن شاء الله نجيبهم للانترنت و اني ندير مواضيع و نحطهم فيهم فقط يلزمني بعض من الوقت
الفيزياء و الرياضيات نعرف الهباج ممتاز بصح منعرف نزيد نسقسي و نقلك و الفلسفة موقع الاستاد فورار و احفظي المقالات ياسر و أما المفاجأة الكبرى بالنسبة ليا هو موقع اللي داروه الطلاب المتفوقون بامتياز في بكالوريا 2011 اللي داو اكتر من 18 الموقع فيه مواضيع دروس ممممممممممتتتتتتااااااااز ممتاز كلش ملخص و مفيد و منقي و مختار منهم و فيه لقاءات مع متفوقوا بكالوريا 2011 انا استفدت منهم ياسر ننصحك اقرايهم و متزيديش تحوسي على حاجات وحدخر غير فالمات و الفيزياء اتمنى ان القى مراجع ممتازة و نقلك عليهم
لاكان نجيب معلومات جدد اني نقلك ok و انا اني هنا كشما احتجتي سقسيني و اسناي مواضيعي القادمة إن شاء الله

[amel soltani]

wallah mani 3arfa kifach nochkrak apare nad3ilek rabi ywaf9ak w ywafa9na kamal sa7a nta insan ma chaa allah rabi ya7fdak

[روح المعرفة]

المشاركة الأصلية كتبت بواسطة amel soltani

wallah mani 3arfa kifach nochkrak apare nad3ilek rabi ywaf9ak w ywafa9na kamal sa7a nta insan ma chaa allah rabi ya7fdak

merci amel netmena ani ofidokom wa law bilkalil
w nchalah nnjhou kamel bimtiyaz

[amel soltani]

nchallah ya rabi

[عادل الكتالوني]

شكرا على المرور
وبارك الله فيك
وجعله في ميزان حسناتك
ودمت ذخرا للمنتدى اطال الله في عمرك

[روح المعرفة]

المشاركة الأصلية كتبت بواسطة عادل الكتالوني

شكرا على المرور
وبارك الله فيك
وجعله في ميزان حسناتك
ودمت ذخرا للمنتدى اطال الله في عمرك

شكرا لك جزيلا أخي الكريم دمت في رعاية الله

[amel soltani]

habit nsa9sik ya akhi nta kifah tari9at al7ifd nta3ak ma3a al3ilm kol wa7ad w tari9to mais wa9il nastfado manak merci

[روح المعرفة]

مرحبا أختي الكريمة يعني للأسف أنا المشكل الوحيد اللي عندي هو الحفظ (و الحمد لله) لدلك فانا لا اعرف اطلاقا كيف احفظ و لكن لما سالت الطالبة العزيزة علي نسمة النجاح قد اخبرتني بطريقة رائعة جدا وهدا الرد الدي كتبته لي خصيصا و قد جلبته كما هو لك أتنمى ان يفيدك و ادا كانت لك طريقة أخرى أخبريني بها
شوف خويا
هي في الحقيقة الطريقة تتبدل من شخص لآخر
لكن بما ان لا طريقة لديك
يعني الافضل تشوف كيفاش يتعاملو الناس مع الحفظ وتحاول مع كل طريقة باش تختار الاحسن واللي تناسبك اكثر

الفكرة تاعي
هي انو
تفهم .... تقرا .... تكتب .... تكرر مع التسميع .... تكتب
تلك هي المراحل
هاذ المراحل راك تخليك تشغل العقل البصر السمع وحتى انك تستعمل يدك

الآن اول مرحلة قلنا الفهم ..... لازم تفهم الدرس جيدا ... تقدر تفهمو في القسم بلا ما تحتاج تعاودو ... واذا مافهمتوش في القسم عاودو في الدار تقدر تعتمد على الكتاب
ثم نجو الى اليوم اللي راك حاب تبدا تحفظ فيه .... جيب الكراس تاعك واقرا الدرس فقرة فقرة ربما مرتين تكفي
ثم الآن ومن الاحسن تحكم ورقة .... ورقة مزدوجة مثلا ... وعلاش ورقة ... لأنها تساعدك على التركيز غير مع هذاك الدرس وماتخليكش تحس انو مزاللك بزاف ما حفظتوش .... اوكي تحكم الورقة وتنقل الدرس تاعك فيها .... موش الدرس باكمله .... لأنو مرات يكون الدرس يحوي نقاط تقدر تعبر عليها وحدك من خلال الفهم يعني ما تحتاجشش حفظ .... بالتالي انقل على الورقة كل ما يحتاج الحفظ فقط
ناتي الآن الى مرحلة التكار والتسميع ..... فقرة بفقرة ... والفقرة هنا تقدر تعني مجرد نقاط ...... تقرا الفقرة ثم تزيد تعاود وتزيد .....قلت قراءة يعني بالنظر الى الفقرة المكتوبة ...... بعد هذا تغمض عينيك وتكرر مع التسميع ..... لأنو سماع الصوت امر مهم يساعد على الحفاظ على ما تلقيته .... لا تتوقف عن التكرار الا بعد ما تحس ان الفكرة ترسخت
في بعض المرات تحس انو ورغم التكرار مزال ما دخل والو في راسك ..... هنا استرح قليلا
وحاول ان تسترجع كل كلمة ... حتى وان كانت مجرد كلمات غير مرتبطة ... ثم اعد الكرة
الآن وبعد ان انتهت عملية التكرار والتسميع ...... روح لكراس الحفظ ... يعني كراس خلاف .... وحاول ان تكتب ما حفظته ...

[نسمة النجاح]

المشاركة الأصلية كتبت بواسطة روح المعرفة

مرحبا أختي الكريمة العزيزة على قلبي نسمة النجاح كتبت الموضوع هنا لتقرإيه بما انه موضوعك و انا اسف لاني لم اشكرك في الوقت المحدد اليوم رايت ردك و لا اعرف كيف اصف لك عرفاني و شكري لك باركك الله و جعله في ميزان حسناتك و جزائك الجنة بإذنه تعالى راكي نحيتي علي هم كبير تع الحفيظة و نفكرك بالموضوع اللي كتبتيهولي في موضوع (انت تسال و نحن نجيب) اشكرك جزيل الشكر

السلام عليك ورحمة الله تعالى وبركاته

لا داعي للشكر اخي
هذا من واجبي
اتمنى ان اكون قد افدتك
وان كانت لديك اي اسئلة اخرى فلا تتردد بطرحها
فنحن هنا لخدمتكم

[روح المعرفة]

المشاركة الأصلية كتبت بواسطة نسمة النجاح

السلام عليك ورحمة الله تعالى وبركاته

لا داعي للشكر اخي
هذا من واجبي
اتمنى ان اكون قد افدتك
وان كانت لديك اي اسئلة اخرى فلا تتردد بطرحها
فنحن هنا لخدمتكم

مشكورة جدا أختي نسمة النجاح و الله مقصرتي معانا ربي يحفظك و الطريقة نتيعك فهمتها سوا و قد أعجبتني كثيرا

[الجـَرَاح ْ]

اخي انا نعطيلك مصطلح آخر
الحفظ = مفهوم ما ستحفظه + التكرار

لو تفهم الشيئ قبل ما تحفظوا وتواضب على تكراره سيرسخ في عقلك بسهولة

وحقيقة انا شخصيا كنت نعاني من مشكل الحفظ ههه لكن الحمد لله التربية الاسلامية والله اجبت بطريقتي وطبعا اعتمدت على ما حفظته لكن صغته بطريقتي فحصلت على 20 والحمد لله