كل عضوة تحكينا عن جرائمها المطبخية

[sirinor2009]

اضحكو ياالبنات علي ماما
علي8.00نخرجو نروحو نقراو هي توجدنا لفطور وترجع ترقد شوية 8.45وبعد تنوض تكمل صوالحها ايا هادا نهار قالت عندي صوالح بزاف منرجعج نرقد
دارت اللكسوة في الماشينة قعدتلها غي التشلال وخلات العجينة ترتاح ونصبت عدس ومصكرتش الكيكوط ايا وهي فرحانة كي كملت كاع صوالحها وختي بيبي راقدة خرجت تنشر في الكسوة تصكر عليها البالكو 9.45 10.00 11.00 واختي تبكي تبكي وهي تحاول تكسرو والو 11.45 باش تفتح عليها الباب وحاجة مهيش كاملة ني كسرة ني عدس ني كسوة مغسولة

[الاء هبة الرحمان]

مسكينة ماماك تكون ماتت من الخلعة خاصة على البيبى اما الباقى نورمال

[طائر النورس مغتربة]

شكرا المازة على الموضوع تفكرت اول مرا تعلمت فيها نعجن شمرت على يديا وحسبت الدعوا ساهلا خلطت الدقيق فلماء عادي ولما دخلت يديا غرقو فلعجين وما قدرتش نسلك روحي وضليت على هدا الحال حتى جات امي الله يدكرها على خير وسلكتني ملعجين هههههههههههه

[ايمان2009]

والله قتلتوني بالضحك انا ماعنديش بزاف غير واحدة برك مرة اختي قاتلي طيبت البيتزا ب 5 مغارف خميرة وصفة تاع حورية المطبخ نروح انا كي الفحلة ندير 5 مغارف صح والله جات خبز الدار بالطماطم

[حلاوة_87]

ههههههه منين قريت جرائمكم..تفكرت اكبر جريمتين درتهم فالمطبخ....هههههههه
كنت صغيرة يعني 14 سنة ومنعرفش المطبخ وين يبدا ووين يخلاص نسمع فقط يحكيو على الطياب...المهم هذاك اليوم امي اضطرت تبات عند جدتي..يعني امها...وهي كي تعرفني خاطيني الطياب وصاتني وقالت لي قولي لابوك يشريلكم العشا جاهز...انا الفحلة قلت ياك الطياب ساهل يخلطوا كلش فالقدرة ويخلوه حتى يطيب يطفو...قلت نطيب شربة vermicelle وطبعا قليت ودرت الماء باش نمرق وفرغت نص علبة نتاع الشربة وغلقت القدرة ورحت نتفرج....وكي رحت نشوفها هههه المصيبة لقيتها تنفخت ونشفت وحصلت وتبهدل الفرن ومنحكيلكمش....قلت لالا بابا رح يعيط عليا ندبر عشا اخر ...نظفت الحالة وقلت ندير شوفلور...وبسلامتي مش غليته ودرته فالبيض وقليته..لالا قسمت راس الشوفلور وهكذا نيء حطيته فالمقلاة فالزيت...هههه وذاك العجب تحرق ومنعرف كيفاش رجع...تم ارفدت العلام الابيض ..وعند بابا مباشرة قلتله سلاكها اشريلنا العشا من برا......ولليوم كي نتفكرهم نموت بالضحك.

[**نور اليقين**]

المشاركة الأصلية كتبت بواسطة بسمة حنان

انا عندي جرائم بزاف كي كنت صغيرة كي نتفكرهم نقولكم عليهم اما الجريمة الطازجة عندها غير البارح انا الفحلة درت البيتزا خدمت العجينة و حطيتها تطلع و رحت نحضر في الحشو قاعدة نغني و باسطة للاخر العجينة طلعت و ختكم واش تفكرت .........؟؟؟؟؟؟؟
و الله العظيم من عند ربي جاتني طول في بالي بلي باطة الملح ما جبدتها خلاص اذا العجينة مسوس واش دارت المغبونة نتاع ختكم عاودت عجنتها بالملح و خليتها عاودت طلعت جاتني شوية برك معجنة بصح الحمد الله جات بنينة

ههههههههههههههههه

رانا كيف كيف
انا ثاني البارح درت البيتزا خدمت العجينة وخليتها تطلع درت اللاصوص ورحت نشوف في العجينة نلقاها هي هي ماطلعتش وتفكرت بلي مادرتش الخميرة قبضتني الخلعة ومن بعد درت شوية فرينة ودرت فيها الخميرة وكثرت شوي وعاودت خلطتها مع العجينة والحمدلله صلحت وجات خير من مالفة نديرها

[sirinor2009]

ههههههه انا جرائمي مهيش بزاف
ابرزهم الدولمة جا عدنا ضيف في رمضان وجدنا الفطور كاع وبقلنا لحم مرحي قلت نديرلو شوية دولمة نتاع الفلفل وكورجات مذقتهاش وحطيتهالهم والنتيجة رجعوها كامل وعلاه............?????,,??????,,?,?,,???
الفلفل حار يشوي شواهم هههههههه .

[ام احمد]

و الله قتلتوني بالضحك اما انا الحمد لله جرائمي قليلة نوعا ما اخر مرة درت عجينة10 دقائق و نسيت الزيت طيبت اول بيتزا هاكاك ثم تذكرت وزدتو مي للاسف ماجاتش مليحة كيما موالفة تجيني..........................

[رحيق الايمان]

حكاية الملح عندي نورمال خلاص ولو يعرفوني في الدار كي نطيب راي اكيد مسوسة و مام راجلي حفضني نهار درت ليه الغداء اول كلمة قالها قبل ما يبدا ويني الملاحة هههه هذا روتين عندي ضرك حبيت نحكيلكم على الجديد تاع مختبر ديكستر تاع وحدة فامي ليا في عرس ولد عمي لعبتها شغل تاع دار و تتفلسف و الحاجة الي نحكيو عليها تقول ما طيبش هكا المهم نهار الكورتاج نضنا كامل نوجدو في الغداء للمعروضين جات حبت تعاونا لقاتنا صايي قسمنا الخدمة بيناتنا البنات راكم تعرفو اختصاص البنات في العرس بقات غير السلاطة اختى زربوها باه تروح للحفافة باه تركب مع العروس خلتهالها المهم تربعت عليها كي لالة تنقي و تحط و واحد ما جاء في بالو يطل عليها وصلت 10 جينا نديرو السلاطة في الصحونة ما لقيناش عيطنالها قالت راي ثم قلبنا الدنيا لا اثر للسلاطة تخيلو وين لقيناها جات عمتي حسبتها السلاطة الفاسدة الي تترمى دارتها في البوبال و بدا الحس و تقلبت الدنيا السلاطة كامل راحت هي مسكينة قالت جيت فيريفيتها لقيتها مفتفتة اندري كلاها الدجاج عرفتها الفاسدة و تخيلو رحنا جبدنا كيفاه نقاتها كل ورقة ما تفوتش 2 سم كارثة وهي هربت و من يومها وين العرس الي تروحو ما يخلوهاش تقرب للسلاطة

[allmaza]

[الاسراء]

السلام عليكم والله ضحكتوني بزااااااااف.انا واحد الخطرة بغيت ندير البسبوسة وكنت عاد نتعلم اي درت السميد والزيت وبسستهم بيدي ومن بعد رحت عند اختي قلت لها صايي بسبستها قعدت غي تضحك علي ولدرك راهم شادينها لي.بالاضافة الى اني دائما نقلي صباعي في الزيت مع الطبخ.خطرة رحت عند اختي ضيفة قالت لي دير العشاء نصبت وخليته على النار ونسيته حتى لقيته محروق(شايط).وخطرة كنا نديرو في المناج وجعنا وقرب الفطور قالولي نتي ديري لنا خبزة في الكوشة من كثر الجوع درته مسووووووووووس قعدنا ندرو فوقه الملح وناكلو .انا كي نكون وحدي في الكوزينة يسمعوني نطلق تتويغة ونسكت ياااااو راني محروقة من كل جيهة