المخلع البشاري على اصوله ..مع اسرار نجاحه ....تفضلوا

[أ م ساجد وسيم]

السلام عليكم
كيراكم يا حراير المنتدى..اليوم درت طبق تقليدي المعروفة بيه منطقة بشار واللي هو المخلع...هاذ الطبق اشتق اسمه من كلمة الخليع لي هو القديد...ودرك كاين لي يديره بالقديد خاصة في عرس الرجل ويديروه في لعشية مع الشاي ويقدموه لكل من يجي للعرس ..ويديروه في اليوم الاول من العرس]و عنده بزاف حشوات كاين لي يديره بالبصل والشحمة والبطاطااو البصل والشحمة فقط..او الكفتة والبصل والشحمة..وصدقوني يجي بنين بنين بزااااااااااااااف
نبداو على بركة الله... نسيت ماقلتلكمش الطريقة هذي علمتهالي مرت خويا الله يفرح قلبها ويحفظلها ولادها وينجحهم
الحشو :
بصل اخضر مقطع رقيق باش مايثقبش العجينة وتخرج الحشوة

شحمة مقطعة رقيق رقيق او مرابيينها كيما درت ..او تطحنيها في الروبو

كفتة نقلوها مع ثلاث سنينات ثوم وقصبر وشوي معدنوس، ملح، كمون ضروري،فلفل اكحل ونخلوها تبرد


نروحو للعجينة
فرينة ، ملح ، ملعقة صغيرة خميرة خبز انا درت كمية كبيرة قريب عشرين خبزة درت ملعقة صغيرة معناها انتوما ديرو نص ملعقة ممسوحة وعجنوها مليح ماتجيش قاسح تجي طرية شوي ونبلو يدينا بالماء ونمسحو العجينة من فوق ونخلوها ترتاح ونغطوها....

بعد عشر دقايق نخبطو العجينة مليح مليح ونخلوها ترتاح نديرو طريقة هذي زوج مرات وحتى كي نحب نبدا نطيب نديرو طريقة هذي....كلما نخبطو العجينة راح تجي هايلة وراح تلاحظو في الصور
هذي المرة الاولى كي خبطتها.. طريقة العجن هذي سر من اسرار نجاح الطبق هذا وباش تجي العجينة خفيفة والمخلعة رقيقة ماشي غليضة
س
المرة الثانية

منبعد نحكم قصعة او صحن كبير وغامق نحط فيه البصل الاخضر والشحمة وخليط الكفتةونضيف عليه ملعقة كبيرة طماطم معلبة ، حرور بارد، كمون كمية مليحة ، راس الحانوت ، فلفل اسود ، ملح ، ونضيف نص كاس تاي زيت وهذا سر من اسرار نجاح المخلع باش الحشو يتمشالك مع العجينة وخاصة في البرد ونضيف قصبر وزوج سنينات ثوم ولي تحب الحار ديره على شرط تقطعه رقيق او ضيف هريسة .. نخلط مليح باليد ونذوق اذا لزمه شيء من التوابل نضيفله..


نحضر طاولة لي نخدمو عليها مع غرفية زيت وغرفية فرينة و طاجين نديروه يسخن نديرو كويرات من العجين وندهنوهم بالزيت و نغطوهم ناخد اول كويرة من العجينة نحلها باليد بعدما نكونو رشينا طاولة بالفرينة وندير مغارف من الحشو ونلم اطراف العجينة مليح ونقطع العجين الزائد بيدي ونرش فوق الكويرة الفرينة في لمكان لي قطعت منه العجين الزايد ونقلبها على جهة القطع ونخليها




نجهز ثلاث كويرات بنفس الطريقة ونغطيهم بعدما يكون طاجين سخن نرجع للكويرة الا لى ونبدا نحل فيها بيدي بسياس ونقلبها مرة على مرة باش نحلها من الجانبين وبطبع الطاولة فيها الفرينة باش ماتلصقش

كي تكونوا تحلوها ودير فقاعات معناها عجنتوها مليح
نرش شوي زيت في طاجين ونلوح المخلعة تاعنا طيب كي نحطها فوق الطاجين لازم نزيد نقرصها بيدي مليح مليح وخاصة حواشي المخلعة

وكي نشوفها طابت من التحت نرش شوي زيت ونقلبها


وتقدم بصحة والهنا وتنكل سخونة مع لتاي اممممم

الصور مظلمة شوي لان كنت نطيب في الحوش وفي ليل وراني حاولت نعدلهم نتمنى تاخدو تعبي بعين الاعتبارطبق المخلع طبق سهل وبنين بزااااااف مايتشبعش نتمنى تجربوه حاولت نشرحلكم بتفصيل
ادعولي خواتاتي ولمرت خويا ربي يخليهالي
ملاحظة تقدرو ديرو المخلع بالبصل العادية بصح قطعوها مليح وذبل ها في المقلاة شوي برك خمس دقايق وخلوها تبرد ومنبعد عصر ها من الماء لي تطلقه مليح مليح