دلّلي كوزينتك ...العيد قرّب :

[ابداع جزائرية]

اللهم صل على سيدنا محمد صلاة ترضيك وترضيه وترضى بها عنا يا رب العالمين
وعلى اله وصحبه اجمعين والتابعين باحسان الى يوم الدين:


وش احوالكم يا بنات نتمنى تكونو كامل بخير
اليوم جيت ضيفة جديدة في قسم الخياطة نتمنى نكون ضيفة خفيفة الظل

حبيت نحط موضوع نتاع طقم الكوزينة
اولا في خاطر احتي الغالية ام راضية لانها طلباته
وثانيا للعرايس اللي توجّد حوايجها للدار الجديدة ربي يهنيهم ولعقوبة للي مازالو
وثالثا لكل من تحب تجدد في كوزينتها او كوزينة ماماها
فقط للي استفادت ماتنسانيش من دعائها
ربي يرضى علينا ويقدرنا نعملو صالحا يرضاه ويبعد علينا كل سوء

الكوزيييييييييييييييينة...
حبيبتنا الكوزينة...ورفيقة الدرب في االليالي الحالكات..ههههه
طقت في دماغي في عيد من الاعياد ندرلها قش العيد وندللها على تعبها معايا
تستاهل...لا؟
وحتى حنا لبنات نستاهلو نكونو مرتاحين فيها واغلب وقتنا لثمّا
كنت شريت قماش خاص بالمطبخ وكاين انواع ماشاء الله
حوالي 4 مترات
شوفو وش درت بيه:


اولا حكمت الطابلية القديمة نتاع الطقم القديم المشري جاهز
وحطيتها فوق القماش وفصلت قدها
ودرت التور بالبيي موف...
بَنَشْنَنِي كيما تقول بنتي مريومة ...زعمة بنفسجي
وخيطت جيب على شكل تفاحة
مانعرف بانت تفاحة ولاّ برج دلاّع؟


وعاودت فوق الكاري القديم القماش وحوطتلو بالبيي

ونفس الشي للقفاز القديم لأنه كان قدام لكن كان مبطّن ويشد الحرارة كي نهز بيه

وخيطتو بالبيي كيما في الصورة ودرتلو منين يتعلق

وفصلت مستطيل وخيطتله البيي على الجناب ودرتلو لاستيك على بعد حوالي 4 صباع من الحافتين
ودرتلو حتى هو منين يتعلق
لأكياس البلاستيك عملية
ندخلوهم من فوق ونجبدو بالواحد من تحت



وحتى الفريجيدار خيطتله مستطيل كبير عرضه عرض الثلاجة وطوله حسب ماتحبي
يعني المهم يكون نازل على الجناب



الجيب نفس اللي درتو في الطابلية


ونفس الشي للميكرووند...لكن بلا جيب

والطابلة درت دائرة كبيرة وكففتها بالبيي

كانت الخياطة لازم تكون في النص لان القماش عرضه قليل بالنسبة لعرض الطابلة

وهذا نحطو غير في المناسبات
لكن للدوم شريت توالسيري يتماشى مع اللون

بالنسبة للريدو كنت معولة نخيطه من نفس القماش
باش يكون مع بعض
لكن ماكفانيش الوقت
وكنت كي خرجت لقيت هاد الريدو سامبل ويتماشى مع اللون اللي شريت
شريته لان ثمنه كان معقول يعني


وشريتلو اكسسوار صغير على شكل تفاحة باه يتحكم او يتطلق
بهاذ الشكل لاختراه ماعنديش لا أوت فمضطرة نحل الطاقة بزاف

هذا بالنسبة للخياطة نتمنى تكونو استفدتم من الفكرة
وفي المشاركة التالية باذن الله نحط بعض الاكسسوارات اللي شريتها
باه تتماشى مع اللون وتكمل بهاه في الكوزينة