بطاقة تعريف خياطات امنتدى الجلفة

[wafaachal]

المشاركة الأصلية كتبت بواسطة ام مريم اسراء

انا عجبتني ياسر هاذ المبادرة الطيبة الي قامت بها الاخت sara و انا بصراحة مجرد هاوية او بالاحرى مبتدئة .... اول تجربة لي هي منذ الصغر كنت نخيط للدمية نتاعي وفي الكثير من المرات كنت ننسي الابرة و تدخل في الفراش و مرة على مرة تبيكي واحد من الدار خاوتي المشاغبين كانو كيحبو ينتقمو مني يحطو ابرة و يقولو .... اي و يحصلوها فيا حتان ندي عركة بالبليغة نتاع البلاستيك بونتور 40 و السبب الانتقام كبرت و ضربات لبليغة لم تقتل في حب الابرة و الخيط ولم تقتل كذلك نسياني للبرة في اي مكان ربي يستر المهم حبيت ندخل لمدرسة الفنون الجميلة لحبي لتصميم الازياء ( حينها لم اكن اعرف بوجود مدرسة ببن عكنون لتصميم الازياء ) و لما جبت الباك لكن الاب نتاعي رفض ذلك وصمم ان اكون محامية ......رحت للمحاماة وانا نغمضة عينيا و كنت حابة نخرج رسامة ااااااااااااااااااااااه كملت الدراسة و تزوجت و رااني نحوس على الدروس نتاع الخياطة في النت اخيرا وافق زوجي على دخولي مركز التكوين و كنت لما نشوف جبة مخيطة نحب نعمل كيفهل و لما نشوف مسايا نهبل .... تنبهت لعدم جود دروس جدية تعلم الاخوات الصنعة .... و لقيت الانشغال عند الكثير من البنات اولهم الاخت سارة 5 قلت نعمللكم دورة و لما نتعلمو ادعولي .... المهم راني حابة نتعلم السواري ( الكورسي ) لكن تظل لاباز مطلوبة ..... النظري مهم ..... مناش عارفين يمكن نولو كما زهير مراد و الا عبد محفوظ و غيرهم مثل ام مريم ....... ههههه اه متنساوش تشجعوني راني مشتركة في مسابقة تصميم الازياء للاخ عمر و ليوم البرايم و اذا مخرجت نوميني نعطيكم السكنة تنتخبو ميييين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

عجبتني قصتك اختي

[نور المستقبل]

يعطيكم الصحة يابناتهكذا خلاتكم سارة تحكو قصص انا شاك راح الدير فيلم دراما وتخير اللي يعجبها هههههههههههههههههه راني عير نضحك امعاكم
متى بديت مشوار الخياطة؟
كنت نكره الخياطة ونحير فالناس اللي يخيطو ونحب الحلاقة اكثر ماتتصوري بالرغم كانت اختي تخيط كانت عندها مشينة وانا مشينة اخرى منحب انشوفها ولا حتى نطل عليها في يوم من الايام فتح مصنع للملابس العسكرية سجلت فيه تم القبول عامين هم يدرسوا لينا جابو احسن مدرسين من الجزائر بصح اختك تدخل من الاذن اليسرى تخرج من ايمنى بصح التطبيق كنت هايلة فيه المهم تقدري تقولي نخيطو بلا فصالة تعلمت الابسة الجاهزة نركبها مليح كي تعود مفصلة على يد خبير موش فصالة عشوائة تزوجت قعت فالدار جبت الاولاد نسيت مخبرتكش المشينة اديتها معايا كي نشوفها مغلوقة نتحسر اول قندورة خيطها قندورة نتاع الكتان دخلت فيها دخلة قولهاش متحلفة فيه والله لحد الان نص خياطة كي كبرو بناتي شوية قريت عالحلاقة بوهران في مدة بسيطة اخذت ديبلوم جيد جدا كي رجعت لمسقط راسى كنت مع زوجي كان يعمل هنك متخفيش نجاوب على كل اسئلتك متعطليش السكنة فتحت صالون للحلاقة بطبيعة الحال ميكنوش زبائن في الاول واش اندير واناقاعدة وحدي والوقت يضيع دخلت لجمعية نتعلم لفصالة نهار تجي عشرة لا وليت حبست بصح عرفت القاعدة الاساسية وبديت نفصل حوايجي ونخيطمن بعد ماتحسنت عادو زبائن الحلاقة تعجبهم لخياطة ولقيت نفسي نخيط لناس بلا ماندري
ماهي الصعوبات التي واجهتكي
من ناحية المشينة معنديش غير كي تحبس ميعرفوش يصلح شيطونيييييييييييييييي ااوالى مازالت تواجهني نحب نتعلم نخرج باترون على قاعدة صحيحة نحب نتعلم كل مايتعلق بلخياطة من ا الى ياهذا هو المشكل الكبير وراه وراه حتى نحل
واخيرا نحب ننصح كل واحدة عنها ولو 1في100رغبة في الخياطة تصبر البداية دايما صعيبة صدقوني بمجرد ماتتعلمو مليح تلقاي كلش ساهل لازم تتعبو باش توصلو وترتاحو اللي يكون عندها وقت تنميه بالتطبيقات ولي تعرف حاجة توريها لاختها ممتقليش راني نقر ونخرج طبيبة او او
المهم تعلمي وتركي خاصة انتم يابنات ياصغار ادخلو احسن معاهد خيرو الالبسة الجاهزة باش تكوني قادرة على كل انواع الخياطة والفصالة
قبل ما نخليكم على خير راني مشركة في المسابقة احسن تصديرة اليوم تضهر التصاميم ياربي نقدرو نطبقوها ادعولي اصوتو بضمير شكرا للجميع

[نور المستقبل]

سارة لازم نحكمو عليك تحكيلنا حكايتك ولا نخرجوك برا المنتدى نغلق عليك الزيارة حتى تنساي لخياطة ههههههههههههه

[sarra5]

مشكورين يا بناااات يا حلواااااااات

راني بعثت la demande لوزير السكن

راهي خابزة بصح الخدمة ماتعولوش البطالة دايرة حالة على حساب الشوفة هههه

نور انا ماعندي حتى حكاية جات في راسي نتعلم خياطة ورايحة نسجل في البريفي

طبعا نحب نخيط من وانا صغيرة

كانو les poupeés de barbies نحب نخيطلهم عملتلهم بزااف حوايج ملاح

لكن الخياطة تاع الصح جامي عملت حاجة راني نتعلم من المنتديات ومن دروس ام مريم حتى ندخل نتعلم

[wafaachal]

هههههههههههههه يتسما هفيتينا بصحتك السكنة

[kadikirou]

المهم

كل واحد تدخل تعمر ال dossier

خياطة ماهرة

خياطة محترفة

خياطة مبتدئة ana khayata mobtadi'a

او مشروع خياطة قادمة كيفي هههه

متى بداتي مشوار الخياطة؟hawali 3 sanawat

ماهي الصعوبات الي واجهتكي فيها؟؟wajahatni so3obat fi tafsil w la finition

ماهي الصعوبات الي مازالت تواجهك لحد الان في هذا المجال؟؟la finition mais al hamdouleh fark min li bdit hata al dork

ماهو اول شيء قمتي بخياطته؟؟al katir min al achya nsit exact

كيف كان اول ماقمتي بخياطته _ جيد ام سيء؟؟sayi'a
asabr w mouhawalat itkan al "amal hata yaslahlak

w bi tawfik liljami3

[وصال7]

انا خياطة مبتدئة ابى خياط وكان عندو مصنع للخياطة وكان لباس العيد كله من تصميمه لاكن للاسف حبس المهم ملى كنت صغيرة والماكنات بمختلف انواعها فى محيطى بيعت كلها وبقات واحدة للاستعمال المنزلى معنديش مشكل فى الخياطة نخيط ولاكن شوية صعوبة فى التفصيل امع العلم ان ابى مختص فى ملابس الاطفال والرجال الكلاسيك جبت من دارنا باترونات *بوغدا *بصح معقدين بالنسبة لمبتدئة المهم اول شىء خيطتو هو جبة لبنتى يعنى جات شابة تم مباشرة لشورة* التحدى*ومنقوللكمش جات روعة
الصعوبات هو طريقة التفصيل خاصة ونخاف الساتان فى التفصيل والخياطة شكرا

[ام شاهين]

انا خياطة مبتدأة خيط كروشي وقنادر تل كي كان في عمري 18 سنة ومن بع ترك كل شئ و اريد العودة . عندي افكار يستفيدو منها اخواتي لأنهن كلهم خياطات المشكلة ما عنديش الوقت

[ايمان2009]

المشاركة الأصلية كتبت بواسطة ام شاهين

انا خياطة مبتدأة خيط كروشي وقنادر تل كي كان في عمري 18 سنة ومن بع ترك كل شئ و اريد العودة . عندي افكار يستفيدو منها اخواتي لأنهن كلهم خياطات المشكلة ما عنديش الوقت

شكرا لك اختي ام شاهين والله افكارك خلابة ورائعة ومودالاتك كلها هايلة نشكرك ونشكرك من صميم قلبي ربي يوفقك في عملك وبيتك صح صعيبة الواحدة نهار كامل وهي تخدم تزيد تروح للدار مع شغل البيت وتربية الاولاد وانت عندك التوأم ربي يعيشهملك انا بواحد ومانيش قادرة انت نحييك تحية خاصة وربي يقدرك

[mahri_free]

هل هده الفرص متاحة فقط للجياطات نساء أم مفتوحة. في وجه الخياطين الرجال. تقبلي تحياتي. ارجوا رد. وشكرا

[sarra5]

المشاركة الأصلية كتبت بواسطة mahri_free

هل هده الفرص متاحة فقط للجياطات نساء أم مفتوحة. في وجه الخياطين الرجال. تقبلي تحياتي. ارجوا رد. وشكرا

كل من لديه موهبة الخياطة

[nadoouuch]

wallahi ya oum meriem ki krit hkaytatek, golt chkon hadi li tahki 3lia, ana tani kont nmout 3la rassem dima naressm, ki dit lbac habit ndir les beaux arts, mais oumi mahabetch w galbet dania 3la rassi w gatli mani oumek maki benti lokan diriha malgri baba kan wagef m3aya ,w men hadak nehar mahazitch kalam wla richa ,ghadeni lehal bezaf w helafet 3la rrasem ,el mohim dekhalet ljami3a w te3alamet le crochet bach ndéfoli berk te3alamto fi semana, w jat fi bali kheyata golt badal manersem nkhayat 3la khater lakhyata fan w mawhiba mahich khadema berk, mais oumi tani wagfetli w mahabetch gatli rah tfalssak lakhyata 3la kraytak, el mohim khalaset krayti w mazelt nkamel fi doctorat w zawajet w jabet tafela fi 3omerha 8 mois w khedamtaleha hwayj bel crochet li ichofehom igol sobehan ellah ybano machrriin hata oumi gatli si pas vrais, makich nti litakhedmi, w 3jozeti gatli wagtach te3alamti takhedmi bih w nti takray, w dork rani sajalt nakra kheyata fi jam3ia nta3 mahw el oumia w bdit had semana w rani sajalt m3a oum meriem tani rani ntaba3 fiha, rajli ki gotlo haba nakra khyata ,maskin mafehemch gali yakhi li ta3ejbk nachrihalek , gotlo rahi fi galbi w mabghitch nmout w hia fi galbi hhhhhhhhhhhhhhhhhhhhhhhhhhhhhh
raho m3aaya w gali nachrilk machina, ki nt3alam chiw nachriha,
w nasihti likoum li tehab haja direha madam had el haja matghedhebch rbi w mahich hram 3la khater had dania n3ichoha mara waheda matkhaliw hata haja fi globbekoum hhhhhhhhhhhhhhhhhhh

[هندة السوفية]

وانا معجيكش مشواري ؟

[فايزة1207]

مساء الخير لبنات ملفي كالاتي خياطة مبتدئة متى بداتي مشوار الخياطة؟ قبل الزواج ماهي الصعوبات الي واجهتكي فيها؟؟ كانت غير مناسبة لضروفي ولم استفد منها ماهي الصعوبات الي مازالت تواجهك لحد الان في هذا المجال؟؟ عديييييييييييييييييددة وعلى حساب الشوفة مارحش يخلاصو طولو بالكم راح نحكي حكاااااااية البداية شريت مشينة ودايمامعاها مشاكل تقطع الخيط مانجي نكف حاجة حتان ندخل الخيط اكثر من10 خطرات كي بديت نتعلم بديت وحدي بلا واحد ما يعلمني زوجي مابغاش يخليني نخرج حتان رزقني ربي بنوتتين وحبيت نتعلم نخيطلهم لكن دايما تجيني الرقبة عريضة ونتقلق لدرجة نمسها يبدا راسي يستر لكن مازال ماياستش وذرك رانا 4 انا و3بنات لازم نتعلم خاصة البنات تحجبو صغار ومانلقاش لبسة محتشمة تجي قدهم في القراية ولا في الدار ولا في مناسبات مع باباهم مايحبش العرا ومن بين الصعوبات مانخرجش الا مرة في كل عطلة ولا عيد وماعنديش الكتان المتوفر بكثرة عدت نهاب نمس اي حاجة كل خطرو نقول راح يفسد وماعنديش بديل راكم تقولو هاذي تحكي في معاناة ماهو اول شيء قمتي بخياطته؟؟ قندورة نتاع لاستيك في الرقبة لبنتي كان عمرها3سنوات كيف كان اول ماقمتي بخياطته _ جيد ام سيء؟؟ متوسط واخيرا نصيحة للي حابين ينضمو لهذا المجال مثلي ؟؟؟ لازم الاصرار وماتخافوش من المقص كي حالتي

[wissem1]

السلام عليكم انا ملفي كالاتي.
انا عندي مشروع خياطة قادمة بديت العام لي تعدا عند وحدة تعلم بالدراهم علمتني نفصل قندورة و سروال و جربت فصلت قندورة لماما بمساعدتها و فصلت سروال في الجرنان برك و مبعد اكتشفت بلي الخياطة هده باقية غير تعلمنا في فصالة القندورة برك مكاش حاجة جديدة زدت بطلت من عندها رحت عند وحدة خلاف الحق تع ربي تعلم من قلبها زدت بديت من الاول تفصيل قندورة و فصلت قندورة صيف ليا جات مليحة بالنسبة لوحدة كي غير وان بدات ومبعد درت حالة في الدار نشري ماشينة بالسيف شراولي وحدة سنجر اديك لي تخيط برك خيطت بيها قندورتي لي فصلتها بالشعايف اي تقطع الخيط وشبيها بابا و خويا يعيطو واش الحس هدا هنا وزين؟هههههههه كملت شهر عند لمرا هده و مبعد لقيت خدمة في شركة اسبانية بطلت معادش عندي الوقت ومبعد ملتم خبيت المشينة ومعدتش نخيط و القندورة قاعدة نلبس فيها
الصعوبات لي واجهتني اني نهاب نفزد الكوبو
الصعوبات لمعاي حتى درك اني مزلت نخاف نفصل وحدي
بصح ليامات هده راني ناوية نرجع نتعلم بمساعدة خياطات المنتدى طبعا نشكرهم بزاف راهم ميبخلوش علينا
النصائح نتمنى كل وحدة حابة الخياطة تحاول تتعلم تغلط و تصلح حتى تتعلم انا عندي بزاف افكار و موهبة في الخياطة مي مكملتش بصح درك كي راني ندير في جهازي لازم نكمل نتعلم خطر عاد كلش غالي اموا حتى ندير قنادر خفاف تع دار
و شكرا





بصح متنسايش اعطيني خدمة برك السكنة راجلي عندو بصح الخدمة الشركة لي نخدم فيها فيطت و بطلونا هههههههههههههههه