ذكريات رجـــــــاء في العشرية الســــــــــوداء

[أم أماني أريج]

المشاركة الأصلية كتبت بواسطة ibtihal18

اهلا و سهلا اختي ..............فعلا هي سنوات لا نتمنى ان تعود علينا رملوا نساء و يتموا اولاد و قطعوا رؤوس اباء الحمد لله اني كنت صغيرة و لم ارى راس مقطوع لان اخواتي شاهدوهم و الحمد لله انها لم تترك فيهم عقد نفسية رب ستر الجميع
اتذكر فقط في رمضان 2007 ...في ليلة 27 و بعد انهاء صلاة التراويح .........اتجه الشباب و الرجال الى المقاهي و اذا بهجوم بين الدرك و افراد ارهابية ينطلق .......في تلك اللحظة بابا يعيط من البالكون على خاوتي لا حياة لمن تنادي ما فهمنا فيها والو ..قلبي قريب حبس اختي شحال من يوم و هي مريضة ......و ربي اللي سترنا الحمد لله
عانينا بزاف لكن نحمدو ربي في هذي الساعة ربي يدوم علينا الامن و الامان

الحمد لله يا أختي ربي حفظكم و حفظ خاوتك و اختك مسكينة ان شاء الله برك تكون ما قعدتلهاش عقدة لليوم ؟

بالرغم من أنها ذكريات أليمة لكن تبقى مجرد ذكريات و الحمد لله على نعمة الأمن و لي ماتوا و راحو في هذاك الوقت ضحية أفكار دموية ربي يتغمد أرواحهم و يسكنهم فسيح جنانه .
آمين يارب .......
أسرني مرورك أخيتي إبتهال

[أم أماني أريج]

المشاركة الأصلية كتبت بواسطة 0ibtissam

ذكرياتي انا اسكن بلجنوب وكل صيف نذهب للعاصمة لان بيت جدي هنا كنت ذكريات مع الارهاب في الليل نسمع دوي الرصاص والقنابل وفي الصباح نجد الرؤس معلة بحم المنقة كانت مقر للارهاب وكال خالي لا يخاف يخرج حى في الليل امرى جدي بترك المنطق فرفض قم بترحيل عائلته وهو بقي في المنزل في تلك الليلة هجم عليه الارهاب وامره بإنظمام إليهم فرفض فقمو بإخظهم معهم في الطريق هرب منهم وقفز في الوادي ولحقو بهم فوجد بلوع كبير ( حشكم الزيقو ) فدخل فيك كانت مملوء بلجثث فتخبى بها وقمو بالطلاق النار فظنو انه مات باق هناك الي غاية سمعه انه ذهبو في الصباح الباكر هرب وقد تمر تدمير المنطقة بلكامل ولحد الساعة مزالت لم تبنى سعات نروح نشوف الدار ولات ارض الحمد الله ربي ستر

الحمد لله على نجاة خالك أخيتي .......إبتسام ...........
المسكين عاش فلم رعب لكن للأسف هي حقيقة
المبيت وسط الجثث غير اللسان لي يقدر ينطقها
ربي يكون في عونوا
الحمد لله على نعمة الأمن حمدا كثيرا .......
سعدت بمرورك

[أم أماني أريج]

المشاركة الأصلية كتبت بواسطة سميرة10

السلام عليكم
انا في العشرية السوداء قتل ابي رحمة الله عليه لو احكي لكم القصة لن تصدقوها

إن لله و إن إليه راجعون
ربي يتغمد روح والدك برحمته الواسعة
اللهم ارحمه و اغفر له و جعل قبره روضة من رياض الجنة
و الله أحزنتني مشاركتك أنت و الأخت آناليس الربيع
أتمنى أن تروي لنا التفاصيل أخيتي إذا كانت لك القدرة على تحمل مرارة الذكريا الأليمة
أنا في الإستماع عزيزتي و لا أملك إلا مواساتك

[ام مهدي 03]

اولا اهلا اختى طال الرجاء .وانا اقول من هى ام براء لم ار اسمها من قبل فمبارك الاسم الجديد وعلى فكرة هو الاجمل
العشرية السوداء فترة لا اعادها الله علينا
لم اعشها فى مدينتى لكن القناة الجزائرية الوحيدة فى التلفاز كانت كفيلة بنقل كل الالام
الحمد لله على نعمة الامن واللهم ادمها علينا

[ام مهدي 03]

اختى اناييس رحم الله والديك وجدتك ورزقهم الجنة يارب
اختى سميرة رحم الله والدك
متاسفون جدا على ما حدث فى بلادنا باسم الاسلام
اللهم عوض كل من فقد عزيز بالرحمة من عندك يارب

[الواثقْ بالله]

الله لا يردها تلك السنوات

صح مايحس بالجمرة غير لي كواتو

و لكل خاوتي لي ما عاشوش ديك الفترة نقولهم

" حافظوا على الجزائر راهم ماتوا عليها رجال ضد فرنسا و رجال ضد الارهاب"

و احمدوا ربي على الامن و الامان لي رانا عايشين فيه دك

اللهم احفظ الجزائرو اهلها سخاءا رخاءا و سائر بلاد المسلمين

[sonia32]

شكرا لك اختي على هذه القصة صحيح نحن في منطقتنا لم نعش مثل هذه المحن لكن كنا نرى في التلفزيون كوارث انسانية فظيعة والله كنت اتاثر كثيرا عندما اسمع بمثل هذه الحوادث واثرت في حادثة لن انساها ابدا وهي انفجار فنبلة في مقبرة وكان انذاك اطفال صغار للكشافة يترحمون على الشهداء منظر بقي عالقا في ذهني اصبت انذاك بكابة وحزن خاصة منظر هؤلاء الصغار الابرياء رحم الله هؤلاء ودوم علينا الامن والسلام وابعد الجزائر عن كل حرب ودمار

[Simassim]

السلام عليكم
اول ماشفت العنوان نكذب عليك ضحكت بالدموع. تفكرت موقفصرا. من بعد تفكرت وراحت الضحكة. خاصة بعد ماقريت ردود الأعضاء

الله يحاسب لي كان السبب وربي يحمي البلاد والشعب الجزائري. ايام مرت لكن اتارها.وعقدها كبيرة مازلت للان

كنت صغيرة هداك الوقت يمات نروح عند جدي ونسمعوهم يضربو الجبال بالمدافع كنت نفرح. وتعجبني هديك الشعلة الحمرا لي فالسما.
ونهار هجموا على الحي تاعنا. وأختي كانت وحدها فالدار عمرها سبع سنين مع اخي الصغير فعمره شهور برك. راح ضحيتها رجل شرطي مسكين والطريق. كاملة واحنا نشوف بقع الدم. وسائق الطاكسي يتكلم هنا دبحو فلان وهنا حرقو طاكسي تاع فلان. دون مراعاة وجود صغار فاللوطو لاحول لا قوة الا بالله
وتفتيش الأمن للبيوت والدي ملتحي. كل مرة نشوف ماما وبابا مقلقين وانا نقول علاش. نطفو الضو ويسكتو. باش مايدخلوش عندنا مرة واحدة الحكايت بدأت ترجع والصور تدور بين عيني
أمور وحوادث وقصص كنت نسمعها وقتها مافهمتهاش وبقات راسخة برأسي وصلت اول موضوع بحت عليه فالنت هو الاٍرهاب. وشفت اللي ماينشاف. قدرت نفهم واش كان صار. بصح ندمت. لاني وقتها حسّيت روحي تبدلت تتارت بزاف. صح مرات الجهل يكون انعم من العلم

[Simassim]

السلام عليكم
اول ماشفت العنوان نكذب عليك ضحكت بالدموع. تفكرت موقفصرا. من بعد تفكرت وراحت الضحكة. خاصة بعد ماقريت ردود الأعضاء

الله يحاسب لي كان السبب وربي يحمي البلاد والشعب الجزائري. ايام مرت لكن اتارها.وعقدها كبيرة مازلت للان

كنت صغيرة هداك الوقت يمات نروح عند جدي ونسمعوهم يضربو الجبال بالمدافع كنت نفرح. وتعجبني هديك الشعلة الحمرا لي فالسما.
ونهار هجموا على الحي تاعنا. وأختي كانت وحدها فالدار عمرها سبع سنين مع اخي الصغير فعمره شهور برك. راح ضحيتها رجل شرطي مسكين والطريق. كاملة واحنا نشوف بقع الدم. وسائق الطاكسي يتكلم هنا دبحو فلان وهنا حرقو طاكسي تاع فلان. دون مراعاة وجود صغار فاللوطو لاحول لا قوة الا بالله
وتفتيش الأمن للبيوت والدي ملتحي. كل مرة نشوف ماما وبابا مقلقين وانا نقول علاش. نطفو الضو ويسكتو. باش مايدخلوش عندنا

مرة واحدة الحكايت بدأت ترجع والصور تدور بين عيني
أمور وحوادث وقصص كنت نسمعها وقتها مافهمتهاش تساؤلات بدون اجوبة وبقات راسخة برأسي وصلت اول موضوع بحت عليه فالنت هو الاٍرهاب. وشفت اللي ماينشاف. قدرت نفهم واش كان صار. بصح ندمت. لاني وقتها حسّيت روحي تبدلت تتارت بزاف. صح مرات الجهل يكون انعم من العلم

[eBusiness]

المشاركة الأصلية كتبت بواسطة *أم براء *

و الله يا أخي عبد المجيد ..............هم يضحك و هم يبكي ............
قصتك مضحة من جهة و مؤلمة من جهة أخرى
أنا أيضا عندي قصة طريفة سأرويها
أختي الصغرى عمرها الآن 22 سنة كانت في تلك الفترة صغيرة جدا و عندما تسمع عبارة ...........راهم جاو ........مباشرة تظن أن الإرهاب قد وصلوا فأحيانا تنتشر إشاعات في الحي أن المعتدين سيهجمون قريبا فتبدأ أصوات أجراس الإنذار المزعجة في الصفير و الحومة تتقلب .
ففي أحد الأيام أخذت خالتي أختي إلى منزلها وكانت خالتي تسكن في الدار الكبيرة .....مع سلافها و نساهم ......ففي ذلك اليوم كانت خطبة إبنة شقيق زوج خالتي و عندما وصل الخطاب جاء الأطفال مسرعين إلى البيت وبدءوا يصرخون ........راهم جاو...راهم جاو ........و عندما سمعت أختي العبارة أسرعت إلى المطبخ و تخبأت داخل .......البوتاجي .......المهم بقي الخطاب فترة من الزمن و غادروا ......فتفقدت خالتي أختي و لم تجدها و أصبح البيت كله يبحث عن الطفلة الضائعة و لم يجدوا لها أي أثر و خالتي المسكينة ماتت بالخلعة .....إلى أن وصل المساء فدخلت أم المخطوبة إلى المطبخ حتى تعد القهوة و ما إن فتحت باب ........البوتاجي ......حتى وجدت أختي هناك فقالت لها متعجبة : ماذا تفعلين هنا ؟ فقالت لها أختي : هل غادروا ؟ قالت المرأة : من ؟ فأجابتها أختي الذباحين
و حتى لضركا مازلنا نتفكروا القصة و نضحكوا عليها .

والله قتلتيني بالضحك....

[canopus]

السلام عليكم
المدينة نتاعنا ما عانتش ياسر من العشرية السوداء لكن ابي الغالي عقب في بدايتها عامين في العسكر و جدي و جدتي عانو الكثير من الخوف و القلق عليه خصوصا و انه ماموريته كانت في اقصى الغرب الجزائري و يالضيط في مغنية اين تتكاثر تلك الجماعات

[Simassim]

المشاركة الأصلية كتبت بواسطة *أم براء *

و الله يا أخي عبد المجيد ..............هم يضحك و هم يبكي ............
قصتك مضحة من جهة و مؤلمة من جهة أخرى
أنا أيضا عندي قصة طريفة سأرويها
أختي الصغرى عمرها الآن 22 سنة كانت في تلك الفترة صغيرة جدا و عندما تسمع عبارة ...........راهم جاو ........مباشرة تظن أن الإرهاب قد وصلوا فأحيانا تنتشر إشاعات في الحي أن المعتدين سيهجمون قريبا فتبدأ أصوات أجراس الإنذار المزعجة في الصفير و الحومة تتقلب .
ففي أحد الأيام أخذت خالتي أختي إلى منزلها وكانت خالتي تسكن في الدار الكبيرة .....مع سلافها و نساهم ......ففي ذلك اليوم كانت خطبة إبنة شقيق زوج خالتي و عندما وصل الخطاب جاء الأطفال مسرعين إلى البيت وبدءوا يصرخون ........راهم جاو...راهم جاو ........و عندما سمعت أختي العبارة أسرعت إلى المطبخ و تخبأت داخل .......البوتاجي .......المهم بقي الخطاب فترة من الزمن و غادروا ......فتفقدت خالتي أختي و لم تجدها و أصبح البيت كله يبحث عن الطفلة الضائعة و لم يجدوا لها أي أثر و خالتي المسكينة ماتت بالخلعة .....إلى أن وصل المساء فدخلت أم المخطوبة إلى المطبخ حتى تعد القهوة و ما إن فتحت باب ........البوتاجي ......حتى وجدت أختي هناك فقالت لها متعجبة : ماذا تفعلين هنا ؟ فقالت لها أختي : هل غادروا ؟ قالت المرأة : من ؟ فأجابتها أختي الذباحين
و حتى لضركا مازلنا نتفكروا القصة و نضحكوا عليها .

. احنا مرة وحد الناس عرضونا للعرس اجتمعنا خالاتي كامل فالدار فقرية كان فيها ارهاب بزاف. بصح هداك الوقت الأمور كانت هادية ماكان الاٍرهاب لا خوف
النسا كامل راحو لدار العرس بعد العصر واحنا بنات قعدنا فالدار طلعنا للسطح نحكو. مرة سمعنا صوت تاع الجامع الامام كان يهدر مافهمناش واش قال فمنا كلمة واحدة واسم منطقة. قريبة بزاف للدار لي كنا فيها. وفيها الدار تاع العرس. كانت معنا واحدة تسكن تم وتعرف نورمالمو سقسيناها وأس راه يقول الامام. قالتنا اجريو راه يقول الاٍرهاب هجم ورآه فالمنطقة. واحنا بدينا وااااع واااااع. العياط سمعوه من دار العرس
واللي تبكي واللي خايفة على يماها والنَّاس كامل طلعت السطوح يشوفو العياط وين
فالاخير. الامام كان يبرح على وحدين صابو مفتاح طايح وكان يلغى. على الناس باش تحترم الدالة تاعها علاخاطرش يسقو البساتين بالدور


الحمد لله. لي حتى واحدة مانحرقت. بنت خالتي كانت حاطة الطابونة وتوجد فالعشا عند الدروج باش تسمعنا واش نحكو. واحنا كامل هبطنا قفزنا على المقلة تاع الزيت سخون


الحكاية هادي وصل أخبارها حتى لفرنسا ههههه واحنا لحد الان نتفكروها تضحكوا بالدموع

[إكليل]

رحمة الله أختي أناييس على الوالدين و كل اللي ماتوا في العشرية

[ماريـام]

هم يضحك و هم يبكي

انا نحكيلكم حكاية عرسي

انا كي رحت عروسة رحت لمنطقة جبلية و هي اصل عائلة زوجي

المهم كان العرس و اجواء البهجة حنا في الاعراس عادي نديرو العاب نارية لكن في الارياف في هاذا الوقت غير معروفة و جديدة

زوجي حب يدير حاجا جديدة جاب كمية مهولة من العاب النارية من كل الانواع هههههههههههه المهم شعلهم فوق السطح نص الناس كانو راحو لبيوتهم المهم الناس الي كانت في القهوة كامل اترماو الارض حسبالهم رصاص و لخرين هربو و ناس ميتى من الرعب هههههههههه :d خدايم زوجي


اما الارهاب في العشرية السوداء كامل عانو منو زوجي كان يحكيلي انو كان كل يوم يشوف ريسان مقطوعين لما يروح للمدرسة و اخت صديقتي شعال من مرة سلكت من الرصاص انا شخصيا كنت نرقد و الموس تحت الوسادة تاعي

ربي يرحم كل موتى المسلمين و ينتقم من كل ضالم و يهدي الامة لطريق المستقيم امين

[fadi02]

اه فكرتوني في سنين كنت حاب ننساهم تزوجت في 1993 و كان زوجي غير كيما كمل دراسته بعثوه يخدم في مستشفى في جيجل مدة عامية هو طبيب اطفال هو مدو له عدة ولايات و لان اهله يسكنو في جيجل قبل و جيت معه واش انقول لكم كل يوم حكاية مرة رحنا بتنا في دارهم و هما يسكنو في الريف و الله العضيم في الليل زدمو علينا الارهاب
دخلو للمطبخ اداو كلش الاكل و الفراش الدراهم مام اداو الديمو قالو حرام انا مت بالخوف و خفت اطلعو راجلي معهم للجبل باش اداويهم كي طلع النهار قالت له امه ادي مرتك و روح مرة الجايا ما نعرف واش يصرا الصباح سافرنا ما جيجل لقسنطينة باش يرجع للادارة وين قرى باش ابدلوه صدقوني كي مشينا 30 كلم بين ميلة و جيجل شفت واحد المنضر عمري ما ننساه رقينا مع الاول الغاشي الطنوبيلات حابسين فالي راجلي واقيل اكسيدو كي مشينا شوية شفت 7 رجال ميتين و مرميين في الطريق دايرين كامل اللحيم و قتلوهم بالرصاص و الناس تقلب فيهم باش تتعرف عليهم و الله العضيم طريق كامل و انا نبكي حتى قريب جاني انهيار عصبي لحقنا لقسنطينو قعدنا تم ايامات و ولينا للعاصمة بدلوه يخدم تم الحمد لله وليت ما نشوف والو غير نسمع و لكن بعد ايامات جانا خبر رجل اخته قتلوه كانو ايامات الله لا يردهم لينا