الى ام اسيد1 وكل وحدة حاصلة واش الطيب

[غزالة الصّحراء]

ياله حبوباتي سلامي الحّار للجميع على املّ أن تكون كلّ واحدة منكنّ في ألف عافية وصحةّ جيّدة هي وكلّ عائلتها. تحياتي الخالصّة.

[ام سوهيل]

مساء الخير وش راكم لباس ولله غير اتوحشتكم بزااااااااااااااااااااااف

كنت في دارنا طليت على ماما الحمد لله راهي بخير

وكان عندي الخدام في البيت بنترلي المطبخ والدوش وش نقولكم مخلا مبقا كلشي خمجله ولديه

عندي اسبوع وانا نضف حتى لليوم باش فريتها

وراجلي يقولي بركاي متقتلي في روحك غدوة ولى غير غدوة ايخرجنا الكاري يطيحلي المورال قتلو معليش المهم انقيها قبل رمضان

يعطيكم الصحة على وش حطيتو

حتى انا مجيتش بيديا فرغين راني درة الكبك نتاع اغزالة يعطيها الصحة خرجتلي روعة بصح مكانش عندي وقت كافي باش نتفنن فى التزين



روح موراد وش راكي حنونة عجبتني الفكرة انتاعك وان شاء الله الاخوات يطبقوها

سلامي للجميع

[ام هاديل وياسين]

السلام عليكم


ان شاء الله تكونو بخير نسلم عليكم كلكم ام سوهيل بصحتك

الكيكة هايلة حتى انا جربتها وخرتلي فووور الله يعطي الصحة لغزالة

وحتى المشماش تاع ام سيراج جربتو وخبيتو في الكونجيلاتور

[ام الخير 05]

صباحكم بالخير يا حبوباتي غزالتي السكرة مشكورة على الرابط ربي يهنيكم و يسعدكم جميعا

[ام سوهيل]

صباح الخير وش راكم

[روح مراد]

صباح الخير حبيباتي واش راكم
إنشاء الله تكونو كامل بخير
كورنو عظم الله أجركم و ربي يعطيكم الصبر
البنات راني نقيت بيتي الجمعة مازاللي نرتب الخزانة برك
و لكن للأسف نهار نظفت البيت راجلي رقد في الثصلون ياو رجعو مخروب كامل تقول جراد دخل معاه
و البارح صباح خرجنا قضينا شوية قيس هاذ سمانة و الجمعة يزيد يقضي إنشاء الله و العشية رحت لوحد العرس كي رجعت طيبت العشاء و نقيت الدوش بقالي غير قيس ما نكمل اليوم العشية إنشاء الله
و في الليل نقيت شوية لوز مع بنات سلفي و السهرة كانت الطويلة و احنا نحوسو واش ندير حلويات في العرس

[منال ومنير]

المشاركة الأصلية كتبت بواسطة غزالة الصّحراء

أهلا بك اختي منال ومنير. هذي غيبة . ياربّ اتكوني بألف خير. وربّي ايساعدك في أشغالك راهي فكرة الغاليّة الأخت روح مراد بزاف هايلة يعطيها الف صحّة وعافيّة. خبريني عن الكنف. واش درتي أمعاه. كنت أنخمل في غرفة أوليدي الصغير بسلامتو . ولقيت كراسي القديم أنتاع بعض الوصفات . وفيه ثاني وصفة عن كيفية التخلّص من الكنف. لما تتحسّن النت رايح نكتبلك الموضوع حرف بحرف. واش راهي الأمورة آية . ابديتي لها الأكل أو مازال؟ أعطيها البيون أنتاع الخضر بصّح لازم أيكون جاري أمليح. هذا جدّ مفيد. أنا أوليدي لكبير بسلامتو ابديتهولو في السنة الرابعة من عمره. ربّي يحفظلك أولادك وأولادنا ويحفظ لنا صحتنا. سلامي الحار لك ولكلّ الأخوات.

صباح الخير اخواتي
يعطيك الصحة اختي والله الكنف مازال فيا حتى وليت نحشم بيه الى كان عندك كاش وصفة افديني
اما فيما يخص بنتي اية راهي مليحة بسح ماحباتش ترضع الحليب الاصطناعي ارضعها على 07 صباحا ماترضعش حتى الواحدة بسف باش ترضع 60 حتى انجي ورضعها هل هذا كافي
راني نستنا حتى تقفل 04 اشهر ونصف ونبدلها الاكل
اختي اعطيني الرابط لقتيلي عليه فيما يخص الاطفال

[غزالة الصّحراء]

المشاركة الأصلية كتبت بواسطة منال ومنير

صباح الخير اخواتي
يعطيك الصحة اختي والله الكنف مازال فيا حتى وليت نحشم بيه الى كان عندك كاش وصفة افديني
اما فيما يخص بنتي اية راهي مليحة بسح ماحباتش ترضع الحليب الاصطناعي ارضعها على 07 صباحا ماترضعش حتى الواحدة بسف باش ترضع 60 حتى انجي ورضعها هل هذا كافي
راني نستنا حتى تقفل 04 اشهر ونصف ونبدلها الاكل
اختي اعطيني الرابط لقتيلي عليه فيما يخص الاطفال

أهلا بك أختي منال ومنير وآية . والحمد للّه ألي راكي والعائلة بخير. وبالنسبة للوصفة أكيد حنونتي رايح نعطيهالك أعطيني فقط الوقت . راني بزاف مشغولة. رايح نكتبهالك حرف بحرف. وراهي أمليحة تبعيها برك. والأمورة ربّي يحفظهالك ويحفظلك خاوتها. خليها عللى راحتها.
هاكي الرابط. كنت اعطيتهولك في احدى الردود ولم تنتبهي إليه. . يارب تستفيدي منه. سلامي الحّار لك ولكلّ الأخوات.
https://www.djelfa.info/vb/showthread.php?t=699848

[غزالة الصّحراء]

المشاركة الأصلية كتبت بواسطة روح مراد

صباح الخير حبيباتي واش راكم
إنشاء الله تكونو كامل بخير
كورنو عظم الله أجركم و ربي يعطيكم الصبر
البنات راني نقيت بيتي الجمعة مازاللي نرتب الخزانة برك
و لكن للأسف نهار نظفت البيت راجلي رقد في الثصلون ياو رجعو مخروب كامل تقول جراد دخل معاه
و البارح صباح خرجنا قضينا شوية قيس هاذ سمانة و الجمعة يزيد يقضي إنشاء الله و العشية رحت لوحد العرس كي رجعت طيبت العشاء و نقيت الدوش بقالي غير قيس ما نكمل اليوم العشية إنشاء الله
و في الليل نقيت شوية لوز مع بنات سلفي و السهرة كانت الطويلة و احنا نحوسو واش ندير حلويات في العرس

أهلا بروحي وروح مراد. اللّه ايعاونك ياروحي في التنظيف. أنا ثاني راني مازلت انكمّل بعض الأشغال. كلّ مانقول كملت تخرجلي خدمة أخرى. راني مع الطابق الثاني. سلامة مراد حبيبتي ماعندو غير انت . أنت روحو. على بيها راه ايدير كيما ايحبّ ّربّي يرزقكم بالذريّة الصّالحة. ورايح اتشوفي بأنّ شكاويك لاتخرج من لسانك حين يتعلّق الأمر بتخريبهم للحالة. ربي ايكون سندك دوما. وأتمنّى أن تكوني ازهيتي اشويا في العرس ونحيتي صيقة الخاطر. على الأقل استرحتي من تعب البيت .
تحياتي الخالصة

[روح مراد]

شكرا غزالتي ربي يخليك
ما طولتش في العرس كان عرس الجيران رحنا فطرنا و ريحنا شوية و شربنا قهوة و جينا كان ما فيها والو لا رقص و لاهم يحزنون رحنا هدرنا مع الناس و رجعنا بالخف
هاذاو الناس الله يبارك عندهم و لكن دارو عرس بوحد التقشف ربي يستر
طعام بنين نتاع الصح للقهوة نص المدعوين وزعو عليهم قهوة حليب و نص شاي و الحلوة عادية شتراك العريان و حلوة مول السلسيكون بجلجلان و قريوش

[غزالة الصّحراء]

أختي أم منال ومنير وآية. واللّه غير اتقلقت عليك لما قلتي لي هذاك لكلام. وحبست أشغالي على جالك. باش نكتبلك الوصفة. وياربّ اتجيب معاك النتيجة المرضيّة.
قناع للحامل.
يتعرض وجه المراة الحامل خلال فترة الحمل إلى ظهور بقع بنيّة اللّون في منطقتي الخدين وحتّى الرّقبة. تُعرف هذه البقع باسم الكنف. االنّساء المجربات توصلن إلى طريقة سهلة وغير مكلّفة للقضاء على هذه البقع المشوهة.
الحل عبارة عن قناع يمكنك سيّدتي صناعته بنفسك وذلك ب:
- ملعقتين كبيرتين من الطفل، أو الصلصال.
- ملعقة كبيرة من صابون " دزاير "
- عصير حبة ليمون.
التحضير:
حلّلي الصلصال أو الطفل داخل كميّة من الماء الدّافئ، اضيفي بعد ذلك عصير حبة اللّيمون والصابون. امزجي الخليط جيدا حتّى تتحصلي على عجينة متجانسة ورطبة . اطلي بها المنطقة المصابة بهذه العجينة ، وانتظري مدة نصف ساعة. اغسلي وجهك ، كرري العملية وانتظري النتيجة المضمونة.
حنونتي راني اكتبتك الموضوع حرف بحرف. بلا زيادة او نقصان. وأصلا الصلاصال أمليح للوجة حتّى وإن لم تكن المراة مصابة بالكنف. فهو يطهّر الوجه. اتمنى أن أكون أفدتك. وأنتظر منك الرّد ريثما تشرعين في تطبيق الوصفة ولكن بعد النتائج التّي تتحصلين عليها. املي وكلّ أملي ان تكون الوصفة نافعة.

[غزالة الصّحراء]

المشاركة الأصلية كتبت بواسطة روح مراد

شكرا غزالتي ربي يخليك
ما طولتش في العرس كان عرس الجيران رحنا فطرنا و ريحنا شوية و شربنا قهوة و جينا كان ما فيها والو لا رقص و لاهم يحزنون رحنا هدرنا مع الناس و رجعنا بالخف
هاذاو الناس الله يبارك عندهم و لكن دارو عرس بوحد التقشف ربي يستر
طعام بنين نتاع الصح للقهوة نص المدعوين وزعو عليهم قهوة حليب و نص شاي و الحلوة عادية شتراك العريان و حلوة مول السلسيكون بجلجلان و قريوش

أهلا بك روحي مرّة اخرى. المهم ريحتي اشويا من شغل الدّار. وكيما ايقولوا نّاس بكري. لما اتشوفي هموم النّاس أتقولي راني في رحمة ربّي.بصّح روحي الحلويات الي وزعوهم ماهيش حلويات تدلّ على الثراء. على حساب الشوفة خرجوا الطفلة عروسة من البيت . ماجابوش عروسة للبيت.

[غزالة الصّحراء]

المشاركة الأصلية كتبت بواسطة ام الخير 05

صباحكم بالخير يا حبوباتي غزالتي السكرة مشكورة على الرابط ربي يهنيكم و يسعدكم جميعا

أهلا بك أختي ام الخير. إذا كنت انا السكرة فأنت العسل الحرّ. مادرت غير الواجب حبيبتي . اللّه ايسّر عليك أمورك. وتنجحي في التطبيق. ربّي ايهنينا ويسعدنا جميعا.

[غزالة الصّحراء]

المشاركة الأصلية كتبت بواسطة **ام هدول**

السلام عليكم


ان شاء الله تكونو بخير نسلم عليكم كلكم ام سوهيل بصحتك

الكيكة هايلة حتى انا جربتها وخرتلي فووور الله يعطي الصحة لغزالة

وحتى المشماش تاع ام سيراج جربتو وخبيتو في الكونجيلاتور

اهلا بك أم هدول . ياربّ اتكوني بألف خير وعافية أنت أيضا. وبصحتكم الكيكة. تاكلوها بالصحّة والهناء لعقوبة للقاطو انتاع الباك. ماتنسايناش برك. ربّي ايفرحك باش نفرحوا معاك.أنا ثاني حبيت أنطبق وصفة المشماش بصّح حبيت ثاني اندير. معجون المشماش راني قدمتلكم الوصفة شوفيها في الصفحات السابقة اتجي هايلة . خير من الّي نشروه من برا. أتاع برا صار في أغلب الأحيان كيما الماء السائل. جربيه ماش رايح تندمي. تحياتي لك ولكلّ الأخوات وكلّ واحدة باسمها.

[غزالة الصّحراء]

المشاركة الأصلية كتبت بواسطة ام سوهيل

مساء الخير وش راكم لباس ولله غير اتوحشتكم بزااااااااااااااااااااااف

كنت في دارنا طليت على ماما الحمد لله راهي بخير

وكان عندي الخدام في البيت بنترلي المطبخ والدوش وش نقولكم مخلا مبقا كلشي خمجله ولديه

عندي اسبوع وانا نضف حتى لليوم باش فريتها

وراجلي يقولي بركاي متقتلي في روحك غدوة ولى غير غدوة ايخرجنا الكاري يطيحلي المورال قتلو معليش المهم انقيها قبل رمضان

يعطيكم الصحة على وش حطيتو

حتى انا مجيتش بيديا فرغين راني درة الكبك نتاع اغزالة يعطيها الصحة خرجتلي روعة بصح مكانش عندي وقت كافي باش نتفنن فى التزين



روح موراد وش راكي حنونة عجبتني الفكرة انتاعك وان شاء الله الاخوات يطبقوها

سلامي للجميع

أهلا بك حنونتي . نوّر القمر واضاء الصّفحة بنوره اللّماع. عاش من شاف ردّك على هذه الصّفحة. ومشكورة ألف شكر على واش جابوا يديك. يسلموا هذوك اليدين .ربّي يحفظك لأولادك . أمّا عن التزين ، المهم جاتك ابنينة . والتزين الزّين خليه لمّا ينجحلك سوهيل ربّي يحفظو ، من فرحتك ديري وزيدي وزيدي من الفوق التزين. فرحتك رايح تعطيك الوقت باش تتفنني في تزينها. . واش راه سوهيل . يادرا كيفاش جوزوا الامتحانات أنتاعهم. دفعة واحدة او بالتناوب. كيفاش كانت نتائجه. ياربّ أتحسن أكثير. وحتّى في صحتّه. ربّي ايخليهولك ويحفظو من كلّ مكروه. آمين.