مهندس في الأسلاك المشتركة ...أو...ضابط شرطة

[أسير الروح]

أنت راك حاكم زوج بلايص وماعرفتش شكون تخدم فيهم امالا شد وحدة وخلي الثانية لينا نخدموا فيها على الاقل خير ماراني مشومر هههههههههههههه ربي يوفقك ان شاء الله

[Ali-Dz]

المشاركة الأصلية كتبت بواسطة sarl02

انقولك حاجة الكاسكيطا كون جات حالة ما تسبقش اصحاب الشكارة واولاد القماقم ليها ...مهما كان يبقى السيفيل احسن عندك الحرية التامة في فعل اي شيء والحاجة الي تحب اديرها اديرها بلا قيود وتفرح فيها و تستبنها مليح ...والله غير اصحابي راهم ضباط و مفتشين قسما بالله غير كارهين حياتهم و 2 منهم والله ما كملو 15 يوم ف المدرسة او حطوها ...انا مانيش ضد هذا المهنة والله يحسن عون اي واحد الي مالقاش عليها وين لازم يخدم والله اعاونو ..لانه الخدمة فالسيفيل راهي عزيزة بزاف ...بصح اناكدلك انت واحد من الناس كون افتح عليك ربي بمنصب عمل برا واكون اوافق التخصص تاعك صدقني ما تروحش تتمرمد في لابوليس .....لكن تبقي الكاسكيطا الخيار الوحيد لابناء القلاليل والزوالية .وبالتوفيق للجميع.

يا أخي أنا قلتله رأيي فقط
يعني أنت قلتلي أني أنا لو لقيت منصب في السيفيل ويكون منصب مليح زعما نختار السيفيل على الشرطة؟؟؟ شوف أخي أنا من اللي راني صغير داير في راسي غي الكاسكيطا يا خويا نحب النظام والإنضباط مانحبش خدمة السيفيل وكل المسابقات اللي فوتها كلها على الكاسكيطا :: فوت على طيارين العسكريين وزدت دفعت لشرشال داك الوقت ودفعت للدرك الوطني زوج مرات ودفعت للشرطة زوج مرات وهاد العام بالاك جات في الصواب،، والوظيف العمومي عمري مادفعت فيه ماعدا صح جربت خدمت عام بتشغيل الشباب anem العام اللي فات والله باش نجرب ونشوف الوظيف العمومي مي والله شفت العجب وكرهت حياتي معاهم وشفت الناس غي الغش غي التمناك والغيابات :: تعرف المدير أمالا خلاص يدير معاك غيب حتى تشبع :: تعرف واحد مسؤول زيد تدي حق كثر من حقك والله العجب المعجب.. مي العمل في النظام على الغالب تدي حقك :: تخدم وتكون نشيط أكثر من غيرك تطلع في الرتبة :: ماتخدمش وتكون فنيان تلقى روحك في رتبتك طول حياتك.. وعندي معظم أقاربي قاااع يخدمو في الوظيف العمومي وبمناصبهم بمناصب مليحة ومع ذلك قاااع دفعو ولادهم للجيش او الدرك ووالله يقولولي بفمهم لوكان يرجع بينا الزمان والله ندخلو ((نقاجوو)) ،، وشوف إذا قضية الفساد هادي مانهدروش عليها الفساد تلقاه في كل بلاص وليس حـُجة باش الواحد يهرب من أي عمل :: ولكن كاين اللي قلبه يميل لجهة معينة ،، المهم ربي خلق الناس متفرقة باش كل البلايص يكونو عامرين : إذا كان الكل حاب السيفيل أمالا شكون يخدم قضية الأمن والدفاع ؟؟

المهم كيما قلنا كل واحد ورأيه ولا يكلف الله نفسا إلا وسعها والواحد يخدم في العمل اللي يحس فيه روحه مرتاح :: انا ماعليش نحب نتعب جسديا في العمل المهم الراحة النفسية وتحس بلي تدي حقك بزااف عليك

وأنت أعطيت مثال على 2 من الناس قلت أنت بلي كرهو حياتهم في الكاسكيطا :: مي أنا عندي أمثلة على ألاف من الناس دايما يقولو الحمد لله في العمل نتاعهم في الكاسكيطا، شوف الخلاصة انه اللي دخل للكاسكياطا غي باش يلقى خدمة وخلاص هادا نقولك صح يكره بطول الوقت وبالاك يندم : ولكن اللي يدخل لأي عمل حبا في طبيعة العمل اللي فيه فهذا يواصل عمله نورمال بدون توسويس ولا هم يحزنون

وانا نقول للأخ صاحب الموضوع :: إذا تحس روحك ماباغيش هاد العمل فخلاص خطيك منه وماتدخلش:: الواحد يخدم في العمل اللي يوالمه بطول الوقت ماشي يدخل فقط من أجل الجاه أو الرتبة ومن بعد يقعد يندم على روحه،،


ربي يوفقنا اجمعين في أي بلاص تناسب أي واحد فينا

وكيما قلت هذه اراء فقط وكل واحد وكيفاش يشوف ويحس
والسلاااام’’,,

[salimtheone]

الدواء هو انك تصلي صلاة الاستخارة .متخافش الا كان بغيتها كمل فيها . لكن مهندسي الدولة في الوظيف العمومي يترقاو حتى هوما مهندس رئيسي ثم رئيس مهندسيين .

لكن نصيحة من عندي راك مليح في الوظيف العمومي تقدر تكمل ماجيستار. تقدر تبدل مكان العمل اذا غيرت الاقامة . حوايج بزاف ملاح في الجيهتين . لكن ماتشوفش للراتب فقط للأن القناعة هي كلش قادر 10 ملاين ومتكفيكش .

بالتوفيق لك