عندي نظرة سلبية على الزواج و تربية الأطفال

[karime amrs]

المشاركة الأصلية كتبت بواسطة manomanila

الأخ karime amers
يظهرلي عندك نظرة سودية لزواج ماش سلبية
أنا توتر ماقبل الزواج هو لي راه أثر عليا و بالعكس مانيش نحلم أحلام واقعية راني جد واقعية من الناحية هاذي
ولكن العزوبية معاناة لكلا للطرفين خاصة لرجل
حنا درك صغار و قادرين على رواحينا بصح كي تكبر شكون رايح يقاسمك أعباء الحياة فالمرض و المشاكل الأخرى
ولا يشاركك أفراحك
مكانش كيما تكون عندك زوجة و أولاد يحبوك و يخافو عليك
مانيش رايحة نقول الزواج راه سعادة
لكن إدا عرفنا كيفاش نمشيوه أكيد راح يكون البيت دافئ و الصدر الحنون عند الأزمات .
كان عندي خال الله يرحمو توفى مند عامين ماتزوجش و كان عايش و حدو تنشنف مع المرض و الوحدة و مهما عاوناه مقدرناش نحسسوه بالرعاية لي كان رايح يحسها مع زوجتو و أولادو.
الزواج أكيد راه نعمة كبيرة و لولا هذا لاه ربي جعلو نصف الدين.
الزواج يحميك من الحرام و يخليك تكون شخص ذو قيمة و قدر هذا الشئ لاحظتو في بعض الرجال كانو متسكعين غير مسؤولين
لكن بعد الزواج أصبحو مسؤولين يقدرو معنى الحياة و تعب الأباء .
المهم أصبحت أنا الناصحة في موضوعي هذا هههههه
مارعفتش كيفاش نخير أفضل إجابة
بارك الله فيكم إخوتي الكرام
تزوجو و أسسو حياة جميلة
مهما تكون متعبة و منهكة لكن رايحة تكون جميلة

سلام
شكرا على الجواب و انرد عليك بمثال اخر من الواقع و انت تعرفيه او على الاقل سمعتي بيه
الزواج نعمة و حمد لله ما نختلف في هذا لكن هناك امور لازم تفهميها
انا معاك في ما تقولي زوجة حنونة ترفد زوجها و اولاد طايعين ابوهم و بناتو طايعات يرفدوه و يرفدو امهم هذا جميل جدا و لعلمك هذا كان قديما يعني جيل امي و امك ابي و ابوك جدي و جدك
الوالدين بكري رفدو و تعبو الامهات ضحاو من اجل رجالتهم و اولادهم هذه حقيقة و تقال و موجودة في كل بيت جزائري و الكل عاش و يعرف هذا الامر
اما الان تقوليلي مراة ترفد زوجها و تربي اولادها انقولك شوفي الشارع كامل النساء برا في العمل وين راهم الاولاد مع من راهم وين و كيف يترباو
هل تعلم المراة هذه وين راه زوجها وواش تغدى مثلا
كيف تحبي مراة كيما هذه مادية ترفدني لما امرض تخلي خدمتها و ترفدني يعني
ام الاولاد يرفدوني و هما مايعرفو قيمة الوالدين منين يعرفو مادام امهم مارباتهمش و ابوهم يجري وراء الخبزة
شوفي الجيل الحالي جيل المادي و البنت المادية هذه ترفد روحة برك راهي مليحة
تقوليلي كاين الماكثات في البيت
و هل صح راهي متهلية في بيتها و زوجها و مربية اولادها
الشاذ لا يقاس عليه اختي في الله
اخيرا شوفي المحاكم و التبهدايل و الطلاق و الخلع حسب الاحصاءات الرسمية راهي واصلة 65.000 حالة طلاق في السنة
علاش هذا العدد الكبير في رايك
لانو واحد ما يرفد وواحد ما يساعف وواحد ما يصبر و مع اول مشكل يطلقو عادي و كان شيىء لم يكن
مالا انستي مرة اخرى كلامك احلام وردية و غير منطقي بالمطلق لان الحياة قاسية جدا و كثر الكذب و النفاق
سمحيلي على الاطالة و انتظر ردك بصدر رحب
ربي يوفق الجميع

[محمد 7411]

بالتوفيق لك وربي يتمم بالخير

[faouzi33]

الزواج حكمة في الدنيا و الابناء متعة الحياة و عند وفاة الوالدين اعمالهم تعتبر صدقة جارية حتى القبر دائما نظيفا من كثرة الزيارات الابناء ..فما بالك قبر من لا يترك ورائه احدا

[manomanila]

واش هذا يا أخي karime amers

هههه كنت ضانة روحي فقط أنا لي عندها نظرة سلبية و سودية على الزواج لكن لقيت بلي كاين لأكثر مني

مهما الحياة صعيبة و الوقت صعيب لكن لازم نتفاؤلو بالخير باش نلقاوه كيما و صانا الرسول عليه الصلاة و السلام
هل في رايك العزوبية حل تاني لا و الله
العزوبية تؤدي إلى مشاكل و متاهات أعظم من النضرة تاعك إلى الزواج
و ماش لبنات كامل كيما راك تشوف
أنا نشوف فيك بلي حطيت الملامة كاملة على المرا لي تعمل لالا صدقني لمرا كي تكون فاسدة و ماش متهليا في زوجها و أولادها و لو ماتكونش عاملة
يعني هذا الأمر يرجع للمرا و تربيتها و مقدار تحملها للمسؤولية.
الزمان راه صعاب صح و رانا في وقت كلش لازمو دراهم
مابقاتش الحياة سهلة و بسيطة كيما كانت
بالعكس كاين نساء قايمين بدايرهم و منضمين و قاتهم و متهليين في رجالهم و أطفالهم باالإضافة لأنو يعاونو أزواجهم في مصروف الدار
ماش حابيين يخرجو فقط لغرض الخروج
المرأة العاملة أكثر مرا مسؤولة و منضمة وقتها و تعرف قيمة الدرهم لي تجيبو بعرق جبينها و تقدر معاناة الرجل في كسب المال
بالتالي ماش رايحة تكون مستهطرة و تصرف و تضيع كيما بعض النساء
صدقني أغلب النساء يتمناو يبقاو قاعديين فالدار متهنيين لكن للأسف مايقدروش
و الزمان صعاب بزااااففففف
بكري الناس عايشين بطرف كسرة و لبن و لاباس بيهم
لكن التطور لكبير لي وصل ليه العالم هو السبب
الأكل أشكال ألوان
اللباس من كل شكل و لون
حتى لوازم البيت من كل شكل ولون كلش
الإنترنت و لات حتمية وضرورة قسوة من الضروريات
تخيل ولدك يطلب حاجة و مااقدرش تلبيهالو
يعني الزمان لي خلا لمرا تخرج تعاون راجلها و تساندو
أنت ممكن عندك نظرة سلبية عن النساء العاملات يخرجو فقط لمجرد اللهو و فرض الشخصية لالا لا
أصابعك يديك مختلفين
كيما كاين نسا ماش ملاح كاين نسا ملاح
و كيما كاين رجال مجرد ذكور فقط كاين رجال هوما رجال صح
من وجهة نظري
يظهرلي كون يكونو الراجل و لمرا متربيين و واعيين و يحطو اليد فاليد يقدرو يعيشو و يتأقلمو فهذا الزمان الصعيب
يتعاونو على مسؤولية المنزل
يتعاونو على مصارييف المنزل
يتعاونو في تربية الأطفال مع بعض و ماش يترك العبء ككل على الأم فقط أكيد هكذا ماتقدرش توفق
خلاصة القول تفأل خيراااااا تجد خيرا إن شاء الله
و نزيدلك معلومات عليا أنا شخصيا
أنا فقط توتر ماقبل الزواج خلاني نكتب الموضوع
في الواقع الحمد لله رزقني ربي براجل طيب رائع و الحمد لله و أنا بدوري و الحمد لست من اللواتي يهتممن بالماديات قبل كل شئ
و نزيدلك أنا أعمل وراني متفاهمة مع راجلي نحطو اليد فاليد و نتعاونو على كلش و الحمد الله كل المشاكل واجهناها مع بضعضنا
من ناحية العمل أعمل في صيدلية و الحمد لله عمل شريف رايح يفيدني في حياتي مع عايلتي من حيث الناحية الصحية و راني ندير في مجهودي باش نفيد الناس بواش تعلمت فهذا المجال
بإختصار ماش كل مرا تخدم برا يعني ماهيش متربية و لا مادية و لا ماش تاع دار وبلاك ظروفها خلاوها تخرج تجري ورا لقمة العيش
لالا أخي الكريم صدقني أقرا لخير تلقا الخير
و الزمان صعاب و لازم تكون قد المسؤولية
و إن شاء الله يرزقك بالمرأة الصالحة
كن كمحمد ترزق بخديجة
عيد سعيد