قالي سميتها " ميلسان " ... - الصفحة 2

ولد حمد الباتني · 2014-09-20, 20:24

السلام عليكم ورحمة الله وبركاته
واش راكم خاوتي ان شاء الله بخير وعافية
لا أدري الموضوع مكرر او لا ولكن ماعليهش
البارح تلاقيت واحد نعرفو واش راك لاباس بخير الحمد لله .. ، قالي زادت عندي طفلة، قتلو ربي بارك كلشي مبروك واش سميتها، قالي سميتها " ميلسان " ؟؟؟؟ قتلو ربي بارك ، شاف وجهي تبدل تاع وعلاه عليكم تسميو هك، قالي ميلسان بلاصة فالترك بويسك ايكسيتيغا وقالو وفيها وو قتلو وي وي وي ايا وتفارقنا
أيا فكرني في لحكاية هاذي ألي ظهرت عندها 5 سنين ولا ألي يزيد عندو طفل ولا طفة لازم يسميها اسم هك " درصاف" "بيلاس" "نورميلا" " جلنار" ووو
ياخويا علاه عليكم تسميو هك ولا باه بنتكم وحدها الي مسمية هك ولا باه تكون خير من بنت صليحة جارتكم وكنزة سلفتك ؟؟؟؟؟؟
نعم أوافق أن الوالدين يحرصو على أنو يسميو ولادهم وبناتهم بأسامي ماتحرجهمش في الكبر، وأنا ضد الواحد يسمي بنتو بأسم الوالدة تاعو زعما يشتيها وهي في حياتها كان يسب فيها وبلاك يضربها ....
يسميهم بأسامي مليحة ولكن الحمد لله كاين أسامي ملاح ومايروحو مايجيو ومعروفين مثل " هاجر، مريم، سارة، خديجة، وووووو مايتحسبوش " وعلاه عليك اسم ماعندو حتى معنى ...
هذا واحد سمى بنتو نورميلا، قتلو واش معناها قالي نور من الله مذكورة في القرءاة ؟؟؟؟ قتلو نور من الله مذكورة في القرءان بصح ماوش اسم طفلة، وحتى فرعون مذكور فالقرءان ...

المفيد الأعضاء يمدونا رايهم وخاصة الأمهات ألي أكيد وقطعا هوما ألي راهم يسميو في هاذ الأسامي هههههه

ملاحظة :
الموضوع كتبتو باللغة العامية لأن قسم المجتمع ربما يستلزم ذلك ولوضوح الكلمات وتوصيل الفكرة
ثانيا : بعض الأسماء الجديدة لها معاني لا تليق ولكنهم لا يعلمون ..