السلام عليكم ورحمة الله وبركاتهوالله يا اختي نقرا في موضوعك ونتفكر كيفاش عقبت اول شهر وشهرين مع ابني درك عندو 4 اشهر ربي يحفظو ويحفظلك بنتك ان شاء الله انا تاني في اول الايام بل والشهر الاول كان لازم يرقد وصدري في فمو حتى يكون شبعان لازم يكون في فمو من بعد بديت نحيلو فيها بشوية ساعات نخليه يبكي شوية من بعد درتلو السوسات لاباس ولا يرقد بلا صدري بالنسبة للقماط انا مازالني لدرك نقمطو نلبسلو تريكو لحم خفيييف ونديرلو مورسو واحد نتاع قماطة مع لكليماتيزور في الغرفة ونغطيه بدرا خفيف خاطش هو تاني يخلعوه يديه في الاول كنت نديرهالو طول الليل وفي النهار وقت القيلولة نخليه بيها حوالي 5 ساعات درك نحيتهالو في النهار خليتهالو في الليل برك واول ما يفظن نلقاه نحاها وساعات ينحيها قبل ما يرقد نتي اذا خفتي من السخانة غطيها بدرا بصح لميلها يديها يعني الدرا هاداك لويه عليها مليح باش ما تتخلعش
بالنسبة للغازات اكثر شي سوفريت بيه معاه كان ينوضلي من الوحدة حتى للستى نتاع الصباح وهو يبكي وانا ما نعرفش اول طفل عندي درتلو تيزانة كنت كل عشية على السابعة نديرهالو فيها كروية وكمون وساعات نغليلو كمون وحدو حبات برك على روس صباعك نديرهم في البيبرون الصغير خلاص المخصص للتيزانة ويساعدها باش ترقد الكمون وكنت نحط تاني شوية فيجل على روس صباعي في شوية ما نخليه حوالي عشر دقايق نصفي الما من الفيجل ونمدهولو اما وحدو اما نخلطو مع التيزانة قالولي مليح باش يرقد الصغير ومؤخرا سمعت بلي مليح للغازات ايضا بيبي غاز نفعني بزاف هوما قطرات تحطيهم حسب عمر الصغير الصيدلي يفهمك خير ايضا مساج لكرشها يساعدها تخرجهم ولا ترفعي وتنزلي رجليها اذا معاك مرا كبيرة وتعرف تمدلها زيت زيتونة ما تمديهش نتي اذا ما تعرفيش لانو صعب للاطفال الرضع لازم وحدة ذات خبرة ورح تبدا تتبدل في كلشي بعمر شهرين ونص وثلاثة وتنساي هاد الايام لانو فعلا اول ثلاث اشهر هي الصعبة بالنسبة للهزان ما تولفيهاش يا اختي راكي والله ما تلحقي لشي حتى باش تغسلي وجهك رضعاخا وبدليلها وحطيها غير تبدا تبكي حاولي تلهيها شوية لعبيها ولا غنيلها وابداي بعدي بشوية انا كنت نخليه يبكي وما نخلي حتى واحد يهزو المهم نعرف بلي راهو شبعان ونظيف ومتكرع
ربي يقدرك ويقدرنا كامل على تربية اطفالنا التربية الحسنة الصالحة يا رب
( تقرير عن مشاركة سيئة )، و الموجودة أسفل كل مشاركة .
2014-08-25, 19:49
العرض العادي
