اخي يضربونيييي 2 - الصفحة 2

كريمة 118 · 2013-07-30, 21:47

حسبي الله وحده نعم الوكيل في من ظلمني في من اسقط دمعة من عيوني ومن تكلم شئ وانا لست بفاعلته
اللهم انصرني على القوم الظالمين وعن الناس الحاسدين والطاغيين

أمة الرحمان رقيّة · 2013-07-30, 22:09

اقتباس:

المشاركة الأصلية كتبت بواسطة مريم الصابرة

السلام عليكم
انا نصحتك من قبل لكن ما كنتش عارفاتو متجبر هاك لازم باباك يوقفو عند حدو لو فرضا بعيد الشر كاش ما صرا لباباك يدفنك هذا ما عندوش قلب عليك غدعي ربي يهديه لكن لو نهار باباك درلو عقوبة وحاوزو من الدار تشوفي كان يزيد يدور بيك وإن شاء الله تتزوجي وتتهناي منو من رأي لازم والديك يديرو معاه امر ضروري لأانو راح يزيد يتمادى وما راهش حنيني معاك لكن نظن راه تحراش من خالك على جال قريتي وخوك بغا يدفنك هذا ما عندو الحق باباك حي وكلمتو تفوت ربي يهديه تحملي مي لازم تهدري مع باباك ربي يهديه

عندها الحق اختي مريم

sali-sali · 2013-07-30, 22:17

لما يحكي معاك اسكتي و خليه وحاولي تكسبيه اي شي يحبو اعمليهلو و اي حاجة سقسيه

الله يهديه

samira135 · 2013-07-30, 22:41

ماترديش عليه مهما يقووول هذا باين عصبي

مسلمة انا · 2013-07-30, 22:44

اختي فرج ربي عليك

لكن لا ادري لما تقولين انهم بغيرو مني ويحقدوا عليا وانا خير منهم مع تكرارها
اعتقد انه هناك سبب ما وراء تصرفاتهم ومن كلامك حسي بلي راكي متكبرة عليهم حتى لو قريتي خير من بنتهم ولا صليتي قبلها ولا تحجبتي قبلها
علما انو مقارناتك دائما بيها وكانك تقولين بطرقة غير مباشرة انها هي سبب المصائب والاحزان اللي راكي عايشتها

بالاك هوما حسو بلي راكي شايفة روحك عليهم وحابة تصوطيهم رغم انو فضلهم كبير عليك انك تربيتي معاهم وفي دارهم وحسو انو تصرفات فيها نكران للجميل

فكانت ردة فعلهم هذه باعتبارهم اناس عاديين
لذلك لا تغري نفسك بانهم يغيروا منك لانو بصراحة اختي ماكاش اللي مقراش اليوم وماكاش ما تحجبتش وماكاش اللي متصليش حتى بنتهم تقدر ربي يصلح حالها وتصير ماشاء الله

انا مارانيش حابة نجاملك ونقولك صح عندك الحق بل اريد ان اكون صادقة معك

قد تكونين فعلا انسانة رائعة كما قلتي لكن لا تجعليها مصدر للوسوسة كلما حدث لك امر رجعتيه لهذا الجانب هكذا لن تجدي ابدا الحلول لمشاكلك
فكري في ماقلت لك وابحثي عن جذور المشكل ويازين الراي اللي يبكيك على الراي اللي يضحكك ويرضيك

اختي ما تتقلقي من كلامي ما والو انا راني حابة نعاونك ونتمنالك الخير ونقولك ساعفيهم هذوك خاوتك يوم تتزوجي او كشما تحصلي تصيبيهم في كتافك غييير اربحي الملاحة معاهم خير لك
غير بالسياسة تكسبيهم ويرجعو يحبوك
وفي الاخير انتي تربحي وتكسبي رجال في كتافك

كريمة 118 · 2013-07-30, 23:45

اقتباس:

المشاركة الأصلية كتبت بواسطة مسلمة انا

اختي فرج ربي عليك

لكن لا ادري لما تقولين انهم بغيرو مني ويحقدوا عليا وانا خير منهم مع تكرارها
اعتقد انه هناك سبب ما وراء تصرفاتهم ومن كلامك حسي بلي راكي متكبرة عليهم حتى لو قريتي خير من بنتهم ولا صليتي قبلها ولا تحجبتي قبلها
علما انو مقارناتك دائما بيها وكانك تقولين بطرقة غير مباشرة انها هي سبب المصائب والاحزان اللي راكي عايشتها

بالاك هوما حسو بلي راكي شايفة روحك عليهم وحابة تصوطيهم رغم انو فضلهم كبير عليك انك تربيتي معاهم وفي دارهم وحسو انو تصرفات فيها نكران للجميل

فكانت ردة فعلهم هذه باعتبارهم اناس عاديين
لذلك لا تغري نفسك بانهم يغيروا منك لانو بصراحة اختي ماكاش اللي مقراش اليوم وماكاش ما تحجبتش وماكاش اللي متصليش حتى بنتهم تقدر ربي يصلح حالها وتصير ماشاء الله

انا مارانيش حابة نجاملك ونقولك صح عندك الحق بل اريد ان اكون صادقة معك

قد تكونين فعلا انسانة رائعة كما قلتي لكن لا تجعليها مصدر للوسوسة كلما حدث لك امر رجعتيه لهذا الجانب هكذا لن تجدي ابدا الحلول لمشاكلك
فكري في ماقلت لك وابحثي عن جذور المشكل ويازين الراي اللي يبكيك على الراي اللي يضحكك ويرضيك

اختي ما تتقلقي من كلامي ما والو انا راني حابة نعاونك ونتمنالك الخير ونقولك ساعفيهم هذوك خاوتك يوم تتزوجي او كشما تحصلي تصيبيهم في كتافك غييير اربحي الملاحة معاهم خير لك
غير بالسياسة تكسبيهم ويرجعو يحبوك
وفي الاخير انتي تربحي وتكسبي رجال في كتافك

شوفي اختي انا نحترم رايك كااختي وماتقلقتش
لكن والله انا متكبرت عليهم ولا نكرة الجميل لكن هذي هي الحقيقة ويوجد اخي اخر يعلم بذالك و حتى امي تعلم وزيد انا كرهت من هادوا المشاكل خليها على ربي ولي قعد قعد ولي راح راح

hakeem · 2013-07-31, 00:36

راكي حابتنا نقولولك أضربي خوك و نذلوه و يولي كي يشوفك يخاف منك ؟؟؟؟ هذا خوك و يبقى خوك
طلبتي النصيحة إذا عجباتك فاعملي بها و إذا ما عجباتكش أتركيها
و لمعلوماتك مشكلتك عادية جدا في المجتمع الجزائري و الأخ يضرب أخاه و يضرب أخته و في حالات اخرى الصغير يتعدى على الكبير و تستمر الحياة دون احقاد و تضخيم و أنت يمكنك الترفع و الصبر و اطلبي ربي يهديه و يمكنك الإستقواء بوالديك و تلقين أخاك درس و لك الإختيار فإن أضررت به فهو اخاك و غن سامحته فهو أخاك

wafa16 · 2013-07-31, 01:28

هاد المرة رايحة نكون قاسية
يا اختي ادا ربي ماهداهش واش نقولك الله يعطيه مصيبة يتلهى بيها و ينساك و الا ضربة تهبطو على خاطر راه طاير
الطفلة تحكيلكم تقوللكم يحوسلي على السبايب و انتوما تقولولها اسكتي علاه راهي حيوان و الا دابة ما نقدروش نكونو مثاليين زيادة حتى ادا كانت طفلة و صغيرة راهي عندها حدود و نفاد صبر الباب قلقو يغلقو هو سبحان الله كلمة زوج يقوللها انا دارنا و انتي راكي زيادة هنا
الطفلة عايلتها مشتتة مرة تقولك بابا مرة خالي هو خويا و يماها ماشي صح يماها يعني راهي خالوطة كبيرة ويماها سامحة فيها و خاوتها ما يسمعولهاش انتوما تقولولها لسانك طويل و اسكتي و متكبرة و تحبي المشاكل و تستاهل الضرب اللي ضربها هدا الي ما قراش موضوعها الاول خضات طريحة تع الكلاب حشاكم على حاجة والو اتقو الله وواحد فاتحلها محضر تع الاسئلة باش يصيبلها الخطا و العثرة باش يخرج خالها براءة عندو عقد يروح يفرغهم في جهة اخرى ماشي في بنت اختو المسكينة مكسورة الجناح و ما عندها وين تروح و اللي يقولك الضرب عادي ردي بالك تدي هاد الهدرة في راسك لازم ترفضي العنف بانواعه لانو الرسول قدوتنا عليه الصلاة و السلام لم يضرب احدا قط لا امراة لا عبد لا خادم و ضرب الانسان غلى الوجه في حد داته خطيئة لانو ربي كرمو
فما كان لاه ادخلونا ثقافة الضرب باش تولي عادية اليوم الاخ و غدا الزوج ............
الغيرة تع لافامي كاينة و تكون الطفلة تصلي متحجبة و متفوقة في دراستها و زيد ماشي عاجبتهم
احتي عليك بالدعاء غير هو اللي يفيدك في هاد الحالة على خاطر الناس ماتفهمش و بما انك طفلة نتي دايما غالطة حتى ادا كان عندك الحق و ماتنسايش دعوة المظلوم ليس بينها و بين الله حجاب

soso sirin · 2013-07-31, 02:01

مكانش اخ يكره اختو بلا سبب الا اذا كان مريض نفسي فهذا حاجة وخدخرا.هو كاين سبب لازم عليك تعرفيه .راكي تقولي باباك راه عندو 70 سنة حنونة باباك راه كبير و اي صدام بينك و بين خوك ممكن يسببلو في كارثة امالا ايفيتي المشاكل على قدما تقدري مانيش نقلك يضربك و اسكتيلو لانو اذا ماغلطيتش مش من حقو يضربك مي على الاقل ماتتناقروش قدام باباكم و هذا في جالك كي يروح الاب الطفلة ينكسر ظهرها.بلاك يكون عندو مشاكل في الخدمة و لا كاش واحد كاش ماوصلو عليك و ممكن باباك مفششك بزاف و كلمتك انتي الي مسموعة و باباك دايمن يبهدلو في جالك هنا تاني ممكن من الزعاف يولي يشريلك فيها و لا ممكن راهي افار تاع دراهم لانو اي مشكل راه موراه الدراهم..ماترديلوش الهدرة و شوفي كاش واحد يهدر معاه و خممي بينك و بين روحك وين راه المشكل و اذا كانت هاذي طبايعو واش نقولو ربي يهديه ان شاء الله

كريمة 118 · 2013-07-31, 04:24

اقتباس:

المشاركة الأصلية كتبت بواسطة wafa16

هاد المرة رايحة نكون قاسية
يا اختي ادا ربي ماهداهش واش نقولك الله يعطيه مصيبة يتلهى بيها و ينساك و الا ضربة تهبطو على خاطر راه طاير
الطفلة تحكيلكم تقوللكم يحوسلي على السبايب و انتوما تقولولها اسكتي علاه راهي حيوان و الا دابة ما نقدروش نكونو مثاليين زيادة حتى ادا كانت طفلة و صغيرة راهي عندها حدود و نفاد صبر الباب قلقو يغلقو هو سبحان الله كلمة زوج يقوللها انا دارنا و انتي راكي زيادة هنا
الطفلة عايلتها مشتتة مرة تقولك بابا مرة خالي هو خويا و يماها ماشي صح يماها يعني راهي خالوطة كبيرة ويماها سامحة فيها و خاوتها ما يسمعولهاش انتوما تقولولها لسانك طويل و اسكتي و متكبرة و تحبي المشاكل و تستاهل الضرب اللي ضربها هدا الي ما قراش موضوعها الاول خضات طريحة تع الكلاب حشاكم على حاجة والو اتقو الله وواحد فاتحلها محضر تع الاسئلة باش يصيبلها الخطا و العثرة باش يخرج خالها براءة عندو عقد يروح يفرغهم في جهة اخرى ماشي في بنت اختو المسكينة مكسورة الجناح و ما عندها وين تروح و اللي يقولك الضرب عادي ردي بالك تدي هاد الهدرة في راسك لازم ترفضي العنف بانواعه لانو الرسول قدوتنا عليه الصلاة و السلام لم يضرب احدا قط لا امراة لا عبد لا خادم و ضرب الانسان غلى الوجه في حد داته خطيئة لانو ربي كرمو
فما كان لاه ادخلونا ثقافة الضرب باش تولي عادية اليوم الاخ و غدا الزوج ............
الغيرة تع لافامي كاينة و تكون الطفلة تصلي متحجبة و متفوقة في دراستها و زيد ماشي عاجبتهم
احتي عليك بالدعاء غير هو اللي يفيدك في هاد الحالة على خاطر الناس ماتفهمش و بما انك طفلة نتي دايما غالطة حتى ادا كان عندك الحق و ماتنسايش دعوة المظلوم ليس بينها و بين الله حجاب

والله يااختي غير انت حسيتك فهمتني يعني راني متشتة ومراني صايبة لمن نحكي لكن تفاجئت بقساوة بعض الاعضاء مع كل احتراماتي قالوا اصبري مالقري اخوك لكن هوما مازالوا مايعرفوش عقليتوا واش ندير معييت نحمل ونصبر مرة يجرحوني بالهدرة تحسب انا جبت روحي وفرضت روحي عليهم كون نصيب وين نروح والله مانزيد نرجع لهاد الدار راني نقارع للقراية بفارغ الصبر والله حسبي

z.abdo · 2013-07-31, 10:21

اقتباس:

المشاركة الأصلية كتبت بواسطة كريمة 118

اخواني الحقيقيين والاشقاء 4ذكور الاكبر27سنة والاخر 25سنة وهما مقاجيين في الخدمة العسكرية وواحد 21سنة في فرنسا وواحد 18سنة يدرس وكل واحد لاهي في روحوا وانا نهدر معاهم هدرة خفيفة
والاناث 2 واحدة متزوجة وعمرها 30سنة كلما نحكيلها تقلي مكتوب ربي وكاين لي كثر منك احمدي ربي والاخرى 19سنة وواحد مرانيش متقربة منوا الا اختي الكبرى كنت نحاول باش تعاوني لكن دايمن ماتفهمنيش كرهت وماوليتش نحكيلها

وفي مايخص اخوالي يوجد واحد في انجلترا وعمره 40سنة و 4في فرنسا واحد في عمروا 29سنة و واحد 27 وواحد 25وهذا لي حاقرني 34سنة
و2هنا في الجزائر واحد 36سنة والامام الحاقد عليا 46سنة والاناث وحدة ماتت منت متقربة منها بزاف ووحدة متزوجة متقدرش تدخل روحها وانا في اخوالي متقربة من الي عمروا27سنة وهو ثان محقور من خالي نفسوا لي حاقرني وهو متداقي معاه وميكلموش غير مرات

السلام عليكم مرة اخرى

من خلال كلامك استنجت انك مقربة لخالك الذي عمره 27 لأنكما متقاربان في السن وفي نفس الوقت انت قلت ان لك اخت متزوجة عمرها 30 سنة وقلت انها لاتفهمك

من المفروض بما انها انثى مثلك وقريبة لك في السن تحس بيك اكثر وتفهمك اكثر .......ما سبب انها لا تفهمك ؟؟

بصراحة اختي هناك حلقة مفقودة في القصة لم تحكيها لنا لا ادري لمذا و ما هي ؟؟؟

فكري جيدا اختي ما الشيء لم تذكريه في القصة .....حتى نعرف الخطا من الصواب

لدي سؤال لك اختي كريمة في رأيك انت ما هي الأخطاء التي ارتكبتيها مع اخوالك سواء كانت منذ سنوات او منذ مدة قريبة ؟؟؟؟

انت لديك الجواب اختي

انتظر ردك اختي وانتظر صراحة منك اكثر اختي

loufa · 2013-07-31, 11:40

اشارك الاخت Wafa الراي لكن اضيف شيء اخر
واسمحيلي اذا قلتو يا بنتي اذا امك تخلت عنك لا تنتظري شيء اخر من الاخرين واهم حاجة ا ضرك انك تتفادي اي نقاش مع اخخوك هذا وكيما قالو بعض الاخوة مترجيلوش الكلام خلاص يعني كيما حكاية الباب اغلقيه بلعقل واذا قالك علاه قوليلو مدرتهاش بالعاني وتفرا
متزيديش تعمري راسك ببنت خالك او ابوها واللي دار حاجة ضدك وكلي ربي وخلاص واقراي مليح لانها مستقبلك
وربي يفرج عليك

leila ben · 2013-07-31, 12:07

يا أختي لو كان مقلتيلوش ماشي الباب تاع الشمبرة تاعك ميردش عليك بهذاك الكلام أنت تعرفي عقليتو خاسرة وتعاندي فيه يا بنتي ماتشوفي بليس ماتسمي منو بلاك هو راه حاب يتهنى منك وتولي لداركم مالا متعطيلوش الفرصة خاصة كي يشوف جداتك وجدك واقفين في صفك يخرجولو القرون واش يقلك مترديلوش وإذا كنت من الصنف اللي لازم يهدر روحي وين ميسمعك حتى واحد ورجعي الهدرة كيما تحبي ربي يصفي القلوب ويهديه

كريمة 118 · 2013-07-31, 12:15

اقتباس:

المشاركة الأصلية كتبت بواسطة z.abdo

السلام عليكم مرة اخرى

من خلال كلامك استنجت انك مقربة لخالك الذي عمره 27 لأنكما متقاربان في السن وفي نفس الوقت انت قلت ان لك اخت متزوجة عمرها 30 سنة وقلت انها لاتفهمك

من المفروض بما انها انثى مثلك وقريبة لك في السن تحس بيك اكثر وتفهمك اكثر .......ما سبب انها لا تفهمك ؟؟

نعم لا تفهموني وكلما نحكيلها ونفرغ قلبي تقولي ياخي هما دايرين هكا وربي كتب لك انك تعيشي عند اخوالك وكاين ناس اكتر منك ولم تتطوع مرة حتى تحكي معاهم ولا تتدخل يعني محاباش تربح العيب مالقري على حساب ظلمي وسعادتي

بصراحة اختي هناك حلقة مفقودة في القصة لم تحكيها لنا لا ادري لمذا و ما هي ؟؟؟
اختي لا يوجد شئ مفقود سردت القصة مثلما جرت

فكري جيدا اختي ما الشيء لم تذكريه في القصة .....حتى نعرف الخطا من الصواب

لدي سؤال لك اختي كريمة في رأيك انت ما هي الأخطاء التي ارتكبتيها مع اخوالك سواء كانت منذ سنوات او منذ مدة قريبة ؟؟؟؟

تربيت مع اخوالي على اساس انهم اخواني وحتى جدي وجدتي خباوا علي ولم اعرف انا بنت من !حتى السن 14سنة وانا منذ ذلك اليوم اصبت بالانهيار وعدم الثقة سواء في نفسي واخوالي وجدي وجدتي ووالدي الحقيقين ولذلك سعى جدي لكسب ثقتي من جديد فاستطعت ان اتجاوز ازمتي والحمد لله ,ربي راه شاهد غير نعاملهم بالاحترام والحاجة الي يقولولي عليها نديرهالهم حشاك حتى سبابطهم نغسلهم والفطور يلحق حتى لعندهم ووو راني عارف بلا مزيتي مي غير راني نقلك وزيد جدتي البارح قالتلي انوا خالي الكبير هو الي راهو مشيطنهم يحوسني نخرج من الدار وهو دايمن يطير ويزعف عليا مثلا مرة بنتوا واش قالتلي مدابيك كي يجي بابا عندكم وتكوني تقراي حطي الكراس لانوا يظلي قلنا اقراوا وزيد جدي الحاجة الي يقولي نديرهالوا وهو يحبني بزاف ويخاف علي
انا لم ارتكب حتى خطا فقط عندما اظلم مرات نسكت مرات مين نصيب افراد العائلة ساكتين ندافع على حقي
انت لديك الجواب اختي

انتظر ردك اختي وانتظر صراحة منك اكثر اختي

كنت صريحة معك واذا يوجد اسئلة اخرى اطرحها

وزيد راني نفكر باه نخرج من الدار مي معلابليش وين نروح

z.abdo · 2013-07-31, 12:24

اقتباس:

المشاركة الأصلية كتبت بواسطة كريمة 118

كنت صريحة معك واذا يوجد اسئلة اخرى اطرحها

وزيد راني نفكر باه نخرج من الدار مي معلابليش وين نروح

السلام عليكم مرة اخرى .......

انا اخ و لست اخت .............هل لما اخبروك انك لست ابنتهم قمت مثلا بتصرفات طائشة ضدهم او كنت عنيدة معهم خصوصا مع اخوالك

انت قلتي ان بنت خالك قالت لك لا تدرس امام والدهم ......وحسب فهمي تقصدي انه يغار منك لدراستك ؟؟

وانت في رأيك انه هذا سبب كرهه لك

لكن لمذا يريد ان يخرجك من البيت ؟؟؟ كذالك اين البديل لما تخرجي من البيت فهو اين يريدك ان تذهبي واين تعيشي هل يريدك ان تعيشي في الشارع ؟؟؟