وصفات حراير الكوزينة الجزء الثاني - الصفحة 19

idron0 · 2015-01-18, 19:28

الكرمب المحشي في الفرن روضة 88

اول حاجة منديرش الروز في الحشو و ثاني حاجة انا نقلي الكرمب المحشي قبل ما نحط في المول و نكون من قبل وجدت صوص بيضاء فيها القليل من الحمص نصبها عليه و نرابي فرماج روج و نخلي القليل من المرقة نقدمها معاه,يعني الطبق ما يجيش ناشف .

idron0 · 2015-01-18, 20:20

معجون البرتقال والليمون عطرالذهب

كيلو برتقال مقشرومقطع مع 3 حبات ليمون مقشر منحيتلو حتى الجلدة الرقيقة والنواة نضيفلهم 250غ سكر وكاس ماء ونخليه يغلي حوالي 20 دقيقة ثم نرحي الخليط كامل في الميكسور ونرجعو للكاسرونة ونضيفلو 500غ سكر وحبة نجمة الارض ونرجعو يغلي وانا ننزع في الرغوة اللي تتكون في الوسط الى ان تزول تماما ويصبح المعجون يلمع
نخليه يبرد شوي ونحطو في بلارة تاع زجاج واغلقيها مليح وخليه في الثلاجة او خارجها مايصرالو والوو .

.

idron0 · 2015-01-19, 17:19

قاطو حلوة الترك بالشيكولا ولوز ايفيلي ام سراج و ملاك

بصح انا الحشو نتاعو مدرتش حلوة الترك درت الحشو الثاني ضك نحطلك الحشو لي درتو ومدرتش لوز ايفيلي من فوق مكانش عندي كان عندي كاوكاو يتباع مقطع كيما لوز ايفيلي هو لي زينت بيه تشري كمية قليلة تزينلك الحبات كامل وزيد الثمن نتاعو رخيس نخليك مع المقادير نتاعو جربيه بنين بزاف
المقادير :
500غ زبدة اي نوع تحبي تخدمي بيه + كاس سكر ارطب + 2 حبات بيض + 2 مغارف كبار نشاء + فاني + باكي خميرة + فرينة تلمي بيها لعجينة
الحشو : حلوة ترك
الحشو الثاني :كاس كاوكاو مرحي رقيق + كاس نواد كوكو + نصف كاس سكر ارطب + مغرف كبيرة كاكاو اذاكان لونو غامق نتاع الميزان اذا كان لونو فاتح ديري زوج مغارف لمي الخليط نتاع الحشو بماء الزهر وديريهم دوائر صغار
التزين : شيكولا ذائبة ولوز ايفيلي
طريقة التحضير : تخلطي المقادير نتاع لعجين تتحصلي على عجينة طرية تشكلي دائرة وديري حفرة في الوسط تحطي الحشو لي حبيتي وتغلقي الدائرة مليح وتكملي باقي لعجين نفس الطريقة كي يطيبو تغطسي في شيكولا ذائبة ومن فوق تزيني بالوز ايفيلي ولا تزيني باش حبيتي نتي[ شوفي الصور هاذا واش صورت بلاكش تفهمي مليح
هاذا الحشو
ملاحظة
هاذي الكمية تخرجلك بزاف قادرة تلحقلك حتى 100 حبة على حسب حجم الحبات لي ديريهم انا كبرتهم شوي خرجتلي 95 حبة.
إضغط هنا لرؤية الصورة بحجمها الطبيعي.

هنا تهزي عجينة ديري فيها الحشو

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

هنا تقفليها مليح

إضغط هنا لرؤية الصورة بحجمها الطبيعي.

وتكملي باقي لعجين وتحطيهم في يطيبو

إضغط هنا لرؤية الصورة بحجمها الطبيعي.

وهنا واجدين

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

idron0 · 2015-01-19, 17:49

كيك العسل ببيضة yakot

بيضة, نصف كاس سكر, كاس عسل, كاس حليب ناقص شوية, كاس زيت ,ساشي خميرة ,فاني, الفرينة عنك مزانك
ضرب البيضة مع السكر حتي يذوب ونزيد الحليب ونضرب ثم العسل ونضرب ونزيد الخميرة مع الفاني والفرينة كما امسكوتة وندخلوها للفرن طيب
ماجيش حلوة مايخلعكمش العسل وجي معلكة من الداخل ممممم وخاصة كي تصبح مع فكرة هي وصفة فرنسية
والمول ماشي كبير ماتغركمش الصورة راهي زوم برك هههههه وقطر المول 21سم .

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

idron0 · 2015-01-19, 18:34

قاطو السكرفاج أم ياسين الزهراء

4 بيض مع 1كاس سكر وفاني مضربين مليح وتزيديلهم 1 كاس زيت معمر وتضربي و2 خميرة وزاست اللي عندك والفرينة طبعا ماتكثريش بزاف الطبقة الاولى اكثر من الثانية تحليها في البلا وديري المعجون موالفة تاع المشماش ونخلط معاه عصير البرتقال ولا ماء الزهر كيكون عندي وندير كمية مليحة تاع المعجون فوق الطبقة والطبقة الثانية نزيدلها الفرينة باش نقدر نرابيها في لاراب تاع البصل يعني الخشينة وندير على كل المعجون نغطيه ونحط في الفرن يطيب .

ام احمدي · 2015-01-19, 20:18

كيكة الملاعق لزينب 83

4 بيض 8 ملاعق سكر ، 8 ملاعق زيت ، 8 ملاعق حليب وحدة خميرة و شوي فاني ، و 8 ملاعق فرينة هذه الوصفة الاصلية ، لكن انا في بلاصة الحليب ندير علبة ياوورت و في بلاصة الفرينة ندير 7 ملاعق فرينة و 2 ملاعق نشاء و بصحتك حبيبتي

إضغط هنا لرؤية الصورة بحجمها الطبيعي.

ROSELUISE · 2015-01-20, 07:32

بسم الله الرحمن الرحيم السلام عليكم
اجرب معجون ساهت وفي مقدور كت واحدة
حبة قارس وحبة برتقال توضع في المجمد حتى تجمد ثم اسكرفجيها ضفي كيتو سكر تيتر ماءثم علئ النار حتئ تعقد
بالصحة واتهناء

ROSELUISE · 2015-01-20, 07:36

معدرة لتر ماء
هده اول مرة انها وصفة قديمة ومجربة

أم التوأم · 2015-01-20, 08:43

ا

لبالوزة لدائمة الشكر
البالوزة احنا انديروها ثلاث طبقات والطبقة الاولى مافيهاش نواد كوكو نديروا: الطبقة البيضاء. نصف لتر حليب وثلاث ملاعق سكر زوج ملاعق ونصف مايزينة لفاني ونخلط بارد في بارد ثم نخليها فوق النار حتى تعقد نفرغها في أكواب ، الطبقة الثانية :نصف لتر حليب وثلاث ملاعق سكر وزوج ملاعق ونصف مايزينة وثلاث ملاعق كاكاو بني ونخلط بارد في بارد ونحطها فوق النار تعقد ونضيفلها فالأخير واحدة علبة دانات ونخلط ونصبها فوق الخليط الاول اما الطبقة الاخيرة ندير نصف لتر عصير البرتقال ثلاث ملاعق سكر ثلاث ملاعق مايزينة ونخلط فوق النار حتى تعقد ونصبها فوق الخليط الثاني ونزينها بشرائح البرتقال ونخليها تبرد فالثلاجة وبصحتكم

idron0 · 2015-01-20, 10:22

قراتان ام حمزة أم محمد تاج

نقلي البطاطا كيما لي فريت ونوجد صوص بيشامال ونقلي صدر الدجاج او فيونداشي مداوي بصلة وثوم ومعدنوس ونحط في بﻻ تاع الفور البطاطا المقلية كاملة وفوقها اللحم مفتت او الفيونداشي ونزيد عليه كمية من فروماج الشيدار نرابيه هاذي إضافتي ونحط على الكل ﻻبيشامال وندخلو للفور يهز تحميرة وبالصحة ولهنا ليكم
بالمناسبة نحيي ام حمزة الفحلة النشيطة.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

idron0 · 2015-01-20, 11:40

شخشوخة الظفر Omrihem

انصبي بواش عندك لحم والا جاج رابي بصلة كبيرة وسنات ثوم الشخشوخة تحب الثوم والطماطم حب ودري دواوات فلفل اكحل وملح وكسبر واذا تحبي الحار ديري شوي فلفل احمر وقلي البرمة نتاعك مليح منبعد مرقي بماء سخون ورمي فيها الحمص وخلي كلشي يطيب اذا عندك جريوات والا لفت ديري معاها وزيديلها طماطم نتاع الباطة وكي تقربي تطفي عليها لوحي قرون فلفل حار باش تمد فيها طعمة مليحة
والشخشوخة جوزيها في السيار باش يطيح منها الدقاق الرقيق خلاص ومن بعد ديريلها شوي زيت وحطيها تفور بعد ما تفور عاوديها مليح بماء وديريلها طريف زبدة وعاودي فوريها انا عادة نفورها زوج مرات علي حساب الشخشوخة اذا خشينة والا رقيقة كي تطرا خلاص ضرك تجمريها حطيها في حاجة واسعة يعني بوبيطة تكون واسعة باه ما تلصقلكش وزيدلها شوي زبدة والا عندك زبدة نتاع بقرات تجي ابن وجمري بشوي وشوفي واش لازمها مرقة انت عينك ميزانك ما تخليها يابسة ما تكثريها حتان تتعجن ان شاء الله قدرت نفهمك.

idron0 · 2015-01-20, 13:02

وصفة صابلي بحلوة الترك و العسل من قناة سميرة oum ibrahim

250غ مرغرين طرية
3مغارف كبار عسل
3مغارف ك حلوة الترك
3م ك كوكاو محمص و مرحي رقيق
باكي خميرة حلوى
لفاني
فرينة
تخلطي المرغرين مع العسل و الحلوة ثم تزيدي الكوكاو من بعد لفاني و الفرينة و الخميرة مخلطين حتى تتحصلي على عجينة طرية
حللي و اطبعي الشكل الي حبيتي و طيبيهم في فرن ساخن 160 د ماتغفليش عليه راهو يطيب بسرعة و يتحمر لانو فيه حلوة الترك و العسل
بعد ما يطيب خليه يبرد ذوبي الشوكولا الخاصة بالحلويات و زيني نصف الحبة و خليها تنشف تماما
من بعد سخني شوية عسل و ادهني النصف الاخر للحبة بيه و مرغديه في الكوكاو المحمص مرحي
و لصقي كل حبة مع اختها بالمعجون و بالصحة و الهناء.

إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.

yasmalak · 2015-01-20, 15:47

ارز بالكلامار ل LYZZABEL

في مقلة نحط شوية زيت و نحط ارجل الكالامار بعدما نكون نقيتهم مليييح و نحيتيهم الجلدة تاعهم طبعااا و قطعتهم قطع متساوية ،، و النار تكون هاااادية خاطرش يدو الوقت فالطياب مشي كيما الساك تاع الكالامار ،، و نتبلهم بشويييية ملح و نعطيهم غادي يطلقو الماء و ساعة ساعة نخلطهم بالملعقة حتى ينشف الماء تمااااماااا
ننحي الكالامار في صحن و في نفس المقلاة نرابي فصين او ثلاثة ثوم و ملعقة كبيرة طماطم معلبة و نخلط حتى يتقلو مليح نضيفلهم زوج حبات طماطم رابي و نزيد نقلي نتبل بالملح و الفلفل الأسود و نضيف مقدار كاس ماء و نرجع الكالامار ونغطيها و نخليهم يطيبو على نار هادية حتى تولي صلصة عاقدة
في هداك الوقت نغسل الروز مليييح حتى يولي الماء صافي ،، و نحط على النار طاجين فيه شوية مارغرين و شوية زيت نخليهم يسخفو و ننقص النار و ندير الروز يتقلى و نتبله بالملح و الفلفل الأسود و شويييية سكنجبير و ورقتين رند مع الخلط المستمر حتى يتشرب النكهات مليييح و لونه يميل الى الأصفر الشفاف نضيف عليه ماء سخون و نطيبه ،، لازم مين يطيب يكون ناشف مالماء لي طاب فيه
و في مقلة اخرى نحط شوييية زيت و نقطع فلفل اخضر و فلفل احمر حلوين بالطول على شكل أعواد و نخليهم على نار هااااادية لازم يطرو مليح و ما يتبدلش لونهم و طبعا نديرلهم شوييية ملح
مين يطيب الروز نحط عليه الفلافل هههه و نخلط برفق هنا ما نستعملش الملعقة فقط نهز الطاجين باش الروز ما يتعجنش
و نقدم في صحن الروز في الوسط و الكالامار بالصلصة فوقه او على الجانب و شهية طييييييبة

idron0 · 2015-01-21, 19:48

الكانيلوني ناقصة دهون زينب 83

اللحم المفروم داويتو مليح مليح ، طماطم حب و شوي معلبة ، ثوم ، بهارات ، ملح دبشة فلفل حار مقطع و زيتون اخضر مغلي و مقطع و طيبتو في لا صوص تاع الطماطم جا امممممممم و مانفوتش يعني خليت لاصوص
جبت الكانيلوني واجدين و هوما يابسين حشيتتهم باللحم المفروم و حطيتهم جنب,
الصوص البيضاء ، شوفو واش درت، جبت لترا غير ربع حليب خلطت فيها ثلاث مغارف فرينة و هو بارد و حطيتهم فوق النار و بقيت نحرك حتى خثارت بصح لازم تبقى سائلة و مباعد نحيتها و خلطت فيه ثلاث حبات جبن المثلثات حتى ذابو و شوي ملح و اللي تحب تزيد فلفل ابيض انا مادرتوش,
دهنت المول بشويييييييييية زيت و حطيت كمية تاع صوص و ستفت فوقها الكانيلوني و حطيت فوقو كمية صغيييييرة بقاتلي تاع اللحم المفروم بالصوص تومات و فرغت فوقها كمية الصوص البيضاء و دخلتها الفرن و الله جات اممممممممم و لذيذة جدا و ماتتشبعش.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

ام سراج وملاك · 2015-01-21, 22:21

سلطة فواكه زينب 83

وصفة سلطة الفواكه بطريقتي

نقص الفواكه قطع صغير ، نزيد عصير برتقالتين طبيعي بدون إضافات ، و عصرة صغيرة ليمون و للتحلية ندير لمسة سحرية و هي نصف ملعقة اكل حليب مكثف محلى ونخلط مليح بعد ربع ساعة راح تلقاو الفاكهة خرجت الماء تاعها و حلاوتها وجي بنينة بزاف و حلوة بدون اضافة كمية كبيرة من السكر جربوها و كيد راح تعجبكم