السلام عليكم عزيزاتي عضوات منتدانا الغالي
صحا عيدكم و كل عام و أنتن بخير
كيف أحوالكم إن شاء لاباس عليكم
ها أنا عدت بعد غياب طيلة شهر رمضان بسبب سفري إلى بلادي الحبيبة
أشكر كل الأخوات لي راسلوني على الخاص أذكر منهم عزيزاتي أم ماجد ... أم نجمو ... الصوامعية... عاشقة الجنة .... أم أيمن ... أم إياد و المستغفرة ومحبوبة الكل توتا .... لمسة حنية ....و لي نسيتهم إن شاء الله نذكرهم نضيفهم أسمحولي
اليوم جبتلكم أسهل و ألذ بقلاوة على طريقتي بعجينة الفيلو المعدة منزليا عندي سنين و أنا معتمدتها و هي من حلويات العيد 2013 لبيت أهلي
آسفة ماصورتش المراحل من الأول لأني كنت مسرعة باش نروح لأهل زوجي و لكن وعد مني أني نعمالهالكم بالتفصيل الممل في الأيام القادمة بإذن الله ... نخليكم مع الصور
هنا منين كملتها و قطعتها
هذه هي الوصفة للعجينة :
5 كيلات فرينة لابال لاتستعملو سيم درت بيها ماصلحتليش مافيهاش العلك .. تتقطع وحدها
كيلة ليدام ( 1/2سمن + 1/2مارغارين التوريق)
1/2 كيلة مايزينة
قرصة ملح حليه في شوية ماء
حبة بيض
2 ملاعق حليب بودرة .. تقدري تستغناي عليه أنا مادرتوش
2 ملعقة أكل خل أبيض
2 ملعقة ماءالزهر ( أنا زدت شوية)
2 ملعق أكل سكر بودرة
ماء للعجن
الكيلة لي درت بيها هذه الصينية هي باطة مارغارين 500 غ
للحشو
3 كيلات مكسرات
3/4 كيلة سكر عادي خطرش تتعسل
قشور ليمون
لفاني بودرة
قليل من السمن الذائب
و نرش بماءالزهر مثل فتل الكسكس.........
الطريقة هي أنك تحطي كل مقادير العجينة في قصعة و تعجني عادي مثل البقلاوة العادية .... أقسميها على 14 كرية متساوية (أوكيما تحبي نتي عدد الطبقات) أنا درت 7 من فوق و 7 من تحت ممبعد تحطي الكريات يرتاحو داخل كيس نظيف
ممبعد أغطسيهم في المايزينة ثم حلي 7 كريات شوية و حطيهم فوق بعضاهم مع إعادة رش المايزينة مليح بين الطبقات و حلي بالحلال جيدا حتى توصلي لسمك 0.5 سم وطبعا قد سمك الصينية
ممبعد تهزي العجينة و تفرشيها فوق صينية فرن تكوني دهنتيها مسبقا بمارغرين التوريق جيدا
تعملي ثقوب بالإبرة ثم تفرشي الحشو و تسويه جيدا ثم تعاودي تحلي الكريات 7 الباقية بنفس الطريقة و زاودو المايزينة بيناتهم و تحطيهم فوق الحشو وتسوي الحواشي ثم تقطعيها و تزينيها حسب الرغبة ثم تدهنيها بمارغارين التوريق.... خليها تريح شوية ثم طيبيها في الأول على نار قاوية ثم نقصيلها تطيب في غرضها و عسليها و خليها تتشرب
و هنا دهنتها بمارغارين توريق
طيبتها في هذا الفور الرائع
و هنا منين خرجتها و عسلتها بعسل من صنعي .... مازالت سخونة تغلي
صورة أقرب
شوفو كيفاش ورقت وحدها بلا مادهنت الطبقات .... تقدروا تحسبوهم
زوووووووووم
مزايا هذه البقلاوة أنها ماتعييش و ماتديش الوقت مثل العادية و لذتها لاتقاوم و مانحكيلكمش على القرمشة هههههه
ثانيا أنها تحلي الطبقات العجينة فوق بعضها أنا عملت 7 من تحت و 7 من فوق ثم تضعينهم كطبقة واحدة في السني يعني أسهل منها مافيش
قولولي رايكم ممبعد إن شاء الله نحطلكم الوصفة نروح نرقد أولادي و نرجع إن شاء الله
( تقرير عن مشاركة سيئة )، و الموجودة أسفل كل مشاركة .
2015-07-14, 12:08
العرض المتطور
