طريقة عمل عجينة التزيين - الصفحة 121

souma.sousou · 2014-01-05, 13:10

اقتباس:

المشاركة الأصلية كتبت بواسطة لينا11

صباح الخير على عسولات
معذرة بارح حرجت فجأة ولدي ماحبش يرقد وحكومة تخدم بكري تحتمت عليا نحطو في بلاصتو ونعسو خخخخخخ

راني جبت لكم قاطو جديد هاكم تحلاو بيه

سومة شدي في ربي وماتخافيش
اغلب رجال هكذا الا من رحم ربي

يعطيك الصحة ،صراحة مفهمتهش بانلي مخدوم بالكاوكاو او اللوز وهذاك لي منفوق بنان ولا كرام.مقولتيناش اسمو ،شهيتيني،

souma.sousou · 2014-01-05, 13:14

اقتباس:

المشاركة الأصلية كتبت بواسطة ام الاء وسدن

صباحكم عسل يا الحبيبات
ام ايوب تاتا وسومة الفحلة حبيت نقولك حاجة في البداية راهي تبانلك مشكلة كبيرة يجي النهار تحكيها لبنتك كي تصبريها
على طارى في حياتها
.........وتستمر الحياة............
ام ايوب نشا الله راكي مليحàة وايوب صبح باري

مشكورة حبيبتي،معندنا مانديرو،لي يجيب الصغار يتحمل ويصبر،الله يقدرنا

souma.sousou · 2014-01-05, 13:17

يا ام ايوب وين راكي وام اريام نشاله تكونو بخير ،

souma.sousou · 2014-01-05, 13:56

صح فطوركم وين راكم

silent scarf · 2014-01-05, 14:14

اقتباس:

المشاركة الأصلية كتبت بواسطة souma.sousou

صباح لخير،اختي ،ومرحبا بيك في لمتنا لمت لحبابات،ربي يكملك بالخير،ويسهل ولادتك وتفرحي ،بصغيرك،متقلقيش حبيبة درك تجاوبك ام ايوب،معنديش خبرة كبيرة باش نجاوبك بصح نقولك المهم لازم كل نوع تحطيه وحده،باه ميتخلطوش الروائح ويتبدل الذوق،ومتزينيش الحلوة حتى تسلكي ،وربي يجيبلك الخير،اختي

ربي يحفظك على طيبة مشاعرك و كلامك الحلو في انتظار ام ايوب

لينا11 · 2014-01-05, 14:19

[QUOTE=silent scarf;1055347845]

اولا مبروك عليك حنونة
ثانيا تقدري تديري قاطو مسبقا حطيه في بورت مونجي وغلفيه مليح بورق الاملنيوم باش يحكم روحو كي تجي تخرجيه يقعد هوهو
وجربي حلويات الي فيها سكر قلاص ولا معجون ماتزيديهش حتى نهار تجي تحطيه باش يبان جديد
حاولي توجدي سكر قلاص في جهة ومعجون ثاني حطيه في جهة باش كي تجي تحطي يكونو عندك وماتتحيريش ولا مايكونش شكون يشريلك

ومبروك مسبقا ربي يسلكك انتي وولدك او بنتك مسبقا

tatadamizour · 2014-01-05, 14:24

مساء الخير يا جماعة وين راكم
لينا القاطو شباب بصح صرالي كي ام اريام مافهتوش مليح
فهمينا شوية

ام اريام · 2014-01-05, 15:06

السلام عليكم ورحمة الله وبركاته. مساء الخير يا اخواتي العزيزات انشاء الله الجميع بخير.انا نضت صليت الفجر ووليت رقدت شوية ومن بعد كنت مع الشغل والله ما يخلاص .سوما حسيتك ريحتي شوية خير من قبل .والله يا اختي دعيتلك ربي يهنيك و يهنينا اجمعين آمين.اختي لينا باين قاطو بنين بصح فهمينا شوية واش فيه .طاطا ربي يقدرك حاولي تخصصي وقت اقعدي تلعبي مع الاولاد باش ما تسكتيهمش حاولي تشغليهم مثلا بالتلوين او اللعب بالعجينة... لخاطر الطفل كون نهار كامل وانتي اش اش يولي قلوق .انا مازال ما رزقنيش ربي بصح قريت على المعاملة مع الاولاد وزيد ولاد خواتاتي تقريبا ربيتهم انا .ام ايوب بت نخمم فيك على الفورنو لي فسدلك انشاء الله يتخدم اليوم.

tatadamizour · 2014-01-05, 15:32

اقتباس:

المشاركة الأصلية كتبت بواسطة ام اريام

السلام عليكم ورحمة الله وبركاته. مساء الخير يا اخواتي العزيزات انشاء الله الجميع بخير.انا نضت صليت الفجر ووليت رقدت شوية ومن بعد كنت مع الشغل والله ما يخلاص .سوما حسيتك ريحتي شوية خير من قبل .والله يا اختي دعيتلك ربي يهنيك و يهنينا اجمعين آمين.اختي لينا باين قاطو بنين بصح فهمينا شوية واش فيه .طاطا ربي يقدرك حاولي تخصصي وقت اقعدي تلعبي مع الاولاد باش ما تسكتيهمش حاولي تشغليهم مثلا بالتلوين او اللعب بالعجينة... لخاطر الطفل كون نهار كامل وانتي اش اش يولي قلوق .انا مازال ما رزقنيش ربي بصح قريت على المعاملة مع الاولاد وزيد ولاد خواتاتي تقريبا ربيتهم انا .ام ايوب بت نخمم فيك على الفورنو لي فسدلك انشاء الله يتخدم اليوم.

على السلامةحنونة شفتي الشغل مايخلاص ما يكمل
باالنسبة للاولاد والله غير الحمد الله ماشي صعاب بصح مساكن غير فى الدار كيما قالت سومة مدفونين بالحياة
المهم غدا الكبير يرجع المسيد و نتهنى منو الصبح و اللابري ميدي القيلولة و شوية لعب يتعشاو و دودو
وانت كيفاش تقضي نهارك وان شاء الله ربي يرزقك الذرية الصالحة

ام اريام · 2014-01-05, 15:47

انا يا طاطا اختي نحاول دائما نصلي الفجر في وقتو لا عاد راجلي يخدم الصباح نوجدلو الفطور .لاعاد ما عنديش خرجة نرجع نرقد ولا عاد عندي شغل ما نوليش.من بعد الشغل نتاع الدار و الفطور .والمساء نتكلم مع امي ولا اخواتي في الهاتف.والحمد لله الصلاة على وقتها و قرائة القرآن انشاء الله ربي يقبل.ونحب ساعة على ساعة نخدم الحلويات و نقسمها على الجيران ولا خبز الدار.وندخل المنتدى معاكم هذه حياتي .من قبل كنت نقري في المسجد العربية والسور القصيرةمن القرآن للاولاد ما بين 5و8سنوات كل يوم احد ممتطوعة.وهذا العام حدثت مشاكل في المسجد ما بين المسيرين حبست .

aboayoub · 2014-01-05, 15:51

مساء المور سومة ريحتي شوية اسمحولي البارح خرجت ديراكت وماقلتلكمش تصبحو بخير ايوب باقي يدور فالبرد وراجلي زقا عليا ديتو رقدت معاه عند عجوزتي ماحبش يرقد عند عمومو ودركا قريب رحنا فيها ماجاش السقام راجلي جاتو القفازة وخلط فالفورنو ولات البيت غير ريحت الغاز ولينا ندوخو مزيا فقت راهو رايح يجيب الراجل يسقمو

ام اريام · 2014-01-05, 15:56

اهلا اختي ام ايوب .بلاكي من الغاز راهو بعيد الشر قتل ما قتل في هاذ الشتاء .

لينا11 · 2014-01-05, 16:07

لبنات هاكم قاطو على بالي يدوخ خخخخخخخخخخخخ
https://www.djelfa.info/vb/showthread.php?t=1504365

aboayoub · 2014-01-05, 16:11

اقتباس:

المشاركة الأصلية كتبت بواسطة ام اريام

اهلا اختي ام ايوب .بلاكي من الغاز راهو بعيد الشر قتل ما قتل في هاذ الشتاء .

مساء العسل ام اريام .....قريب رحت جيفا انا وايوب وباباه ...راهو دا الفورنو كوملي يسكمو ...
من 3 وهي حاكمتني الدوخة وهو تاني وهي من الغاز وانا عندبالي راني نعسانة كتن نضت بكري مادانيش النوم تبدلت عليا البلاصة

لينا11 · 2014-01-05, 16:14

ام اريام ربي يرزقك طشرون ان شاء الله