السلام عليكم ورحمة الله وبركاته
اخواتي اليوم حابة نشارككم بطريقتي في شربة الفريك
المرة الاولى محبيتش نشارك لانو قلت الشربات كل تتشابه
واليوم وانا نطيب قلت هيا نصور ونحطها واش راني خاسرة
المهم المشاركة
شربة فريك
طريقتي سهلة ولذيذة والمبتدئات راح تعجبهم
اولا نجيب بصلة صغيرة وسنات ثوم وحبتين طماطم
وفلفل احمر يابس (قاوجة) نقطة فوق القاف منعرف واش تسموه
وهذا سر من اسرار الشربة لبنينة ولحم اودجاج وملح طبعا
نهرس الثوم مع الفلفل لي قلتلكم عليه والملح ا
انا كي يحمارلي الفلفل نغسلو ونحطو يبس
ونخبيه في بلارة ماكلتو مممم المهم بعد ماهرسنا الثوم
نقطع البصل رقيق والطماطم قطعي برك اي شكل لانو رايحة نصفيها من بعد
التصفية على جال لولاد والصنعة هاذي ورثوها على امهم هيهيهي لاكن
الصراحة في دقيقة تنصبي
نرجعو للموفيد نحطو كلش في كوكوط ونقلي مليح ونضيف توابل راس حانوت
وفلفل احمر انا نستعمل الحار وكركم كي تتقلى نضيف طماطم مصبرة والسر الثاني
الطماطم حليها في شوي ماء سخون مترميهاش مباشرة تعطي لون جميل احمر للشربة نمرق شوي بماء سخون وبعد مدة
نكمل نمرق حتان يتغطى اللحم نخليها طيب
هنا نعطيك سر اخر كي تكوني تقلي في اللحم ضفي شوي نعناع يابس مممم على
البنة والريحة تهبل تهبل
نغلق على الكوكوط حتان يطيب اللحم نحي اللحم ونصفي
بالكسكاس ونرمي عليه ماء سخون ونرجع لاصوص الصافية
في برمة الطين نحطها فوق النار كي تغلي نرمي لفريك بعد منغسلو
كي نغسل لفريك نزربو منخلوهش في الماء بزاف باه متروحش البنة
ونرمي معاه راس ولازوج فلفل مغلوق للبنة كي طيب لفريك نطفي وندير
ورقات نعناع اخضر اذا معندكش ديري اليابس فتفتيه بين صباعيك ونغطي لحين تسربي ومتنسايش الدبشة
نتمنى تكون عجبتكم طريقتي الكلام كثير باه نفهم لبنات المبتدئات
لاكن الطريقة سااااهلة ماااااهلة
نسيت نقلكم في برمة الطين الصغيرة نستعمل فنجان صغير تاع فريك
والصور توضح اكثر
شهية طيبة
دعوة الخير برك تكفيني
باه متروحش بين الصفحات راني درتها موضوع لتعم الفائدة للجميع
https://www.djelfa.info/vb/showthread...post3995756108
( تقرير عن مشاركة سيئة )، و الموجودة أسفل كل مشاركة .
2016-06-17, 00:09
بمناسبة شهر رمضان.... دورة طبخ للمبتدئات
الوصفة راني كاتبتها راهي في الصفحات الي فاتو
العرض المتطور
