السلام عليكم إن شاء الله تكونوا كامل بخير نتوما و عائلاتكم و عيدكم مبارك كريم ...
حبيت نطرح عليكم قصة فكرتها الرئيسية ماذا يفعل الأبناء ضحايا العائلات المريضة نفسيا و ليست لديها رحمة ندي نصائحكم عل و عسى أستفسد و نستفيد جميعا من تجاربكم ...
أنا شابة في العشرينات من عمري كنت دائما بشوشة و إجتماعية لكني عانيت من فترة طفولتي من الضغط الزائد من العائلة ضغط نفسي رهيب في كل شيء تقريبا و تخويف رهيب من الناس, من الدراسة أولهم يعني واجب عليا ندي الأولى في البنات لم يضرني ذلك كثيرا كوني أحب الدراسة بطبعي فقد كان هي إحدى الأسباب للخروج من ضغوطات الحياة ثانيا ما خاصش يكون عندي صحابات و كي يكون عندي خاصني نتصرف غير كيما يبغوا والديا يعني إذا ظلموا والديا صحاباتي أنا خاصني نسكت و هذي الشيء آلمني لأني كنت نشوف دائما ما صحاباتي ينظلموا أقلهم بسوء النية ... كان الوالد تاعي شكاك يشك في كل شيء ... و الأم تاعي جد عصبية و أي حاجة طير فيا و تظل تدعي عليا و فهمتها غير بشويا بلي خاصني نصابها هي صحبتي في هذي الدنيا و لكن دون نتيجة و دايما تدعي عليا و كي تعيطلي وحدة من صحاباتي تبقى تسمع و تقعد ديرلي في الضغط باه نقطع و الكثير الكثير المهم بإختصار الضغط هداك بدا بأثر فيا في فترة مراهقتي بصح ما بانش بلي عندي عقد نفسية و لكن بدأ يتضح الأمر تدريجيا ..المهم حتى لهاذو عامين صاي بلغ السيل الزبى و بانو فيا كل العقد النفسية و وليت حتى نقدر نفسر تصرفاتي... تولد فيا الخوف من كل شيء أصبحت أخاف من معاركي قبل أن أخوضها ... باختصار مات فيا كل شيء و ما بقات عندي رغبة في أي لا أستطيع اتخاذ قرار و لا التعبير عن رأيي و لا فعل أي شيء حتى الدراسة لم أعد أقوى عليها و أخيرا راني في أشهر نعاني من الأرق مع كوابيس يومية تفزعني... تقريبا خاصة في الشهر الأخير و ما أزعجني حقا هو تأثير هذه الحالة النفسية السيئة على حالتي الروحية...لم تذق روحي طعم السكينة للعديد من الشهور و عباداتي مقصرة فيهم كثيرا.. مع العلم أنا ما تربيتش تربية دينية ما كانش الي علمني في ديني و لقلة التوجيه أنا إنسانة كثيرة الأخطاء يأست من روحي نغلط بزاف ما كانش إلي يوريلي ...كان دائما ما يقول لي الوالد (ربي يهديه🤲
تصلي بزاف نتيا و كان يقولي ما تصوميش حتى تقفلي 18 عام فاتوني عامين من مور إلي بلغت و أنا ما علاباليش بلي كي نبلغ نصوم فرضا حتى عرفتها من أستاذة التربية الإسلامية يعني غير ربي كن فضله أكرمني سبحانه بعلم من عنده ...والدي ما يصليش و أخي كذلك ...والدي عانى من طفولة جد قاسية تزوج أمي مرضها نفسيا ثم أتبعني أنا كمل عليا و زادوا إخوتي الصغار مساكن تاني .. راني نعاني من التعلق بالناس راني نغير كي نسمع وحدة تحكي على صداقتها مع والديها بدون حسد طبعا تمنيت حتا أنا كون راني مصادقة والديا باه ما نحسش بلي راني في حاجة للناس و هذا الشيء مقلقني صراحة وليت همجية في الردود على إلي يتجرأ عليا بعد ما كنت نتجاهل تماما الناس المزعجين فقدت الثقة في كل الناس ضعف شخصية حساسية مفرطة هشاشة نفسية تفكير مفرط باغية نهرب من راسي نهرب نهرب ... خوف و قلق شديد و نوبات هلع وليت نخاف من كلش ما نقدر ندير والوانوض من بلاصتي نخاف و نخاف نرقد و نخاف ناكل ما تطيب لقمة في فمي ..و نخاف من كل شيء كي يقرب مني الوالد تاعي نخاف و الأساتذة نموت بالخوف منهم و صحاباتي كي تهدر معايا وحدة نخاف اكتئاب شديد ... أهملت نفسي كثيرا و توقفت عن ممارسة هواياتي و أنا في عمر الزهور ما بقيت قادرة ندير والوا.. راني نحس بلي راني ميتة على وجه الأرض... قلت بالاك نزور طبيب نفسي خفية على دارنا و لكن خفت نروح و نريسكي بروحي و نخصر دراهمي و من بعد يقعد يشكل عليا الطبيب النفسي ... و الكثير الكثير ...
نتمنى ديروني ختكم و لا بنتكم نصحوني لوجه الله شا ندير و الله تعبت حاسة روحي تايهة و ضايعة و حاسة روحي نزيد ننطوي على نفسي من الداخل ... إذا تعرفوا كاش ما طبيبة نفسية تقدر تحكي معايا أونلاين ما تبخلوش عليا راني في حالة 
ربي يشافي كل مريض نفسيا ما هذا إلا شورى كأخذ بالأسباب ...
و ربي يسمح لينا من الوالدين و علينا إكرامهم بحسن ظننا ...
راجية السماح على الإطالة و ربي يجازيكم مسبقا ...
( تقرير عن مشاركة سيئة )، و الموجودة أسفل كل مشاركة .
2022-05-05, 18:31
العائلة المريضة نفسيا
العرض العادي
