اقتباس:
المشاركة الأصلية كتبت بواسطة zawali.dz
ختي الله يحفظك فهميني
اسكو كي نحلو العجينة مع بعض وحدة فوق وحدة نرجعو نحلو كل وحدة و ننفضو النشا و ندهنوها
ولا و هي هكذاك مجموعة مع بعض نحطها فالبلاتو فوق بعض و نزيد الحشو و نزيد المجموعة الثانية من فوق و من بعد نسقيها بالزبدة
تعيشي فهميني مليييييييييييييييييييييييييح حابة نديرها و خفت نغلط عمري لا جربتها
قوليلي كي نعملو وحدة فوق وحدة واش نديرو و الوجه ندهن فقط بالزبدة ذائبة ولا نسقيها طول بعد ما نقطعها شوية
فهميني بالتفصيل الممل ربي يحفظلك بنيتك
|
صباح الخير اختي هذا وين شفت ردك درك نفهمك بالتفصيل
شوفي كي تحلي لابات نتاعك وتحطي واحدة فوق واحدة عمريهم بالنشاء بيناتهم وافتحيهم على خطرة بلا ماتنحيهم على بعض وماتنفظيهمش حطيهم هكذاك مجمولين وقبل ماتحطي الطبقة الاولى ادهني البلاطو نتاعك بالسمن ولا الزبدة مليح من كل الجوايه وحطي لابات اللي فتحتيها قع بلا ماتفتحيهم وماتنفظيهاش افتحيها رقيقة كي الورقة ماتتخلعيش وماتخافيش لازم تكون هكذا قد ماتكون رقيقة تجي مليحة
وبلا ماتزيدي تدهني منالفوق لاسمن حطي الحشو نتاعك كاوكاو ولا لوز ولا اللي عندك وزيدي نفس الطريقة مع 6 قرصات اللي بقاولك افتحيهم وحطي النشاء بزاف بيناتهم وافتحي بنفس الطريقة الاولى
وفي الاخير انا درت بواطة نتاع زبدة ستار ذوبتها وخليتها بردت
كي كملت حطيت لابات الدوزيام وقطعتها ورشقت فيها الكاوكاو فرغت فوقها الزبدة الذايبة كامل البواطة ماشي دهنتها ومباشرة للفرن
تخليها تطيب من تحت حتان تشوفي الجوانب نتاعحها تبعدو على البلاطو وحمارو افتحي عليها النار من الفوق تولي وردية برك بلا ماتحمار بزف سي نو تتحرقلك
وغير تخرجيها سقيها بالعسيلة انا نقصت كاس منها ونص نتاع عسل من كيلو خاطرش طيبتو في الدار شوفي الرابط
تسقيها غطيها وخليها حتى لغدوة باش تقسميها وتنحيها
ان شالله تنجحي فيها تبعي الوصفة الاساسية نتاع ام كوثر مليح وتبعي النصائح اللي قلتهملك واذا مافهمتيش زيدي سقسيني وانا نردلك
( تقرير عن مشاركة سيئة )، و الموجودة أسفل كل مشاركة .
2013-03-01, 14:35
العرض المتطور
