للبنات اللي حابين يشاركو في الطبعة 10 - الصفحة 5

sarra5 · 2012-11-08, 15:54

https://www.djelfa.info/vb/showthread.php?t=972993

ملف خاص بعصائر طبيعية من اعداد فحلات الجلفة

sondse1 · 2012-11-08, 22:13

اسعد الله مسائكم
كيف احوالكم ان شاء الله بالف خير
دخلت نقوللكم على وحد الحاجة قلقتني بزاف و حبيت تنصحوني واش ندير وواش نتصرف
ما قدرتش نتصرف حتى تصرف تحت الضغط هذا
المهم بلا مقدمات المشكل هذا راه بيني و بين اختي الوحيدة
الا و هو مشكل الغيرة
ذرك هي كيفاه بدات
بدات نهار وصلو الحجاج نتاعنا في الليل فتحنا الفاليزات كيما كامل الناس عادي
و بدينا نقسمو في الحوايج نتاع البوراكة
و بابا دارنا حوايجنا كل واحد في صاشيتو و خلاهم في فاليزة وحدهم
المهم كي قسمنا كلشي ماما ربي يحفضها كلفتني انا باش نمد للناس اللي يجيو يبوركو و وراتلي كيفاه نقسم ووصاني على كل شي
كيما عارفين ملات الدار لازم تقعد مع الناس اللي يجيو ووحدة تقوم بالحوايج الاخرى
وماما على نيتها مسكينة وكلتني انا بحكم اني انا البنت الوحيدة اللي في الدار و اختي راهي متزوجة و بالزيادة نافسة
في اليوم الثاني كيما روحت جدة لبيتها باه تستقبل ضيافها اختي تحاست مع ماما و قاتلها كيفاه توكلي ميمي على كلشي و انا اكبر منها ماما برتلها علاه بحكم انها نافسة وما يليقلهاش الجري نتاع روح جيب و ارواح و ادي ....الخ سورتو انها والدة بعملية قيصرية يعني لازملها روبو تام اختي زعفت و قاتلها تحبيها خير مني وتعافرت معايا
انا خليتها في نيتها و قلت كي تهدى نحكي معاها و نفهمها
واللي زاد الطين بلة انو كي فتح بابا الفاليزة نتاعنا جابلي شوي حوايج زيادة بحكم اني في مرحلة زواج و من ضمن الجهاز
انا ما قبلتش و قلت لماما ماتزيدوش تحسوها اني مخيرة عليها و مانيش حابة مشاكل مي ماما و بابا اصرو
وبابا قالي بلي راني عادل بيناتكم و انو هي جابلها اكثر مني تاني
لانو قبل عامين بابا راح للعمرة و جاب لاختي اكثر مني بخاتم و حوايج اخرى نتاع الشهرة بحكم انها كانت مخطوبة و مقبلة على الزواج وانا والله ما قلت حاجة بالعكس زدتها 2 حوايج من نتاوعي يصلحو للعرايس
و اختي ربي يهديها كي شافت بلي جابلي اكثر منها بشوي زعفت و شنفت و ذرك ماراهيش تحكي معايا
وكي صرا هذا المشكل ولات كامل ما تشوفش فيا ولات تقول لماما انها تحبني اكثر منها
وماما عيات وهي تفهم فيها انو هذي ماشي تفضلة مي هاذي حاجة لازمة على بابا و فكرتها انو في العمرة جابلها اكثر مني و انو انا اللي راني حاملة الدار كامل على كتافي من كلشي و هكذاك ما حبتش تستعرف
و ذرك انا صراحة ما قدرتش نستحمل معاملتها ليا و خصوصا لما يجيو الضياف تحب تهيني قدامهم و تتمسخر عليا
مع اني ندير كلشي وحدي و واحدة ما تمس معايا حتى حاجة حتى طاس الماء نجيبولهم انا و هكذاك و نقول معليهش على خاطر والديا اللي رباوني و كبروني و نردلهم خيرهم اللي مهما ندير مارايحاش نوفيهم حقهم
مي ما استحملتش اهاناتها ليا ووصلت بيها حتى انها تقلق ماما بكلامها
حتان قلت لماما انو نمدلها الحوايج اللي جابهملي كامل ماندي حتى حاجة المهم تخليني في حالي
وذرك حباباتي راني علابالي كسرتلكم راسكم مي نتمنى نلقى عندكم جواب على سؤالي كيفاه ندير معاها دون ان ناذيها او نجرحها وحابة علاقتنا ترجع كيما كانت قبل معليهش تغير مني مي بلا اهانات

cherilety · 2012-11-09, 00:16

مساء الخير الاخت سندس ، الله يعينك ، في الاول لازم تحوسي على سبب كل هذه الغيرة ، بلاك كراه نافسة ، ولا كان الوالدين يدللوها بزاف و والفت كلشي ليها ، ككبرت وليتي تنافسيها في كلشي ...
و افضل حل هو الحوار ثم الحوار ، حاولي تهدري معاها و لو احرجتك اصبري ، انشاء الله يهديها

وفاء سعاد · 2012-11-09, 06:52

صباح الخير عليكم صحاباتي الاعزاء مبروك عليك سندوسة عودة الحجاج وربي يعاونك في الشقى اختي سندوسة ماتقلقي روحك ماوالو راكي في دار باباك وهي ضيفة وقاعدين تخدمو عليها يعني مدايرة فيها الخير انا خاوتي كي كنت نافسة ويخدمو علي كي يروحو نكسيهم من راسهم لرجليهم والغيرة انتاعها غير
مبررة اطلاقا لانها الان متزوجة وخرجت من مسؤولية باباك واي حاجة يجيبهالها يكتر خيرو وانت مازلت تحت مسؤوليته ونورمالمو هي اللي تقولهم يجيبولها لانك سياتي يوم وتتزوجيين ربي يهديها وماتعانديهاش لانها تحت تاثير الهرمونات ونافسة واصبري حتى ترتاح واحكي معاها بالعقل وفهميها كي هي كانو يجيبولها وهي طفلة الان دورك انت وربي يصفي القلوب ويحننكم على بعضاكم

sondse1 · 2012-11-09, 14:27

اقتباس:

المشاركة الأصلية كتبت بواسطة وفاء سعاد

صباح الخير عليكم صحاباتي الاعزاء مبروك عليك سندوسة عودة الحجاج وربي يعاونك في الشقى اختي
ربي يخليك حنونتي الله يبارك في عمرك حنونة
سندوسة ماتقلقي روحك ماوالو راكي في دار باباك وهي ضيفة وقاعدين تخدمو عليها يعني مدايرة فيها الخير انا خاوتي كي كنت نافسة ويخدمو علي كي يروحو نكسيهم من راسهم لرجليهم
والله بلا مزية مني وماني طالبة منها حتى حاجة غير الكلمة الطيبة و دعوة خير هذا ماكان
والغيرة انتاعها غير مبررة اطلاقا لانها الان متزوجة وخرجت من مسؤولية باباك واي حاجة يجيبهالها يكتر خيرو وانت مازلت تحت مسؤوليته ونورمالمو هي اللي تقولهم يجيبولها لانك سياتي يوم وتتزوجيين
والله حبيبتي حتى و تزوجت و خلفت وهكذاك بابا وماما ربي يحفضهم مازالو لحد الساعة يديرولها الحوايج كل عيد تتكسى كيما تكسينا و ماما ذرك بنتها كسيناها كي ماما وبابا كي انا والله في 2 درنالها كسوة زينة وخاطي الماكلة و التروسوات والله كل ما نخدم حاجة ليا نخدملها حاجة ليها و نبعثهالها وذرك وليت نخدمل لبنتها تاني وبلا مزية مني لاني والله غير نحبها و نعزها اكثر من عينيا
ربي يهديها
اللهم امين
وماتعانديهاش لانها تحت تاثير الهرمونات ونافسة واصبري حتى ترتاح واحكي معاها بالعقل وفهميها كي هي كانو يجيبولها وهي طفلة الان دورك انت
والله نساعف فيها على قدر ما نقدر سواء في فترة النفاس ولا في باقي الايام العادية لانو هذي الغيرة ماهيش وليدة اليوم راهي عندها سنين حتى قبل ما تتزوج وهي عندنا
وربي يصفي القلوب ويحننكم على بعضاكم
اللهم امين

ربي يحفضك حنونتي سعاد على النصائح

~ حراير ~ · 2012-11-09, 13:22

السلام عليكم و رحمة الله تعالى و بركاته

عزيزتي مريومة راني غير ما قريت رسالتك ادخلت نجري و ماكانش في بالي اخلاص بلي راح نلقى هاد الموضوع المهم و بما أنك حبيتي طلبتي رايي فأنا راح نقولك وش اندير كون جيت في بلاصتك

الحاجة الأولي شهدي و استغفري و العني الشيطان الرجيم الي حاب يدخل يبنك و بين أختك

الحاجة الثانية ركزيلي مليح على الكلمة الي قلتيها "الضغط" يتسمى انت في الضغط و أختك نافسة و ما تستبعديش أبدا أنها دخلت في اكتئاب ما بعد الولادة يعني لازم نحسنو عونها و نسايسوها و نوقفو معاها باش ما يطورش عليها و نعودو "بعيد الشر" في حاجة أخرى و اسأليني أنا على هاد الإكتئاب لأني مريت به و لولا ستر الله و عائلتي وقفو معايا ما نعرف وين راني درك و الحمد لله على كل حال

وحاجة أخرى أسئلي نفسك شكون خير القش و الروايح و الذهب و إلا أختك و عايلتك بصفة عامة و الهناء في الدار خاصة قدام ميمتك مسكينة و باباك الي راهو جاي من التعب لأنه الحج تقول عليه جهاد .... احنا العام الي فات كي جا بابا من الحج والله حسيتو فارغ تخيلي كي سلمت عليه حسيت روحي راح انهز و نطلع بيه لدار هيهيهيه كيما الطفل الصغير

على هك حبوبتي استهلي في والديك و العني الشيطان و ما تخليلو حتى فرصة باه يدخل في عايلتك كوني انت فحلة عليه و قوية بإيمانك .... و زيد راهو مش الشيطان وحدو الي يتشفى فيك كون تصرى حاجة "لاقدر الله" بينك و بين أختك ... راكي تلقاي الجيران و الكنات و بنات العم و بنات الخال كامل في أول فرصة يحبو "يعايروكم" سامحيني على الكلمة و لكن الحقيقة هاد هي على هك حبوبتي ما تخلي الفرصة لحتى واحد أنه يقولك كلمة مش مليحة على وخيتك

درك انقولك كيفاش نتصرف أنا أول حاجة أنا مش مع الأخت ام مريم أنك اتقوليلها ماتعاودش تهدر معاك هكداك قدام الناس لأنها ممكن تجيبها لعبة و تعود "تحمص" فيك و تقولك الكلام الي يزعجك مالا عزيزتي أجلبيها ليك بالهدرة المليحة و و بجليها في الحوايج الي تحبهم مثلا تعودو تاكلو أعطيها من قسمتك أبداي بيها في إعطاء افاكهة و هكذا و كي تعودي قاعدة و تجي هي نوضيلها و قلها أرواحي أقعدي منا .... و هك بالشوية بالشوية حتان يطير هاد الشيطان
و عندك تقولي راني انحط من روحي بلعكس راكي انت خير عند ربي بتصرفاتك هادي و كيما نقولو "الملاحة تغلب القباحة" مالا كوني مليحة تربحي دنيتك و آخرتك و تربحي رضا والديك و إن شاء الله حتى أختك تعاود ترجع لعقلها بهاد التصرفات

و حتى القش مافيها والو كون تقوليلها خيري وش حبيتي و راهو بابا مسكين حب يشَوَرْني من درك و جيبيهالها بتمسخيرة بلاك راهو كره مني و حبني نروح عليه .... و هك و أنا نتوقع أنه قلبها يحن و ما تاخذش منو ..... و حتى كان أخذت وش حبت .... ديري في بالك بلي القش يتقطع و الريحة تفرغ و الذهب يرشى و ما يبقى غير الكلمة الطيبة .... و وين تبقى تبقالك دعاوي خير من عند والديك و رضى من عند الله ... و زيد ممكن ربي يعوض صبرك خير و يرجعلك الحاجة بألف حاجة أخرى
أختي لعزيزة مريومة بلاك تقولي لا ما نحطش من روحي "خاصة و أني مش عارفة عقلية أختك موالفة هك ولالا" لكن صدقيني كي تبردي المشكل ماراحش تندمي بصح كون تكبريه انت و إلا هي راح تبقاي على طول حياتك نادمة
و ربي يطيب عشرتكم و يرزقكم بالهناء و المحبة على طول الحياة

و درك وش اديري التاي بشغلك و بوالديك و كبري مخك خليك من الصغائر ديما خلي همتك مرفوعة للسماء

فراشات العمر · 2012-11-09, 07:01

شوفي اختي سندس هدى لي رهح للحج راح ينقي روحو من الذنوب باه اختك تفسد عليكم الفرحة يعني حبت تقول ان باباك مازال متنقاش من الذنوب حاولي انت ماترديش عليها وتجنبيها كي تبدا بالهدرة اخرجي لانك لوكان تردي عليها قدام الضيوف توليلكم عيب وباباك يتقلق مالا غير اسكتي عليها وقليلها ربي يهديك ماتكثريش معاها الهدرة
الهدية من عند باباك مدهالك وهو راضي

sondse1 · 2012-11-09, 08:06

اسعد الله صباحكن حبيباتي

الف شكر ليكم سعاد / بنت خليل / cherilety على نصايحكم ان شاء الله رح نقتدي بيها

و نتمنى حبيبتنا ام اريج تنصحني هي تاني

ربي يعطيكم ما تتمناو

ام مريم الجزائرية · 2012-11-09, 09:20

السلام عليكم
مريومة الحمد لله اللي وصلو الحجاج بخير وانا فان جيت نغير ماجبتيليش شتا قلتلك ماء زمزم والاثمد
شوفي انت الله يبارك كبيرة ورزينة ماتعانديش اختك في الشرع المعاملة ليس بالمثل يعني كبري قلبك معاها اما بالنسبة انها تتمسخر قدام الناس هدري معاها بالشوية وقوليلها ماتحرجينيش امام الناس او خلي امك تحكي معاها اما بالنسبة لحوايجك ماتمديهمش ليها هذا حقك وباباك راه عارف شتا دار
ربي يصلح بيناتكم ويهديها

sondse1 · 2012-11-09, 14:17

اقتباس:

المشاركة الأصلية كتبت بواسطة ام مريم الجزائرية

السلام عليكم
مريومة الحمد لله اللي وصلو الحجاج بخير وانا فان جيت نغير ماجبتيليش شتا قلتلك ماء زمزم والاثمد
شوفي انت الله يبارك كبيرة ورزينة ماتعانديش اختك في الشرع المعاملة ليس بالمثل يعني كبري قلبك معاها اما بالنسبة انها تتمسخر قدام الناس هدري معاها بالشوية وقوليلها ماتحرجينيش امام الناس او خلي امك تحكي معاها اما بالنسبة لحوايجك ماتمديهمش ليها هذا حقك وباباك راه عارف شتا دار
ربي يصلح بيناتكم ويهديها

وعليك السلام ورحمة الله تعالى وبركاته
الله يخليك حنونة
والله لو كان جيتي قدامي حتى لعشا نبعثلك ما عنديش ما اعز منكم حباباتي
ماما حكات معاها جوست ما شافتها احرجتني قدام الناس قاتلها لالا ماحقكش تقوليلها هكذا لانو ماراهيش تدير في حاجة غلط وماغلطت في حق حتى واحد وخصوصا انت مي هكذاك ومازالت في نفس الوضع
والله يا لوكان القش اللي نمدولها يحل المشكل نمدولها و نحل هذا المشكل

اللهم امين

sarra5 · 2012-11-09, 11:34

صباح الخير عليكم

سندوستي الجميلة

يا عمري آآ’ه ختك هادي انا نروح نتفاهم معاها

انتي انساي واش قالت كامل

والله انا متاكدة انها تحبك لكن شافت روحها نافسة وعاجزة تعمل واش عملتي و زيد باباك جابلك اكثر بحكم انك عروسة

ف اختك حكمتها نوع من الغيرة اللارادية

بصح دوك تراجع نفسها و اتشوفي كيفاه اتعود

عندي فكرة

بما ان اختك نافسة وغير عادا وين جابت بنوتة تهبل

ديريلها غداء واعرضيها هي وراجلها بالخصوص

طبعا ماشي درك حتا ترتاحي راكي تعبانة بزااف

وفي هذاك الوفت احكميها وحدها وفهميها كلشي و فرغ قلبك مليح وشوفي اذا ماتبدلتش معاك

لان المعاملة بالحسنى اتجيب غير الخير

sondse1 · 2012-11-09, 14:13

اقتباس:

المشاركة الأصلية كتبت بواسطة sarra5

صباح الخير عليكم

سندوستي الجميلة

يا عمري آآ’ه ختك هادي انا نروح نتفاهم معاها

انتي انساي واش قالت كامل

والله انا متاكدة انها تحبك لكن شافت روحها نافسة وعاجزة تعمل واش عملتي و زيد باباك جابلك اكثر بحكم انك عروسة

ف اختك حكمتها نوع من الغيرة اللارادية

بصح دوك تراجع نفسها و اتشوفي كيفاه اتعود

عندي فكرة

بما ان اختك نافسة وغير عادا وين جابت بنوتة تهبل

ديريلها غداء واعرضيها هي وراجلها بالخصوص

طبعا ماشي درك حتا ترتاحي راكي تعبانة بزااف

وفي هذاك الوفت احكميها وحدها وفهميها كلشي و فرغ قلبك مليح وشوفي اذا ماتبدلتش معاك

لان المعاملة بالحسنى اتجيب غير الخير

ربي يخليك حنونتي سارة
و الله راني دايرتها فوق راسي و مام راجلها وبيت شاخها كامل حاطتهم على العين و على الراس و ديما نبعثلهم غير الحاجة لعزيزة

sondse1 · 2012-11-09, 14:03

اقتباس:

المشاركة الأصلية كتبت بواسطة اريج المسك

السلام عليكم و رحمة الله تعالى و بركاته

عزيزتي مريومة راني غير ما قريت رسالتك ادخلت نجري و ماكانش في بالي اخلاص بلي راح نلقى هاد الموضوع المهم و بما أنك حبيتي طلبتي رايي فأنا راح نقولك وش اندير كون جيت في بلاصتك

الحاجة الأولي شهدي و استغفري و العني الشيطان الرجيم الي حاب يدخل يبنك و بين أختك
ربي يلعنو و يغزيه
الحاجة الثانية ركزيلي مليح على الكلمة الي قلتيها "الضغط" يتسمى انت في الضغط و أختك نافسة و ما تستبعديش أبدا أنها دخلت في اكتئاب ما بعد الولادة يعني لازم نحسنو عونها و نسايسوها و نوقفو معاها باش ما يطورش عليها و نعودو "بعيد الشر" في حاجة أخرى و اسأليني أنا على هاد الإكتئاب لأني مريت به و لولا ستر الله و عائلتي وقفو معايا ما نعرف وين راني درك و الحمد لله على كل حال

وحاجة أخرى أسئلي نفسك شكون خير القش و الروايح و الذهب و إلا أختك و عايلتك بصفة عامة و الهناء في الدار خاصة قدام ميمتك مسكينة و باباك الي راهو جاي من التعب لأنه الحج تقول عليه جهاد .... احنا العام الي فات كي جا بابا من الحج والله حسيتو فارغ تخيلي كي سلمت عليه حسيت روحي راح انهز و نطلع بيه لدار هيهيهيه كيما الطفل الصغير

صدقيني حنونة والله غير مساعفتها على قدر ما نقدر ومهما كان راهي اختي الوحيدة و الكبيرة
و الله محترمتها ونحبها و نعزها فوق ما تتصوري
على هك حبوبتي استهلي في والديك و العني الشيطان و ما تخليلو حتى فرصة باه يدخل في عايلتك كوني انت فحلة عليه و قوية بإيمانك .... و زيد راهو مش الشيطان وحدو الي يتشفى فيك كون تصرى حاجة "لاقدر الله" بينك و بين أختك ... راكي تلقاي الجيران و الكنات و بنات العم و بنات الخال كامل في أول فرصة يحبو "يعايروكم" سامحيني على الكلمة و لكن الحقيقة هاد هي على هك حبوبتي ما تخلي الفرصة لحتى واحد أنه يقولك كلمة مش مليحة على وخيتك
صح لسانك حنونة ربي ينعلو و يخزيه
درك انقولك كيفاش نتصرف أنا أول حاجة أنا مش مع الأخت ام مريم أنك اتقوليلها ماتعاودش تهدر معاك هكداك قدام الناس لأنها ممكن تجيبها لعبة و تعود "تحمص" فيك و تقولك الكلام الي يزعجك مالا عزيزتي أجلبيها ليك بالهدرة المليحة و و بجليها في الحوايج الي تحبهم مثلا تعودو تاكلو أعطيها من قسمتك أبداي بيها في إعطاء افاكهة و هكذا و كي تعودي قاعدة و تجي هي نوضيلها و قلها أرواحي أقعدي منا .... و هك بالشوية بالشوية حتان يطير هاد الشيطان
والله حنونة كل شي راكي تقولي فيه درتو و زدت عليه وحتى و هي عند عجوزتها نطيبلها الغدا بالعشا و نديهولها بنفسي بنيتها ربي يحفضهالها والله غير نحبها اكثر من نفسي و غير الحاجة لعزيزة اللي نديرهالها حتى وان ماما كسات اختي و بنتها انا درتلهم تاني من مصروفي الخاص و قبل ما تزيد خيطتلها اونسونبل نتاع النفاس كامل ليها و لبنتها ووجدت لبنيتها كلشي من لبسة للعب للكوسميتيك نتاعها و الله غير درتلها كلي بنتي انا ماشي بنت اختي و كي جات لعندنا و الله العلي العظيم غير قمت بيها و ما خليت حتى حاجة في خاطرها وكي تطلب حاجة والله نديرهالها و الله مانخليها تدير حاجة حتى بنتها انا اللي معتنيا بيها مع اني تعبانة وميتة من الخدمة هكذاك و نتهلى فيها هي و بنتها وكي راح بابا للحج و هي حكات قدامي انها حابة بابا يجيبلها اي فون + خاتم ليها + خاتم و مناقش لبنيتها و الله العلي العظيم غير بعثت لبابا و قتلو جيبلها هذو لحوايج وهو قالي راني ديجا جبتلها حوايج اخرى و المرة الجاية الا كتبهالنا ربي نجيبلها هذو الحوايج والله غير قتلو حاول كيفاه تجيبهملها رح تفرح بيهم وراهي حشمت منك و ما قاتلكش وبحكم اني قريبة بزاف من بابا وماما نحكي معاهم كي اصدقائي
والله غير جابهملها و ما حبيتش نقوللها بلي راني عيطت لبابا ووصيتو ومام بابا وصيتو مايقوللهاش
و عندك تقولي راني انحط من روحي بلعكس راكي انت خير عند ربي بتصرفاتك هادي و كيما نقولو "الملاحة تغلب القباحة" مالا كوني مليحة تربحي دنيتك و آخرتك و تربحي رضا والديك و إن شاء الله حتى أختك تعاود ترجع لعقلها بهاد التصرفات

هذا بلا مزية مني
و حتى القش مافيها والو كون تقوليلها خيري وش حبيتي و راهو بابا مسكين حب يشَوَرْني من درك و جيبيهالها بتمسخيرة بلاك راهو كره مني و حبني نروح عليه .... و هك و أنا نتوقع أنه قلبها يحن و ما تاخذش منو ..... و حتى كان أخذت وش حبت .... ديري في بالك بلي القش يتقطع و الريحة تفرغ و الذهب يرشى و ما يبقى غير الكلمة الطيبة .... و وين تبقى تبقالك دعاوي خير من عند والديك و رضى من عند الله ... و زيد ممكن ربي يعوض صبرك خير و يرجعلك الحاجة بألف حاجة أخرى
والله غير قتلها ادي كلشي و ما ندي والو زل عليا والله كلشي يروح و ما يبقى غير العيب كيما نقولو حنا
أختي لعزيزة مريومة بلاك تقولي لا ما نحطش من روحي "خاصة و أني مش عارفة عقلية أختك موالفة هك ولالا" لكن صدقيني كي تبردي المشكل ماراحش تندمي بصح كون تكبريه انت و إلا هي راح تبقاي على طول حياتك نادمة
في الحقيقة هي من قبل هكذا بيناتنا نوع من الغيرة مي هذي المرة زادت و وصلت حتى الاهانات امام الاخرين على هذي اللي انا طلبت نصيحتكم
و ربي يطيب عشرتكم و يرزقكم بالهناء و المحبة على طول الحياة
اللهم امين
و درك وش اديري التاي بشغلك و بوالديك و كبري مخك خليك من الصغائر ديما خلي همتك مرفوعة للسماء
شوفي حنونة نحكيلك واش صرا ليوم و احكمي الا راني مكبرة مخي و لا راني نطاوع فيهم
ليوم راهم عندنا 3 بنات عماتي و 1 بنت عمي واكيد ماما واختي و مرة خويا
كي نضت كي العادة وجدت الفطور و غسلت المواعن وسيقت و وجدت السنيوات نتاع القهوة والتاي للرجال وللنسا و وجدت غدايا و كي كملت حسيت بشوي دوخة كي شفت ماكانش اللي جاو الصباح كي عادت ال10.30 قلت لماما رايحة نتكى شوي و كشما يجي واحد راكم تنوضوني
جاو رجال حباب بابا و كي روحو جاو ايكيب اخرى وانا موالفة كل ما يخرج واحد نروح نتفقد الصالو كشما خص من الحلوى ولا الكوكاو ولا البيستاش .....الخ و نغسل الكيسان اللي شربو فيهم و نعاود نملا ماء زمزم و نسقم الصالة ونخرج ليوم كيما يقولو راحت عليا نومة و ماما كي شافتني تعبانة ما نوضتنيش بابا كي راحو الرجال وجاو ليكيب الاخرى وروحو دخل للبنات قاللهم علاه وحدة ما تحركت وجات طلت على الصالة اختي قاتلو يخي ميمي اللي زعما قايمة وكي شافني بابا هكذا محبش ينوضني ولات ماما مسكينة هي اللي راحت شافت الصالة ورتبتها انا غاضني الحال من لبنات اللي بابا بجلالت قدرو قاللهم روحو رتبو الصالة ووحدا فيهم ما تحركت و ماما هي اللي راحت نضمت الصالة مي هكذاك وما حبيتش نحكي مع حتى وحدا و قلت لماما منا وجاي نوضيني حتى ونكون راقدة وحتى و هوما هنايا ملغري التعب والسهر يطير عليا النوم هكذاك نخدم لانو هذا واجب عليا و حق والديا اللي رباوني و كبروني ووصلوني للي راني فيه ربي يحفضهم و يخليهملي ان شاء الله
ربي يقدرني ونوفيلهم حقهم

ربي يحفضك و يخليك حنونتي
والله كلامك دواء

ام مريم الجزائرية · 2012-11-09, 17:47

راكي معتادة للغيرة تاعها واذاها ليك وراهي تبان مدللة بزاف
انا كي قتلك احكميها وقوليلها ماتهدرش معاك هكاك ماشي للفتنة باه تفكريها بلي راهي تغلط في حقك الى جابت نتيجة صحة واذا لالا خليها تعيا وترجع ليك
ماكاش قد القلب الزين والمعاملة الحسنة وكملي كيما راكي ونويها لله
ماتخليش الشيط\ان يلعب لك في عقلك استغفري وتنساي شتا تعملك ربي يهديها

~ حراير ~ · 2012-11-09, 23:15

اقتباس:

المشاركة الأصلية كتبت بواسطة ام مريم الجزائرية

راكي معتادة للغيرة تاعها واذاها ليك وراهي تبان مدللة بزاف
انا كي قتلك احكميها وقوليلها ماتهدرش معاك هكاك
ماشي للفتنة

أختي العزيزة أم مريم أرجوك سامحيني أولا و أرجوك ما تفهمينيش غالط إذا قصدتي كلامك عليا ... فأنا ماقلتش لسندوسة ما تهدرش مع أختها لأنك تنوضي في الفتنة و العياذ بالله حتى أني مافكرتش هكاك ... و لكني قلتلها ما تهدريش امعاها خفت اديرهالها زكارة و تعود في كل وقت اتحب اتقلقها لأنها كان هدرت معاها و كأنها ستعرف نقطة ضعفها و تصير تعاودلها فيها
إن شاء الله تكوني فهمتيني فهمتي قصدي و طبعا مع كل احترامي ليك و لآراء كل الأخوات

باه تفكريها بلي راهي تغلط في حقك الى جابت نتيجة صحة واذا لالا خليها تعيا وترجع ليك
ماكاش قد القلب الزين والمعاملة الحسنة وكملي كيما راكي ونويها لله
ماتخليش الشيط\ان يلعب لك في عقلك استغفري وتنساي شتا تعملك ربي يهديها

حبيبتي سندوسة راني هاد وين فهمت أختك يعني كيما انقولو القمر و فيه لولة ... هي أختك و دمك و لحمك و أكيد راهي دارت فيك الخير من قبل لكن هذا طبعها تغير منك و اتحب تتميز عليك و تبين رويحتها قدام العباد .... و هذا الأمر انأكدلك أنه عادي جدا تلقايه في معظم العائلات ساعات تلقاي شحال من أخت يبانولك كامل املاح لكن في حقيقتهم تلقايهم يدرقو عيوب وحدة فيهم يعني كيما انقولو إذا لقيت زوج متفاهمين راهو ادرك على واحد
و بما أنه كيما انقولو الي عندو مهبول ماراحش يطبشو فاستحملي حبيبتي و انويها صبر لله و ماراح تلقاي غير الخير إن شاء الله و إلا انسيتي أصحاب الفضل الي يناديلهم ربي و يقولهم وينكم يا أصحاب الفضل ... مالا ينوضو و هوما شووووية ... تخيلي الموقف و تخيلي روحك امعاهم و انت فرحانة بلي ربي نااداك معاهم و بلي راهم عارفين ارواحهم .. عجباتك آه؟؟؟؟؟ و درك تخيلي وش يقولهم ربي ....... أدخلو الجنة من غير حساب .......ياااااااا الله يا الله من غير حساب؟ دبروها ؟؟ مالا يغيرو منهم الخلائقو يقولولهم وش درتو باش وليتو في هاد االمنزلة .... يقولوهم كنا إذا جهل علينا حلمنا وإذا ظلمنا صبرنا وإذا أسيء علينا عفونا

و عندك تنساي ثاني جيران الله و هاد ثاني يعيطولهم و ينهم جيران الله "يارب انكونو منهم" ينوضو و هوما شوووووووييية وهوما الأقل يعني ..... فيقولولهم بم جاورتم الله في داره؟ فيقولون "كنا نتجالس في الله ونتذاكر في الله ونتزاور في الله" و ركزيلي امليييييح على ""في الله" يعني كي تخدمي خدمة و تنويها لله شوفي هاداك الجزاء العظيم مالي ياله قوي ال volume تاع الإيمان وانوي صبرك مع اختك و مع قضية الدار لله

راني كنت راح انقولكم تصبحو بخير اتفكرت هادي انزيد انقولهالك
حبيباتي كان حبيتو ربي يغفرلكم ............... اغفرو انتوما على الناس

و أيا و في خاطركم هاد الأبيات الشعرية هيهيهيهيهيه راهو النعاس بدا يخدم

لما عفوت ولم أحقد على أحد *** أرحت نفس من هم العداوت
اني أحيي عدوي عند رؤيته **** لأدفع الشر عني بالتحيات
وأُظهر البشر للإنسان أبغضه ** كانما قد حشي قلبي محبات

و درك تصبحو بخير