فتيل الكسكس

my lamis · 2011-12-05, 20:14

بسم الله الرحمن الرحيم
الأخت أم إسلام و آية طلبت مني طريقة فتيل الكسكس أو كيما نقولو تكسكيس الطعام نتمنى نكون وضحت الكيفية و اللي عندها سؤال راني واجدة المطلوب فالكيفية : سميد نوع مليح أنا استعملت سميد القمح + تشيشة + ماء + حنا نقولولهم الصواور اللي نصيرو بيهم

هذا سميد القمح خادماتو ماما فالدار

هذه التشيشة اللي في الصحن فوريها و حطيها في قصعة و حليها مليح حتى تبرد

إرفدي ذيك الكمية تاع الماء و رشي بيها ثم إفتلي بيديك لزوج مليح حتى تنشف ثم زيدي ذيك الكمية تاع الماء و زيدي إفتلي مدة 5 دقائق حتى تحسي بيها تحت يدك ثقيلة و مشمخة ثما حبسي مالماء

هاكا تصيبي التشيشة تاعك و المدة ليقلت عليها متبعيهاش يمكن حسب تشيشة كاين اللي تشرب الماء و كاين لا

إرفدي هذي الكمية تاع السميد و رميها على التشيشة و فتلي يعني تنشفيها بالسميد

إفتلي مليح بيدك كيما هاكا متزيري يدك مترخيها

يتبع( خلوني نكملو فيه بزاف من بعد قيمو)

my lamis · 2011-12-05, 20:33

كرري العملية خطرة رشي و فتلي مليح و خطرة بالسميد و ثان إفتلي مليح ديري هاك حتى 4 مرات يعني 4 رشات ماء + 4 سميد حتى تصيبي طعامك طلع راكي تحسي بيه كاين اللي يطلع طعامو ليه ليه ميحتاجش 4 مرات

هذي هنا شوفي مليح كيفاش طلح الطعام راهو باين محبحب

هذا نقولولو السيا فرغي فية و سيري ينزلك الطعام مع الفتلة

كيتسيريه حكي بيدك كيما راكي تشوفي باش ميبقى والو كاين اللي يتكربل هاذاك الفتات إجي خشين حيديه بجيهة
يتبع

my lamis · 2011-12-05, 20:45

هذا النفاض ثان فرغي فيه و سيري مليح باش يحكملك الطعام و تهبط الفتلة

هذا هو الطعام اللي حكمو النفاض

وهذي الفتلة اللي طاحت منو زيدي رشيها و فتليها ثم السميد خطرة خطرة يعني متزيديش ثم خرجيه فالسيار الأول ثم الثاني و تيقاي تعاودي حتى تخرجي طعامك

هنا ديريلو كمية مايزينة قد 2 ملاعق و خلطيه مليح

هذا الطعام اللي خرجلي صحن واحد تشيشة خرجت 2 طعام فوريه و كيتنحيه متكثريش الماء شمخي يدك و زربعيه ثم رجعيه إفور ثم كيتنحيه ديريلو الماء و الملح عادي كيما تعاودي الطعام تاعك و تخليه يريح حتى كيتقربي تاكليه تزيدي تفوريه باش ديريلو الزبدة
وهاكا نكون كملت نشالله نكون فهمت مليح و كاش سؤال راني هنا

miri_27 · 2011-12-06, 17:33

تسلمي عزيزتي شاطرة كي العادة يرحم الوالدة الي رباتك و علماتك

my lamis · 2011-12-06, 20:01

اقتباس:

المشاركة الأصلية كتبت بواسطة miri_27

تسلمي عزيزتي شاطرة كي العادة يرحم الوالدة الي رباتك و علماتك

يسلمك يا بنت الغالية ربي يشدلك فيها و الله يا ختي ضوكا راني كل ما نروح لدارنا نبوس يدين أمي و نقوللها و الله مغلطتي كيعلمتيني بالضرب كنت منحبش نتعلم نقوللها كلشي راهو يتباع بصح ضوكا صح كلشي يتباع و مايجيش كيما خدمت يديك و لا كينحصل نسلك روحي و الحمد لله ندعي قاع لماتنا ربي يخليهمنا آمين يارب
سلامي الحار للوالدة الغالية

ملاك7 · 2012-01-12, 10:22

الله يبارك
يعطيك الصحة
شكرا

my lamis · 2012-01-12, 16:54

اقتباس:

المشاركة الأصلية كتبت بواسطة biba2011

الله يبارك
يعطيك الصحة
شكرا

و صحيحتك حنونة مشكوووووووووووورة على مرورك الكريم نورتي

islam1aya · 2011-12-05, 20:51

يعطيك الصحة يا الغالية والله ما ضنيت بهذه السرعة بنت الرجال وفحلة وعندها الحق الوالدة كضرباتك باش تتعلمي خرجتك مراة ونصف
الففففففف شكروشكر

islam1aya · 2011-12-05, 20:54

رايحة نتبع الموضوع مليح ونحط استفساراتي
والله مالقيت كيفاه نشكرك رايحة نبعثلك هديتي

ميمنة الجزائر · 2011-12-05, 20:57

يسلمو هذوك اليدين يعني واش تقصدي بالسميد يعني الفرخ كيما نقولو حنا يعني سميد رقيق

اليس كذالك

وقوليلي ما تستعمليش الفرينة على الاخير باه كيما نقولو في دارجتنا نكسيوها هذا لانو تعلمت لكن نسيت واش كان وانشاء الله راني ناوية

نتعلم على خاطر حاجة في نفسي لا غير

واشكرك مسبقا وجعله الله في مكيزان حسناتك حبيبتي ام لميس

my lamis · 2011-12-05, 20:58

إسمحولي خواتاتي هذه الصورة كيطلعلي الطعام و حبست مالماء و السميد و رحت باش نصيرو

هذي الصورة كيدرتلو المايزينة و فورتو التفويرة الأولى و كيما قلت متكثريش الماء

my lamis · 2011-12-05, 21:14

حشمتيني ختي أم إسلام وآية و الله درت الواجب تاعي حبيتي حاجة و درتها لختي و كان راكي حدي طبقيه معايا و مشكورة بزاف على كلامك العسل و قاع فحلات و بنات رجال و نشالله قاع يتعلموه و يخرجوه طعام في مو
مشكورة ختي الله يسلمك واه سميد رقيق و كاين اللي تكسكس بلحرش تكون فيه التشيشة قاوية و يقولولو سميد مصدر و حنا كنا نديرولو الفرينة بصح الميزينة تزيرو و كيتعاوديه يعني كيتفوريه و دريلو الماء ميخسرلكش بالماء حتى وتغلطي تكثريلو الماء ميتعجنش بزاف

ميمنة الجزائر · 2011-12-05, 21:25

اقتباس:

المشاركة الأصلية كتبت بواسطة my lamis

حشمتيني ختي أم إسلام وآية و الله درت الواجب تاعي حبيتي حاجة و درتها لختي و كان راكي حدي طبقيه معايا و مشكورة بزاف على كلامك العسل و قاع فحلات و بنات رجال و نشالله قاع يتعلموه و يخرجوه طعام في مو
مشكورة ختي الله يسلمك واه سميد رقيق و كاين اللي تكسكس بلحرش تكون فيه التشيشة قاوية و يقولولو سميد مصدر و حنا كنا نديرولو الفرينة بصح الميزينة تزيرو و كيتعاوديه يعني كيتفوريه و دريلو الماء ميخسرلكش بالماء حتى وتغلطي تكثريلو الماء ميتعجنش بزاف

الله يسجيك حنونة ربي يجعلها في ميزان حسناتك والله مرا ونص كيما قالت الاخت ام اسلام واية يعني

مرا تاع الدار صح والله حبيت نتعلم انشاء الله ندير كيما هك ونجرب بالشوية واذا نجح راني نعرضك على عشاء

تسلمي بزااااااف حنونتي

ام خديجة1 · 2011-12-05, 21:27

ما شاء الله عليك اختي لميس راكي وفيتي وكفيتي بالشرح المفصل بربوشتك تسخف يعطيك الصحة

omo mazen · 2011-12-05, 21:27

يسلمو هذوك اليدين

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري