ماهي توابل الشربة فريك؟

[salihastar]

من فضلكم ماهي التوابل التي توضع في الشربة فريك باه تجي بنينة

[nada nina]

السلام عليكم حنونتي حنا شربة الفريك نديرولها لحم الخروف والتوابل لفاح او الدراس كيما يقولو البعض الملح طبعا فلفل اكحل فلفل احمر حلو البصل و الثوم و الدشة فقط
ملاحظة القرفة اي ما تجيش مع شربة الفريك نهائيا

[*بيتي مملكتي*]

كل منطقة كيفاش تديرها راح نعطيك طريقتي و تجي بنينة فعلا

4 سنينات ثوم (ما نستعملش البصل في شربة فريك)- م ص راس الحانوت-م ص فلفل أحمر حار أو حلو حسب ذوقك-2حبات طماطم مرحيين ناعم-1إلى 2 م ك طماطم مصبرة حسب ذوقك أنا ما نحبش نكثر منها لأني نحب نستعمل الحب أحسن-4 م ك زيت و قطع اللحم من المستحسن لحم أحمر تجي أبن بيه

و كاين اللي يحب يديرلها بعد ما تطيب سواء نصف ملعقة ص نعناع أو ورقتين رند (ورق الغار) وتجي بنينة كذلك
فقط بالنسبة لورق الغار تتركيها تغلي معه 3 د
أما النعناع اتركيه فيها و هي سخونة 5 إلى 10 د قبل التقديم راح تجيك ممممممممممممم روووووووعة

أنا نحط فيها خاصة في رمضان الرند أي ورق الغار و الله ما تتشبعش

[نورة]

التوابل التى استعملها هى راس الحنوت فلفل اسود كبابة اذا وجدت الثوم والحشاوش اي كسبرة خضرة واللحم
فلفل حار وفى الخير لما تطيب نرابى فيها فلفل حلو تجينى بنبنة

[*أم كوثر*]

السلام عليكم
اختي الكريمة سر بنة الشربة مشي بالتوابل تقدري تحطيلها فقط الملح و الفلف الاسود و تخرجلك بنيييينة تهبل
السر هو في عملية التقلية كي تحطي البصل اللي هو مكون اساسي مع الدبشة و الكرافس و اللحم و الفلف الاسود و الملح خليها تتقلى على نار هادية بلاماتضيفي الماء حتى يدوبو كامل مع بعض و يتنكه اللحم
انا احيانا نقليها مدة ساعة نص ساعة قبل ومن بعد نضيف الطماطم و نزيد نقلي نصف ساعة ومن بعد نبدى نضيف الماء
و ايضا الماء ضيفي الكمية المناسبة مرة وحدة و ماتكتريش لانو البنة رح تروح باضافة الماء كل مرة و دايما طيابك يكون على نار هاااادية

[janna]

شربت لفريك يا اختي دواها راس الحاموت والثوم معى لول وفي خمس دقائق الاخيره زيديلها شويه ثوم مهروس رايحه تجيك هايله

[أحاسيس مرهفة]

المشاركة الأصلية كتبت بواسطة janna

شربت لفريك يا اختي دواها راس الحاموت والثوم معى لول وفي خمس دقائق الاخيره زيديلها شويه ثوم مهروس رايحه تجيك هايله

بما أني أثق في وصفاتك كمليلي كيفاش حتى تختارلك الشربة يا عزيزتي

[Best hope]

أضن الاخت تسال عن التوابل فقط. . اد تقصدي راس الحانوت.
عليكي تجهيزه بنفسك خير من برا تضمني نضيف.
المكونات :
1 ك كزبر (حب ياس )
الباقي غير شوية لا تكثري( يمكن الاستغنا ع البعض)
فلفل أسود
كرويا
كبابة
هيل
كمون
زعفران
سكنجبير
قنتسة
ورد يابس
نعنع يابس
رند
طيب
قرفة
خلط الكل معا واطحنهم برا.
هده سر التوابل نتاعنا وأكيد كل وحدة لها طريقتها .

[وافي]

سر شربة الفريك هو الكصبر يابس مرحي و لحم الخروف فلفل اسود ملح شوى حار و قلي مليح

[ROZ47]

سر في شوربة الفريك بعد اللح والتوابل مثل الكصبر وحبة الحلاوة والفلفل والثوم مادبيك تحطي فيها طماطم الحب وفي الأخير حطي الثوم والكصبر ورق وشوية كروية مرحية كي تطفي عليها وصدقيني راح تكون شوربة فريك تهبل وإذا ما شكركش إلي كلاها ديري في بالك بلي ما يعرفش الذوق
فقط ماتنسيش باش تحطي جعبة فلفلة خضرة والله ما تندمي ملاحظة لازم إكون الفريك نوعية زينة لأنو الفريك الزين يعطي بنانة فريدة من نوعها وبصحتك

[medjkane]

fi nalger manhatouch toum waji hayla mais lazm lahm alkharouf

[ليلى الجزائرية1]

نعناع يابس،كسبر حب مرحي،فلفل اسود

[لولو1000]

سر شرب فريك فى التقلية قلى مليح اللحم )لازم لحم خروف ) ومن الاحسن لحم لكتف
مع البصل والتوابل لعندك قليهم

[ام شرفو]

على حسب الشوفة الاذواق تختلف من بيت لبيت
و تجربتي الخاصة هي جربي كل وصفة الي قالولك عليها الاخوات واعتمدي الوصفة الي تعجب العائلة
انا كنت نحط الثوم ونرابي حبة قرعة (جريوات) وحبة زرودية(سنارية) وراس الحانوت ومرة جرت طريقة ام كوثر بصح زدت مغرفة زنجبيل ونحط فلفل حلو

[lilyann]

المشاركة الأصلية كتبت بواسطة ام شرفو

على حسب الشوفة الاذواق تختلف من بيت لبيت
و تجربتي الخاصة هي جربي كل وصفة الي قالولك عليها الاخوات واعتمدي الوصفة الي تعجب العائلة
انا كنت نحط الثوم ونرابي حبة قرعة (جريوات) وحبة زرودية(سنارية) وراس الحانوت ومرة جرت طريقة ام كوثر بصح زدت مغرفة زنجبيل ونحط فلفل حلو

هادا صح سر بنتها شكرا لك اختي
لانو عندي اختي ديرها كيما انتي ودايما تعها بنينة ياسر
اما تاعنا تاني بنينة وكيما قالو الاخوات الملح+الفلفل الاسود و الدبشة والمعدنوس ولازم تقلي مليح وطيب في برمة تاع طين تجي هايلة