رايح نهبل

[مشكلتي]

انا شاب عندي 31 سنة و أستاذ في الجامعة , خاطب فتاة نعرفها من قبل آية في الجمال و فيها كل صفات الأنثى المرغوبة و خطبتها عن قناعة و حب, مشكلتي أني كاينة طالبة عندي مهبلتني , الطالبة هاذي ذكية بزاف لدرجة كل ما ناقشو موضوع تكون الغلبة ليها رغم أني دكتور و جزء من قرايتي قريتو في الخارج بصح هي مقدرتلهاش يعني النقاش بيني و بينها تعدا النقاش بين طالبة و أستاذ و صار نقاش بين طرفين متكافئين و حتى اجاباتها على أوراق الامتحان اجابات فريدة و متميزة , عميقة و فيها بعد نظر. هي محجبة حجاب شرعي و ليست على ذلك القدر من الجمال يعني شكلها عادي و لا يثير أي رغبة في أي رجل بصح مجرد ما تبدا تحكي كل الرغبات تثار مع أنها تحكي فقط كي نجبرها على الكلام و في بقية الحصة تبقى ساكتة و كأنها غير موجودة .المشكلة الأن أن الطفلة هاذي بدات تعجبني لدرجة أني طلبت من خطيبتي أنها تلبس كيفها و صرت ناقشها و نتحدى ذكاءها (خطيبتي)بالصح فرق كبير بين الاثنتين مع انو خطيبتي هي الأخرى أستاذة جامعية و تصغرني بسنتين , أما الطالبة فتكون في حدود 21-22.
مشكلتي ضك هي اني وليت نخمم في الطفلة هاذي كثر من اللازم حتى أني بديت نقصر من ناحية خطيبتي و موليتش نشوفها رائعة كيما قبل وليت نشوفها غبية و سطحية رغم جمالها الباهر . و الطفلة هذيك سكنت عقلي و قلبي و حاب نملكها بأي طريقة كانت وليت نشوفها في كل مكان و نتخيلها بسبب و بدون سبب و نتشوق للحصة لي نقريهم فيها غير بش نشوفها و نسمع صوتها و كي تتاخر و لا متجيش نولي انورمال و كأني مراهق .
الجديد الأن , البنت هاذي بداو يخطبوها و كي سمعت قريب هبلت نصي طاح و ما ريحتش حتى تاكدت بلي رفضت الموضوع .
الأن يا زملائي رجال أو نساء قولولي وش ندير, نفسخ خطبتي و نروح نطلب البنت و لا نتزوج و ننسا الموضوع و نفسرو على انو حب تملك او سطوة رجل أو نزوة عابرة......مع العلم منقدرش نفوت نهار بلا منخمم فيها .
من ناحية الفتاة هي مش سامعة بيا أصلا حتى و حنا نتناقشو عينيها متهزهمش معايا , أما خارج الحصة إذا تصادفنا تمر مرور الكرام و كأنها لا تعرفني إطلاقا.