كيف تأخذ علامه جيدة في الفلسفة بدون حفظ...تجربتي الشخصية

[ايمان 97]

السلام عليكم ورحمة الله

ممممم علبالي بزاف اللي راهم يعانوا من مادة الفلسفة وخايفين منها بحكم انها مادة جديدة عليكم
وكاين بزاف اللي يخافوا من الحفظ او ما يقدروش يحفظوا مقالات بزاف
وكاين بعض الاساتذة اللي حتى يخوفوا التلاميذ من هذه المادة
حتى انا كنت كيفكم لكن انا حاولت انه نتغلب على خوفي من مادة الفلسفة و عملت طريقة والحمد لله جابت نتيجة معايا

انا تحصلت على 17.5/20 في بكالوريا 2016 و بدون حفظ واكيد مش بالغش ههههههههههههه:

كنت ناخد الدرس و نلخصه يعني ناخد رؤوس اقلام او اللب نتاع الدرس و نكتبهم في كراس خاص
مثلا المنطق نكتب تعريف بسيط باسلوبي الخاص و نكتب مؤسسيه و مؤيديه ومعارضيه واسماءهم و الاسس نتاع المنطق و بعض الاقوال الفلسفيه اللي تشوفو بلي قادرين تحفظوهم و تحسسو بلي مألوفين عندكم
و كل ما نتعلم منهجية جديدة في المقالة نطبقها على التلخيص نتاعي و نكتب مقالة باسلوبي و نبقى متذكرة
و اكيد المنجيات تطبقهم على كل الدروس اللي لخصتهم و كنت ناخذ كل مقالة نكتبها للاستاذ نتاعي يقولي على الاخطاء اللي ارتكبتها و نكتب هذه الاخطاء في الكراس و اذا كانت المقالة مليحة نحتفظ بيها في نفس الكراس اللي لخصت فيه الدروس
هكذا في نهاية العام لقيت روحي نعمل في مراجعة خفيفة و تلقاو بلي عملتو جميع المنهجيات على جميع الدروس و بمجرد ما تراجعو المقالة اللي كتبتوها تتذكرو كلشي وما تخافوش مش رح تنساو لانه كي تكون باسلوبكم الخاص تبقاو متذكرينها
المسألة كامل في الارادة و تنظيم الوقت
والله ولي التوفيق...و ما تخافوش... تنجحوا باذن الله وكونوا واثقين بلي اللي كاتبو ربي سواء خير او شر فيه مصلحة ليكم المهم ديروا اللي عليكم والباقي يرجع لربي سبحانه