هل أتزوجه- السلفيين أولى بالرد

[مشكلتي]

السلام عليكم ورحمة الله وبركاته
أنا فتاة من ولاية تيارت22 سنة عزباء وهذا العام أتممت ليسانس في الأدب العربي....كنت في مجموعة في الفيس مشرفة على مجموعة دينية وكان معي اخ فاضل من ولاية باتنة وهو متدين سلفي المهم فاتت الايام ولما رأيت أخلاقه وعلمه وقريت انه يجوز للمرأة انها تعرض نفسها على الرجل الصالح ارسلت له رسالة مختصرة اوضح فيها رغبتي فيه هي مفروض نرسل وحدة من اهله تقوله لكنني غلطت كي هدرت مباشرة معليش المهم هو قال لي انه الان هو يطلب في العلم ويدرس في مدرسة قرانية وبعد عامين راح يتزوج وحقيقة لم يكن تواصل او تعارف بيننا لانه كان دائما يرفض التواصل ثم بعدها قال لي بعد العيد ساخطبك واعقد عليك والزواج بعد عامين اي العرس صراحة انا مترددة جدا من عدة أوجه: اولا هو مستواه بكالوريا ماكملش قرايتو لانه كانت هناك فتاة تلاحق فيه فتوقف بسببها لكي لا تفتنه وهو في اوروبي يعني امه وابوه اوروبيين الاصل فأجد كتابته ركيكة باللغة العربية وانا دارسة نحو نحب واحد على الاقل يعرف يكتب ويعرف شوي نحو هو قال انه يدرس في الرسم القرآني ودرس العروض ووو لكن كتابته لا توحي بذلك وثاني شي قال هو جميل جدا واحس انه مهتم بمسألة جماله مرة كلمتني اخته قالت لي هو تعرض لحادثة ووجهه خسر هو صح تعرض لحادث لكن وجهه مخسرش كانت تشوف فيا حاباتو على جال جماله ولالا غاضتني هاد الجاست بزاف.والمشكل الثالث انا احب امي واختاي جداااااااااااااااااااا ومتعلقة بهم لا استطيع ان ابتعد عنهم ولاية باتنة بعيدة على تيارت بزاف والمشكل الرابع قال لاختو تقولي انه حاب يعدد باخرى لانه يحب يكثر النسل ابوه وجده كانوا معدين وانا صراحة معنديش مشكلة انه يعدد علي لكنني نغير بزاااااااف والمشكل الخامس انه حاب امه تسكن معاه وابوه وانا حابة داري وحدي باش نربي ولادي على طريقة اسلامية ومنعرفش الاوروبيين كيف يخموا .عندو خاوتو رجال وخواتاتو هوصغير ونحس اخته كبيرة تتحكم فيه بزاف لانه هو طيب معهم ولا يرفض لهم طلب هل كل هذه الامور تتهيأ لي فقط لكي ارفض لانني مصابة بمس عاشق منذ اشهر وارفض كل من تقدم لي رجاءا لا داعي للتعليقات التي ليس منها فائدة هاد الراجل مقعدتش في قصة حب معه او كلام مختصر ثم قطعنا التواصل لوجه الله وانا الان اتواصل مع اخته فقط. وانا كون نرفض يغيضني والله لا ادري اشفق عليه المهم تقبل الله منا ومنكم تذكروا قل خيرا او اصمت.

[توحيد الجزائرية]

اعانك المولى ،ووفقك لما فيه خير

[مراد سابقا]

في مجموعة دينية وتتدارسون الدين وتتكلمون في مثل هذه الأمور الحب والعشق والغرام

تتعجب صح يا لطيف والطف بينا

[اياد حياتي]

كل هذه الاحتمالات التي تدور في عقلك لم يكن داعي ان تعرضي نفسك عليه وفقك الله

[~رآقية بأخلآقي~]

بدون تعليق على تفاصيل القصة.......


افضل شيء فعلتيه انك قطعتي التواصل معه


اتركي الامر يمر كما هو و عندما يتقدم لكي رسميا ادرسي الامر مع عائلتكِ واستخيري عندها وخذي قراركِ

[**د لا ل**]

السلام عليكم

لا أجد ما أقوله حقا سوى وفقك ِالله لما هو خير لكِ

استخيري كثيرا يا اختي

[طيور الجنان]

مافهمتش اختي مادام عندك كل هاذ العراقيل للزواج به علاش عرضتي نفسك عليه !!!!!!!!!!!!

[~عبد السلام~]

اولا لا داعي ابدا لعبارة ( السلفيون اولا بالرد )

كلنا هنا مسلمون اللهم اجمع كلمة المسلمين، اللهم وحد صفوفهم ,


للعودة للموضوع


بالاختصار كان عليك التفكير جيدا قبل ان تعرضي نفسك عليه فامور كالمسافة و اختلاف الثقافة و السكن لوحدك كلها امور في غاية الاهمية وجب التفكير فيها بامعان

اما الخط و جمال وجهه و امور مثل هذه لاقيمة لها

الان ماعلبك فعله هو انتضار قدومه للخطبة ثم استخيري و ناقشي الامر مع الوالدين

[طاعة زوجي ..]

رغم أنّه ليس من عادتي التّكذيب وعدم التّصديق ، بدون دليل واضح ، ولكن مشكلتك غريبة جدّا ، ألم تعلمي بكلّ هاته العراقيل قبل أن تعرضي نفسك عليه للزواج ؟؟؟؟؟؟

ثانية ياأخت أرجوك دعك من هذا التّواصل حتّى وإن كان مع أخته ،لو قصدك من الباب فهنا لكلّ مقام مقال ، ولكن لحدّ الساعة لم يحدث شيء
نقطة أخيرة العنوان لا داعي له ، فكما قال الأخ كلّنا مسلمون ولا داعي لهاته المسمّيات

أعتذر إن كنت أخطئت في الرّد فليس قصدي الإساءة فقط بيّنت وجهة نظري

[سماح 2]

ههه مــآ تديهش وخلاهْ ,, سبحــآن الله ,, ألف ن عذر عندكْ , نحب أختي وماما وما نقدرش نبعدْ , هيه موافقة ع التعدد بصح عندي مشكل نغير بزافْ , غاضتني راهم يكذبوا عليا ماش مشوه ,
واش من زواج هذا , ؟ يهديك ربي , زيد كان خاطب والا خاطب حسب ما تقولي , راكي تلوحي في روحك -_-

[softech]

ما بني على باطل فهو باطل .. ناس قاعدة تتفيس في الفيس و بنات جايحات قاعدين يصدقو و عايشين في الاحلام.

[ابراهيم داود]

قصة غريبة تفتقد للمنطق...... سلفي يفيسبوكي ...جن عاشق....حابة نتزوج....

[شمس الشتااء]

مين عندك قاع هاد الشكوك علاش تعرضي نفسك عليه من الأول ؟ مفهمتش

[روح المي]

أنا سلفية
وكلناسلفييون المهم نساعدوك أختي
أنت عرضتي روحك عليه ؟
انتهى اذا دورك اذا تقدم استخيري الله
اذا لم يتقدم انسي الموضوع
أنت ماما وبابا تفكرتيهم بعدما حكيتي
ونصيحه مني كذب فيسبوك انه مجاني
وواحد من الف يكون صادق
انه عالم الخيال
فاسهل شيء على شاب يقلك سوف اتزوجك ليدخل معك علاقه غير شرعية
والاحسن ان تبتعدي عن كل اتصالات بين اخته
واذا تقدم لخطبتك شخص يخاف الله تزوجي فانه هذا الذي اخبرك عن قصته كاذب من ننوع رفيع
واذا كنت مسحورة عليك بالاذكار وارقي نفسك بسورة االفاتحه

[يسمينة البجائية]

السلام عليكم اختي ربي يكون في العون

لا لا و لااااااااااااااااااااااااااااااااااااااااااااااااا ا أنت لا تعرفي عن هذا الشخص ولا شيء

وعلاش عامين بالظبط ؟ اطلب العلم ماشي مشكل في الزواج . الا اذا كانت قراية نتاع الجامعة وين لازم يصرف على كتابات باش يدي ديبلوم و يخدم ...
انا في منهاج السلفية و راني نشوف اخوات و اخوة يتعلمون الدين و الفقه و القران يطلبوا في العلم 15 سنة و 20 سنة ... و ما قاطعوش و الله ما وصلوا درجة من العلم .. و علما انهم ماشي متزوجين و لا مسؤولية صباح كامل و هوما رافدين كتابات و حافظين و الله ياكلو في كتاباتهم ... كي جا وقت الزواج تلقاهم 45 سنة .... وعلاش ؟ العلم رزق من الله يأتيه لمن يشاء نحن normalement نتعلموا ديننا لكي نتفادى الحرام و ابواب الشيطان و نزيد في الايمان و التقوى بصح اليوم الاخوة يطلبو العلم ليكون معروف .... فلان ابن فلان فقط و الله اختي رياااااء . و الدليل اللي يطلب العلم ماشي لازم يقول للناس ... اطلب العلم و اسكت .

يا سيدي رانا متزوجين في بيوت ازواجنا و طالبين العلم ما كان لا عامين و لا اعوام ........... رانا نعيشوا و نعطي لحياتنا حق الزواج و العمل و تربية الاولاد ... jamais كان طلب العلم عائق في الزواج الا اذا كان فقير و ما عندوش الامكانيات و هنا نقولو واش يديه للتعدد ....؟؟؟؟

هذه المودا الجديدة يعني مفهوم جديد و في غالب الاحيان ... كاين اخوة يقولوا حنا ما نتزوجوش حتى نكمل طلب العلم .... و غدوة يشوفو بنت جميلة و غنية و و و . تلقاهم ينساو طلب العلم و المشاريع تتبدل .. .... يعني بالاك هي سبب للرفض
او تلقاهم ماكانش خدمة و لا مصروف العرس و لا امكانيات الزواج و يقولو لازم نطلب العلم في عامين ... هاذي ثاني سبة باه ما يحشمش وجهوا بالفقر قال نطلب العلم ..

طلب العلم راهو بحر و بحوووووووووووور ... يا ربي 50 سنة باش تكمل نصف طلب العلم ... ما كان لاه نتلاعبو على عقول الناس و البنات النيات خاصة ...

و تسكني في دار مع والديه و يزيد يتعدد ....... ؟ على ما نظن راه مرفه و غني ... وعلاش ما يتزوجش معاك دورك ؟ ياخي قلنا طلب العلم ماشي مشكل و الدراهم عندو و الا كيفاش يخمم على التعدد c logique . واش هو المشكل مالا ؟
و يعني هاذي المقولة نتاع انا وسيم و جميل ... الزين للنسا كيما يقولو les algerien خلينا من الجسم و الجلد و الحواجب و العيون الزرقة .
انا اذا كنت في بلاصتك لا و ابداااا ما نقبلش هاذي باينة تمسخير يا اختي ما كان لاه تروحي في الاحلام و هبطي للواقع

و نقول لك قسما بالله العلي العظيم ما عندي ذرة حقد للاخوة و لا اي حاجة بصح نكره التمسخير .. راني متزوجة و تابعة المنهاج منذ اعوام و رانا نشوفو قصص محيرة للسلفيين والله يحبس مخك . سبحان الله العظيم ... منذ متى سلفي يقول انا جميل لأخت ما راهي حلالو و الله نكره التمسخيرات هاذو و نزعف ناكل روحي كي نسمع التوافه هاذو ... اللي تسيء ظن الشعب و نوليو نحطو رؤوسنا .