سؤال

[أم شروفة]

ابني عمره سنة ونصف ولديه أعراض حقيقة أخافتني كأم لأني لا أشعر أنه طبيعي .وعندما رأيت فيديوهات للتوحد للأطفال أقل من سنتين نفس أعراضه .اولا هو لايتكلم ولا حتى كلمة ماما.غير اجتماعي. لايلعب مع الاطفال لايعرف ابوه .ولا اي أحد سواي .عندو الحركة بزاف .دايما يمشي على رؤوس اصابعه.والعابه يقلبها ويلعب بإطارات السيارات ويحب اي شيئ دائري ويبقى طول اليوم يدور فيها .عصبي جدا .وعندما اناديه لا يلتفت و لايشعر بالالم لو سقط .لما اخبرت أبوه أني ناخذه إلى طبيب نفسي استغرب وقالي حكمك الوسواس .
..

[saraz09]

شوفي اختي على حساب الهدرة ديالك هدي هي اعراض التوحد بحكم اني ام لطفلة متوحدة. وليدك يفهم كيتهدري معاه؟ الا ما يفهمش لازم تتحركي اديه عند pėdopsychiatre اوorthophoniste رايحة تساعدك . وابنك رايح يتحسن مازالو صغير بصح ماتغفليش عليه

[أم شروفة]

لا يفهم اختي .سوى بعض الحركات أني نفتح إيديا ونقولو تعالى يجي .لكن امي تقول مازال صغير .ولعلو متاخر فقط في نمو الفكري .شكرا على الرد .لكن أختي نحس وليدي شوية ذكي . مثل زر نتاع التلفزيون اللي يفتحو عارفو .يفتح ويغلق روحو وايضا ويتذكر الأشياء وين خبيتها مثلا مكان العابو يعرفو .ولو كان ابني مريض بالتوحد لا قدر الله سيكون الذنب ذنبي لاني منذ صغره نفتحلو طيور الجنة ونخليه وحدو .الان وقفتها واحسست انو بدا شوية يكون اجتماعي

[ام نهوله]

شوفي اختي احتمال كبير ما يكونش عندو توحد لكن ننصحك ديه للمختص باش تتاكدي ماتستهزايش وحتى ويلا عندو التوحد لاقدر الله راكي فقت و هو صغير يعني التحسن التاعو راح يكون سريع و ربي يجيب اللي فيه الخير

[saraz09]

قلب الام دليلها الا احساسك يقول ابني مختلف اديه عند مختص. وشكون قال المتوحد بدون عقل بالعكس ذكاءهم يفوق احيانا الشخص العادي هم ليسوا متخلفين بل مختلفين . وما تلوميش روحك كاين اللي نهار كامل قدام التلفزيون والو ما بيه. بصح التلفزيون للطفل جريمة حنا لقيناها وسيلة تلهي ولادنا باش ما يقصروناش راسنا. صح التلفزيون ياثر على عقل الصغير لكن التوحد موجود قبل اكتشاف التلفزيون. يقد يكون وليدك عندو سمات التوحد يعني يدير لي جاست ديالهم ومع الانتباه والخدمة معاه رايح يبطلهم. انا بنتي نحيتلها كامل الطبايع مازات واحدة برك مازولت ماجبرتلهاش الحل بصح رايحة نحيهالها. اختي حتى لوكانلبدك ماعندوش التوحد البسي القومبينيزو وديماري ما تسنايش حتى ينتقل من مرحلة الطبايع لحاجة اخرى . اجبديه ورديه وليدك رايح يولي عادي انشاء الله

[anissa90]

الله يشفي كل اولاد المسلمين اختي اطفال التوحد كل وحد عندو موهبة هم اطفال اذكياء و صحيح عايشين في عالم اخر هذا مجرد مصطلح لدى كي تعيطلوا لا ينتبه وكذلك طفل عنيد متقلقيش روحك لازم متابعة مبكرة عند اخصائين وحتي متابعة من طرف الاولياء من الدرجة الاولى في المنزل حاولي تهدري معه متخلوهش وحدوا اشياء دائرية نحهملوا التلفاز كارثة حذار تم حذار كذلك علمه اشد ملعقة قلم اشريلوا كتب التلوين باش ينته للالوان علمه اطفي شمعة لازم يلعب مع اطفال اذا ممكن حطه في روضة اذا عندك اسئلة اخرى راني في الخدمة

[ام ياسمين10]

متخافيش اختى انا كنت مثلك لما قريت على التوحد لقيت عندو كل الاعراض رحت ديتو عند الارتوفونيست قالى معندوش توحد بصح عندو تاخر لغوى وقعد يعالج فيه لمدة اربع اشهر كل اسبوع عندو جلسة وانا تانى خدمت مع الطبيب يعنى ورالئى كيفاش نهدر معاه ونلعب معاه حتى يكون عندو مخزون لغوى وتانى الروضة مليحة ليه والان راه عمره اربع سنوات ونصف والحمد لله راه كيما صحابو فى النطق
انتى ادى ابنك للارتوفونيست وهو يعرف