سؤال بخصوص الكسرة بليز عاونوني

[bonbon]

نتمنى تساعدوني و ما تضحكوش عليا

انا الكسرة جامي درتها و جات نورمال دايما تجي يابسة ما علاباليش علاه؟ رغم انني نحط المقادير عادي

ممكن تقولولي واش الشي للي يخليها تجي يابسة؟ المشكل في كمية الزيت ولا الخميرة؟

ربي يخليكم خواتاتي عاونوني تعيشو

[liliane24]

أختي المشكل في العجين ، أختي لازم تكون مبسسة بصح و تتعجن ملييييييييح لأنك إذا بسستيها و ما عجنتيهاش رايحة تتفتت في الطاجين وإذا ما كانتش مبسسة تجيك يابسة .

[أناييس الربيع]

لازم تحدي أي كسرة جاتك يابسة كسرة الخميرة أو الكسرة الاخرى

لأنو أنا كسرة الخميرة مانديرش فيها الزيت .

[أم ماجد]

ممكن الطاجين ماسخنش مليح

[bonbon]

صباح الخير و شكرا ليكم للي رديتو

والله نعجنها مليح و الطاجين نخليه يسخن مليح

و الكسرة للي نقصدها هي كسرة الرخسيس للي نورمالمو تجي طرية انا تجيني يابسة ما عرفتش علاه؟؟؟؟

[دائمة الحمد]

يا اختي العزيزة اصبريني شوي ذرك نحط وصفتي لفوق في واش طيبتي اليوم وجربيها ورجعيلي الخبر

اما كسرة الكوشة جربي هذي تاعي واداكان عندك سؤال اني هنا

https://www.djelfa.info/vb/showthread.php?t=1520904

[bonbon]

المشاركة الأصلية كتبت بواسطة دائمة الحمد

يا اختي العزيزة اصبريني شوي ذرك نحط وصفتي لفوق في واش طيبتي اليوم وجربيها ورجعيلي الخبر

اما كسرة الكوشة جربي هذي تاعي واداكان عندك سؤال اني هنا

https://www.djelfa.info/vb/showthread.php?t=1520904

ان شاءالله يا ختي والله تديري فيا بليزير كبير و ندعيلك من قلبي

فقط اعطيني المقدير بالتقريب مثلا كل كمية شحال نديرو فيها الزيت و الخميرة

ربي يعطيك ما تتمناي ان شاءالله

[tokio hotel]

[size="6"ادا طابت الكسرة على نار قليلة تجى يابسة


[/size]

[bonbon]

المشاركة الأصلية كتبت بواسطة tokio hotel

[size="6"ادا طابت الكسرة على نار قليلة تجى يابسة


[/size]

قادرة تكون

تعيشي اختي

[sisouni]

اختي العزيزة راكي فكرتيني في روحي بكري كان عندي نفس المشكل
الحل هو :
1- بليها مليح مالزمش تكون ناشفة بزاف
2- بسسيها مليح بالزيت ودخلي البسوس قبل ما تبليها
3- الطاجين يكون سخون مليح
وانشاء الله تجيك ملييييييييييييييحة
بالتوفيق

[ياسمين1990]

السلام عليكم
اولا باه تيجيك الكسرة مليحة او اي خدمة لازم تكون عندك ثقة في نفسك
ثانيا سمي الله وحطي الدقيق في القصعة وبسسيه بالزيت ومن بعد ضيفي الخميرة نتاع الكسرة والملح طبعا ورشي بالماء يكون دافي
مايش سخون يقتل الخميرة ولا بارد مايخليهاش تطلع
بعد ما تلميها حطيها في كيس بلاستيكي وخليها تخمر من نصف ساعة الى ساعة في مكان دافئ في المطبخ
ثم اعجنيها مدة عشر دقائق ثم لولبها او ديريها قرصات ورجعيها للكيس ترتاح
حطي الطاجين يسخن على نار قوية وانتبهي للمفاتح نتاع الطابونة و انبوب الغاز
بعد ما تتأكدي من سخونة الطاجين اطرحي الكسرة نتاعك وحطيها بكل فخر في الطاجين ممكن تثقبيها وحرفيها في الطاجين وماتعياش تقلبي فيه المرأة الحرة تقلب كسرتها مرتين فقط حتى لا تبرد وتزيد تعاود تسخن من جديد وانتظري احل واجمل كسرة
ملاحظة نسيت ماقلتلكش على طريقة العجن لازم تقطعها ما تعجنيهاش فتاتي كيما المعارك ارجو انك تكوني فهمتني واذا عندك اي إستفسار ان شاء الله نجاوبك
انا هنا حطيتلك طريقة عمل الكسرة اما المقادير على حساب واش رايحة تطيبي ديري وعينك ميزانك
اتمنى لك التوفيق والنجاح في حياتك
سلام

[حبةسكر]

تبارك الله على الاخوات شرحولك بما فيه الكفاية
ان شاء الله تنجحي فيها هاد المرة

[catia]

وانا نستنى باه ناكلها سخونة من عندك ههههه

[لميس اميرة]

شوفي اختي نعطيك طريقتي

سمي بسم الله و اتعوذي

لازم ديري في بالك انو راكي رح ديريها بحب لانو الطبخ على القلب

لما تطبخي حاجة من قلبك تخرج هايلة و خصوصا لو كان فيها حب و دفئ

لازم تحبي الطبخ و المطبخ حتى تتقني خدمتك و لازم يكون بالك طويل

حطي الدقيق نتاعك بعد ما تغربليه و تنحيلو الراس لخشين لانو يدير لفتات فالكسرة و تولي يابسة و تبان ماشي معجونة

حطيلو الزيت و بسسيه ما تكثريش لانو لما تبسسيه بزاف يجي يتفتت و تقولشي براج

حطي في جنب الملح و الجنب الاخر الخميرة تاعك

ديري بماء اقل من دافئ لانو لو استعملتي ماء دافئ زيادة ولا سخون رح تقشلف الكسرة و تاني الخميرة تموت تجيك يابسة

خلطي الماء مع لخميرة و من جهة اخرى الملح مع الماء حتى يذوب لانو لو تخلطيهم مع بعض ما تجيش طالعة و طرية

و من بعد كملي بلي و دكيها في بعض حتى تتلم و اعجنيها شوية

غطيها في كيس و خليها تعرق و خليها تخمر قليلا و تتشرب الماء مليح

و من بعد ارجعي اعجنيها و اسقيها قليلا حتى تولي طرية فقط ماشي كيما المطلوع و ما فيهاش الحبة الخشينة تاع الدقيق و عندك تجريها تطون طرية و حاكمة روحها

و ديري قطعة كبيرة زبدة او سمن و دخليهم للمرة الاخيرة و اعملي القرصات تاوعك غطيهم بكيس و حطي الطاجين و قرصي القرصة تاعك بالرولو و اثقبيها فوق السرفيطة مليح حتى ما تبوطش و تعمل نبابل و تاني ما يتحرقش جيهة الثقيب لو ثقبتيها فالطاجين

و لوحي القرصة تاعك غير تنشف شوية برك من تحت اقلبيها و خليها تتحمر من تحت و زيدي كملي تحمار الوجه الآخر

هاذي طريقتي و الكل يموتو على كسرتي يقولولي قاطو تجي خفيفة رييييشة و لما تبلعيها ما تنزلش مثل الرصاصة كيما كسرة البعض

[bonbon]

المشاركة الأصلية كتبت بواسطة sisouni

اختي العزيزة راكي فكرتيني في روحي بكري كان عندي نفس المشكل
الحل هو :
1- بليها مليح مالزمش تكون ناشفة بزاف
2- بسسيها مليح بالزيت ودخلي البسوس قبل ما تبليها
3- الطاجين يكون سخون مليح
وانشاء الله تجيك ملييييييييييييييحة
بالتوفيق

ربي يخليك ختي ان شاءالله تصلحلي هاد المرة