مشكلـــة

[مشكلتي]

السلام عليكم و رحمة الله و بركاته
أردت أن أخبركم بقصتي عسى ان أجد عندكم حلا
مشكلتي هي أن صديقتي جد مكتئبة
السنة المــاضية هبلتني على أتفه الأسباب تتشائم و تشنف و تدى تبكي و الله أحيانا أشياء لا تستحق
و عندما أكلمها تقولي مراكيش حاسة بيا
و الله نقلت الي العدوى بعد أن كنت دائما متفائلة
وصلت بنا درجة الاكتئاب الى عدم الدراسة حتى لآخر السنة دخلنا لامتحانات الاستدراكية
و المشكلة أنها صديقتي المقربة و تبغيني لكن أن أستمر على هدا الحال أمر متعب و الله
و في الدخول الجديد ظننت أنها تحسنت حتى رأيت ان الفتاة انقلبت و اكتئبت
بففف كيندير هده السنة راني باغية نقرا
أعطوني أراءكم من فضلكم لو كان راكم في بلاستي مع العلم منطيقش نفارقها خاطرش قراب بزاف لبعضنا؟؟؟؟؟؟ظ

[مراد سابقا6]

ليكيدي عليك

إذا كانت مريضة فلتعالج

هكذا ستضعين


ولا تلقوا بأيدكم للتهلكة

[amine60]

صديقتك هاذ انسانة سلبية ورايحة تأثر عليك بزااف خطراش التشاؤم و الاكتئاب ينتاقلوا كي العدوى انتي راكي بين قرايتك و صديقتك خيري وحدة منهم ولا شوفي طبيب نفسي لصديقتك بالاك تبرى

[نورسين.داية]

عزيزتي قارني بين دراستك و صديقتك ....أيهما أهم
لو كان الموضوع يخصني سوف انهيها ....مباشرة ............صداقة لا أجني منها أي مصلحة ................واش تنفعني أرمي عليك

[ولد حمد الباتني]

الصاحب ساحب ....

[زايدي أمحمد]

سبحان الله رأيت كل الردود مع احترامي لكم رأيت ردود ينم عن الانانية سامحوني اخواني
هاذي صديقتك فعليك ان تعرفي جوهر المشكلة وتحاولي حل مشكلة نهائيا بعد نقاش طويل
وان لم تفلح فعليك مصارحتها انك لا تطفين رؤيتها بهاذه الحالة لانك تحبيها وفي نفس الوقت انها تؤثر فيك
فعليك ان تفهميها ان اولوياتك حاليا الدراسة
فحسب ماقرأت أظن فتاة فقدت قريبا على قلبها لذا عليك وقوف بجانبها
واستنتاج الاخير حول هذه الفتاة انها ضعيفة الايمان فعليها ان تتقي الله

[loufa]

السلام عليكم
اذا كان سبب اكتئابها واضح حاولي معها اخر محاولة وفهميها مليح وانصحيها بالرقية
اما اذا سبب تافه ارمي عليك واتلهاي بدراستك الوقت يمر ولن تستطيعي استرجاع مايفوتك
بالتوفيق

[salem1985]

عاونيها بلاك سحر ولا مس ولا عندها مشاكل تقرا القران وتشوف ولازم تعرف السبب وهدي هي الصداقة لازم في السراء والضراء

[sarl02]

المشاركة الأصلية كتبت بواسطة نورسين.داية

عزيزتي قارني بين دراستك و صديقتك ....أيهما أهم
لو كان الموضوع يخصني سوف انهيها ....مباشرة ............صداقة لا أجني منها أي مصلحة ................واش تنفعني أرمي عليك

صار هكذا يا العرب...هذه راهي كيما اختها ..كون جات اختك ثاني اتليكيديها؟؟....والصداقة ولات عندك مصلحة وفايدة برك؟؟...نورمالمو تنصحيها اتقوليلها توقف معاها اتعاونها بلاك تتحسن ....ما اتكونيش هكذا يا المتصرفة ..الدنيا هذه ماشي غير مصالح.

[الجنة الجنة]

قرايتك تسحقيها اختي لا تستخفي بها اعتقد ان الدراسة اهم من صديقتك
الحل في نظري انك تاخذي بيدها وروحو راجعو انت واياها وجماعة تاع بنات جديات قوليلها شوفي هوما كيفاش راهم يقراو ولازم نديرو كيما هوما باش نتحصلو على نتائج مرضية، حاولي انك تخرجيها من الشي اللي راهي فيه
ربي يكون في عونك اختي

[امال مارية]

السلام عليكم. يا اختي ندكرك بحاجة الوقت راه غالي ادا شفتي عندك الوقت باش تنصحيها و تغيريها والا فابتعدي عنها وانقدي روحك اهلك يصرفو عليك وينتظروا نجاحك . انا من الناس اللي يحبوا التفاؤل وناس كي
هادو لو يزيدوني الدراهم ما نحبش حتى نشوفهم صدقيني اعلاش عليا في رحمة ربي ولاباس نولي نبكي. يخي حالة يخي ادا راهي مريضة تروح تداوي وادا ناقصة ايمان تتقرب من ربي . المؤمن لازم دايما متفائل باش يخدم دين و الوطن.

[lilaloulou]

سبحان الله انا تشوكيت من بعض الردود لي قولولها ليكيدي عليك و ارمي عليك مع ان صاحبة المشكلة قالت صديقتي المقربة يعني ماراهيش صحبة وخلاص ولا تع مصلحة راهي تعرفها من مدة طويلة اكيد و البعض يقولها ارمي عليك ماعندك ماديري بيها لوكان جي دوكا نفس هذه الصديقة تطرح مشكلتها وتقول انا نمر بظروف و اصبحت مكتئبة وصديقتي تخلات عني قع تقولولها هذي ماراهيش صديقة و ماشي حق عليها الخ ياخي حالة كاين عباد عندهم قلب اسود و وجهين في هذا المنتدى انا نظن حاولي تساعديها شوفي واش بيها انتي اتلهاي بقرايتك و فهميها بلي هذه الحالة ما لازمش تستمر ربما هي تمر بظروف صعبة ادت الى تشوش افكارها حاولي مساعدتها

[الوردة الذبلانة]

المشاركة الأصلية كتبت بواسطة نورسين.داية

عزيزتي قارني بين دراستك و صديقتك ....أيهما أهم
لو كان الموضوع يخصني سوف انهيها ....مباشرة ............صداقة لا أجني منها أي مصلحة ................واش تنفعني أرمي عليك

لا حول ولاقوة الا بالله العلي العظيم
لماذا ألسنا اخوة في الاسلام هاد الطفلة اكيد عندها ظروف ..كي تواسيها متجنيش منها صدقة متلا

لا لا يا اختنا ليس هكدا فـــــ لربما يأتي يوم وتنقاب الموازين وتنفعها الا صديقتها

يااخت صديقتك بحاجة اليك فــــــ لاتتركيها وبإمكانك ايجاد حل كأن تخبري اهلها او تقنعيها انو لاشيئ في الدنيا يستحق الحزن والاسى لاشيئ
تم اني لا أراى سببا كافيا مقنعا يجعلكي تتأترين الى هدا الحد
يعني صاحبتك حزينة وانت علاه كل هاد الاكتئاب تم مادخل الدراسة في صديقتك عذرا يا اخية لكن اقول رب عدر اقبح من دنب ؟؟

[ابوبكر17.00]

كان الله في عونك

[فارس وجواد]

صاحبيها و بدل من أن تسحبك إسحبيها أنت ,
و بدل من تؤثر عليك أثري أنت عليها .