قاطو سحري رائع بالطبقات روعة رح تشوفو السحر بعينيكم

[mayabella]

gateau magique
قاطو سحري أكثر من رائع
جربتو و عجبني بزاف و حبيت نوريلكم
درتو لبارح للسهرة و عجبهم كامل
هو عبارة عن خليط واحد و كي يطيب يولي عندك 3 طبقات
طبقة فلان ثم طبقة كريمة سائلة ممممم هايلة ثم طبقة بسكوي رائع رائع

المقادير:
4 بيضات
150 غ سكر
م ك ماء
125 غ زبدة ذايبة و باردة
70 غ فرينة
45 غ كاكاو أسود
قرصة ملح
500 مل حليب

الطريقة
تضربي 4 صفار بيض مع السكر و الماء بالباتور حتى تولي عندك رغوة بيضا شابة
ضيفي الزبدة الباردة بشوية وضربي
ثم الفرينة و الكاكاو و ضربي مليح
و أخيرا الحليب و ضربييييي
راح تتحصلي على خليط سائل

من جهة أخرى
ضربي 4 بياض البيض لي عندك مع قرصة ملح
طلعيه bien
en neige

و ضيفيه للخليط بشوية و خلطي بالسباتول باش ما يتكسرش
جيبي المول لي حبيتي أنا درت مدور العادي و دهنيه بالزبدة
و فرغي فيه الخليط

الفرن يكون سخون مسبقا
طيبيه في حرارة 150 درجة لازم
و لازم يطيب مدة 55 دقيقة بالتمام ما تحليش عليه حتى يجوزو 55 دقيقة لاااازم
كي تنحيه خليه يبرد مليح مليح قد ما تقدري مليح ساعة أو أكتر
اومبعد حطيه في الثلاجة يبرد مليح
في السهرة ذرذري عليه سكر قلاص
و قطعيه و قدميه
راح يعجبهم بزااااف
أنا درتو و طابلي ساعة قبل الافطار خليتو برد و بعد الفطور و بعد ما كملت الماعن باش درتو في الثلاجة
و كي جاو من التاراويح باش قسمتو
نتمنى تجربوه
هاذي بعض الصور
للأسف ما صورتش المراحل
أصلا مراحل سهلة جدا

أترككم مع الصور










هنا تقدرو تشوفو الطبقات



صح فطوركم