اقتراح.......حلويات العيد

[الجزائرية 2010]

لكن يا اختي كانو قواطو
كي تخدميهم وديريهم في الكونجيلاتور يرجعو يابسين

[tamimkougi]

الملتزمة بإذن الله,,,صدقيني اختي جزائرية أنا ما عمري ما كونجليت القاطو ,برك العام الماضي اول مرة درت كورني القطايف كونجليتهم بدون حشو,,,لكن انا نسمع بللي القاطو كيما الصابلي و البقلاوة معسلة و حلويات اخرى تقدري تكونجليهم و ما يصرالهم والو,,,والله المستعان

[ام ملاك و عبدو]

اختى الملتزمة بدين الله شكرا لكن ما قلتيليش القطايف عسلتيهم ولا لالا و المقروط نعسلو ولا لالا لخاطر عجوزتي قالتلي على المقروط ما نعسلوش حتى نجبدو واش رايك و شكرا مرة اخرى

[fifi tery]

المشاركة الأصلية كتبت بواسطة ** موحدة 02 **

قلوب الالماس عجبني بززززززززززززززززززززاف و معولة نديرو
لكن انت وش قصدتي نبداو الدورة من درك و نخبو الحلويات للعيد و اللا كيفاه ؟؟

انا ايضاااااااااا اعجبتني كثيراااااااااا

[سهيلة21]

السلام عليكم صح القاطو في اواخر رمضان يتعب وزيد يلهي على العبادة عجبتني فكرة نوجدو القاطو قبل انا نفضل نكملو قبل 20 رمضان ونكونجلوها هكا نتفرغو للعبادة في العشر الاواخر بالنسبة ليا انا عندي 2 اولاد الكبير عامين و 7 اشهر والتانية 8 اشهر في رمصان انا كي نوض صباح نوجد كلش نطيب ونوجد السلاطة نقطع الدلاع نوجد البوراك بصح العشية نطيبو تقريبا تبقا لي غير حاجة قليلة نديرها في العشية وزيد نغسل مواعيني ونقي كوزينتي نتلاقا بالضهر نصلي ونقرا القران بالنسبة للملابس بعد الافطار نغسل المواعين لي فطرنا فيهم نسيق وندير الماشينة نغسل الملابس كي نكمل نريح ونبدا التراويح اسمحولي طولت الحديث حبيت نشارككم بطريقتي ننصحكم طيبو الصباح اما بالنسبة للقاطو عجبني قاطو صابلي البيضة ونزيد بقلاوة ومقروط الشهدة عجبني تاني قاطو النسكافي للاخت فايزة 44
اللهم بلغنا رمضان لا فاقدين ولا مفقودين
اللهم بلغنا رمضان واعنا فيه على الصيام والفيام والقران
وفي الاخير حبيت نفيدكم بهادي المعلومات وصلتني من احد المواقع

[tamimkougi]

الملتزمة بإذن الله,,العفو أختي أم ملاك وعبدو أنا كونجليت القطايف بلا ما عسلتهم ,,أما المقروظ نعرف جارتي كي تخدم المقروظ تكونجليه بلا ما تعسلو..رب يوفقك

[بريق الدجى]

السلام علكم و رحمة الله و بركاته
مرحبا بكن جميعا
- لكل من تسأل على المقروض انا موالفة نكونجليه
كي يطيب نخليه يبرد شوية يعني تروحلو برك السخانة لي بزاف و نكونجليه بلا مانعسلو يبقى حتى 3 اشهر مايصرالو والو
لأني ماعنديش العايلة بزاف كنت في العيد الصغير ندير بلاطو تع الكوشة تع برا و كي يطيب نقسمو و نصف البلاطو نخبيه للعيد الكبير يبقى جديد
- البقلاوة تاني جربت نكونجليها و بقات جديدة
هذا عن تجربة

[ام ملاك و عبدو]

شكرا لكم جميعا انا راني نخمم ندير صابلي و قاطو بالشيكولا وواحد مايطيبش وقاطو بالطلية يعني من كل بستان زهرة ربي يدخلو علينا بالصحة و الهناء

[tamimkougi]

الملتزمة بإذن الله,,أخواتي رب يقدّرنا على صيام شهر رمضان إيمانا واحتسابا و يتقبل منا صالح الأعمال,,ومن بين هذه الأعمال ان شاء الله "الــصــدقــة " مثلا عندما نحضروا الحلويات بكميات بهزا ما ننساوش نذّوقوا الجيران و ندخلوا الفرح على الأطفال الأيتام وووو,,,خاصة اننا نحاولو نتقنوا حلوياتنا و نحّبوا تكون بأبهى حُلة إذا لازم نتصدقوا مما نحبوا ــــــــــــــ قصة وعبرة : كان سيدنا عمر بن الخطاب رضي الله عنه دائما يتصدق بـ"السكر" فلما سألوه لما تتصدق بالسكر بالذات ؟ قال: لانني أحبــه,,ألم تسمعوا قول الله تعالى :"لن تنالوا البر حتى تنفقوا مما تحبون " ـــــــــــــــــ والله المستعان

[ام مهدي 03]

السلام عليكم البنات هدا وين قدرت ندخل .النت هبلتنى هاذ ليام

[ام ملاك و عبدو]

صباح الخير على الجميع وين راكم يا الحراير وين راهم الحلويات اللي رايحين تديروهم ان شاء الله

[ام مهدي 03]

مساء الخير وين راكم يا لحراير. ولا بطلتو فى الفكرة

[ام مهدي 03]

هيا نبداو على البقلاوة الى متفقين عليها كامل
واش رايكم نحطو صور لانواع البقلاوة ونخيرو

[ام مهدي 03]

صباح الخير عليكم كامل
هيا اخوات حطونا افكار على البقلاوة .كل وحدة تقولنا على عجينتها وكيفاه ديرها

[tamimkougi]

الملتزمة بإذن الله,,السلام عليكم و أسعدالله صباحكم بكل خير اخواتي الكريمات..
ـــــــ دخول سريع و خروج أسرع ـــــــــــــ لظروف العمل ــــــــــــ
عجينة البقلاوة : أربع كيلات فرينة سيم ـ قرصة ملح ـ كيلة مش مليانة سمن ـ ماء زهر ======== لازم ترتاح العجينة
الحشو : بنوعين أو أكثر" لأن هذه وصفة بقلاوة الطبقات " ,,وكالعادة ثلاث كيلات حشو بكيلة مش مليانة سكر +قرفة +ماءزهر