ما لا تعلمه الزوجة العاملة

[أَحمــد]

المشاركة الأصلية كتبت بواسطة meriem-mimi

ههههـ..رأيي هو أن احتلال النساء لمجالات العمل ليس خطأهن بل هو خطأ الإدارة لي تخلي غير النساء يخدمو و الرجال لالا..
أنا ضد عمل المرأة في الجيش و الشرطة لأنها ما يقدر عليها غير الرجال
+كل واحد يشوف لزوجتو و أمو و أختو و ما يفرضش رأيو على هذا المنتدى من خلال شاشة الشعوب تمشي و تتقدم و نتوما ليل نهار تحكيو على عمل المرأة

لا للإستثناء ... إذا أردت المرأة الخروج والعمل والمساواة مع الرجل .... لازم تخدم عسكرية في الصحرا وتخدم بناءة وتعس في الليل وتخدم فيرايور وميكانيسيان وكل الأشغال الشاقة ... هذه هي المساواة ولا لا ...كي هي كي خوها الراجل الي حبت تكون كيما هو.

لا أريدها محتكرة للأعمال السهلة .... البيروات والاستقبال وهي بكل زينتها ...

ملاحظة: وين نشوف أي مكتب فيها نساء وبيناتهم راجل أو رجال إلا يتخلين عن العمل المطلوب منهن ويتسابقن إلا التزين والحديث أن ذاك الراجل وقيلا راني عاجباتوا والأخرى تقول لا لا أنا راني عاجباتوا وعطالي التيليفون انتاعوا ...... هذا واقع معاش ... وبطبيعة الحال ولكي لا نظلم الناس يوجد الاستثناء. ... أبهذا تمشي وتتطور الشعوب ...

**********
المرأة نريد لها الكرامة كما أراد لها الإسلام مربية ومدرسة للرجال الذين بهم تمشي وتتقدم الأمة

[fani09]

السلام عليكم ورحمة الله تعالي وبركاته

في الاول كنت مانحبش نشار ك في المواضيع هاذي
حتي من كثرة الجدل عليه وانا حسيتو اصلا ممكن عادي كاين اشياء اهم راها توقع في المجتع
مثلا كنقص الوازع الديني لدي المراة .تربية الدينية الصحيحة للمراة ;والرجل ايضا
كون تغيب تعرف روحك مخلي راجل وراك حتي لوكان في فرنسا وحدها في وسط الفتن
مشكلة حاستها نص ثقافة وعي ديني الحالة راها مخلطة الموضوع اكبر من ذلك هاذا الضاهر تاعو فقط

نرجعو للموضوع الاساسي المسالة مسالة قناعات قناعات كل واحد ربي يسرلو في حياة وكل واحد بقناعة والنية تاعو
ربي عالم شكون ليدخل الجنة او النار لتخدم او ماكثة في البيت ربي هو عالم مافي القلوب

انا ما نقدر نقولك شكون احسن وانت ما تقدر تقولي شكون احسن المسالة مسالة قناعات بنتي تخدم زوجة تخدم تقعد كل واحد وقناعة
والله المستعان علي فتن الدنيا داخل والبرة

شكرا علي احترام راي الاخر وكل واحد ربي يعيني وكل واحد نية تاعو ربي يهديني ويهدينا اجمعين الى ماهو احسن

[agro44]

الحق باين

بصح كاين الي ماهمش رجال ديوثين

انا غيار بزاف
منقدرش نخلي الزوجة انتاعي - ربي يرزقني بوحدة ذات دين و شوية جمال - مع الرجال
باش اجيبلي الدورو المعفون

والحمد لله كاين بزاف كيما انا

ونزيدكم

راكم فتنتونا برا

كي المتبرجة كي المحجبة

والله منسامحكم امام الله

[ichrak03]

حقا الرجال قوامون عن النساء
لكن اذا كانت الزوجة تعمل فهذا اكيد يكون بموافقة الزوج وبما انه موافق ...معناه هو راض عليها وهي غير مقصرة

السوال موجه للرجل العامل الان هل انت مقصر ام لا . لان الرجل يتحجج دائما بطبيعة الرجل لازم يكون يخدم .....علاه كي يكمل خدمتو

يكمل نهارو برا مع صحابو باش يتنفس شوي من تعب الخدمة وما يقضيش وقتو مع ولادو

[rahma nour]

عندي قناعة واحدة ان الرجل اذا ترك المراة تعمل وبموافقته فهو يريد الراتب و فقط نقطة النهاية

[chouchou.24]

صحيح الرجال قوامون على النساء لكن يا اخي وقتنا هذا صعب جدا فالمراة تعمل وزوجها كذلك ويقولون اننا غير مكفيين

[أم احمد3]

المراءة عاملة من زمان في الحقل في البساتين في الاعمال الشاقة في المزارع تجبد مثل الرجل زمان وليس هناك من يقول لها ابقي في المنزل وتلد من عشرة لاربعة عشر غير ربي لعالم بها
اليوم نفس الشي تساعد زووجهاا فقط

[رزان حياة]

معلبالي وعلاه راكم تعيو في رواحكم كل واحد لاهي بصوالحه.الخدامة مغادي تحبس الخدمة علبال رأيك والماكثة في البيت مغادي تمدلها دراهمك ادا احتاجة . معناه هدو دنيا وكل واحد يكون فيها كيما يحب.قادر هداك الي يقول محال نخلي مرتي تخدم تلقاه اكبر منافق. خلاص المثاليات راحت مع ناس بكري.

[fatehbougaa]

خلاصة القول الرجل مابقاش راجل و انثى ترجلت
علابيها راه صاري غير الكوارث
الله المستعان

[zawman123]

بسم الله الرحمان الرحيم، السلام عليكم ...

أنا شخصيا أجد هذا الموضوع جد حساس و خطير جدا، خـــــــــــــاصة في مجتمعنا ...
لا بأس إن كانت المرأة عاملة، لكن وااااااااحسرتاه على هذا الوقت الذي نعيش فيه ....... العمل أصبح حلما لن يتحقق لأي شاب، لماذا يا ترى؟ لأن المرأة احتلت جميع المناصب التي أستطيع أن أصنفها عادية من جهتها (كالتعليم مثلا و النمريض و الإدارة، ...) و الغير عادية التي تعتبر رجولية أكثر منها للمرأة ...
فهنا، أنا أجد بأن النظام هو الملام و المسؤول الوحيد، لا المرأة ... أنا لا أحبذ أن أرى امرأة في بذلة رجل شرطة وسط الطريق يعاكسها اللي رايح و اللي جاي، أو امرأة تلبس خوذة أمام حقل بترول أو غاز !!!!!!!!!!!!!!! والله العظيم اختلط علي الأمر ...

لذا، أتدخل، و أربط هذا الشئ ببساطة في جملة واحدة تشملنا جميـــــــعا !!!!!!!! التربية و الأخلاق، كلمتان ثقيلتان جدا علينا، لو طبقنا جزءا صغيرا منها نجحنا بإذن الله ...
و هنا أوجه رسالة صغيرة : يا امرأة، أولا ما راهوش محتم عليك تخدمي لأنو راجلك ولا باباك راهو يخدم عليك، ما تخافيش، ماعليش حتى و بغيتي تخدمي أنا من رأيي الشخصي ما كان حتى مشكل، اخدمي ربي إعاونك، بصح في حدود، ... الخدمة اللي تليق بيك و تساعدك، و تساعدنا كـــــــامل، ماشي خدمة و خلاص !!!!!!!! عيب و الله غير عيب ....
أما الرسالة اللي اقدمها للمسؤول عن العمل : انعل الشيطان و خلينا انشوفو رحمة ربي، راكم قتلتونا !!!!!!!!! في عمري 33 سنة و متخرج بشهادتين منذ عام 2004 و لحد الساعة راني بطال ... نخدم غير عند روحي و الشئ اللي كان راني اندير فيه، و راني صابر و الحمد لله، ... الخدمة اللي راح تمدها لطفلة بدون خبرة في الميدان، اعطيهالي ولا اعطيها لواحد كيما أنا، ...

و لوكان تتم الحالة كيما هاك، حنا الرجال اللي مازال ماراناش متزوجين، ما نعياو نستناو كاش امرأة هي اللي تجي تخطب فينا (هههههههههههههههههه مجرد مزحة، ربي إبعد هذا النهار علينا و عليكم و على كل المومنين) ...

على العموم، هذا موضوع يثير الجدل، لكن فقط الإنسان الحكيم هو وحده يستطيع التفهم و إيصال الرسالة، و ربي يهدينا و يهديكم إلى ما فيه خير للأمة المسلمة إن شاء الله ... و السلام عليكم و رحمة الله ...

[اسرار43]

نهار يولو الرجال رجال و يتحملو القوامة قلبا وقالبا ماشي مجرد ايه محفوضة عن دهر قلب هاذاك النهار تحكم لمرا دارها .

[ام محمد أدم]

لي يحب مرتو تقد فالدار يوفرلها سكن فردي و عيشة كريمة
اقول عيشة كريمة و لا اقول الرفاهية فقط عيشة كريـــــــــــــمة
الرجال فهاذ الوقت نساو مشكل المجتمع و عماو عينيهم و عقولهم على الضياع تاع الشباب و المراهقين و شغلهم الشاغل المراة لي قرات و تعلمت و خرجت تخم و تعاون راجلها ............................
ربي يهديكم .........................

[kamel76]

المشاركة الأصلية كتبت بواسطة غنية.نسمة

لي يحب مرتو تقد فالدار يوفرلها سكن فردي و عيشة كريمة
اقول عيشة كريمة و لا اقول الرفاهية فقط عيشة كريـــــــــــــمة
الرجال فهاذ الوقت نساو مشكل المجتمع و عماو عينيهم و عقولهم على الضياع تاع الشباب و المراهقين و شغلهم الشاغل المراة لي قرات و تعلمت و خرجت تخم و تعاون راجلها ............................
ربي يهديكم .........................

تخدم و تعاون راجلها مليح . لكن ليس على حساب حق الأسرة من أولاد و زوج و أمور البيت هذا من جهة من جهة أخرى إننا نرى في المؤسسات و الإدارات كيف يعامل الرجال "الزملاء" النساء "زميلاتهم" من تحرش و اختلاق الكلام للحديث معهن ، و رمقهم بنظرات شهوانية و هدا أقل شيء أتحدث عنه بالرغم من أن هاتة الزميلات محترمات و متحجبات و لا يتجاوزن حدودهن في الكلام و لا يجالسن الرجال في المكاتب ، إلا أن أغلب الرجال ذئاب بشرية إلا من رحم ربي ، و لهذا لا أظن أن هناك رجلا يغار على عرضه أن يسمح لرجل أجنبي عن زوجته أن ينظر إليها بتلك النظرات "هذا أقل شيء في حقها" .

و أنا أتفهم حاجة المجتمع للمرأة العاملة ، لكن يجب أن يكون في المجالات الخاصة بها و فقط و هي معروفة للجميع .

[nilly]

موضوع المراءة العاملة من 10 سنين ونحنا نتناقشو المراءة العاملة.
نعرف واحدة خرجتلها لالوتري وهي خفت تروح لمريكان وحدها املا خوها لقالها روحي. وكان يلح عليها تروح.
والحمد الله رحتن ومندمتش هادي مريكان اما فرنسا وكندا ضربوها كي طبل وهادي منهدروش عليها .

[LILA LAMIS]

السلام عليكم

يا اخوتي الكرام ان نسبة المراة العاملة في الجزائر لا تمثل الا 15 بالمائة اي ان الرجل يستحوذ على 85 بالمائة فهي لا تساويه ....و انما تحتل جزءا بسيطا جدا من كيان من المفروض ان يكون له وحده حسب ما يتخيله هذا الرجل الاناني الذي في اغلب الاحيان ليس كفءا ....
و على حد علمي و اريد ان اجيب من قال ان جداتنا و امهاتناوقرن في البيوت مكرمات يربين فقط الاولاد و كانهن ملكات .....اقول له انك مخطيء فاغلبهن كن يزرعن و يحصدن و منهن من تجلب الحطب و تقسمه لتشعل النار و كن يخرجن احيانا باكرا كي يسرحن بالغنم اي كن راعيات غنم ....و منهن من مهمتها توليد النساء و تذهب لبيت فلان و فلان لتساعد زوجته في وضع مولودها....اما الان و بتطور مستوى المعيشة اختلف معه نوعية العمل....

اما عن الاخ الذي قال ان المراة تعمل لتصنع صواريخ اقول انها كناية في غير محلها .....و من المفروض الرجل البطال الذي يملك اعلى الشهادات و الذي اختطفت المراة منصبه و هو في حاجة ماسة اليه عليه اذن ان يعصر مخه ليخرج من مازقه الذي لا يكون الا باختراع الصواريخ فهو فارغ الشغل بمعنى له وقت كااااااف جدا و يطبق مقولة""""" الحاجة ام الاختراع...اليس كذلك""""

ارى ان مجال البناء و الفلاحة يعانيان نقصا فادحا في اليد العاملة نتيجة هروب الشباب من هذين القطاعين حسب اخر الاحصاءات و السبب يكمن في ...؟؟؟؟؟
المهم الكلام في هذا الموضوع تجاوزه الدهر...و انصحكم ان تفكرو في اقتراح حلول كتحديد نسبة عمل المراة مثلا 5 بالمائة و فقط للاكثر كفاءة مثلا ....
و عدم السماح للمراة بالعمل في بعض القطاعات كالادارة و الاقتصاد و القطاع الامني....اي عملها في التعليم و الصحة مثلا



ومع كلهذا اطالب بالمساواة في الحصول على مناصب الشغل لسببين الاول نحن الاكثر عدادا ....و الثاني الاكثر كفاءة و تاهيلا.....ههههههه